నందమూరి బాలకృష్ణ ‘లెజెండ్’ విజయ యాత్ర ముగిసింది. పనిలోపనిగా జరిపిన ‘తీర్థయాత్ర’ కూడా ముగిసింది. పాత ఫీల్డులో విజయాన్ని ఇచ్చినందుకు, కొత్త ఫీల్డులోకి ఎంటర్ కాబోతున్నందున ఆశీర్వాదాలు కోరుకుంటూ బాలకృష్ణ పనిలోపనిగా ప్రసిద్ధ దేవాలయాలను కూడా సందర్శించారు. అనంతపురం జిల్లాలో బాలకృష్ణ పర్యటన ముగిసింది.   ఈ సందర్భంగా కార్యకర్తలతో సమావేశమైన బాలకృష్ణ తాను హిందూపురం శాసనసభ స్థానం నుంచి పోటీ చేయడానికి సిద్ధంగా వున్నట్టు వెల్లడించినట్టు సమాచారం. ఇప్పటి నుంచే కార్యకర్తలు, అభిమానులు హిందూపూర్‌లో తన ప్రచారానికి సంబంధించిన అన్ని ఏర్పాట్లనూ చేయాల్సిందిగా సూచించినట్టు తెలుస్తోంది. హిందూపురం అసెంబ్లీ నుంచి బాలకృష్ణ పోటీచేయాలనుకోవడం స్థానిక తెలుగుదేశం నాయకులలో సంతోషాన్ని కలిగిస్తోంది. ఎన్టీఆర్ కుటుంబానికి హిందూపూర్ అంటే ఉన్న అభిమానాన్ని తలచుకుని అక్కడివారందరూ మురిసిపోతున్నారు. ఎన్టీఆర్ కూడా గతంలో హిందూపూర్ నుంచే పోటీ చేసి ఘన విజయాలు సాధించారు. ఆయన సంప్రదాయాన్ని ఆయన కుమారుడు బాలకృష్ణ కొనసాగిస్తారని భావిస్తున్నారు.
  చనిపోయిన వారు ఎలాగు తిరిగి బ్రతికి వచ్చి నిజాలు చెప్పలేరు గనుక వారి పేరున ఎన్ని కబుర్లయినా దైర్యంగా చెప్పేసుకోవచ్చును. అవసరమయిన చోటల్లా వారి పేరుని యదేచ్చగా వాడేసుకోవచ్చును. మహాత్మా గాంధీజీ అంతటి వాడికే ఈ బాధ తప్పలేదు. ఇక అటువంటప్పుడు మాజీ సీయం స్వర్గీయ రాజశేఖర్ రెడ్డి మాత్రం అందుకు అతీతులు కాబోరని ఆయన పుత్రరత్నాలే నిరూపిస్తున్న సంగతి అందరికీ తెలిసిందే.   చెట్టుపేరు చెప్పి కాయలు అమ్ముకోవాలని చూస్తున్న జగన్మోహన్ రెడ్డి తండ్రిలాగే అమ్మమ్మలు, తాతయ్యలు, అక్కయలు, చెల్లాయిలు అంటూ తెలుగు డిక్షనరీలో ఉన్న బందుత్వాలన్నినీ రోజూ తన సభలలో వల్లే వేసి చివరాఖరున వారికి పేరుపేరునా దండాలంటూ ఇమిటేట్ చేస్తూ, తండ్రిలాగే 108 అంభులెన్స్ కుయ్యికుయ్యిమని ఎలా వస్తుందో చెపుతూ ప్రజలను రంజింపజేస్తున్నారు.   ఆయన సంక్షేమ పధకాలన్నిటినీ జగన్ తన పద్దులో వ్రాసేసుకొన్నపటికీ, ఆయన తన కోసం భద్రంగా దాచి ఉంచిన వందల కోట్ల విలువ చేసే టైటానియం లంకె బిందెలని మాత్రం క్లెయిం చేసుకోవడానికి ఎందుకో వెనుకంజ వేస్తున్నారు. కానీ జగన్ అంగీకరించినా, లేకున్నా ఆ నిధులన్నీ ఖచ్చితంగా ఆయనవేనని చంద్రబాబు బల్ల గుద్ధి మరీ వాదిస్తున్నారు.   అయితే తన తండ్రి దాచిపెట్టిన ‘టైటానియం నిధులున్నలంకె బిందెలు సరిగ్గా ఎన్నికల సమయంలో దొరికినందుకు జగన్ సంతోషించక పోగా బయటకు చెప్పుకోలేని ఏదో బాధతో కుమిలిపోతున్నాడు.   “యస్! వైయస్స్ ఆత్మని, అంతరాత్మని, పరామాత్మని... అన్నీ నేనే..సర్వం నేనే...అదిగో నా తల మీద ఆయనే ఉన్నాడు చూడండి...” అని కేవీపీ రామచంద్ర రావు సగర్వంగా మీడియా ముందు నిలబడి చెప్పిన ఆ నాలుగు ముక్కలే బహుశః జగన్మోహన్ రెడ్డికి ములుకుల్లా గుచ్చుకొని బాధిస్తూ ఉండవచ్చును.   ఏమయినప్పటికీ గత రెండు మూడు వారాలుగా అన్ని టీవీ ఛానేళ్ళలో “ఆయన వస్తున్నాడు..ఆయన వస్తున్నాడు..”అనే వైకాపా ప్రకటనలు చూస్తున్న ప్రత్యర్ధ పార్టీల వాళ్ళందరూ కూడా యస్! వైయస్స్ నిజంగానే ఇప్పుడు తిరిగి వచ్చేసినట్లే ఉందని  కుళ్ళు జోకులు వేసుకొని పకపకా నవ్వుకొంటున్నారుట.
