తెలంగాణ క్రికెట్ ప్రపంచంలో ఒక్కసారిగా తీవ్ర కలకలం రేగింది. భారత క్రికెట్ నియంత్రణ మండలి (బీసీసీఐ) నుంచి ఎలాంటి అధికారిక అనుమతులు లేకుండా నిర్వహించ తలపెట్టిన "టీజీ20 లీగ్" (TG20 League) ఇప్పుడు తీవ్ర వివాదాలకు కేంద్రబిందువుగా మారింది. ఈ అక్రమ లీగ్‌ను ప్రోత్సహిస్తున్నారనే బలమైన ఆరోపణలతో టీమిండియా స్టార్ క్రికెటర్లు మహ్మద్ సిరాజ్, తిలక్ వర్మలతో పాటు పలువురు టాలీవుడ్ ప్రముఖులకు తెలంగాణ క్రికెట్ అసోసియేషన్ (టిసిఎ) షాకిస్తూ లీగల్ నోటీసులు జారీ చేసింది. హైదరాబాద్ క్రికెట్ అసోసియేషన్ (హెచ్‌సీఏ) ఆధ్వర్యంలో జరగాల్సిన ఈ టోర్నమెంట్‌ చుట్టూ ఇప్పడు అనేక అనుమానాలు, చట్టపరమైన చిక్కులు ముసురుకున్నాయి. కేవలం క్రికెటర్లే కాకుండా, మాజీ ఆటగాడు అంబటి రాయుడు, టాలీవుడ్ స్టార్ హీరోలు విక్టరీ వెంకటేష్, రౌడీ బాయ్ విజయ్ దేవరకొండ కూడా ఈ నోటీసులు అందుకున్న వారి జాబితాలో ఉండటం తెలుగు రాష్ట్రాల్లో పెను సంచలనంగా మారింది. లీగ్ చట్టబద్ధతపై పూర్తి సమాచారం లేకుండా సెలబ్రిటీలను వాడుకుంటూ ప్రజలను, క్రికెట్ అభిమానులను తప్పుదోవ పట్టిస్తున్నారనే ఆరోపణలు వెల్లువెత్తుతున్నాయి.

ఈ మొత్తం వ్యవహారంపై తెలంగాణ క్రికెట్ అసోసియేషన్ జనరల్ సెక్రటరీ గురవారెడ్డి మీడియా ముందుకు వచ్చి సంచలన విషయాలను వెల్లడించారు. బీసీసీఐ నిబంధనల ప్రకారం రాష్ట్ర స్థాయి ఫ్రాంచైజీ లీగ్‌ను నిర్వహించాలంటే కచ్చితంగా ఒక ప్రత్యేక గవర్నింగ్ కౌన్సిల్ ఏర్పాటు చేయాల్సి ఉంటుందని ఆయన స్పష్టం చేశారు. అంతేకాకుండా ఆ లీగ్ ఛైర్మన్‌ను అసోసియేషన్ సాధారణ సభ (General Body Meeting) ద్వారా ప్రజాస్వామ్యబద్ధంగా ఎన్నుకోవాల్సి ఉంటుంది. కానీ ప్రస్తుత టీజీ20 లీగ్ నిర్వహణలో ఇలాంటి ఎలాంటి కనీస చట్టపరమైన ప్రక్రియలను, పారదర్శక నిబంధనలను పాటించలేదని టీసీఏ తీవ్రంగా ఆక్షేపించింది. గతంలోనూ ఇదే లీగ్ అనేకసార్లు పేర్లు మార్చుకుంటూ వచ్చిందని, మొదట తెలంగాణ ప్రీమియర్ లీగ్ (టీపీఎల్) గా, ఆ తర్వాత టీటీఎల్ గా, ఆపై టీజీ20 ప్రీమియర్ లీగ్ గా రూపాంతరం చెందిందని టిసిఎ ఆధారాలతో సహా బయటపెట్టింది. నిబంధనలకు విరుద్ధంగా సాగుతున్న ఈ ప్రైవేట్ టోర్నీని అడ్డం పెట్టుకుని అమాయక వాటాదారులను, క్రికెట్ అభిమానులను మోసం చేసేందుకు పెద్ద ఎత్తున ప్రయత్నాలు జరుగుతున్నాయని గురవారెడ్డి ఆరోపించారు.