Home  
Others

త్వరలో 40 వేల ఉద్యోగాలు భర్తీ : సీఎం రేవంత్‌

  త్వరలో మరో 40 వేల ఉద్యోగాలు భర్తీ చేస్తామని సీఎం రేవంత్‌రెడ్డి అన్నారు. కాంగ్రెస్ ప్రభుత్వం ఇప్పటికే 60 వేల ఉద్యోగాలు ఇచ్చామని రెండున్నరేళ్ల పాలన పూర్తయ్యేలోగా లక్ష ఉద్యోగాలు పూర్తి చేస్తామని ముఖ్యమంత్రి స్ఫష్టం చేశారు. ఇవాళ హుస్నాబాద్‌లో ముఖ్యమంత్రి పర్యటించారు. పలు అభివృద్ధి పనులకు శంకుస్థాపన చేశారు. రూ.262.68 కోట్ల విలువైన అభివృద్ధి పనులకు శ్రీకారం చుట్టారు.  2023 డిసెంబర్ 3న పదేళ్ల పాలనకు ప్రజలు చరమగీతం పాడారని రేవంత్ అన్నారు. శ్రీకాంతాచారి బలిదానం కూడా ఇదే రోజు జరిగిందని ఆయన స్పూర్తితో 60 వేల కోసం ఉద్యోగాలు చేశామని తెలిపారు. 2001లో ఈ ప్రాంతం నుంచే ఉద్యమం ఉవ్వెత్తున ఎగిసిందని 2004లో కరీంనగర్‌లో సోనియా ప్రత్యేక రాష్ట్రం మాటిచ్చారని తెలిపారు.  పదేళ్లు రాజకీయాలు పక్కన పెట్టి గ్రామాల్లో అందరూ ఏకమై సర్పంచ్‌లను ఏకగ్రీవం చేసుకోవాలని సీఎం పిలుపునిచ్చారు. ఎమ్మెల్యేలతో కలిసిమెలిసి పనిచేసే వారినే సర్పంచ్‌లను ఎన్నుకోవాలని కోరారు. కిరికిరి సర్పంచ్‌లను వస్తే ఐదేళ్ల కాలం వృధా అవుతుందన్నారు. అలాంటి వారిని ఎన్నుకోవద్దని సూచించారు. కేంద్ర ప్రభుత్వంతో కోట్లాడైనా అత్యధిక నిధులు గ్రామాలకు ఇచ్చే బాధ్యతను తాను తీసుకుంటానన్నారు. హస్నాబాద్‌ను అన్ని రకాలుగా అభివృద్ధి చేస్తామని తెలిపారు. గత పదేళ్ల కాలంలో నిర్లక్ష్యానికి గురైన గౌరెల్లి రిజర్వాయర్ పనులను పూర్తి చేసే బాధ్యత తీసుకుంటామన్నారు. గడీలు, పెత్తందార్లకు వ్యతిరేకంగా సర్దార్ పాపన్న గౌడ్ గారి నాయకత్వంలో బహుజనుల రాజ్య స్థాపనకు ఇక్కడి నుంచి శ్రీకారం చుట్టారని ఆ ప్రాంత ప్రాధాన్యతను  గుర్తుచేశారు. ప్రజల ఆకాంక్ష మేరకు ఏర్పడిన ప్రజాప్రభుత్వం రెండేళ్లు పూర్తి చేసుకున్న తరుణంలో భవిష్యత్తులో తెలంగాణను ఏ విధంగా అభివృద్ధి చేయాలన్న ప్రణాళికలు సిద్ధం చేశామని చెప్పారు.రైతులకు రుణమాఫీ, రైతు భరోసా వంటి వ్యవసాయ రంగంలో 1.04 లక్షల కోట్ల రూపాయలను వెచ్చించినట్టు తెలిపారు.  మహిళలకు ఆర్టీసీ బస్సుల్లో ఉచిత ప్రయాణం, 200 యూనిట్ల వరకు ఉచిత విద్యుత్, మహిళా సంఘాలకు సోలార్ విద్యుత్, రేషన్ కార్డుల జారీ, సన్నబియ్యం పంపిణీ, 4.5 లక్షల ఇందిరమ్మ ఇండ్లు, అధికారంలోకి వచ్చిన తొలి ఏడాదిలోనే 60 వేల ఉద్యోగాల భర్తీ.. ఇలా చెప్పుకుంటూ వెళితే అనేక ప్రజా సంక్షేమ  కార్యక్రమాలు అమలు చేశామని ముఖ్యమంత్రి గుర్తుచేశారు.    

బీజాపూర్‌‌లో భీకర ఎన్‌కౌంటర్...12 మంది మావోలు మృతి

  ఛత్తీస్‌గఢ్‌  బీజాపూర్‌ అడవుల్లో భద్రతా బలగాలు, మావోయిస్టుల మధ్య భీకర ఎన్‌కౌంటర్ జరిగింది. ఈ ఎదురు కాల్పుల్లో 12 మంది మావోలు మృతి చెందారు. ఇద్దరు జవాన్లు ప్రాణాలు కోల్పోయారు. ఘటనా స్థలంలో భారీగా ఆయుధాలు స్వాధీనం చేసుకున్నారు. డిస్ట్రిక్ట్ రిజర్వ్ గార్డ్, స్పెషల్ టాస్క్ ఫోర్స్, సీఆర్‌పీఎఫ్‌ సిబ్బంది బుధవారం ఉదయం బస్తర్‌ డివిజన్‌ లోని అటవీ ప్రాంతంలో నక్సలైట్‌ వ్యతిరేక ఆపరేషన్‌ చేపట్టారు. అక్కడ మావోయిస్టులు, భద్రతా దళాల మధ్య కాల్పులు చోటు చేసుకున్నాయి.  ఈ ఘటనాస్థలి వద్ద భారీగా ఆయుధాలు, పేలుడు పదార్థాలను పోలీసులు స్వాధీనం చేసుకున్నామని  బస్తర్ రేంజ్ ఐజీ సుందర్‌రాజ్ వెల్లడించారు. గత కొంతకాలంగా మావోయిస్టు పార్టీ లొంగుబాట్లు, ఎన్‌కౌంటర్లతో ఉక్కిరిబిక్కిరి అవుతున్న సంగతి తెలిసిందే. కేంద్ర హోంశాఖ మంత్రి అమిత్ షా ఆదేశాల మేరకు 2026 ఆగస్టు 31 నాటికి దేశాన్ని మావోయిస్టు రహిత భారత్ గా మార్చేందుకు ఆపరేషన్ చేపట్టిన సంగతి తెలిసిందే.

