హైదరాబాద్ పోలీస్‌లకు రెండు ప్రతిష్ఠాత్మక సేవా పతకాలు..!

స్వాతంత్య్ర దినోత్సవాన్ని పురస్కరించుకుని కేంద్ర హోంశాఖ ప్రకటించిన ప్రతిష్ఠాత్మక పోలీస్ సేవా పతకాలకు ఎంపికైన ఇద్దరు హైదరాబాద్ పోలీస్ అధికారులను నగర పోలీస్ కమిషనర్‌ వీసీ సజ్జనార్‌ శుక్రవారం ఘనంగా సత్కరించారు. రాష్ట్రపతి విశిష్ట సేవా పతకానికి ఎంపికైన సికింద్రాబాద్‌ జోన్‌ అదనపు డీసీపీ జే. నర్సయ్య, విశిష్ట సేవా పతకానికి ఎంపికైన సైబర్‌ క్రైమ్‌ ఏసీపీ ఆర్‌జీ శివమారుతిని సీపీ కార్యాలయంలో ప్రత్యేకంగా అభినందించారు.

ఈ సందర్భంగా సీపీ సజ్జనార్‌ మాట్లాడుతూ.. విధి నిర్వహణలో అంకితభావం, అత్యుత్తమ నిబద్ధత కనబరిచినందుకే అధికారులకు ఈ అత్యున్నత పురస్కారాలు దక్కాయని కొనియాడారు. శాంతిభద్రతల పరిరక్షణలో అదనపు డీసీపీ నర్సయ్య, సైబర్‌ నేరాల నియంత్రణ, సాంకేతిక దర్యాప్తులో ఏసీపీ శివమారుతి కనబరిచిన ప్రతిభ ప్రశంసనీయమన్నారు.

జాతీయ స్థాయిలో ప్రతిష్ఠాత్మక సేవా పతకాలు అందుకోవడం ద్వారా హైదరాబాద్‌ సిటీ పోలీస్‌ కమిషనరేట్‌ కీర్తిప్రతిష్ఠలను మరింత పెంచారని సీపీ పేర్కొన్నారు. వారి సేవలు ఇతర పోలీస్‌ అధికారులు, సిబ్బందికి స్ఫూర్తిదాయకంగా నిలుస్తాయని అన్నారు. భవిష్యత్తులోనూ ఇదే అంకితభావంతో ప్రజాసేవలో కొనసాగుతూ మరిన్ని ఉన్నత పురస్కారాలు అందుకోవాలని ఆకాంక్షించారు.

అదనపు డీసీపీ జే. నర్సయ్య..!

అదనపు డీసీపీ జే. నర్సయ్య 1991లో ఎస్సైగా పోలీస్‌ శాఖలో చేరారు. 35 ఏళ్లుగా పోలీస్‌ శాఖలో సుదీర్ఘ సేవలందిస్తున్న ఆయన.. పలు కీలక కేసుల దర్యాప్తుతో పాటు శాంతిభద్రతల పరిరక్షణలో కీలక పాత్ర పోషించారు. విధి నిర్వహణలో ప్రతిభకు గతంలో ‘ఇండియన్‌ పోలీస్‌ మెడల్‌’ (ఐపీఎం) సహా పలు పతకాలను అందుకున్నారు. తాజాగా రాష్ట్రపతి విశిష్ట సేవా పతకానికి ఎంపికయ్యారు.

ఏసీపీ ఆర్‌జీ శివమారుతి..!

సైబర్‌ క్రైమ్‌ ఏసీపీ ఆర్‌జీ శివమారుతి 1995లో ఎస్సైగా పోలీస్‌ శాఖలో చేరి 31 ఏళ్లుగా సేవలందిస్తున్నారు. దేశవ్యాప్తంగా సాగుతున్న రూ.127 కోట్ల సైబర్‌ మోసాల నెట్‌వర్క్‌ను ‘ఆపరేషన్‌ ఆక్టోపస్‌’ ద్వారా ఛేదించడంలో కీలకంగా వ్యవహరించి గుర్తింపు పొందారు. సాంకేతిక దర్యాప్తులో కనబరిచిన ప్రతిభకు గాను 2022లో ‘కేంద్ర హోంమంత్రి పతకం’ కూడా అందుకున్నారు. తాజాగా విశిష్ట సేవా పతకానికి ఎంపికయ్యారు. ఇద్దరు అధికారులకు ప్రతిష్ఠాత్మక సేవా పతకాలు దక్కడంపై హైదరాబాద్‌ పోలీస్‌ కమిషనరేట్‌ వర్గాలు హర్షం వ్యక్తం చేశాయి.

ACP J. Narsaiah awarded Presidents Police Medal, CM Revanth reddy, Telangana police, Hyderabad police, CP Sajjanar, ACP RG Shivamaruthi