ప్రస్తుతం వశిష్ట మల్లిడి దర్శకత్వంలో 'విశ్వంభర' చేస్తున్న మెగాస్టార్ చిరంజీవి.. తన తదుపరి సినిమాని అనిల్ రావిపూడి డైరెక్షన్ లో చేయనున్న సంగతి తెలిసిందే. అయితే వీఎఫ్ఎక్స్ వర్క్ కారణంగా 'విశ్వంభర' ఆలస్యమవుతోంది. మరోవైపు అనిల్ రావిపూడి ఈ సంక్రాంతికి వెంకటేష్ తో చేసిన 'సంక్రాంతికి వస్తున్నాం'తో రీజినల్ ఇండస్ట్రీ హిట్ అందుకున్నాడు. దాంతో చిరు-రావిపూడి ప్రాజెక్ట్ పై అందరిలో ఆసక్తి నెలకొంది. (Megastar Chiranjeevi)

 

చిరంజీవి, అనిల్ రావిపూడి కాంబో మూవీ షైన్ స్క్రీన్ బ్యానర్ లో రూపొందనుంది. ఈ ప్రాజెక్ట్ ను పక్కా ప్లానింగ్ తో వీలైనంత త్వరగా పూర్తి చేయాలని చూస్తున్నారు. ఈ సినిమా కోసం చిరంజీవి 90 రోజులు కేటాయించారట. మే నుంచి రెగ్యులర్ షూటింగ్ ప్రారంభం కానుందని తెలుస్తోంది. అక్టోబర్ నాటికి షూటింగ్ కంప్లీట్ చేయాలని టార్గెట్ గా పెట్టుకున్నట్లు సమాచారం. సినిమాని 2026 సంక్రాంతికి ప్రేక్షకుల ముందుకు తీసుకురావడానికి సన్నాహాలు చేస్తున్నారు. (Anil Ravipudi)

 

చిరు-రావిపూడి సినిమా కోసం అప్పుడే మ్యూజిక్ సిట్టింగ్స్ కూడా మొదలయ్యాయి. తనదైన మ్యూజిక్ తో 'సంక్రాంతికి వస్తున్నాం' విజయంలో కీలక పాత్ర పోషించిన భీమ్స్ సిసిరోలియో.. ఈ మూవీకి సంగీత దర్శకుడిగా వ్యవహరిస్తున్నాడు. ఇప్పటికే ఫోక్ టచ్ తో అదిరిపోయే ట్యూన్ ఒకటి భీమ్స్ సిద్ధం చేశాడట. ఫోక్ టచ్ తో ఉండే భీమ్స్ సాంగ్స్ ఏ రేంజ్ లో ఉంటాయో తెలిసిందే. భీమ్స్ మార్క్ ఫోక్ సాంగ్ కి చిరంజీవి స్టెప్పులేస్తే చూడటానికి రెండు కళ్ళు సరిపోవు అనడంలో సందేహం లేదు. చిరు కామెడీ టైమింగ్, డ్యాన్స్ నెక్స్ట్ లెవెల్ లో ఉంటాయి. ఆ రెండూ రావిపూడి మూవీలో చూడబోతున్నాం. మొత్తానికి వచ్చే సంక్రాంతికి మెగా ఫ్యాన్స్ కి ట్రీట్ అని చెప్పవచ్చు.