రెండో వన్డేలోనూ కోహ్లీ సెంచరీ

టీమ్ ఇండియా స్టార్ బ్యాటర్ విరాట్ కోహ్లీ సౌతాఫ్రికాతో జరుగుతున్న వన్డే సిరీస్ లో వరుసగా రెండో మ్యాచ్ లోనూ మూడంకెల స్కోరు సాధించాడు. రాంచీ వేదికగా జరిగిన తొలి వన్డేలో 135 పరుగులు చేసిన కోహ్లీ, ఇప్పుడు రాయ్ పూర్ వేదికగా జరుగుతున్న రెండో వన్డేలోనూ సెంచరీ చేశాడు. ఈ సెంచరీతో వన్డేల్లో కోహ్లీ చేసిన శతకాల సంఖ్య 53 కు చేరింది. క్రికెట్ లోని ఏ ఫార్మాట్ లోనైనా సరే అత్యధిక సెంచరీలు సాధించిన రికార్డు కోహ్లీదే.  ఈ మ్యాచ్ లో కోహ్లీ 90 బంతుల్లో ఏడు ఫోర్లు, రెండు సిక్సర్లతో శతకం బాదిన కోహ్లీ ఆ తరువాత 102 పరుగుల వద్ద ఎంగిడి బౌలింగ్ లో మాక్రంకు క్యాచ్ ఇచ్చి వెనుదిరిగాడు. తొలి వన్డేలోలాగే ఈ మ్యాచ్ లోనూ కోహ్లీ బౌలర్లపై పూర్తి ఆధిపత్యం చూపించాడు.   ఇదిలా ఉంటే.. వ‌రుస‌గా రెండు వ‌న్డే మ్యాచ్‌ల్లోనూ శ‌త‌కం చేయ‌డం కోహ్లీ కెరీర్‌లో ఇది 11వ సారి.

తెలంగాణలో రెండు టర్మ్‌లు నేనే సీఎం : రేవంత్ రెడ్డి

  తెలంగాణలో రెండు టర్మ్‌లు నేనే ముఖ్యమంత్రిగా ఉంటాని సీఎం రేవంత్ రెడ్డి అన్నారు. ఢిల్లీలో మీడియాతో చిట్ చాట్‌ నిర్వహించారు. తెలంగాణ అభివృద్ధికి  సహకరించాలని ప్రధాని మోదీని కోరాని రేవంత్ పేర్కొన్నారు. గుజరాత్ సీఎంగా మోదీ ఉన్నప్పుడు అప్పటి ప్రధాని  మన్మోహన్ సింగ్ ఎలా సహకరించాడో ఇప్పుడూ అలాగే సహకరించాలని ప్రధాని విజ్ఞప్తి చేశాని రేవంత్‌రెడ్డి తెలిపారు.  నిన్నటి నా వ్యాఖ్యలపై అనవసర వివాదం చేస్తున్నారని   డీసీసీ అధ్యక్షుల సమావేశంలో పార్టీలో  భిన్నాభిప్రాయాలు ఉండడం సహజం అని చెప్పే ప్రయత్నం చేశాని రేవంత్ అన్నారు. జూబ్లీహిల్స్ ఉప ఎన్నికలో బీజేపీ డిపాజిట్ కోల్పోవడంతో ఈ విషయాన్ని పెద్దదిగా చేసి వివాదాస్పదం చేస్తోందని ధ్వజమెత్తారు. హిందూ దేవుళ్లు మూడు కోట్ల మంది ఉన్నారని… పలు సారూప్యతలు కలిగిన దేవుళ్లు ఉన్నారని తాను చెప్పానని గుర్తుచేశారు. ఈ క్రమంలోనే కాంగ్రెస్ కూడా హిందూ సమాజం లాంటిదేనని తాను వివరించానని సీఎం రేవంత్‌రెడ్డి పేర్కొన్నారు.  

పంచాయతీ ఎన్నికల్లో అభ్యర్థులకు కోతుల తిప్పలు

  పల్లెలో  గ్రామ పంచాయితీ ఎన్నికల రగడ మొదలైంది.  గ్రామంలో ఉన్న కోతులను తరిమిన తర్వాతే ఓట్లు అడగాలని ఓటర్లు ఫ్లెక్సీలు ఏర్పాటు చేశారు.. కోతులు లేకుండా చేసిన అభ్యర్థికి ఓట్లు వేస్తామని ఓటర్లు డిమాండ్ చేస్తున్నారు.. దీనితో పోటీ చేస్తున్న అభ్యర్థులకు కోతుల బెడద సవాల్‌గా  మారుతుంది..జయశంకర్ భూపాలపల్లి జిల్లా..రేగొండ మండలం కేంద్రంలో మా ఓటు అమ్మేది లేదంటూ వేలిసిన వాల్ పోస్టర్లు....మండల కేంద్రానికి చెందిన మాడగాని నరేష్ అనే వ్యక్తి వాల్ పోస్టర్లు వేసి ఓట్ల అమ్ముకోము అంటూ ఫ్లెక్సీలు ఏర్పాటు చేశారు.  కోతుల బెడదను తీర్చేవారినే సర్పంచ్‌గా  గెలిపిస్తామంటూ ఓటర్లు ఖరాఖండిగా చెబుతున్నారు. తెలంగాణలో దాదాపు 35 లక్షలకు పైగా కోతులు ఉన్నాయంట. చిన్నా, పెద్దా అన్న తేడా లేకుండా కోతులు దాడులు చేస్తున్నాయి. కోతుల దాడిలో గాయపడటంతో పాటు గుంపుగా దాడి చేయడంతో ప్రజలు ప్రాణాలు కోల్పోయిన సంఘటనలూ అనేకం ఉన్నాయి.

సచివాలయమా? కమర్షియల్ కాంప్లెక్సా.. పోలీసులపై చంద్రబాబు ఫైర్

ఆంధ్రప్రదేశ్ ముఖ్యమంత్రి నారా చంద్రబాబునాయుడు నిత్యం ప్రజలలో ఉంటారు. ప్రజలకూ తనకూ మధ్య బారికేడ్లు అనవసరమని భావించడమే కాదు.. ఆ దిశగా పోలీసులకు స్పష్టమైన ఆదేశాలు కూడా ఇచ్చారు. శాంతి భద్రతల పరిరక్షణ తో పాటు ప్రజలకు ఎటువంటి ఇబ్బందులూ కలగకుండా చూడాల్సిన బాధ్యత కూడా పోలీసులు తీసుకోవాలని చెబుతుంటారు. వైసీపీ హయాంలో అప్పటి సీఎం జగన్ జనానికి తనకూ మధ్య పరదాలు కట్టించుకుని వారికి కనిపించకుండా ముఖంచాటేసి తిరిగారు. అయితే తాను అందుకు పూర్తిగా భిన్నమని చంద్రబాబు పదేపదే చెబుతున్నారు. తన పర్యటన సందర్భంగా పరదాలు, బారికేడ్లు వంటికి ఉండటానికి వీల్లేదని స్పష్టమైన ఆదేశాలు కూడా ఇచ్చారు. పోలీసులు కూడా ఆయన అభిమతానికి తగినట్లేనడుచుకున్నారు. పించన్ల పంపిణీకి ఆయన గ్రామాలకు వెళ్లిన సందర్భాలలో పోలీసుల ఏర్పాట్లు చక్కగా ఉన్నాయని చంద్రబాబు ప్రశంసలు కూడా కురిపించారు. అయితే.. పోలీసుల తీరు పూర్తిగా మారలేదని ఆయన తాజాగా గమనించారు. సచివాలయానికి వెళ్లే దారిలో ఆయన ప్రయాణించే సమయంలో పోలీసులు ఎక్కడికక్కడ బారికేడ్లు ఏర్పాటు చేసి రహదారిపైకి వాహనాలు రాకుండా అడ్డుకోవడాన్నిఆయన గమనించారు. వెంటనే తన కాన్వాయ్ ఆపించి అక్కడికక్కడే పోలీసులపై అసహనం వ్యక్తం చేశారు. ఇది రాష్ట్ర సచివాలయమా? లేకపోతే కమర్షియల్ కాంప్లెక్సా అని ఆగ్రహం వ్యక్తం చేశారు. సచివాలయానికి వెళ్లే దారిలో ప్రధాన రహదారికి ఇరువైపులా ప్రకటనలతో కూడిన బారికేడ్లను వెంటనే తొలగించాలని అక్కడికక్కడే ఆదేశాలు జారీ చేశారు.  ఆ తరువాత ఆర్టీజీఎస్ సమావేశంలో పాల్గొన్న చంద్రబాబు అక్కడ కూడా బారికేడ్ల విషయాన్ని ప్రస్తావించారు.  స్థానిక పోలీసులు ట్రాఫిక్ ను క్రమబద్ధీకరిస్తే చాలన్నారు. రోడ్లను మూసేస్తూ  బారికేడ్లు పెట్టి ప్రజలకు ఇబ్బందులు కలిగించడం సరికాదన్నారు.  

