బంధు.. అందరికా లేక కొందరికా? కేసీఆర్ కొంప ముంచబోతోందా?
టీఆర్ఎస్ సర్కార్ కొత్తగా తీసుకువచ్చిన దళిత బంధు పథకాన్ని ప్రతిష్టాత్మకంగా చెప్పుకుంటోంది. దళిత బంధుతో తమకు బాగా కలిసివస్తుందని అంచనా వేస్తున్నారు గులాబీ బాస్. అయితే క్షేత్రస్థాయిలో పరిస్థితులు మాత్రం అందుకు భిన్నంగా కనిపిస్తున్నాయి. దళిత బంధుతో అసలుకే ఎసరు వచ్చేలా ఉందని అధికార పార్టీ నేతలే ఆందోళన చెందుతున్నారు. దళిత బంధుకు అందరికి పక్కాగా అమలు చేస్తేనే ఫలితం ఉంటుందని లేదంటే టీఆర్ఎస్ కు తీవ్ర నష్టం జరుగుతుందని మాజీ ఉప ముఖ్యమంత్రి కడియంశ్రీహరి ఓపెన్ గానే చెప్పేశారు. కడియమే కాదు గులాబీ నేతలంతా దాదాపుగా ఇదే అభిప్రాయం వ్యక్తం చేస్తున్నారు. దళిత బంధుతో ఏం జరుగుతుందోనన్న భయంతో వణికిపోతున్నారు.
సీఎం కేసీఆర్ దళిత బంధు వ్యూహం పెద్దగా పనిచేసే అవకాశాలు లేనట్లుగా కనిపిస్తున్నాయి. దేశంలో ఎక్కడా లేని విధంగా, దళితుల ఆర్థిక అభివృద్ధి కోసం వారికి, “దళిత బంధు” పేరుతో రూ.10 లక్షలు నేరుగా అందించే పథకాన్ని ప్రవేశపెట్టి అందరి దృష్టిని ఆకర్షించారు కేసీఆర్. రాష్ట్ర వ్యాప్తంగా ఈ పథకాన్ని అమలు చేస్తామని ముఖ్యమంత్రి కేసీఆర్ ప్రకటించినప్పటికీ ముందుగా హుజరాబాద్ లో “పైలెట్ ప్రాజెక్టు” చేపట్టారు. ఇప్పటికే, ఈ పథకం కింద వాసాలమర్రి లో 76 దళిత కుటుంబాలకు రూ. 10 లక్షల చొప్పున రూ.7.76 కోట్లను అందజేశారు. తన దత్తత గ్రామం వాసాలమర్రి లో దళిత వర్గాలు సంతోషాన్ని వ్యక్తం చేస్తూ సీఎం కేసీఆర్ కు బాసటగా నిలిచారు.
వాసాలమర్రి పరిస్థితిని రాష్ట్ర వ్యాప్తంగా, తమకు అనుకూలంగా మలుచుకునే ఆలోచనతో సీఎం కేసీఆర్ అడుగు ముందుకు వేస్తున్నారు. హుజరాబాద్ కోసం, మొదటి విడతగా రూ.500 కోట్ల రూపాయలను విడుదల చేశారు. అయితే హుజురాబాద్ నియోజకవర్గంలో దాదాపు 54 వేల మంది దళిత ఓటర్లు ఉన్నారు. దాదాపు 16 వేల దళిత కుటుంబాలు నియోజకవర్గ పరిధిలో ఉన్నాయి. వీరందరికీ ‘దళిత బంధు” పథకం కింద ఒక్కో కుటుంబానికి రూ.10 లక్షల చొప్పున ఇవ్వాల్సి ఉంది. మొదటి విడత రూ. 500 కోట్లు మాత్రమే విడుదల చేయడంతో, కేవలం 5 వేల మందికి మాత్రమే లబ్ధి చేకూరుతుంది. దీంతో మిగతా 11 వేల మంది కుటుంబాల పరిస్థితి ఏంటి..? అనేది ప్రశ్నార్థకంగా మారింది.