      టీఆర్ఎస్ అధినేత కేసీఆర్ పార్టీ నుంచి పోటీ చేసే 69 అభ్యర్థుల లిస్టును ప్రకటించారు. కేసీఆర్ ప్రకటించిన అభ్యర్ధుల జాబితాలో వలస నేతలకు ఎక్కువగా ప్రాధాన్యం ఇవ్వడంతో ఆ పార్టీ నేతలు అసంతృప్తి వ్యక్తం చేస్తున్నారు. పార్టీలోకి వలస వచ్చిన ప్రజాప్రతినిధులు తమ స్థానాలను కైవసం చేసుకున్నారనే ఆవేదనతో రగులుతున్నారు.   ప్రస్తుత ఎన్నికల్లో టీఆర్ఎస్ కు పొత్తులు లేకపోవడంతో పార్టీలోని నేతలంతా తమకు టికెట్ దక్కుంతుందని ఆశలు పెంచుకున్నారు.  నియోజకవర్గాల్లో నేతలు తమ గెలుపే లక్ష్యంగా పార్టీని అభివృద్ధి చేసుకుంటూ వచ్చారు. అయితే అఖరి నిమిషంలో ఇతర పార్టీల ను౦చి వలస వచ్చిన వారికి టిక్కెట్లు కేటాయించడంతో వారు ఆగ్రహంతో రగిలిపోతున్నారు. దీంతో తెరాసలో ఆందోళనలు మొదలైయ్యాయి.    నేతలు వారిని బుజ్జగించే పనిలో పడ్డారు. అలక వహిస్తున్న నేతలను బుజ్జగించేందుకు ముఖ్య నాయకులు కూడా రంగంలోకి దిగినట్లు సమాచారం. ఆయా నేతలు తమ వంతు ప్రయత్నాలను ముమ్మరం చేసినట్లు తెలుస్తోంది. బరిలో దిగేందుకు అవకాశం లేని వారికి ప్రత్యామ్నాయాలు కల్సిస్తామని ఏకంగా అధినేతనే వారికి హామిలనిస్తున్నారు. అయినా అలకల పర్వం మాత్రం కొనసాగుతుంది. దీంతో తెరాస దీనిపై ప్రత్యేకమైన దృష్టిని సారించినట్లు తెలుస్తోంది.    
