Facebook Twitter
తరువులే తరముల వరములు

తరువులే తరముల వరములు

 


ఊపిరి పోసే తరువుల 
ఊపిరి ఆగిపోతే
పుడమిని కాచే అడవుల 
జాడలు కాలిపోతే
చినుకు కనుమరుగైతే
సేద్యం సతికిలపడితే
కరువు సాధ్యం
మనుగడ అసాధ్యం

నాగరికత సాకుతో
స్వేదపు మాట అంటకుండా
సౌధపు బాటలో గెంతుకుంటూ
జీవనాన్ని సాగిస్తున్నాం

మితిమీరిన కాలుష్యంతో
కాలాలు మారిపోయాయి
ఋతువులు గతులు తప్పాయి
తరువులు బదులు చెప్పాయి
తరుగుచున్నది తరువుల ఊపిరి కాదు
తరముల ఊపిరి అని..

తరువుల మాటను తలపున నాటుకుని
వెనకటి తరాల వారు అందించిన ఊపిరిని
ముందరి తరాల వారికి వరాలుగా అందిద్దాం

 


రచన : వెంకు సనాతని