ప్రముఖ టెక్ దిగ్గజం ఆపిల్ తన వినియోగదారులకు భారీ షాక్ ఇచ్చింది. ఆస్ట్రేలియా మార్కెట్లో తన ప్రధాన ఉత్పత్తుల ధరలను విపరీతంగా పెంచుతూ సంచలన నిర్ణయం తీసుకుంది. ముఖ్యంగా విద్యార్థులు, బడ్జెట్ ప్రియులు ఎంతో ఇష్టపడే మాక్‌బుక్ నియో, మాక్‌బుక్ ఎయిర్, ఐప్యాడ్ సిరీస్, మ్యాక్ మినీతో పాటు ఆపిల్ టీవీ 4K, హోమ్‌పాడ్ మినీ వంటి పరికరాల ధరలు ఆకాశాన్ని తాకాయి. ప్రపంచవ్యాప్తంగా సాగుతున్న ర్యామ్ (RAM), స్టోరేజ్ విడిభాగాల కొరత, విపరీతంగా పెరిగిన తయారీ ఖర్చులే ఇందుకు ప్రధాన కారణమని కంపెనీ వర్గాలు వెల్లడించాయి. ఆపిల్ సీఈఓ టిమ్ కుక్ గత నెలలోనే ఈ ధరల పెరుగుదలపై సంకేతాలు ఇచ్చారు. మెమరీ ఖర్చులు విపరీతంగా పెరగడం వల్ల ఈ నెల నుండి ఉత్పత్తులపై ఆ ప్రభావం స్పష్టంగా కనిపిస్తుందని ఆయన పేర్కొన్నారు.ఈ ధరల పెంపు ప్రభావం ఆస్ట్రేలియాలో కొత్తగా ల్యాప్‌టాప్ లేదా టాబ్లెట్ కొనాలనుకునే వారి బడ్జెట్‌ను పూర్తిగా తలకిందులు చేసింది. ఆపిల్ లైనప్‌లోనే అత్యంత చౌకైన మోడల్‌గా మార్కెట్లోకి అడుగుపెట్టిన సరికొత్త 'మాక్‌బుక్ నియో' (MacBook Neo) ప్రారంభ ధరను ఆపిల్ ఏకంగా పెంచేసింది. ఆస్ట్రేలియాలో మొదట AU$899 ఆస్ట్రేలియన్ డాలర్లకు లాంచ్ అయిన ఈ బేస్ మోడల్ ధర ఇప్పుడు ఏకంగా AU$1,049 లకు చేరుకుంది. అలాగే టచ్ ఐడీ కలిగిన 512GB స్టోరేజ్ వేరియంట్ ధర AU$1,099 నుండి ఏకంగా AU$1,249 కి పెరిగింది. బడ్జెట్ ధరలో లభిస్తుందనుకున్న మాక్‌బుక్ నియో ఇలా ధర పెరగడంతో విండోస్ ల్యాప్‌టాప్‌లతో పోటీ పడటం ఇప్పుడు కాస్త కష్టంగానే మారేలా ఉంది.మరోవైపు, వినియోగదారులను ఎంతగానో ఆకట్టుకునే మాక్‌బుక్ ఎయిర్ (MacBook Air) మోడల్స్ కూడా భారీగా ప్రియమయ్యాయి. M5 చిప్‌తో వచ్చిన 13-ఇంచుల మాక్‌బుక్ ఎయిర్ ప్రారంభ ధర ఏకంగా AU$300 పెరిగింది. గతంలో AU$1,799 గా ఉన్న ఈ ల్యాప్‌టాప్ ధర ఇప్పుడు ఏకంగా AU$2,099 కి చేరింది. అదేవిధంగా, పెద్ద స్క్రీన్ కలిగిన 15-ఇంచుల మోడల్ ధర కూడా AU$2,199 నుండి AU$2,499 కి పెరిగింది. మిడిల్ రేంజ్ వినియోగదారులకు ఈ AU$300 (దాదాపు 16 వేల రూపాయలకు పైగా) అదనపు భారం కానుంది. ప్రొఫెషనల్స్ వాడే మాక్‌బుక్ ప్రో 14-ఇంచ్ మోడల్ అయితే ఏకంగా AU$2,699 నుండి AU$3,199 కి పెరిగి కస్టమర్లకు చుక్కలు చూపిస్తోంది.కేవలం ల్యాప్‌టాప్‌లు మాత్రమే కాదు, డెస్క్‌టాప్ ప్రియుల బడ్జెట్ డివైజ్ అయిన 'మ్యాక్ మినీ' (Mac Mini) ధర ఏకంగా 30 శాతం పెరిగింది. గతంలో AU$999 కే లభించిన ఈ పరికరం ఇప్పుడు AU$1,299 కి చేరింది. చదువుకునే విద్యార్థులు ఎక్కువగా ఆశ్రయించే ఐప్యాడ్ (iPad) సిరీస్ కూడా ఈ ధరల మంటలో చిక్కుకుంది. 11-ఇంచుల ఐప్యాడ్ ఎయిర్ ప్రారంభ ధర AU$999 నుండి AU$1,249 కి పెరిగింది. స్టాండర్డ్ ఐప్యాడ్, ఐప్యాడ్ మినీ, ఐప్యాడ్ ప్రో మోడల్స్ అన్నీ కూడా భారీ ధరలతో కస్టమర్ల జేబులకు చిల్లులు పెడుతున్నాయి. రానున్న రోజుల్లో ఐఫోన్ 18 సిరీస్ ధరలు కూడా ఈ విధంగానే పెరిగే అవకాశం ఉందని టెక్ విశ్లేషకులు అంచనా వేస్తున్నారు.