  తెలుగులోకి డబ్బ్ చేసిన తమిళ టీవీ సీరియల్లాగ ఎంతకీ తెగకుండా సాగుతున్న తెదేపా-బీజేపీ పొత్తుల కబుర్లు వినీవినీ బహుశః ప్రజలకే కాదు చంద్రబాబుకి కూడా బోర్ కొట్టేసినట్లుంది. అందుకే నిన్న అర్ధరాత్రి వరకు సాగిన పోలిట్ బ్యూరో సమావేశం అనంతరం తమ తొలి జాబితా విడుదల చేసేందుకు సిద్దమయిపోతున్నట్లు ఆయన మీడియాకు లీకులిచ్చేసారు.   డిల్లీలో కాంగ్రెస్ పార్టీని తిట్టుకొంటూ బిజీగా ఉన్న బీజేపీ నేతలు టీవీలలో లీకవుతున్న ఆ వార్తలను చూసి వెంటనే డయల్-యువర్-ఫ్రెండ్ ఆప్షన్ ఎంచుకొని చంద్రబాబుని లైన్లోకి తీసుకువచ్చి ఆయనని తెల్లారే వరకు ఆగమని, అప్పటికి తామే రెక్కలు కట్టుకొని ఆయన ముందు వాలిపోతామని హామీ ఇవ్వడంతో చంద్రబాబు లిస్టు మళ్ళీ జేబులో పెట్టేసుకొన్నారు. కానీ కొన్ని టీవీ ఛానల్స్ వాళ్ళు ఆయన జేబులో నుండి పడిపోయిన ఆ లిస్టు తమ చేతిలో చిక్కిందని చెప్పుకొంటూ స్క్రోలింగులో వరుసపెట్టి తెదేపా అభ్యర్ధుల పేర్లను చూపించేస్తున్నాయి. మరి ఇది కూడా మరోకరకమయిన లీకీజి సమస్యా అన్నది ఇంకా తేలవలసి ఉంది.   ఇక కమలనాధులు అంతకు ముందు చంద్రబాబుకి మొన్న సాయంత్రం వరకు గడువు పెట్టినట్లు వార్తలు వచ్చాయి. కానీ ఇప్పుడు చంద్రబాబే వారికి ఈరోజు సాయంత్రం వరకు గడువు పెట్టి ఈ క్లైమక్స్ సీన్లో కొత్త ట్విస్ట్ ఇచ్చారు. ఈసారయినా సీరియల్ సుఖాంతం అవుతుందని ఆశిస్తూ, ఇంతకాలంగా తెదేపాతో చర్చలు సాగిస్తున్న బీజేపీ నేత ప్రకాష్ జవదేకర్ తో బాటు గ్రూప్ ఫోటో కోసం అరుణ్ జైట్లీ కూడా విమానంలో దిగుతున్నారుట. ఒకవేళ పొత్తులు ఆ రెండు పార్టీల మధ్య కుదిరితే ‘జై రామ్ జీ’కి అనుకొంటూ ఒకరి భుజాల మీద మరొకరు చేతులు వేసుకొని ఫొటోలకి ఫోజులివ్వచ్చును. లేకుంటే రేపటి నుండి ఆ రెండు పార్టీల నేతల మధ్య రామరావణ యుద్ధం మొదలయిపోతుంది. దానిని బట్టే మిగిలిన పార్టీల సౌండ్ క్వాలిటీ కూడా మారిపోవడం తధ్యం.
  కిరణ్ కుమార్ రెడ్డి స్థాపించిన జై సమైక్యాంధ్ర పార్టీకిలో కార్యకర్తలెవరయినా ఉన్నారో లేదో ఖచ్చితంగా తెలియదు, కానీ ఒక అరడజను మంది నేతలు మాత్రం ఇంకా పార్టీలో మిగిలి ఉన్నారు. అయితే వారిలో కూడా ఒకరొకరుగా మెల్లగా వేరే పార్టీలలోకి జారుకొంటున్నారు. తాజాగా ఆ పార్టీ ఉపాధ్యక్షుడు పితాని సత్యనారాయణ తెదేపాలోకి జంపైపోయారు.ఆయన చంద్రబాబు చేతులతో పసుపు కండువా కప్పించుకొని తెదేపా తీర్ధం కూడా సేవించారు.   శుక్రవారం తెనాలిలో జరిగిన సభలో ఆ పార్టీ అధ్యక్షుడు కిరణ్ కుమార్ రెడ్డితో కలిసి కనిపించిన హర్షకుమార్, రెండు రోజుల క్రిందటే తనకు డిల్లీ నుండి దిగ్విజయ్ సింగ్ ఫోన్ చేసి పార్టీలోకి తిరిగి రమ్మని ఆహ్వానించారని, కానీ పార్టీయే తమను బయటకు వెళ్ళగొట్టింది గనుక ముందు తనపై వేసిన ఆ పార్టీ బహిష్కరణ వేటుని ఎత్తేస్తే అప్పుడు పార్టీలోకి తిరిగి రావడం గురించి ఆలోచిద్దామని జవాబు చెప్పినట్లు వార్తలు వచ్చాయి. దానితో ఆయన తాను జైసపాను వీడి వెళ్ళడం లేదని, ఆ పార్టీ టికెట్ పైనే తాను అమలాపురం నుండి లోక్ సభకు పోటీ చేయబోతున్నట్లు ప్రకటించేసి అప్పటికి మంటలార్పగలిగారు. కానీ రేపు మళ్ళీ దిగ్విజయ్ నుండి డిల్లీకి రమ్మని కాల్ వస్తే, అప్పుడు కిరణ్ పెట్టుకొనే తరువాత సభలో ఆయన మరి కనిపిస్తారో లేదో అనుమానమే. ఈ మునిగిపోతున్న నావలో మరెవరూ లేరని రూడీ చేసుకొన్నాక ఆఖరుగా కెప్టెన్ కిరణ్ కుమార్ రెడ్డి కూడా బయటకు దూకుతారేమో!