పాతబస్తీలో మృతదేహాలు కలకలం

  హైదరాబాద్ నగరంలోని  చాంద్రాయణగుట్ట పరిధిలోని ఒక ఆటోలో ఇద్దరు యువకుల మృతదేహాలు అనుమానాస్పద స్థితిలో లభ్యం కావడంతో స్థానికంగా తీవ్ర కలకలం రేపుతుంది. ఆటోలో రెండు మృతదేహాలు కనిపించడంతో స్థానికులు తీవ్ర భయభ్రాంతులకు గురయ్యారు. ఈరోజు తెల్లవారుజామున ఆటో పార్క్ చేసి ఉండగా, అందులో ఇద్దరు యువకులు ప్రాణం లేకుండా కనిపించడంతో స్థానికులు భయపడుతూ వెంటనే పోలీసులకు సమాచారం అందించారు. సంఘటనా స్థలానికి చేరుకున్న పోలీసులు మృతదేహాలను పరీక్షిస్తున్న సమయంలో ఆటోలో మత్తు ఇంజక్షన్లు, స్టెరాయిడ్స్‌కు సంబంధించిన కొన్ని శాంపిల్స్‌ కనిపించాయి. పోలీసులు వెంటనే వాటిని స్వాధీనం చేసుకున్నారు. యువకులు మత్తు ఇంజక్షన్లు తీసుకుని ఉండవచ్చన్న కోణంలో పోలీసులు విచారణను కొనసాగిస్తు న్నారు. ఓవర్‌డోస్ కారణంగానే మరణించి ఉండవచ్చన్న ప్రాథమిక అనుమానాలు వ్యక్తమ వుతున్నాయి.  అయితే, ఇది హత్యలా? లేక యువకులే మత్తు పదార్థాలు తీసుకుని ప్రాణాలు కోల్పోయారా? అన్న దానిపై పోలీసులు వివిధ కోణాల్లో దర్యాప్తు చేస్తున్నారు. అసలు ఈ యువకులు ఎవరు? ఎక్కడి నుండి వచ్చారనే దానిపై కూడా విచారణ కొనసాగుతోంది. మృతదేహాలను పోస్టుమార్టం నిమిత్తం గాంధీ హాస్పిటల్ కి తరలించారు. పోస్టుమార్టం నివేదిక వచ్చాక మరణానికి గల కారణం వెలుగులోకి వచ్చే అవకాశముందని పోలీసులు వెల్లడించారు. ఈ ఘటనతో ఆ ప్రాంతంలో ఉద్రిక్తత, భయం నెలకొన్న నేపథ్యంలో పోలీసులు భద్రతను ఏర్పాటు చేశారు.

ప్రధాని మోదీతో సీఎం రేవంత్‌ భేటీ...గ్లోబల్ సమ్మిట్‌కి ఆహ్వానం

  తెలంగాణ గ్లోబల్ సమ్మిట్‌కు  ప్రధాని మోదీని సీఎం రేవంత్‌రెడ్డి ఆహ్వానించారు. ఈ నెల 8, 9 తేదీల్లో భారత్ ఫ్యూచర్ సిటీ వేదికగా నిర్వహిస్తోన్న “తెలంగాణ గ్లోబల్ సమ్మిట్ - 2025” సదస్సుకు రావాల్సిందిగా ప్రధాని డిప్యూటీ సీఎం భట్టి విక్రమార్కతో కలిసి సాదరంగా ఆహ్వానించారు. మేరకు ఢిల్లీలో ప్రధాన మంత్రి నరేంద్ర మోడీతో రేవంత్‌రెడ్డి సమావేశం అయ్యారు. ఈ సందర్భంగా రాష్ట్ర ప్రభుత్వం  ప్రత్యేకంగా ముద్రించిన గ్లోబల్​ సమ్మిట్​ ఆహ్వాన పత్రికను సీఎం ప్రధానికి అందించారు.  కేంద్ర ప్రభుత్వం ఎంచుకున్న వికసిత్​ భారత్ 2047 లక్ష్యాలకు అనుగుణంగా ..​ 3 ట్రిలియన్​ డాలర్ల ఆర్థిక వృద్ధి లక్ష్యంగా తెలంగాణ భవిష్యత్తు సంకల్పంతో ముందుకు సాగుతుందని సీఎం ప్రధానికి వివరించారు. దీనికి అనుగుణంగా అన్ని రంగాల వృద్ధి లక్ష్యాలు, అనుసరించే భవిష్యత్తు ప్రణాళికలను విశ్లేషించేలా తెలంగాణ  రైజింగ్​ 2047  విజన్​ డాక్యుమెంట్​ రూపొందించినట్లు  చెప్పారు.   హైదరాబాద్​ మెట్రో రైలు రెండో దశ విస్తరణకు  తగిన అనుమతులు ఇవ్వాలని కోరారు.  మొత్తం 162.5 కిలోమీటర్ల పొడవునా విస్తరించే ప్రతిపాదనలను ఇప్పటికే  రాష్ట్ర ప్రభుత్వం కేంద్రానికి అందజేసింది. రూ.43,848 వేల కోట్ల అంచనా వ్యయమయ్యే ఈ  ప్రాజెక్టును కేంద్ర రాష్ట్ర ప్రభుత్వాల జాయింట్​ వెంచర్​గా  చేపట్టేందుకు ఆమోదించాలని విజ్ఞప్తి చేశారు. హైదరాబాద్​ నుంచి అమరావతి మీదుగా బందర్​ పోర్ట్ వరకు 12 లేన్​ గ్రీన్ ఫీల్డ్ ఎక్స్​ప్రెస్​ హైవే, హైదరాబాద్​ నుంచి బెంగుళూరు హై స్పీడ్​ కారిడార్​ ను అభివృద్ధి చేసేందుకు గ్రీన్​ ఫీల్డ్ ఎక్స్​ప్రెస్​ వే నిర్మాణం  చేపట్టేలా కేంద్రం ప్రత్యేక చోరవ చూపాలని విజ్ఞప్తి చేశారు.  రాహుల్‌, ఖర్గేకు ఆహ్వానం.. ప్రధానితో భేటీకి ముందు కేంద్ర ఐటీ, రైల్వే శాఖ మంత్రి అశ్వినీ వైష్ణవ్‍ను సీఎం రేవంత్ కలిసి గ్లోబల్ సమ్మిట్‍కు రావాలని ఆహ్వానించారు. ఈ సందర్భంగా సమ్మిట్‍లో ఆవిష్కరించనున్న విజన్ డాక్యుమెంట్ గురించి ఆయనకు వివరించారు. ప్రధానితో భేటీ అనంతరం కేంద్రమంత్రులు రాజ్ నాథ్ సింగ్, నిర్మాలా సీతారామన్‌తో ముఖ్యమంత్రి భేటీ అయి సమ్మిట్‌కు రావాలని కోరారు.  అలాగే ఏఐసీసీ చీఫ్ ఖర్గేతోపాటు లోక్‌సభలో ప్రధాన ప్రతిపక్ష నాయకుడు, ఏఐసీసీ అగ్రనేత రాహుల్ గాంధీ, జనరల్ సెక్రటరీ ప్రియాంక గాంధీని సీఎం రేవంత్‌రెడ్డి కలిశారు.ఈ సమావేశంలో డిప్యూటీ సీఎం భట్టి విక్రమార్క, ఎంపీలు  మల్లు రవి, రఘువీర్‌రెడ్డి, సురేశ్ షెట్కార్, చామల కడియం కావ్య, గడ్డం వంశీకృష్ణ, అనిల్‌కుమార్ యాదవ్ ఉన్నారు.   