మొదటి విడతలో కొంత మందికి ప్రయోజనం చేకూర్చితే మిగతావారు తీవ్రంగా వ్యతిరేకించే అవకాశాలున్నాయి. దళిత కుటుంబాల్లోని 65 శాతం మంది లబ్ధి పొందని కారణంగా టీఆర్ఎస్ పై కోపంతో రగిలిపోయే ప్రమాదం పొంచి ఉంది. హుజూరాబాద్ నియోజకవర్గంలో ఉన్న దళిత కుటుంబాల అందరికీ రూ. 10 లక్షల చొప్పున అందించేందుకు మరో రూ.1100 కోట్లను విడుదల చేయాల్సి ఉంది. ఇదంతా కేవలం మరో 15 రోజుల్లో ప్రభుత్వం పూర్తి చేయగలిగితే, దళిత వర్గాల్లో ఉన్న మొత్తం ఓట్లు గంపగుత్తగా టిఆర్ఎస్ కు అనుకూలంగా పడే అవకాశాలు ఉన్నాయి. లేనిపక్షంలో దళిత వర్గాల్లో చిచ్చు రాజేసిన అపవాదును టిఆర్ఎస్ మూటగట్టుకుని చతికిల పడే అవకాశాలు ఉన్నాయి. “దళిత బంధు పథకం” లబ్ధి పొందని దళితులు సాధారణంగానే టిఆర్ఎస్ కు వ్యతిరేకంగా, తనకు నచ్చిన వ్యక్తికి ఓటు వేసే అవకాశాలు ఉన్నాయి.
కేవలం దళిత కుటుంబాలకే కాకుండా, పేద, అణగారిన వర్గాల కుటుంబాల అందరికీ రూ.10 లక్షల చొప్పున అందించాలని ఆయా కుల సంఘాలు ప్రభుత్వాన్ని డిమాండ్ చేస్తున్నాయి. అగ్రవర్ణాల అయిన రెడ్డి, బ్రాహ్మణ, వెలమ, వైశ్య కులాల సంఘం నేతలు కూడా తమకు రూ.10లక్షల చొప్పున ఆర్థిక సాయం అందించాలని డిమాండ్ చేస్తున్నారు. హుజూరాబాద్ నియోజకవర్గం లో “రెడ్డి” సామాజిక వర్గానికి చెందిన 22,600 ఓట్లు, వెలమ, బ్రాహ్మణ, వైశ్య, ముస్లిం మైనారిటీ, ఓసి వర్గాలకు చెందిన ఓట్లు దాదాపు 40 వేల వరకు ఉన్నాయి. వీరంతా ప్రభుత్వం నుంచి ఆర్థికపరమైన లబ్ధి పొందని కారణంగా, టిఆర్ఎస్ పార్టీకి వ్యతిరేకంగా పని చేస్తామని బహిరంగంగా ప్రకటిస్తున్నారు.
ప్రధానంగా వెనుకబడిన జాతిగా ఉన్న గిరిజనులకు, దళితుల వలే రూ. 10 లక్షలు తమకు, ఇవ్వనట్లయితే టిఆర్ఎస్ కు వ్యతిరేకంగా పని చేస్తామని కుండబద్దలు కొడుతున్నారు. అలాగే యాదవులు, నాయి బ్రాహ్మణులు, రజకులు ప్రభుత్వం నుంచి సబ్సిడీల రూపంలో అందే తోక సహాయాన్ని తీవ్రంగా వ్యతిరేకిస్తున్నారు. తమకు కూడా పెద్ద ఎత్తున లబ్ధి చేకూర్చే రూ. 10లక్షల సహాయాన్ని అందించాలని డిమాండ్ చేస్తున్నారు. యాదవులకు గొర్రెలు ఇచ్చి, మచ్చిక చేసుకోవడం కుదరదని ఆ వర్గాలు తేల్చి చెబుతున్నారు. నాయి బ్రాహ్మణులు, రజకులకు ఉచిత కరెంటు సౌకర్యాన్ని ప్రభుత్వం ఇటీవలే కల్పిం చింది. దీన్ని ఏమాత్రం లెక్కచేయకుండా, ఈ రెండు వర్గాలు, తమకు ఖచ్చితంగా రూ.10 లక్షల రూపాయల ఆర్థిక సహాయం అందించాల్సిందేనని పట్టుబడుతున్నాయి.