  కాంగ్రెస్ పార్టీ తన ప్రధాన ప్రత్యర్ధి బీజేపీని రోజూ తిట్టిపోసే ముందు ఓం ప్రధమంగా అదొక మతతత్వపార్టీ అని మొదలుపెట్టి ఇతర అంశాలపై విమర్శలకు వెళుతుంది. లౌకికవాదానికి తామే పేటెంట్ హక్కులు తీసుకొన్నట్లు, బీజేపీకి మతాల పేరిట ప్రజల మధ్య చిచ్చుపెట్టడమే పని అన్నట్లు కాంగ్రెస్ వాదిస్తుంటుంది. కానీ, ఈసారి ఎన్నికలలో కాంగ్రెస్ గెలిచే అవకాశంలేదని క్రమంగా బోధపడుతుండటంతో, వరదలో కొట్టుకుపోతున్న మనిషికి గడ్డి పోచ దొరికినా సంతోషించినట్లు కాంగ్రెస్ పార్టీ కూడా గెలుపు కోసం ఉన్న అన్ని మార్గాలను ఆన్వేషిస్తోంది. ఆ ప్రయత్నంలోనే కాంగ్రెస్ అధ్యక్షురాలు సోనియా గాంధీ కూడా తమ లౌకికవాదం కాసేపు పక్కనబెట్టి మొన్న మంగళవారంనాడు ఢిల్లీ జుమామసీద్ షాహి హిమామ్ బుఖారీతో సమావేశమయ్యి దేశంలో ముస్లిం ప్రజలందరూ కాంగ్రెస్ పార్టీకే ఓట్లువేసేలా చేయమని అభ్యర్దించారు. అయితే ఆలోచించవలసిన పాయింటు ఏమిటంటే బుకారీ సాబ్ దేశంలో ముస్లిం ప్రజలందరికీ ప్రతినిధి కాదు. ఆయన కేవలం ఒక మత గురువు మాత్రమే. గత అరవై ఏళ్లబట్టి దేశంలో అధికశాతం ముస్లిం ప్రజల దుర్బర దారిద్ర్యం అనుభవిస్తూనే ఉన్నారు. నాటి నుండి నేటి వరకు దేశాన్ని పాలిస్తున్న కాంగ్రెస్ పార్టీ వారిని కేవలం ఒక ఓటు బ్యాంకుగానే చూసింది తప్ప వారిని కనీసం మనుషులుగా కూడా చూడలేదు. అందుకే వారి పరిస్థితిలో ఇంతవరకు కూడా మార్పు రాలేదు. పైగా నానాటికీ ఇంకా దారిద్ర్యంలో కూరుకుపోతూనే ఉన్నారు. కానీ ఇప్పుడు సోనియాగాంధీ స్వయంగా బుకారీ సాబ్ ని కలిసి వచ్చినందున వారందరూ ఇంతకాలం కాంగ్రెస్ చేసిన నిర్వాకాలన్నిటినీ మరిచిపోయి కాంగ్రెస్ పార్టీకే గుడ్డిగా తమ ఓట్లు గుద్దేస్తారని అనుకోవడం అత్యాసే అవుతుంది. సోనియాగాంధీ ఒక మతగురువుని కలిసి ఆవిధంగా కోరడం ఏరకమయిన లౌకికవాదమో తెలియదు కానీ దేశంలో లౌకికవాదాన్ని అంటే దానికి మారు పేరయిన కాంగ్రెస్ పార్టీని మతతత్వ పార్టీ అయిన బీజేపీ నుండి, దానికి నాయకత్వం వహిస్తూ తన ముద్దుల యువరాజు రాజకీయ భవిష్యత్తుని మంట గలిపేద్దామని చూస్తున్న నరేంద్ర మోడీ నుండి రక్షించవలసిన ఆగత్యం గురించి ఆమె బుకారీ సాబ్ కి విన్నవించుకొన్నారు. దానిపై సహజంగానే బీజేపీ తీవ్ర విమర్శలు గుప్పించింది. బుకారీ ద్వారా దేశంలో ముస్లిం ప్రజలందరి ఓట్లు రాబట్టుకొందామని ప్రయత్నించడం, అది కూడా ఎన్నికల కోడ్ అమలులో ఉన్న సమయంలో అడగడం ఉల్లంఘన క్రిందకే వస్తుందని తీర్మానించేసిన బీజేపీ సోనియాగాంధీపై ఎన్నికల కమీషన్ కి నిన్న పిర్యాదు కూడా చేసింది. అటువంటి పిర్యాదు వస్తే పరిశీలిస్తామని కమీషనర్ సంపత్ ముందే చెప్పారు గనుక వెంటనే పిర్యాదు స్వీకరించి నేడో రేపో సోనియమ్మను సంజాయిషీ కోరుతూ నోటీసు పంపవచ్చును. అయితే సుప్రీం కోర్టు చేత మొట్టికాయలు వేయించుకొన్నపుడే అదరలేదు..బెదరలేదు, అందువల్ల ఎన్నికల కమీషన్ నోటీసులు చూసి కాంగ్రెస్ పార్టీ బెంబేలెత్తిపోదని ఖచ్చితంగా చెప్పవచ్చును.