లోకేష్ విదేశీ పర్యటనలు.. ఆచరణలో స్పీడ్ ఆఫ్ డూయింగ్ బిజినెస్

ఆంధ్రప్రదేశ్ తమ పెట్టుబడులకు గమ్యస్థానంగా ఇన్వోస్టర్లు భావిస్తున్నారు. ఇందుకు ఆంధ్రప్రదేశ్ లో అధికారంలో ఉన్న తెలుగుదేశం కూటమి ప్రభుత్వం అనుసరిస్తున్న ఇండస్ట్రియల్ ఫ్రెండ్లీ విధానమే కారణమని చెప్పడానికి ఇసుమంతైనా సందేహం అక్కర్లేదు. అభివృద్ధి, దార్శనికత విషయాలలో చంద్రబాబుకు ఉన్న ట్రాక్ రికార్డ్ కు లోకేష్ స్పీడ్ తోడుకోవడంతో ప్రపంచం నలుమూలల నుంచీ ఏపీకి పెట్టుబడులు వెల్లువెత్తుతున్నాయి. ఆంధ్రప్రదేశ్ చెబుతున్న స్పీడ్ ఆఫ్ డూయింగ్ బిజినెస్ ను మంత్రి నారా లోకేష్ కేవలం మాటల్లోనే కాదు ఆచరణలో సైతం చూపుతున్నారు. ఐదేళ్లలో ఆంధ్రప్రదేశ్ కు ట్రిలియన్  డాలర్ల ఆర్థిక వ్యవస్థగా తీర్చిదిద్దాలన్న లక్ష్యంతో ముందుకు సాగుతున్నారు.  ఇందు కోసం దేశ, విదేశీ పెట్టుబడిదారులను రాష్ట్రానికి తీసుకురావడమే లక్ష్యంగా పని చేస్తున్నారు. దావోస్ మొదలైన ఈ ప్రయాణం సక్సస్ ఫుల్ గా సాగుతోంది. అదే క్రమంలో  మంత్రి నారా లోకేష్ ఈ నెలలో రెండే దేశాలలో పర్యటించనున్నారు. తొలుత అమెరికాలోనూ, ఆ తరువాత కెనడాలొనూ పెట్టుబడుల వేట కొనసాగించే లక్ష్యంతో లోకేష్ పర్యటించనున్నారు. ఈ నెల 6 నుంచి 9వ తేదీ వరకూ నారా లోకేష్ డల్లాస్ సహా అమెరికా రాష్ట్రాలలో పర్యటించనున్నారు. ఈ పర్యటనలో భాగంగా ఆయన ఎన్ఆర్ఐలతో సమావేశం అవుతారు. అలాగే అమెరికాలోని అగ్రశ్రేణి పారిశ్రామిక వేత్తలతో భేటీ అవుతారు. ఈ భేటీలన్నీరాష్ట్రానికి పెట్టుబడులను తీసుకురావడమే లక్ష్యంగా సాగనున్నాయి. అలాగే అమెరికా పర్యటన ముగించుకు వచ్చిన రోజుల వ్యవధిలోనే అంటే డిసెంబర్ 11 నుంచి రెండు రోజుల పాటు కెనడాలో పర్యటించనున్న లోకేష్ ఆ పర్యటనలో పారిశ్రామిక వేత్తలతో వరుస భేటీలు నిర్వహించనున్నారు. ఈ భేటీల లక్ష్యం రాష్ట్రానికి పెట్టుబడులను ఆకర్షించడమే. రాష్ట్రానికి పెట్టుబడులతో వచ్చే పారిశ్రామిక వేత్తలకు ఆంధ్రపప్రదేశ్ ప్రభుత్వం ఇచ్చే ప్రోత్సాహకాలను వారికి వివరించడమే.  లోకేష్ తన పర్యటన లక్ష్యం ఆంధ్రప్రదేశ్ ను ఆధునిక పెట్టుబడుల హబ్ గా తీర్చిదిద్దడమేనని చెబుతున్నారు. 

కొత్తగూడెం రైల్వేస్టేషన్‌‌లో బాంబు పేలుడు

  భద్రాది కొత్తగూడెం రైల్వేస్టేషన్‌‌లో బాంబు పేలుడు కలకలం సృష్టించింది. గుర్తుతెలియని వ్యక్తులు వదిలి వెళ్లిన ఓ సంచిలో ఉన్న బాంబును వీధి కుక్క రైల్వే ట్రాక్‌‌పైకి నోటితో లాక్కెళ్లింది. ఆ సంచిలో ఉల్లిగడ్డ ఆకారంలో ఉన్న బాంబును కుక్క కొరింది. దీంతో భారీ శబ్దంతో బాంబు పేలుడు సంభవించింది. కుక్క అక్కడికక్కడే మృతి చెందింది. ఈ బాంబు పేలుడుతో రైల్వే స్టేషన్‌లోని ప్రయాణికులు పరుగులు తీశారు. స్థానికుల సమాచారంతో.. కొత్తగూడెం 3వ పట్టణ పోలీసులు రంగంలోకి దిగారు.  కేసు నమోదు చేసి దర్యాప్తు చేపట్టారు. ఇంకా ఏమైనా బాంబులు ఉన్నాయా అంటూ పోలీస్ జాగిలాలతో రైల్వే స్టేషన్‌లో తనిఖీలు నిర్వహిస్తున్నారు. దర్యాప్తులో భాగంగా సమీపంలోని సీసీ కెమెరా ఫుటేజ్‌లను పోలీసులు పరిశీలిస్తున్నారు. రైల్వే స్టేషన్‌లో ఆగంతకుడు ఎటువైపు నుంచి వచ్చాడు. ఎటువెళ్లాడనే కోణంలో పోలీసులు ఆరా తీస్తున్నారు. సీఎం రేవంత్ రెడ్డి పర్యటన జరిగిన మరసటి రోజే ఈ ఘటన జరగడంతో పలు అనుమానాలు వ్యక్తమవుతున్నాయి.  

