భారతదేశంలో డిజిటల్ విప్లవానికి మారుపేరుగా నిలిచింది యూనిఫైడ్ పేమెంట్ ఇంటర్‌ఫేస్ (UPI). 2016 ఏప్రిల్ 11న నేషనల్ పేమెంట్ కార్పొరేషన్ ఆఫ్ ఇండియా (NPCI) ఈ అద్భుతమైన సాంకేతికతను అందుబాటులోకి తెచ్చింది. ప్రారంభంలో దీని వాడకం కొంత నెమ్మదిగా సాగినప్పటికీ, పెద్ద నోట్ల రద్దు తర్వాత దేశంలో డిజిటల్ చెల్లింపుల ముఖచిత్రమే మారిపోయింది. ఫోన్ పే, గూగుల్ పే, పేటీఎం, అమెజాన్ పే వంటి మొబైల్ యాప్‌ల రాకతో యూపీఐ ప్రతి ఒక్కరి జీవితంలో ఒక భాగమైపోయింది. నేడు వీధి చివర ఉండే చిన్న కిరాణా కొట్టు నుంచి నగరాల్లోని పెద్ద పెద్ద షాపింగ్ మాల్స్ వరకు అంతా యూపీఐ మయంగా మారింది. కేవలం ఐదు రూపాయల చాక్లెట్ కొన్నా సరే, జేబులోంచి ఫోన్ తీసి క్యూఆర్ కోడ్ స్కాన్ చేయడం మనకు అలవాటుగా మారింది. దీనికి ప్రధాన కారణం ఈ సేవలపై ఎలాంటి అదనపు ఛార్జీలు లేకపోవడమే.

అయితే ఇప్పుడు ఈ ఉచిత సేవలకు సంబంధించి కేంద్ర ప్రభుత్వం ఒక కీలకమైన నిర్ణయం తీసుకునే దిశగా అడుగులు వేస్తోంది. పెద్ద వ్యాపార సముదాయాల్లో జరిగే యూపీఐ లావాదేవీలపై మర్చంట్ డిస్కౌంట్ రేట్ (MDR) విధించే ప్రతిపాదనను కేంద్ర ఆర్థిక శాఖ తీవ్రంగా పరిశీలిస్తున్నట్లు జాతీయ మీడియాలో కథనాలు వస్తున్నాయి. దీనిపై రాబోయే 15 రోజుల్లోనే ప్రభుత్వం నుంచి ఒక స్పష్టమైన ప్రకటన వచ్చే అవకాశం ఉందని నిపుణులు అంచనా వేస్తున్నారు. అయితే ఈ కొత్త నిబంధనల వల్ల సాధారణ ప్రజలు భయపడాల్సిన అవసరం లేదని సమాచారం. ఎందుకంటే, తాజా ప్రతిపాదనల ప్రకారం కేవలం రూ.2,000 దాటిన పెద్ద లావాదేవీలపై మాత్రమే ఈ ఎండీఆర్ ఛార్జీలను వర్తింపజేయాలని ప్రభుత్వం యోచిస్తోంది.

ఈ ఎండీఆర్ ఛార్జీల శాతం కూడా చాలా స్వల్పంగా, అంటే గరిష్టంగా 0.5 శాతం కంటే తక్కువగానే ఉండేలా నిబంధనలు రూపొందిస్తున్నట్లు తెలుస్తోంది. అన్నింటికంటే ముఖ్యమైన విషయం ఏమిటంటే, ఈ అదనపు బాదుడు నేరుగా వినియోగదారులపై పడదు. కేవలం పెద్ద వ్యాపార సంస్థలు మరియు మర్చంట్ల నుంచి మాత్రమే ఈ రుసుమును వసూలు చేయాలనేది ప్రభుత్వ ప్రధాన ఆలోచన. అందువల్ల సాధారణ ప్రజలు తమ రోజువారీ చిన్న చిన్న డిజిటల్ చెల్లింపుల కోసం అదనపు డబ్బులు చెల్లించాల్సిన పని లేదు. ప్రస్తుతం దేశంలో అమలవుతున్న 'జీరో ఎండీఆర్' విధానం వల్ల బ్యాంకులు, పేమెంట్ సర్వీస్ ప్రొవైడర్లు తీవ్రమైన మౌలిక సదుపాయాల నిర్వహణ ఖర్చులను భరిస్తున్నారు. యూపీఐ వాడకం రోజురోజుకూ రాకెట్ వేగంతో దూసుకుపోతుండటంతో సర్వర్ల నిర్వహణ, సైబర్ భద్రత, సాంకేతిక అభివృద్ధి వ్యయం భారీగా పెరిగిపోతోంది. ఈ వ్యవస్థ సుదీర్ఘ కాలం పాటు స్థిరంగా కొనసాగాలంటే ఆదాయ వనరు తప్పనిసరి అని పార్లమెంట్ స్థాయి ఆర్థిక సంఘం కూడా స్పష్టం చేసింది.

google pay phonepe charges alert,upi payments tax update,central government upi charges.