      కేసీఆర్ తనకి ప్రాధాన్యం లేని, ఓడిపోయే హుజూర్ నగర్ టిక్కెట్ కేటాయించడంతో ఆగ్రహంగా వున్న శంకరమ్మని టీఆర్ఎస్ నాయకత్వం ఎంతమాత్రం పట్టించుకోవడం లేదు. పోటీ చేస్తే చెయ్ లేకపోతే లేదన్నట్టు వ్యవహరిస్తున్నారు. అమరవీరుల త్యాగ ఫలితంగా తెలంగాణ వస్తే, ఆ అమరవీరుల కుటుంబాలనే చిన్నచూపు చూస్తున్న కేసీఆర్ మీద శంకరమ్మతోపాటు అమరవీరుల కుటుంబాల వారు చాలా ఆగ్రహంగా ఉన్నారు.   శంకరమ్మ ఎంత వద్దని చెప్పినా హుజూర్ నగర్ టిక్కెట్‌నే ఆమెని కేటాయించడం అన్యాయమని వారు అంటున్నారు. ఇదిలా వుంటే, కేసీఆర్ మీద తీవ్ర ఆగ్రహంగా వున్న శంకరమ్మకి న్యాయం చేయాలని, అమరవీరుల త్యాగాలకు తగిన గుర్తింపు ఇవ్వాలని తెలుగుదేశం పార్టీ భావిస్తున్నట్టు తెలుస్తోంది. శంకరమ్మకి తెలుగుదేశం పార్టీ నుంచి టిక్కెట్ ఇవ్వాలని, అది కూడా ప్రస్తుతం తెలుగుదేశం సిట్టింగ్ ఎమ్మెల్యే వుండగా, తప్పకుండా గెలిచే స్థానాన్ని శంకరమ్మకి ఇవ్వాలని తెలుగుదేశం పార్టీ తెలంగాణ నాయకత్వం భావిస్తున్నట్టు తెలుస్తోంది. తెలుగుదేశం పార్టీ ఇప్పటికే శంకరమ్మ పోటీ చేసే నియోజకవర్గంలో అభ్యర్థిని పోటీ పెట్టకూడదని నిర్ణయం తీసుకున్నట్టు తెలుస్తోంది. అయితే ఇప్పుడు శంకరమ్మ హుజూర్ నగర్ స్థానాన్ని వ్యతిరేకిస్తూ వుండటంతో ఆమెతో సంప్రదింపులు జరపాలని టీ టీడీపీ నాయకులు ప్రయత్నాలు ముమ్మరం చేసినట్టు సమాచారం.