ఏపీలో విద్యుత్ ఛార్జీలు పెంచే ప్రసక్తే లేదు : సీఎం చంద్రబాబు

  ఏపీలో విద్యుత్ ఛార్జీలు పెంచే ప్రసక్తే లేదని సీఎం చంద్రబాబు మరోసారి స్పష్టం చేశారు. తూర్పు గోదావరి జిల్లా నల్లజర్లలో ముఖ్యమంత్రి పర్యటించారు. ‘రైతన్నా మీకోసం’ కార్యక్రమంలో భాగంగా రైతులు, రైతు కుటుంబాలతో ఆయన ముఖాముఖి నిర్వహించారు. కరెంట్ ఛార్జీలు పెంచకుండా నాణ్యమైన విద్యుత్ సరఫరా చేస్తున్నామని పేర్కొన్నారు. కృష్ణ గోదావరి నదులను అనుసంధానం చేసి పెన్నా వరకు తీసుకెళ్తామన్నారు.  కార్యాలయాల చుట్టూ తిరగాల్సిన అవసరం లేకుండా వాట్సాప్ సేవలు ప్రారంభించామని తెలిపారు. సూపర్ సిక్స్ సూపర్ హిట్ అయిందని ముఖ్యమంత్రి తెలిపారు. ఇచ్చిన హామీలన్నీ ఒక్కొక్కటిగా నెరవేరుస్తున్నామని పేర్కొన్నారు. ఏపీ వ్యవసాయ ఆధారిత రాష్ట్రం. రైతుల సమస్యలపై ప్రధానంగా దృష్టి సారిస్తున్నాం. రైతన్నకు అండగా ఉంటామనేది మా మొదటి నినాదం. నీటి వనరులు పెంచేందుకు అనేక ప్రయత్నాలు చేస్తున్నాం. గోదావరి జలాలను కృష్ణా నదికి కలిపాం. రాబోయే రోజుల్లో గోదావరిని వంశధారకు కలుపుతాం. పెన్నా వరకూ తీసుకెళ్తామని చంద్రబాబు తెలిపారు.  

విజయవాడకు మరో ఫ్లై ఓవర్ .. 500 కోట్ల వ్యయం!

విజయవాడ-హైదరాబాద్‌ జాతీయ రహదారి ఎన్‌హెచ్ 65ను సిక్స్ లేన్ గా విస్తరించడంలో భాగంగా   నగర పరిధిలో మరో భారీ ఫ్లై ఓవర్ నిర్మాణం జగరనుంది.  గొల్లపూడి నుంచి కనకదుర్గ వారధి వరకు 5 కి.మీ. మేర  ఈ ఫ్లై ఓవర్ నిర్మాణం కానుంది. ఈ ఫ్లై ఓవర్ నిర్మాణానికి దాదాపు 500 కోట్ల రూపాయలు వ్యయం అవుతుందనిఅంచనా.  ఈ ఫ్లై ఓవర్ నిర్మాణం పూర్తయితే.. హైదరాబాద్‌ నుంచి విజయవాడ ట్రాఫిక్ కష్టాలు దాదాపుగా తీరిపోయినట్లేనని చెబుతున్నారు.    ఇంతకీ ఈ ఫ్లై ఓవర్ ఎందుకంటే.. ఎన్ హెచ్ 65ను ఆరు లేన్ల రహదారిగా విస్తరించడానికి   భూమి ఆర్‌ఓడబ్ల్యూ 60 మీటర్లు ఉండాలి.  అయితే గొల్లపూడి, కనకదుర్గ వారథి మధ్య అంత వెడల్పు స్థలం లేదు.  రహదారి పక్కన స్థల సేకరణ భారీ వ్యవంతో కూడుకున్న వ్యవహారం. ఎందుకంటే మార్కెట్ ధర ప్రకారమే ఇక్కడ గజం రమారమి లక్ష రూపాయలు ఉంటుంది. అంటే ఈ ఐదుకిలోమీటర్లూ రహదారి విస్తరణకు వెయ్యి కోట్ల రూపాయలు కేవలం భూసేకరణకే అవసరమౌతుంది. ఈ నేపథ్యంలోనే ఈ ఐదు కిలోమీటర్ల మేర ఫ్లై ఓవర్ నిర్మాణం తెరపైకి వచ్చింది.  భూసేకరణకు వెచ్చించాల్సిన మొత్తంలో సగం ఖర్చు పెడితే చాలు ఫ్లై ఓవర్ నిర్మాణం పూర్తవుతుంది.   ట్రాఫిక్‌ రద్దీ నేపథ్యంలో భారీ పైవంతెన నిర్మాణం కష్టమని భావించినప్పటికీ ఒకవైపు ట్రాఫిక్‌ వదిలి మరోవైపు నిర్మించాలని నిర్ణయించారు. ప్రస్తుత డీపీఆర్‌ ప్రాజెక్టు అప్రైజల్‌ అండ్‌ టెక్నికల్‌ స్క్రూటినీ కమిటీ వద్ద ఉంది. అక్కడ ఆమోదం లభించగానే.. మిగిలిన దశల్లో పరిశీలన పూర్చి చేసి వచ్చే ఏడాది నాటికి పనులు మొదలు పెట్టాలని భావిస్తున్నట్లు తెలుస్తోంది.  విజయవాడ -హైదరాబాద్‌ మార్గంలో మొత్తం 221.5 కిలోమీటర్ల రోడ్డును ఆరు లేన్లుగా విస్తరించాలన్నది ఎన్ హెచ్ ఏఐ ప్రణాళిక. అందుకు అనుగుణంగా తొలుత ఈ రహదారిలో కేవలం హైదరాబాద్‌ సమీపంలోని దండు మల్కాపూర్‌ నుంచి జగ్గయ్యపేట మండలం అనుమంచిపల్లి వరకూ విస్తరించాలని తీసుకున్న నిర్ణయాన్ని కేంద్రం సవరించి,  అనుమంచిపల్లి నుంచి గొల్లపూడి వరకూ రోడ్డు విస్తరణకు ఆదేశించింది.  

