మన దేశంలో కుటుంబ ఆస్తులు, వారసత్వ హక్కుల గురించి నిత్యం అనేక వివాదాలు తలెత్తుతూనే ఉంటాయి. "తాత ముత్తాతల కాలం నాటి ఆస్తి కాబట్టి పుట్టుకతోనే నాకు అందులో వాటా వస్తుంది" అని భావించే వారి సంఖ్య సమాజంలో చాలా ఎక్కువ. అయితే, తండ్రి తన తండ్రి నుంచి వారసత్వంగా పొందిన ప్రతి ఆస్తిలోనూ పిల్లలకు పుట్టుకతోనే హక్కు వచ్చేస్తుందా? ఈ అత్యంత కీలకమైన ప్రశ్నకు కర్ణాటక హైకోర్టు ఇచ్చిన ఒక సంచలనాత్మక తీర్పు స్పష్టమైన సమాధానాన్ని అందించింది. తండ్రికి తన తండ్రి ద్వారా లభించినంత మాత్రాన అది తన స్వయంకార్జిత ఆస్తి స్వభావాన్ని కోల్పోయి, ఆటోమేటిక్‌గా పిత్రార్జిత ఆస్తిగా మారిపోదని న్యాయస్థానం తేల్చిచెప్పింది. కాబట్టి అలాంటి ఆస్తులలో పిల్లలకు పుట్టుకతో ఎలాంటి వాటా లేదా హక్కు లభించదని న్యాయమూర్తులు స్పష్టంచేశారు.

ఈ వివాదానికి సంబంధించి 'శ్రీమతి ఉషా ఎన్. స్వామి వర్సెస్ శ్రీ ఎం. వెంకటస్వామి అండ్ అదర్స్' కేసులో కర్ణాటక హైకోర్టుకు చెందిన జస్టిస్ డి.కె. సింగ్ మరియు జస్టిస్ టి.ఎమ్. నాదఫ్ లతో కూడిన ధర్మాసనం అత్యంత ప్రాధాన్యత కలిగిన తీర్పును వెలువరించింది. ఈ కేసులో ఉషా ఎన్. స్వామి అనే మహిళ తన తాతగారి ఆస్తులలో తనకు సమాన వాటా కావాలని కోరుతూ కోర్టును ఆశ్రయించారు. తన తాతగారి మరణానంతరం సదరు ఆస్తులు తన తండ్రికి దక్కాయని, కాబట్టి అవి తమ కుటుంబ పిత్రార్జిత ఆస్తుల కిందకే వస్తాయని, సహ దాయాదిగా (Coparcener) తనకు అందులో పుట్టుకతోనే భాగస్వామ్యం ఉందంటూ ఆమె వాదించారు. అయితే ఈ పిటిషన్‌ను సమగ్రంగా విచారించిన హైకోర్టు ధర్మాసనం, ఆమె అభ్యర్థనను తోసిపుచ్చింది.

ఈ తీర్పులో హైకోర్టు కొన్ని ప్రాథమిక చట్టపరమైన సూత్రాలను విశదీకరించింది. ఒక వ్యక్తి తన స్వంత సంపాదనతో లేదా కష్టంతో సంపాదించుకున్న ఆస్తిని 'స్వయంకార్జిత ఆస్తి' (Self-Acquired Property) అని పిలుస్తారు. సదరు వ్యక్తి మరణించిన తర్వాత ఆ ఆస్తి అతడి కుమారుడికి సంక్రమించినప్పటికీ, అది అతడి కుమారుడికి ప్రత్యేకమైన లేదా సొంత ఆస్తిగానే మిగిలిపోతుంది గానీ, తర్వాతి తరం పిల్లలకు పిత్రార్జిత ఆస్తిగా మారదు. కేవలం ఒక ఆస్తి ఒక తరం నుండి మరొక తరానికి బదిలీ అయినంత మాత్రాన దానికి పిత్రార్జిత హోదా రాదని న్యాయస్థానం స్పష్టం చేసింది. ఈ కేసులో సదరు ఆస్తులను మొదట తాతగారే సొంతంగా కొనుగోలు చేశారు. కాబట్టి అవి ఆయన స్వయంకార్జిత ఆస్తులు. ఆ తర్వాత ఫ్యామిలీ అరేంజ్మెంట్ లేదా పంపిణీ ద్వారా తండ్రికి ప్రత్యేకంగా దక్కడం వల్ల, అవి తండ్రి యొక్క ప్రత్యేక ఆస్తిగానే కొనసాగుతాయి తప్ప పిల్లలకు పుట్టుకతో హక్కును కల్పించవు.

can children claim share in father inherited property,ancestral vs self acquired property court verdict.