      క్రికెట్ ప్రియులు ఎంతో ఆసక్తిగా ఎదురుచూస్తున్న టీ 20 సెమీ ఫైనల్ లెక్క ప్రకారం శుక్రవారం సాయంత్రం ఆరున్నర నుంచి ప్రారంభం కావలసి వుంది. ఇండియా – దక్షిణాఫ్రియా జట్ల మధ్య బంగ్లాదేశ్‌లోని ఢాకా స్టేడియంలో జరుగుతుంది. గురువారం నాడు వెస్టిండీస్ – శ్రీలంక మధ్య జరిగిన తొలి సెమీ ఫైనల్ వర్షం కారణంగా అంతరాయాన్ని ఎదుర్కొంది. వర్షం పెరిగిపోయి మ్యాచ్ ఆగిపోవడం వల్ల తలాతోకా లేని డక్‌వర్త్ లూయిస్ పద్ధతి కారణంగా వెస్టిండీస్ మ్యాచ్ ఓడిపోయింది. అలాంటి పరిస్థితి ఇండియా ఆడే మ్యాచ్‌కి కూడా వస్తుందేమోనని క్రికెట్ అభిమానులు భయపడుతున్నారు.   ఇప్పటికే ఢాకా స్టేడియం దగ్గర వర్షం వచ్చేదా వద్దా అన్నట్టుగా మబ్బులు కమ్మి వున్నాయి. మ్యాచ్‌కి ముందే గనుక వర్షం పడి మ్యాచ్ రద్దయితే రన్ రేట్ ఆధారంగా ఇండియా ఫైనల్‌కి చేరుకుంటుంది. అయితే టాస్ గెలిచిన దక్షిణాఫ్రికా మొదట బ్యాటింగ్ చేయాలని నిర్ణయించుకుంది. ఇండియా బ్యాటింగ్ చేసే సమయంలో వర్షం పడితే మాత్రం ఇండియా డక్ వర్త్ లూయిస్ పద్ధతికి బలైపోయే ప్రమాదం వుందని ఇండియా క్రికెట్ అభిమానులు భయపడుతున్నారు.
      తెలంగాణవాదులు అమరవీరుడని కొనియాడే శ్రీకాంతాచారి తల్లి శంకరమ్మ టీఆర్ఎస్ అధినేత కేసీఆర్ని బతిమాలో, బెదిరించో ఎమ్మెల్యే టిక్కెట్ పొందడానికి హామీ పొందింది. కేసీఆర్ ఆమెకి ఎట్టి పరిస్థితుల్లోనూ టీఆర్ఎస్ అభ్యర్థి గెలవని నల్లగొండ జిల్లాలోని హుజూర్ నగర్ అసెంబ్లీ టిక్కెట్ ఇస్తానని చెప్పారు. అయితే గెలవని సీటు తనకి ఎందుకు అని శంకరమ్మ నెత్తీనోరు బాదుకుంటున్నప్పటికీ శుక్రవారం నాడు కేసీఆర్ ప్రకటించిన తొలి విడత అభ్యర్థుల లిస్టులో శంకరమ్మకు హుజూర్ నగర్ టిక్కెట్ కేటాయిస్తున్నట్టు ప్రకటించారు.   అయితే ఈ నిర్ణయం శంకరమ్మకి ఆగ్రహం తెప్పించినట్టు తెలుస్తోంది. తను వద్దు మొర్రో అంటున్నా తాను ఖచ్చితంగా ఓడిపోయే సీటుని కేటాయించడం అన్యాయమని ఆమె తన సన్నిహితుల వద్ద వాపోతున్నట్టు తెలిసింది.  కేసీఆర్ ప్రకటించినప్పటికీ తాను హుజూర్ నగర్ స్థానం నుంచి పోటీ చేయబోనని, తనకు గెలిచే స్థానం ఇస్తేనే పోటీ చేస్తానని శంకరమ్మ అంటున్నట్టు సమాచారం. అయితే శంకరమ్మ ఆక్రోశాన్ని టీఆర్ఎస్ నాయకులెవరూ పట్టించుకోవడంలేదు. పోనీలేపాపం అని ఎమ్మెల్యే టిక్కెట్ ఇస్తే, ఖర్చులు కూడా మేమే పెట్టుకుంటూ వుంటే ఇంకా కోరికలు కోరడం బాగాలేదని వారు అభిప్రాయ పడుతున్నారు. అయితే శంకరమ్మ మాత్రం తన పట్టు విడిచిపెట్టడం లేదని సమాచారం. తనకు గెలిచే టిక్కెట్ ఇవ్వకుంటే తాను మరో పార్టీ నుంచి గెలిచే నియోజకవర్గం నుంచి పోటీ చేస్తానని శంకరమ్మ అంటున్నా ఆమెని కేసీఆర్ లైట్‌గా తీసుకుంటున్నారు. దాంతో కేసీఆర్ మీద తీవ్ర ఆగ్రహంగా వున్న శంకరమ్మ భవిష్యత్ కార్యాచరణ గురించి ఆలోచిస్తున్నట్టు తెలుస్తోంది.