తెలంగాణ రైజింగ్ గ్లోబల్ సమ్మిట్ కు అన్ని రాష్ట్రాల సీఎంలకూ ఆహ్వానం

తెలంగాణ ప్రభుత్వం అత్యంత ప్రతిష్ఠాత్మకంగా నిర్వహించనున్న తెలంగాణ రైజింగ్ గ్లోబల్ సమ్మిట్ కు అన్ని రాష్ట్రాల ముఖ్యమంత్రులను ప్రత్యేకంగా ఆహ్వానించాలని ముఖ్యమంత్రి రేవంత్ రెడ్డి నిర్ణయించారు. రాష్ట్రాల ముఖ్యమంత్రులను స్వయంగా ఆహ్వానిచే బాధ్యతను మంత్రులకు అప్పగించారు. తాను స్వయంగా ఢిల్లీ వెళ్లి ప్రధానిని ఆహ్వానించారు. ఇక  ఏయే మంత్రులు ఏయే రాష్ట్రాలకు వెళ్లి ఆయా రాష్ట్ర ముఖ్యమంత్రులను ఆహ్వానించాలన్నది కూడా నిర్ణయించారు. ఆ మేరకు ఆయా మంత్రులు ఆయా రాష్ట్రాలకు వెళ్లి ఆయా రాష్ట్రాల ముఖ్యమంత్రులను తెలంగాణ రైజింగ్ గ్లోబల్ సమ్మిట్ కు ఆహ్వానపత్రాలు అందించి ఆహ్వానిస్తారు.   ఈ నెల 8, 9 తేదీలలో  తెలంగాణ రైజింగ్ గ్లోబల్ సమ్మిట్ జరగనున్న సంగతి తెలిసిందే. ఈ సదస్సుకు జార్ఖండ్ సీఎంను ఆహ్వానించేందుకు ఉప ముఖ్యమంత్రి మల్లు భట్టి విక్రమార్క, జమ్మూకాశ్మీర్ సీఎంను మంత్రి ఉత్తమ్ కుమార్ రెడ్డి, పంజాబ్, హర్యానా సీఎంలను మంత్రి రాజనర్సింహ ఆయా రాష్ట్రాలకు వెళ్లి ఆహ్వానిస్తారు. అలాగే ఏపీ, కేరళ సీఎంలను మంత్రి కోమటిరెడ్డి ఆహ్వానిస్తారు. కర్నాటక, తమిళనాడు సీఎంలను మంత్రి దుద్దిళ్ల శ్రీధర్ బాబు, యూపీ సీఎంను పొంగులేటి శ్రీనివాసరెడ్డి ఆహ్వానిస్తారు.  ఇక రాజస్థాన్ సీఎంను మంత్రి పొన్నం ప్రభాకర్, పశ్చిమబెంగాల్ సీఎం మమతాబెనర్జీని మంత్రి సీతక్క ఆహ్వానించనుండగా, ఛత్తీస్ గఢ్ సీఎంను మంత్రి కొండా సురేఖ అహ్వానిస్తారు. అదే విధంగా మధ్య ప్రదేశ్ ముఖ్యమంత్రిని తుమ్మల నాగేశ్వరరావు, అసోం సీఎంను జూపల్లి కృష్ణారావు, బీహార్ సీఎం నితీష్ కుమార్ ను మంత్రి వివేక్ వెంకటస్వామి ఆహ్వానిస్తారు. అలాగే ఒడిశా సీఎంను వాకిటి శ్రీహరి, హిమాచల్ ముఖ్యమంత్రిని అడ్లూరు లక్ష్మణ్ కుమార్, మహారాష్ట్ర సీఎంను మహ్మద్ అజారుద్దీన్ ఆహ్వానిస్తారు. ఇక ఢిల్లీ సీఎంకు, కేంద్ర మంత్రులకు కాంగ్రెస్ ఎంపీలు ఆహ్వాన పత్రాలు అందజేస్తారు.  

పెంచలయ్య కుటుంబానికి అండగా ఉంటా.. ఎమ్మెల్యే కోటంరెడ్డి

నెల్లూరులో గంజాయి బ్యాచ్ చేతుల్లో హతమైన పెంచలయ్య కుటుంబానికి ఎమ్మెల్యే కోటంరెడ్డి శ్రీధర్ రెడ్డి అండగా నిలిచారు. బుధవారం (డిసెంబర్ 3) ఆ కుటుంబాన్ని పరామర్శించిన కోటంరెడ్డి.. ఆ కుటుంబాన్ని ఆదుకుంటానని హామీ ఇచ్చారు. ఈ సందర్భంగా  ఆ కుటుంబానికి పది లక్షల రూపాయలు ఇచ్చారు. కాగా  పెంచలయ్య కుమారుల చదువుల బాధ్యతను తాము తీసుకుంటామని కోటంరెడ్డి కుమార్తెలు హైందవి, వైష్ణవిలు హామీ ఇచ్చారు.   పెంచలయ్య సాగించిన గంజాయివ్యతిరేక పోరాటానికి కలిసొచ్చే అన్నిపార్టీలతో కలసి ఆ పోరాటాన్ని మరింత ఉదృతం చేస్తామని కొటంరెడ్డి శ్రీధర్ రెడ్డి ఈ సందర్భంగా చెప్పారు. అలాగే గంజాయి బ్యాచ్  గురించి భయం అవసరం లేదనీ, తాను అండగా ఉంటాననీ ఆర్డీటీ కాలనీ వాసులకు హామీ ఇచ్చారు. వారం రోజులలో కాలనీ అభివృద్ధికి 50లక్షల రూపాయలు మంజూరు చేయిస్తానన్నారు. భావి తరాలకు గుర్తుండేలా పెంచలయ్య విగ్రహాన్ని కాలనీలో ఏర్పాటు చేస్తామన్నారు. కాలనీ వాసులకు ఏ కష్టం వచ్చినా తాను అండగా ఉంటానని ఈ సందర్భంగా కోటం రెడ్డి కాలనీవాసులకు హామీ ఇచ్చారు.  

మద్యం కుంభకోణం సొమ్ముతో ముంబైలో బంగారం కొనుగోలు

జగన్  హయాంలో జరిగిన ఆంధ్రప్రదేశ్ మద్యం కుంభకోణంలో మనీలాండరింగ్‌కు సంబంధించిన కీలక విషయాలు వెలుగులోకి వచ్చాయి.   ఈ కేసులో ఏ49గా ఉన్న ముంబైకి చెందిన అనిల్ చోఖ్రాను కోర్టు అనుమతితో కస్టడీలోకి తీసుకుని సిట్ విచారించింది. ఈ విచారణలో  మద్యం కుంభకోణం ముడుపుల సొమ్మును ఎలా దారి మళ్లించారో అనిల్ చోఖ్రా పూసగుచ్చినట్లు వివరించినట్లు తెలిసింది.  ఏపీ మద్యం కుంభకోణంలో ఏ1 రాజ్ కేసిరెడ్డికి చెందిన బినామీ డిస్టిలరీల నుంచి వచ్చిన రూ.78 కోట్లను షెల్ కంపెనీల ద్వారా బంగారం, నగదు రూపంలోకి మార్చినట్లు చోఖ్రా అంగీకరించారని సమాచారం. ఊరూపేరూ లేని వ్యక్తుల ఆధార్, పాన్ కార్డులు సేకరించి ముంబైలో 30కి పైగా షెల్ కంపెనీలను సృష్టించి.. ఆ కంపెనీలలోకి ఆదాన్, లీలా, ఎస్‌పీవై ఆగ్రోస్ వంటి డిస్టిలరీల నుంచి వచ్చిన డబ్బును  మళ్లించారు. ఆ తర్వాత ముంబైలోని చాముండ బులియన్స్ యజమాని , ఇతర గోల్డ్ డీలర్ల సిండికేట్ ద్వారా ఆ సొమ్ముతో బంగారం కొనుగోలు చేశారు. చివరిగా.. దుబాయ్‌లో ఉన్న చేతన్ కుమార్ తండ్రికి సంబంధించిన ఆర్థిక నెట్‌వర్క్‌ను ఉపయోగించి మొత్తం నల్లధనాన్ని వైట్‌గా మార్చినట్లు  సిట్ విచారణలో చోఖ్రా వివరించినట్టు తెలిసింది. చోఖ్రా విచారణలో    ఆదాన్‌ డిస్టిలరీస్‌, లీలా డిస్టిలరీస్‌, ఎస్‌పీవై ఆగ్రోస్‌ నుంచి ముంబైకి చెందిన అనిల్‌ చోఖ్రా సృష్టించిన సెల్‌ కంపెనీల బ్యాంకు ఖాతాల్లోకి రూ.78 కోట్లు బదిలీ అయినట్లు సిట్ ఆధారసహితంగా కనుగోంది. చోఖ్రాను ముంబైలో అదుపులోకి తీసుకుని.. విజయవాడ ఏసీబీ కోర్టులో ప్రవేశపెట్టి.. కోర్టు అనుమతితో కస్టడీకి తీసుకుని విచారిస్తున్న సంగతి తెలిసిందే.  కాగా సిట్ అధికారులు ముంబైకి చెందిన చాముండ బులియన్స్ యజమాని చేతన్ కుమార్ కు మంగళవారం (డిసెంబర్ 2) విచారణకు రావాల్సిందిగా నోటీసులు ఇచ్చారు. అయితే అతడు ఆరోగ్యం బాలేదంటూ, తన తమ్ముడు రోణక్ కుమార్ ను పంపించాడు. మంగళవారం (డిసెంబర్ 2)   సిట్‌ కార్యాలయానికి వచ్చిన రోణక్‌ను అధికారులు చోఖ్రాతో కలిపి సాయంత్రం వరకు విచారించారు. అయితే రోణక్ తనకేమీ తెలియదంటూ ప్రశ్నలకు సమాధానం దాటవేయడంతో.. చేతన్ కుమార్ ను బుధవారం (డిసెంబర్ 3) విచారణకు రావాలంటూ ఆదేశించి, అంత వరకూ విజయవాడలోనే ఉండాల్సిందిగా రోణక్ కు ఆదేశించారు.  ఆ సమయంలో అన్న చేతన్ కుమార్ తో మాట్లాడతానంటూ సిట్ ఆఫీసు నుంచి బయటకు వచ్చిన రోణక్ కుమార్ పారిపోవడానికి చేసిన ప్రయత్నాన్ని సిట్ భగ్నం చేసింది. గన్నవరం విమానాశ్రయంలో అతడిని అరెస్టు చేసింది.   

