బీఆర్ఎస్ పార్టీ ఎమ్మెల్యే పాడి కౌశిక్ రెడ్డి చేష్టలు మరీ వింతగా వున్నాయి. శేరిలింగంపల్లి ఎమ్మెల్యే ఆరికెపూడి గాంధీ బీఆర్ఎస్ నుంచి కాంగ్రెస్‌లోకి మారడం, పీఏసీ ఛైర్మన్‌గా ఎన్నికవడం నేపథ్యంలో బీఆర్ఎస్ ఎమ్మెల్యే పాడి కౌశిక్‌రెడ్డి ఆరికెపూడి గాంధీ మీద విమర్శలు చేశారు. దాంతో ఆయన పాడి కౌశిక్‌రెడ్డి ఇంటి దగ్గరకి వెళ్ళి వివాదం సృష్టించారు. పాడి కౌశిక్‌రెడ్డి కూడా నేను మాత్రం తక్కువా అన్నట్టు గాంధీ ఆంధ్రుడు అని, ఎక్కడి నుంచి బతకడానికి వచ్చాడని వ్యాఖ్యానించారు. చినికి చినికి గాలివానలా మారుతున్న ఈ వివాదం హత్యాయత్నం కేసు వరకు వెళ్ళింది. ఆరికెపూడి గాంధీ తన ఇంటికి వచ్చి తన మీద హత్యాయత్నం చేశారని పాడి కౌశిక్‌రెడ్డి హైదరాబాద్‌లోని గచ్చిబౌలి పోలీస్ స్టేషన్లో ఫిర్యాదు చేశారు. కౌశిక్ రెడ్డి ఇంటికి గాంధీ వెళ్ళిన వ్యవహారంలో ‘హత్యాయత్నం’ లాంటి పెద్ద సీన్ ఏమీ లేకపోయినా గచ్చిబౌలి పోలీసులు గాంధీ మీద హత్యాయత్నం కేసు నమోదు చేశారు.