      మలేసియాకి చెందిన ఎంహెచ్ 370 విమానం హిందూ మహాసముద్రంలో అదృశ్యమై నెలరోజులు కావొస్తోంది. విమానంతోపాటు విమానంలో ప్రయాణిస్తున్న 239 ప్రయాణికుల జాద తెలియడం లేదు. మలేసియాతోపాటు అమెరికా, చైనా తదితర దేశాలు ఎంత వెతికినా విమానం ఎక్కడుందో, ఏమైందో ఎవరూ పసిగట్టలేకపోయారు. వచ్చే సోమవారం లోపు ఈ విమానం ఎక్కడుందో కనుక్కోలేకపోతే ఇక ఆ విమానాన్ని మరచిపోవాల్సిందేనని మలేసియాకి చెందిన ఒక అధికారి వ్యాఖ్యానించారు. ఎందుకంటే ఆరోజుతో విమానంలోని బ్లాక్ బాక్స్ సిగ్నల్స్ పంపడం ఆపేస్తుంది. దాదాపు నెల రోజులుగా విమానాలు, హెలికాప్టర్లు, స్టీమర్లతో వెతికారు. మొన్నీమధ్య సబ్ మెరైన్లు కూడా రంగంలోకి దిగాయి. కానీ, ఇంతవరకు ఈ విమానం జాడ తెలియలేదు. అయితే, విమానం జాడ కనుక్కునేవరకూ తాము విశ్రాంతి తీసుకునే ప్రసక్తే లేదని మలేసియా ప్రధానమంత్రి ప్రకటించారు.
      ఎన్నికల సందర్భంగా దేశవ్యాప్తంగా జంప్ జిలానీల కార్యక్రమం ముమ్మరంగా జరుగుతోంది. ఆ పార్టీలోంచి ఈ పార్టీలోకి ఈ పార్టీలోంచి ఆ పార్టీలోకి నాయకులు మారుతూ వుండటం నేచురల్. అయితే రాజకీయాల్లో శాశ్వత మిత్రులు, శాశ్వత శత్రువులు వుండరు. ఏ నాయకుడు ఎప్పుడైనా ఏ పార్టీలో అయినా చేరొచ్చు. అయితే నందమూరి లక్ష్మీపార్వతి మేడమ్ విషయంలో మాత్రం ఈ సూత్రం వర్తించదు. ఆమె ఏ పార్టీలో అయినా చేరొచ్చుగానీ, చంద్రబాబు నాయకత్వంలోని తెలుగుదేశం పార్టీలో చేరే అవకాశం ఎంతమాత్రం లేదు.. లేదు.. లేదు.. లేనేలేదు!   లక్ష్మీపార్వతి, చంద్రబాబు మధ్య ఎంతటి వైరం వుందో, చంద్రబాబు మీద ఆమెకి ఎంత పగ వుందో ఫ్లాష్ బ్యాక్ రాజకీయాలు తెలిసిన వాళ్ళందరికీ బాగా తెలుసు. అలాంటి లక్ష్మీపార్వతి మేడమ్ తెలుగుదేశం పార్టీలో చేరబోతున్నట్టు పుకార్లు వచ్చేసరికి అందరూ ఆశ్చర్యపోయారు. ఈ పుకారు విన్నవాళ్ళందరూ ఇది కలా, నిజమా అనుకున్నారు. తామసలు జీవించి ఈ భూమ్మీదే వున్నామా అనే సందేహాలు కూడా చాలామందికి వచ్చాయి.  ఈ పుకార్లు విని లబోదిబోమన్న లక్ష్మీ పార్వతి వెంటనే వాటిని ఖండించారు. తానేంటి.. తెలుగుదేశం పార్టీలో చేరడమేంటని విస్తుపోయారు. ఇలాంటి దారుణమైన పుకార్లను సృష్టించవద్దని విజ్ఞప్తి చేశారు.