యాదవ సామాజిక వర్గానికి 22,150, రజక సామాజిక వర్గానికి 7,600, నాయి బ్రాహ్మణులకు 3,300, ముదిరాజ్ సామాజిక వర్గానికి 23 220, పద్మశాలి లకు 26,350 ఓట్లు, మున్నూరు కాపులకు దాదాపు 30 వేల ఓట్లు ఉన్నాయి. మైనారిటీలకు 5,100 ఓట్లు ఉన్నాయి. ఇతర అణగారిన సామాజిక వర్గాలకు కలిపి 12 వేల కోట్లు ఉన్నాయి. ప్రధానంగా, దళిత సామాజిక వర్గానికి అంటే అత్యంత వెనుకబాటుకు గురైన ఎస్టి సామాజికవర్గానికి 7,600 ఓట్లు ఉన్నాయి. వీరికి కూడా ఇలాంటి ఆర్థిక సాయం ప్రభుత్వం నుంచి అందకపోవడం వల్ల, తమకు సైతం రూ.10 లక్షల ఆర్థిక సహాయాన్ని అందించాలని డిమాండ్ చేస్తున్నారు.
రాష్ట్ర ప్రభుత్వం ప్రతిష్టాత్మకంగా చేపట్టిన ఆసరా పింఛన్లు, రైతు బంధు పథకాలు హుజురాబాద్ నియోజకవర్గంలో వెలవెలబోతున్నాయి. రూపాయలు 10 లక్షల ఆర్థిక సాయంతో “దళిత బందు” ప్రవేశపెట్టిన పథకంతో.. ఇప్పటికే ఇస్తున్న ఆసరా పింఛన్లు, రైతుబంధు పథకం ద్వారా వచ్చే లబ్ధి పెద్దగా లెక్కలోకి తీసుకోవడం లేదు. ఎందుకంటే ఆసరా పింఛన్లు రైతుబంధు పథకం రూ.10వేలకు మించి కనిపించడం లేదు. కానీ “దళిత బంధు” పథకం రూ. 10 లక్షలు అనేసరికి ఆసరా పింఛన్లు, రైతుబంధు పథకాలు పరిగణలోకి తీసుకోవడం లేదు. ఇటీవల కాలంలో హుజూరాబాద్ నియోజకవర్గం లో రాష్ట్ర ప్రభుత్వం మహిళా సంఘాలకు పక్కా భవనాలు ప్రతి గ్రామంలో నిర్మిస్తామని, వివిధ కుల సంఘాలకు కమ్యూనిటీ హాలు నిర్మిస్తామని హామీలు గుప్పిస్తున్నారు. అయితే ఇవేమీ హుజురాబాద్ ప్రజలకు పెద్దగా ఎక్కడం లేదు. అధికార టీఆర్ఎస్ పార్టీ నేతలు అక్కడి ప్రజలకు ఎన్ని హామీలు ఇచ్చినప్పటికీ, అవి వారి చెవికి ఎక్కడం లేదు. ఏ నోట విన్నా, తమకు 10 లక్షలు ఖచ్చితంగా కావాలని డిమాండ్ వస్తోంది. మర ప్రభుత్వం అన్ని కులాల కుటుంబాలకు రూ.10 లక్షల చొప్పున ఆర్థిక సాయం చేసే పరిస్థితి ఉందా..? లేకుంటే ఉప ఎన్నికల్లో టిఆర్ఎస్ పరిస్థితి ఏంటి..? అనేది అగమ్యగోచరంగా కనిపిస్తోంది.