దినేష్ రెడ్డి డిజిపి పదవికి ఎసరుపెట్టిన క్యాట్

రాష్ట్రప్రభుత్వ డొల్లతనానికి పరాకాష్టగా డిజిపి (డైరెక్టర్ జనరల్ ఆఫ్ పోలీస్) దినేష్ రెడ్డి నియామకం ఉందని క్యాట్ తేల్చేసింది. పైగా ఆ నియామకమే చెల్లదని సుదీర్ఘ విచారణ తరువాత క్యాట్ స్పష్టం చేసింది. రాష్ట్రప్రభుత్వం ఉన్నతపదవుల నియామకంలో తీసుకోవాల్సిన జాగ్రత్తలు తీసుకోకపోవడాన్ని క్యాట్ తప్పుపడుతోంది. నిబంధనావళిని అతిక్రమించటం, సీనియర్టీలను సరిగా పరిశీలించకుండా ఆదేశాలు ఇచ్చేయటం, ఆశ్రితపక్షపాతం వంటి లక్షణాలు రాష్ట్రప్రభుత్వానికి ఉన్నాయన్న విమర్శలకు ఈ నియామకం అద్దం పడుతోందంటున్నారు. పోలీసుశాఖలోనే ఈ నియామకాన్ని సవాల్ చేసే పరిస్థితి ఏర్పడింది. సర్వీసు రిజిష్టర్లు వంటివి పరిశీలించటం, ఆన్ లైన్ లో ఉద్యోగుల సీనియార్టీ తెప్పించుకోవటం వంటి బోలెడు అవకాశాలుండగా ప్రబుత్వం ఎందుకు ఈ నియామకం చేసిందనే ప్రశ్న పలువురిని వేధిస్తోంది. దినేష్ రెడ్డికి డిజిపి పదవి ఎలా కట్టబెట్టారని సీనియర్ అధికారి గౌతమ్ కుమార్ క్యాట్ ను గతేడాది ప్రశ్నించారు. కేంద్రపరిపాలనా ట్రిబ్యునల్ (క్యాట్) తిరిగి డిజిపి పదవికి మరొకరిని నియమించాలని సూచించింది. వాస్తవానికి 1977 బ్యాచ్ కు చెందిన దినేష్ రెడ్డి కన్నా రెండేళ్ళ సీనియర్ ఇదే శాఖలో ఉన్నారు. 1975 బ్యాచ్ కు చెందిన కె.అర. నందన్ ను కాదని దినేష్ కు ప్రభుత్వం డిజిపి పదోన్నతి కల్పించింది. క్యాట్ సూచనల ప్రకారం ప్రభుత్వం ఇప్పుడు నందన్ ను డిజిపిగా ప్రభుత్వం ప్రకటించాల్సి ఉంది. మరి ప్రభుత్వం అలా స్పందిస్తుందా? కొత్తగా ఏమైనా కొర్రీలు పెడుతుందా అని గౌతమ్ కుమార్ ఆసక్తిగా గమనిస్తున్నారు. క్యాట్ తన పిటీషన్ పై స్పందించినందుకు ఆనందించిన ఆయన ప్రభుత్వం రియాక్షన్ కోసం ఎదురు చూస్తున్నారు.