English | Telugu
'జటాధర' ట్రైలర్.. సుధీర్ బాబు విశ్వరూపం!
Updated : Oct 17, 2025
సుధీర్ బాబు, సోనాక్షి సిన్హా ప్రధాన పాత్రలు పోషిస్తున్న చిత్రం 'జటాధర'. ఎస్ కే జీ ఎంటర్టైన్మెంట్ నిర్మిస్తున్న ఈ చిత్రానికి వెంకట్ కళ్యాణ్, అభిషేక్ జైస్వాల్ ద్వయం దర్శకత్వం వహిస్తున్నారు. తెలుగు, హిందీ భాషల్లో రూపొందుతోన్న ఈ సినిమా నవంబర్ 7న ప్రేక్షకుల ముందుకు రానుంది. తాజాగా ఈ చిత్ర ట్రైలర్ విడుదలైంది. (Jatadhara Trailer)
'జటాధర' ట్రైలర్ ను సూపర్ స్టార్ మహేష్ బాబు సోషల్ మీడియా వేదికగా విడుదల చేశారు. మూడు నిమిషాల నిడివితో రూపొందిన ఈ ట్రైలర్ ఆకట్టుకుంటోంది. గుప్తనిధుల అంశాన్ని ముడిపెడుతూ.. దైవ శక్తికి, పిశాచానికి మధ్య జరిగే పోరాటం నేపథ్యంలో ఈ చిత్ర కథ ఉంది. "పూర్వం ధనాన్ని భూమిలో దాచిపెట్టి.. మంత్రాలతో బంధనాలు వేసేవారు. ఆ బంధనాలలో అతి భయంకరమైనది పిశాచ బంధనం" అనే వాయిస్ తో ట్రైలర్ ఆసక్తికరంగా ప్రారంభమైంది. దెయ్యాలను నమ్మని ఘోస్ట్ హంటర్ గా సుధీర్ బాబు కనిపిస్తున్నాడు. లంకె బిందెలకు కాపలాగా ఉండే ధన పిశాచిగా సోనాక్షి సిన్హా కనిపిస్తోంది. దెయ్యాలను నమ్మని హీరో.. ధన పిశాచితో తలపడాల్సిన పరిస్థితి ఎందుకు వచ్చింది? శివుడి ఆశీస్సులతో హీరో ఎలా పోరాడాడు? అనే ఆసక్తిని కలిగిస్తూ ట్రైలర్ ను రూపొందించారు. ఇక ట్రైలర్ చివరిలో నేల మీద పడుకొని రక్తం తాగుతున్నట్టుగా సుధీర్ బాబు పాత్రని చూపించడం సర్ ప్రైజింగ్ ఉంది. మొత్తానికి ట్రైలర్ ఇంట్రెస్టింగ్ గానే ఉంది. విజువల్ గా కూడా బాగానే ఉంది.