బస్సు భద్రతా చట్టం.. గడ్కరీని కోరిన మంత్రి టీజీ భరత్

దేశానికి సంబంధించిన కీలకమైన రవాణా, భద్రతా విషయాలపై కేంద్ర మంత్రి నితిన్ గడ్కరీతో చ‌ర్చించిన‌ట్లు మంత్రి భరత్ తెలిపారు.  ఎంపీ బ‌స్తిపాటి నాగ‌రాజుతో క‌లిసి కేంద్ర మంత్రి గడ్కరీతో భేటీ అయిన  ఇటీవ‌లి కాలంలో తరచుగా జరుగుతున్న బస్సుప్రమాదాలు, వాటిలో పెద్ద సంఖ్యలో ప్రయాణీకులు మరణాల విషయాన్నిప్రస్తావించారు.   క‌ర్నూలు జిల్లా చిన్న‌టేకూరు స‌మీపంలో బస్సు ప్ర‌మాదంలో మంట‌ల్లో చిక్కుకొని ప్ర‌యాణికులు చ‌నిపోయారు. అధునాతన అగ్నిమాపక వ్యవస్థలపై  తాను గతంలో ఇచ్చిన వినతి మేరకు కొత్త‌ ప్రయాణీకుల-బస్సు భద్రతా చట్టాన్ని తీసుకురావాలని భరత్ కేంద్ర మంత్రి నితిన్ గడ్కరీని కోరారు. తన వినతిపై గడ్కరీ సానుకూలంగా స్పందించినట్లు టీజీ భరత్ చెప్పారు.  గుత్తి పెట్రోల్ బంక్ సర్కిల్ నుండి పెద్దటేకూరు వరకు చాలా కాలంగా పెండింగ్‌లో ఉన్న హైవే లైటింగ్ గురించి కూడా కేంద్ర మంత్రి దృష్టికి  తీసుకువెళ్లానన్నారు. అదే విధంగా కర్నూలు-బళ్లారి జాతీయ రహదారి ప్రతిపాదనతో సహా ముఖ్యమైన ప్రాంతీయ రహదారి అనుసంధాన అవసరాలను వివ‌రించిన‌ట్లు చెప్పారు.  

ఓయు విద్యార్థుల రాస్తారోకో

ఉస్మానియా విద్యార్థులు ఆందోళన బాట పట్టారు. వర్సిటీ హాస్టళ్లలో తిష్ఠ వేసిన సమస్యల పరిష్కారం కోసం వారు మంగళవారం (డిసెంబర్ 2) రాత్రి పెద్ద ఎత్తున ఆందోళనకు దిగారు. హాస్టళ్లలో కనీస మౌలిక వసతులు కల్పించడంలో వర్సిటీ అధికారులు విఫలమయ్యారని ఆరోపించారు.   హాస్టళ్లలో శుభ్రతలేమి, తాగునీటి సమస్యలు, మరుగుదొడ్ల దుస్థితి, గదుల మరమ్మత్తుల విషయంలో వర్సీటీ అధికారుల నిర్లక్ష్యానికి వ్యతిరేకంగా ఆగ్రహం వ్యక్తం చేస్తు ఆందోళనకు దిగారు.  ముఖ్యంగా హాస్టల్ లో ఆహారం నాణ్యత నాసిరకంగా ఉంటోందని ఆరోపించారు. ఈ సమస్యల పరిష్కారం కోసం ఎన్నిసార్లు విజ్ణప్తి చేసిన ఫలితం లేకపోయిందనీ, అధికారులు పట్టించుకోలేదనీ ఆరోపిస్తూ ఓయూ ప్రధాన రహదారిపై    రాస్తారోకో చేపట్టారు.  ఈ సందర్భంగా విద్యార్థులు మౌలిక వసతులు కావాలి,  నాణ్యమైన ఆహారం అందించాలి, వీసి డౌన్ డౌన్... పెరుగన్నం మీకు.... పురుగన్నమాకా అంటూని నాదాలు చేశారు.   

కామాక్షి ద గంజాయ్ డాన్ ఆఫ్ నెల్లూర్ అస‌లు క‌థ ఇదే!

