ఆంధ్రప్రదేశ్‌లో కరోనా కలకలం సృష్టిస్తోంది. ఈ మహమ్మారి వేగంగా వ్యాప్తి చెందుతూ మరో సారి కరోనా ఇసోలేషన్ లు, క్వారంటైన్ ల భయాన్ని తీసుకువస్తున్నది. ఇప్పుడు ఏపీలో వ్యాప్తి చెందుతున్న మహమ్మారి కరోనా కొత్త వేరియంట్ గా నిర్థారించారు.   ఇటీవల కడప జిల్లాతో పాటు గుంటూరు పరిసర ప్రాంతాల్లో కోవిడ్ సోకిన బాధితుల నుంచి సేకరించిన  బాధితుల నమూనాలను పూణేలోని  నేషనల్ ఇన్స్టిట్యూట్ ఆఫ్ వైరాలజీ, ఎన్ఐవీ పరిశోధన కేంద్రంలో  నిర్వహించిన అధునాతన జీనోమ్ సీక్వెన్సింగ్ విశ్లేషణలో బాధితులకు  ఒమిక్రాన్ ఆర్‌ఎఫ్.5   అనే నూతన వేరియంట్ సోకినట్లు శాస్త్రీయంగా నిర్ధారణ అయింది. గతంలో కరోనా మహమ్మారి సృష్టించిన వినాశనం, తీవ్ర భయాందోళనలు ప్రజల మనస్సుల్లో ఇంకా సజీవంగానే ఉండటంతో ఇప్పుడు కరోనా కొత్త వేరియంట్ వ్యాప్తి తీవ్ర ఆందోళనకు కారణమవుతోంది.. అయితే రాష్ట్ర ఆరోగ్య శాఖ ఈ కొత్త కరోనా వేరియంట్ పెద్ద ప్రమాదకరమనది కాదని స్పష్టం చేసింది.  

రాష్ట్రంలో కొత్త వేరియంట్ ఉనికి అధికారికంగా వెలుగుచూసిన వెంటనే ఆంధ్రప్రదేశ్ ప్రభుత్వం అప్రమత్తమైంది. బాధితుల నమూనాల ఫలితాల నివేదిక అందగానే రాష్ట్ర వైద్యారోగ్య శాఖ మంత్రి సత్యకుమార్ యాదవ్ ఉన్నతాధికారులతో   సమీక్ష నిర్వహించారు.  వర్చువల్ సమావేశాల ద్వారా వైద్యాధికారులతో మాట్లాడిన మంత్రి, రాష్ట్రవ్యాప్తంగా ఇన్ఫెక్షన్ల నమోదు వేగం, ప్రస్తుతం ప్రభుత్వ,  ప్రైవేట్ ఆసుపత్రులలో అందుబాటులో ఉన్న వైద్య పరికరాలు, ఆక్సిజన్ నిల్వలు,  ముందస్తు జాగ్రత్త చర్యలపై సమగ్ర నివేదిక తీసుకున్నారు.  

 ప్రస్తుతం రాష్ట్రంలో వెలుగు చూసిన ఆర్‌ఎఫ్.5 వేరియంట్ ప్రమాదకరమైనది కాదని వైద్యులు చెబుతున్నారు. చిన్న పిల్లలు, వృద్ధులు, దీర్ఘకాలంగా ఆరోగ్య సమస్యలు ఎదుర్కొంటున్న వారు జాగ్రత్తగా ఉండాలని చెబుతున్నారు. ఇది  సాధారణ సీజనల్ కొవిడ్ ఇన్ఫెక్షన్ తెచ్చే వేరియంట్‌ అని చెబుతున్నారు. కోవిడ్ సోకిన వారిలో  తీవ్రమైన గొంతు నొప్పి, పొడి దగ్గు,   జ్వరం, తలనొప్పి, జలుబు, అలసట ఉంటాయనీ, అలాగే..   కండరాల నొప్పులు కూడా ఉంటాయని వైద్యులు తెలిపారు. 

Covid New Variant RF5,  Omicron Sub Variant AP, Kadapa Covid Samples,  Pune NIV, Health Minister Satya Kumar Yadav Review