TeluguOne Services
Copyright © 2000 - , TeluguOne Sahityam - All rights reserved.
పండగ
- శారదా అశోకవర్ధన్
ఉగాదినా మరేదైనా
కొత్త అనేది రోజులో లేదు
సంవత్సరంలో లేదు-
సూర్యుడు కొత్త రంగు పులుముకొస్తాడా
గాలి కొత్త వాసనలు చిమ్ముకొస్తుందా
అవే పూలు అవే కాయలు
అవే రుచులు అవే గతులు
మనిషి కోరుకునే కొత్తదనానికి
ముద్దు పేరు - పండగ!
రొటీన్ జీవితం బోరుకొట్టక
బయట పడే మార్గం - పండగ
తనకు తానే నియమ నిబంధనల హర్మ్యాన్ని
నిర్మించుకోవడానికి దోహదం - పండగ
స్నేహ సంపదను పంచుకోవడానికి
పదిలంగా పెంచుకున్న నిండిన 'పాదు'-పండగ
మానవత్వం పాలు పంచుకోవడానికి
'పొదుగు'-పండగ
నూతనత్వం గుండెనిండా
అడుగడుగునా నింపుకుంటూ
కష్టసుఖాలను సమంగా ఎంచుకుంటూ
సాగిపోయే బాటసారికి
ప్రతినిత్యం పండగే -
మనిషిగా జీవించడమే
మనకు అసలైన పండగ