భారతీయ స్టాక్ మార్కెట్ నియామక సంస్థ సెబీ (SEBI) తీసుకున్న సంచలన నిర్ణయాన్ని దేశ అత్యున్నత న్యాయస్థానం సుప్రీం కోర్టు సమర్థించింది. కోటక్ మహీంద్రా అసెట్ మేనేజ్‌మెంట్ కంపెనీ (AMC), కోటక్ మహీంద్రా ట్రస్టీ కంపెనీతో పాటు ఆ సంస్థ మేనేజింగ్ డైరెక్టర్ నిలేష్ షా, మరో ఐదుగురు ఉన్నతాధికారులపై సెబీ విధించిన రూ. 2.1 కోట్ల భారీ జరిమానాను సుప్రీం కోర్టు ఖరారు చేసింది. జస్టిస్ దీపాంకర్ దత్తా, జస్టిస్ సతీష్ చంద్ర శర్మలతో కూడిన ధర్మాసనం ఈ అప్పీళ్లను కొట్టివేస్తూ, మ్యూచువల్ ఫండ్ పరిశ్రమకు ఒక బలమైన హెచ్చరికను జారీ చేసింది. లాభాలు రావడం ముఖ్యం కాదు, నిబంధనలను పాటించడమే అన్నింటికంటే ముఖ్యం అని కోర్టు స్పష్టం చేసింది.

ఈ కేసు పూర్వాపరాల్లోకి వెళితే, కోటక్ మ్యూచువల్ ఫండ్ గతంలో ఎస్సెల్ గ్రూప్ (Essel Group) పరిధిలోని కాంటి ఇన్‌ఫ్రాపవర్, ఎడిసన్ యుటిలిటీ వర్క్స్ వంటి సంస్థలు జారీ చేసిన జీరో-కూపన్ నాన్-కన్వర్టిబుల్ డిబెంచర్లలో (NCDs) ఏకంగా రూ. 266 కోట్ల పెట్టుబడులు పెట్టింది. అయితే, 2019 ప్రారంభంలో జీ ఎంటర్‌టైన్‌మెంట్ షేర్ల విలువ భారీగా పడిపోవడంతో ఈ పెట్టుబడులు చిక్కుల్లో పడ్డాయి. ఆ సమయంలో పెట్టుబడిదారుల ప్రయోజనాలను పక్కనపెట్టి, నిబంధనలను ఉల్లంఘించారనే ఆరోపణలపై సెబీ విచారణ చేపట్టి కోటక్ ఏఎంసీ, దాని అధికారులపై చర్యలు తీసుకుంది.

ఈ వివాదంపై విచారణ జరిపిన సుప్రీం కోర్టు, మార్కెట్ సమగ్రత మరియు నిబంధనల అమలుకు అత్యున్నత ప్రాధాన్యత ఇవ్వాలని పేర్కొంది. నిబంధనలను ఉల్లంఘిస్తూ పెట్టుబడిదారులకు లాభాలు తెచ్చిపెట్టినా సరే, అది చెల్లుబాటు కాదని స్పష్టం చేసింది. ఈ క్రమంలోనే కోటక్ ఏఎంసీ పై రూ. 50 లక్షలు, ట్రస్టీ కంపెనీతో సహా ఆరుగురు ఎగ్జిక్యూటివ్‌లపై రూ. 1.6 కోట్లు (నిలేష్ షా పై రూ. 30 లక్షలు) జరిమానాను కోర్టు సమర్థించింది. దీంతో పాటు లిటిగేషన్ ఖర్చుల కింద కోటక్ ఏఎంసీకి రూ. 30 లక్షలు, కోటక్ ట్రస్టీ కంపెనీకి రూ. 20 లక్షల అదనపు భారాన్ని విధించింది.

nilesh shah kotak mutual fund fine,supreme court upholds sebi penalty kotak.