ఒక మంచి వాడు- ప‌ది మంది మంచి వాళ్ల‌ను త‌యారు చేయ‌గ‌ల‌డో లేదో  తెలియదుకానీ..  ఒక క్ర‌మిన‌ల్ మాత్రం ప‌ది మంది క్రిమిన‌ల్స్ ని త‌యారు చేయ‌డం ప‌క్కా అని చెప్ప‌డానికి జ‌గ‌న్, ఆయ‌న వైసీపీ,  ఆపై ఆయ‌న చుట్టూ ఉన్న నాయ‌కులు, వారి వారి కార్య‌ క‌లాపాలను బ‌ట్టి ఇట్టే చెప్పేయచ్చంటారు పరిశీలకులు. ఇందుకు తాజా నిదర్శనంగా  నెల్లూరు గంజాయి  మాఫియా లేడీ డాన్ అర‌వ కామాక్షి ఉదంతాన్ని చూపుతున్నారు.   కామాక్షి తొలుత‌ బోడిగాడి తోట‌లో చిత్తు కాగితాల‌ను అమ్ముకుని బ‌తికేది. భ‌ర్త  ఒక డ్రైవ‌ర్. అలాగ‌ని వీళ్లు అక్క‌డితో ఆగిపోలేదు. ఎలాగైనా  స‌రే  జీవితంలో   ఎద‌గాల‌న్న  ఆలోచ‌న‌తో సినిమా ఫ‌క్కీలో ప్రయత్నాలు చేశారు. దానికి తోడు వీళ్ల చిత్తు కాగితాలు, చెత్త వ్యాపారంలో ఆక‌తాయి పిల్ల‌లు ఎక్కువ‌గా ట‌చ్ లో ఉండేవారు. వీరు ప‌గ‌టి  పూట  చెత్త ఏరుకుని, రాత్రి పూట గంజాయి మ‌త్తులో ప‌డి  తూగే  వారు. ఈ విష‌యం గుర్తించి కామాక్షి.. ఈ అల‌వాటు యువ‌త మొత్తానికి ఎలాగైనా అంట‌గ‌ట్టాల‌నుకుంటున్న‌టైంలో ఈమెకు పాల‌కీర్తి ర‌వి అనే  వైసీపీ  నేత  ప‌రిచ‌య‌మ‌య్యాడు. ఇత‌డి సాయంతో ఒక వైసీపీ మాజీ ఎంపీ ట‌చ్ లోకి వెళ్లిన కామాక్షి గుప్పుమ‌ని గంజాయి  పొగ‌లాంటి  ఘాటైన‌ మాట ఆయ‌న‌తో చెప్పుకుంది.  మ‌నం ఎలాగైనా  స‌రే గంజాయి దందా మొద‌లు పెట్టాల‌ని ఆ వైసీపీ  నేత‌తో ఆమె చెప్ప‌డం ఆల‌స్యం.. గంజాయి అంటే మ‌న‌కు ద‌ళితుల‌ను మ‌ర్డ‌ర్ చేసి, మ‌రీ ఇంటికి డెలివ‌రీ ఇచ్చే ఎమ్మెల్సీ అనంత‌బాబు ఉన్నాడుగా అంటూ అత‌డితో ప‌రిచ‌యం చేయించాడా వైసీపీ  నేత‌ అక్క‌డి  నుంచి కామాక్షి లైఫ్ స్టైలే మారిపోయింది. బోడిగాడి  తోట నుంచి త‌న మ‌కాం ఆర్టీడీ కాల‌నీకి మార్చిన కామాక్షి.. గంజాయి దందాను మూడు పువ్వులు ఆరుకాయ‌లుగా విస్త‌రించింది. స్కూళ్లు, కాలేజీ యువ‌తే టార్గెట్ గా  త‌న మ‌త్తు మార్కెట్ నెట్ వ‌ర్క్ పెంచుకుంటూ పోయి అంచెలంచెలుగా ఈ ఫీల్డ్ లో ఎదిగిపోయింది.   అంతే కాదు ఆమె చుట్టూ భ‌ర్త తో పాటు అత‌డి  బంధుమిత్రుల‌తో స‌హా  గంజాయి దందాను అడ్డూ ఆపూ లేదన్నట్లుగా సాగించింది.  ఈమె మీద ఈ చుట్టుప‌క్క‌ల ప్రాంతాల వారు  చేసిన ఫిర్యాదులతో   స్థానిక పోలీస్టేషన్లో లెక్క‌లేన‌న్ని కేసులు నమోదయ్యాయి. ఆ ఫిర్యాదుల విషయాన్ని  కొందరు పోలీసులే ఆమెకు చేరవేసేవారు. ఇలా కొందరు పోలీసుల సహకారం కూడా ఉండటంతో కామాక్షి ఆగ‌డాల‌కు  హ‌ద్దూపద్దూ లేకుండా పోయిందని స్థానికులు చెబుతున్నారు.   కామాక్షి గంజాయి మాఫియా ఆగ‌డాల‌ను గుర్తించిన‌  సీపీఎం  యువ  నేత పెంచ‌ల‌య్య ఈమె గంజాయి  దందాకు  వ్య‌తిరేకంగా పోరాటం చేసేవారు. ఆయ‌న త‌న దందాకు అడ్డు వ‌స్తున్నాడ‌ని  గుర్తించిన కామాక్షి అత‌డిపై  నిఘా పెట్టి.. రెక్కీ నిర్వ‌హించి.. త‌న మ‌నుషుల‌ను పంపి హ‌త‌మార్చేసింద‌ని పోలీసులు తెలిపారు. ఇది వైసీపీ జ‌మానా కాదు కాబ‌ట్టి కామాక్షి   చిక్కిపోయిందిగానీ.. అదే వైసీపీ ప్ర‌భుత్వ‌మే ఉండి ఉంటే ఇలాంటి హ‌త్యాకాండ‌లు ఎన్ని జ‌రిగినా అడిగే నాథుడే  లేకుండా పోయేవారని పరిశీలకులు అంటున్నారు.   అందుకే పెంచ‌ల‌య్య హ‌త్య‌కు నిర‌స‌న‌గా.. ఆర్టీడీ కాల‌నీలోని  కామాక్షి  ఇళ్ల‌న్నిటినీ ప‌గ‌ల‌గొట్టారు స్థానికులు. ఆపై సీపీఎం, టీడీపీ, జ‌న‌సేన పార్టీలు మంగ‌ళ‌వారం  పెంచ‌ల‌య్య మ‌ర‌ణాన్ని ఖండిస్తూ జిల్లా వ్యాప్త బందు నిర్వ‌హించి  ర్యాలీలు తీశాయి. ఇప్ప‌టికేనా గంజాయి బ్యాచ్ ఆగడాలను పూర్తిగా అరికట్టాలని స్థానికులు డిమాండ్ చేస్తున్నారు. 

శంషాబాద్ ఎయిర్ పోర్ట్ లో ప్రయాణీకుల పడిగాపులు.. ఎందుకంటే?

శంషాబాద్ అంతర్జాతీయ విమానాశ్రయంలో నిన్న అర్ధరాత్రి నుంచి తీవ్ర గందరగోళ పరిస్థితులు నెలకొన్నాయి. ఎటువంటి కారణం చెప్పకుండా ముంబై, అహ్మదాబాద్, బెంగళూరు, చెన్నై వెళ్లాల్సిన విమానాలు తీవ్ర జాప్యం కావడంతో ప్రయాణీకులు ఎయిర్ పోర్టులోనే పడిగాపులు కాయాల్సిన పరిస్థితి ఏర్పడింది. దాదాపు వెయ్యి మందికి పైగా ప్రయాణీకులు నిన్న రాత్రి నుంచీ ఎయిర్ పోర్టులోనే తాము వెళ్లాల్సిన ఫ్లయిట్ ఎప్పుడు బయలుదేరుతుందా అని వేచి చూస్తున్నారు. ఆయా విమానాలలో తలెత్తిన సాంకేతిక లోపాలే ఈ జాప్యానికి కారణమని తెలుస్తోంది. ఈ విమానాలన్నీ ఇండిగో సంస్థకు చెందినవే కావడం గమనార్హం. ప్రయాణీకుల ప్రశ్నలకు సమాధానం చెప్పలేక ఇండిగో సిబ్బంది సమతమమౌతున్న పరిస్థితి.   తెల్లవారుజామున రెండు గంటలకు బెంగుళూరు వెళ్లవలసిన ఫ్లైట్ ను రన్ వే పై రెండు గంటలు నిలిపివేశారు.  ప్రయాణికుల ఆందోళనలతో వారిని కిందకు దింపేసి ఎయిర్ పోర్టులో వెయిట్ చేయాల్సిందిగా సిబ్బంది చెప్పారు.  దీంతో విదేశాలకు వెళ్లాల్సిన ప్రయాణీకులు కనెక్టింగ్ ఫ్లైట్ లు మిస్సయిన పరిస్థితి. అలాగే వీసీ ఇంటర్వ్యూల కోసం వివిధ రాష్ట్రాలకు వెళ్లాల్సిన వారు కూడా ఉన్నారు. వీరంతా ఇండిగో సిబ్బందితో వాగ్వాదానికి దిగడంతో ఎయిర్ పోర్టులో తీవ్ర గందరగోళ పరిస్థితులు నెలకొన్నాయి.