సినీ పరిశ్రమలో మంచి మనిషిగా, వివాదరహితుడిగా పేరొందిన రజనీకాంత్  ఎన్టీఆర్ శత జయంతి వేడుకల సందర్భంగా ఓ కార్యక్రమంలో మాజీ సీఎం, తెలుగుదేశం అధినేత చంద్రబాబునాయుడిని ప్రశంసించడంపై వైసీపీ నేతలు ఇష్టారీతిగా నోరు పారేసుకోవడంపై సర్వత్రా ఆగ్రహం వ్యక్తం అవుతోంది. అన్ని వర్గాల నుంచీ విమర్శలు వెల్లువెత్తుతున్నాయి. అయితే తెలుగు సినీ పరిశ్రమ మాత్రం ఆశ్చర్యకరంగా మౌనం దాల్చింది. ఏపీలో జగన్ పాలనలో  తన మనసులోని మాటను బయటకు  చెప్పుకుంటే కూడా సహించలేని వాతావరణం ఉందనడానికి చంద్రబాబు గురించి రెండు మంచి మాటలు చెప్పిన రజనీకాంత్ పై వైసీపీ నేతలు నోరుపారేసుకుంటున్న తీరే నిదర్శనమని పరిశీలకులు సైతం విశ్లేషిస్తున్నారు. వైసీపీ నేతల తిట్ల వర్షం రజనీకాంత్ చంద్రబాబును పొగిడినందుకు కాదనీ, తమ అధినేత దృష్టిలో పడటానికేనని కూడా కొందరు అంటున్నారు. అది పక్కన పెడితే.. రజనీకాంత్ పై వైసీపీ నేతలు విమర్శలతో సరిపుచ్చలేదు. ఆయన వ్యక్తిత్వ హననానికీ, ఆయనపై తిట్ల వర్షానికీ కూడా తెగబడుతున్నారు.

తెలుగు చలన చిత్ర పరిశ్రమ నుంచి జగపతి బాబు మినహా ఒక్కడంటే ఒక్కడు.. ఆయనతో స్నేహం ఉన్నవారు, కలిసి నటించిన వారు ఎవరూ కూడా రజనీకాంత్ పై వైసీపీ నేతల తిట్ల పురాణాన్ని ఖండించిన పాపాన పోలేదు. మేమంతా  ఒకటే మాది కళాకారుల కుటుంబం.. మాలో మాకు లక్ష విభేదాలున్నా.. మాజోలికి ఎవరైనా వస్తే మేమందరం ఒక్కటే అంటూ డైలాగులు చెప్పే హీరోలు ఇప్పుడు రజనీకాంత్ పై బూతుల పంచాగం విప్పిన వైసీపీ నేతల వ్యాఖ్యలను, విమర్శలను ఖండిస్తూ ఒక్కటంటే ఒక్క మాట కూడా మాట్లాడకపోవడం ఆశ్చర్యం. అన్నిటికీ మంచి రజనీకాంత్ తన ప్రాణ మిత్రుడంటూ వేదికలపై సైతం వాడు వీడు అంటూ తన చనువును ప్రదర్శించే మోహన్ బాబు సైతం.. తన ప్రాణ మిత్రుడిని సొంత పార్టీ నేతలే ఇష్టారీతిన నోరు పారేసుకుంటుంటే కిమ్మనకపోవడం ఆశ్చర్యకరం. ఆయన తరచూ చెప్పుకునేలా ఆయన ముక్కుసూటి తనం కేవలం మాటలకే పరిమితమా అన్న అనుమానాలు వ్యక్తమౌతున్నాయి.  

అలీ, పోసాని, రోజా వంటి నటులు మాట్లాడలేదంటే అర్ధం చేసుకోవచ్చు. రోజాకు ముఖ్యమంత్రి జగన్ మంత్రివర్గపునర్వ్యవస్థీకరణ సందర్భంగా ఆమె జీవితాశయమైన మంత్రి పదవిని కట్టబెట్టారు. ఇక అలీ, పోసానిలకు అయితే మూడున్నరేళ్లు వెయిటింగ్ లో పెట్టినా ఏదో ఒక పదవి ఇచ్చారు. మరి అటువంటి వాళ్లు రజనీపై తమ పార్టీ నేతల దూషణలను ఎలా ఖండించగలరు? మంత్రి రోజా అయితే ఒక అడుగు ముందుకు వేసి తమ పార్టీ నేతలతో కలిసి రజనీకాంత్ పై విమర్శలు  గుప్పించారు. ఈ మొత్తం ఎపిసోడ్ లో పార్టీలతో సంబంధం లేని సినీ పరిశ్రమ ప్రముఖులు కూడా రజనీకాంత్ కు మద్దతుగా నిలవకపోవడాన్ని అందరూ ఎత్తి చూపుతున్నారు.

రజనీకి మద్దతుగా నోరెత్తితే.. జగన్మాయ తమ కెరీర్ పై ప్రభావం చూపుతుందన్న భయమే కారణమా అంటున్నారు. ఇక అన్నిటికీ మించి రజనీకాంత్ ను సొంత పార్టీ నేతలు దుర్బాషలాడుతుంటే కనీసం వారించడానికి కూడా మోహన్ బాబుకు నోరు రాకపోవడంపై కూడా విమర్శలు వెల్లువెత్తుతున్నాయి.