      టీఆర్ఎస్ అధినేత కేసీఆర్ పార్టీ నుంచి పోటీ చేసే 69 అభ్యర్థుల లిస్టుతోపాటు పార్టీ మేనిఫెస్టో కూడా ప్రకటించారు. జనానికి ఆయన ప్రకటించే అభ్యర్థుల పేర్ల మీద ఇంట్రెస్టే తప్ప మేనిఫెస్టో మీద ఎంతమాత్రం ఇంట్రస్ట్ లేకుండా పోయింది. సాధారణంగా ఏ పార్టీ మేనిఫెస్టో ప్రకటిస్తున్నా జనం అందులో ఏముంటుందోనని ఆసక్తిగా ఎదురుచూస్తారు. అయితే టీఆర్ఎస్ మేనిఫెస్టో విషయంలో మాత్రం అలాంటి ఇంట్రెస్ట్ కొంచెం కూడా లేదు. ఎందుకంటే కేసీఆర్ ఇప్పటికే వంద మేనిఫెస్టోలకి సరిపోయేటన్ని వాగ్దానాలు ఆల్రెడీ చేసేశారు. నోటికొచ్చిన వాగ్దానాలు, అమలు అస్సలు సాధ్యం కాని వాగ్దానాలు, హామీలు ఇప్పటి వరకు ఆయన లెక్కలేనన్ని చేశారు. ఈ వాగ్దానాలే పార్టీ మేనిఫెస్టోలో కూడా వుంటాయి కాబట్టి దాన్ని ఎవరూ పెద్దగా పట్టించుకోలేదు. జనం అనుకున్నట్టే టీఆర్ఎస్ మేనిఫెస్టో నిండా గాలిమేడల వాగ్దానాలు వున్నాయి. కేసీఆర్ వాగ్దానాలు వినీ వినీ వుండటం వల్ల మేనిఫెస్టోలో విషయాలన్నీ పాత చింతకాయ పచ్చడిలా అనిపిస్తున్నాయని తెలంగాణవాదులే అంటున్నారు.
      శుక్రవారం నాడు టీఆర్ఎస్ అసెంబ్లీకి పోటీ చేసే 75 మంది అభ్యర్థుల పేర్లను ప్రకటిస్తారని, ఆ లిస్టు ఆల్రెడీ తయారైందన్న వార్తలు వచ్చాయి. అయితే తీరా కేసీఆర్ 69 మందితో మాత్రమే లిస్టు ప్రకటించాడు. వాళ్ళలో పరకాల ఎమ్మెల్యే బిక్షపతి పేరు లేదు. పరకాల సీటును కొండా సురేఖ భర్త కొండా మురళికి ఇవ్వాలన్న ఉద్దేశంతో బిక్షపతికి కేసీఆర్ హేండిచ్చాడని, దీంతో బిక్షపతి బీజేపీ లేదా కాంగ్రెస్‌లో చేరాలని ఆలోచిస్తున్నట్టు తెలుస్తోంది. అలాగే మరో ఐదుగురి పేర్లు గల్లంతయ్యాయి. ఆల్రెడీ టిక్కెట్లు ఖరారైనప్పటికీ వాళ్ళ పేర్లు ఎందుకు ప్రకటించలేదని ఆరా తీస్తే, ఆ ఐదుగురూ కాంగ్రెస్‌లోకి జంప్ అయ్యే ఆలోచనలో వున్నారట. అందుకే లిస్టులో వాళ్ళ పేర్లు ప్రకటించలేదన్న అభిప్రాయాలు వ్యక్తమవుతున్నాయి.
      దర్శకుడు దాసరి నారాయణరావు సంచలనాత్మక ప్రకటన చేశారు. రాష్ట్రం విడిపోవడానికి ఒక బ్రోకర్ కారణమని, ఆ బ్రోకర్ ఎవరో త్వరలో వెల్లడిస్తానని దాసరి ప్రకటించారు. ఈ స్టేట్‌మెంట్ రాష్ట్ర రాజకీయాలలో సంచలనం సృష్టించింది. ఆ బ్రోకర్ ఎవరన్న ఆలోచనలు మొదలైయ్యాయి. అలా ఆలోచిస్తున్న కొద్దీ రకరకాల పేర్లు కళ్ళ ముందు కదులుతున్నాయి. దాసరి జగన్ గురించి అన్నాడా, కిరణ్ గురించి అన్నాడా, చిరంజీవి గురించి అన్నాడా అన్న సందేహాలు కలుగుతున్నాయి. రాష్ట్ర విభజనకు కారణం ఒక బ్రోకర్ కారణం అని చెప్పిన దాసరి ఆ బ్రోకర్ ఎవరో కూడా చెబితే బాగుండేది కదా. అయినా దాసరి స్టైలే అంత. ఎవర్ని తిట్టదలుచుకున్నాడో వాళ్ళని డైరెక్ట్ గా తిట్టడు. ఇలాగే డొంకతిరుగుడుగా తిడతాడు. జనాలు కన్‌ఫ్యూజ్ అయి ‘ఎవరా?’ అని జుట్టు పీక్కుంటారు. మీరు గమనిస్తూ వుండండి.. ఆ బ్రోకర్ ఎవరో, ఆ బ్రోకర్ పేరేమిటో దాసరి ఎప్పటికీ చెప్పడు.
      అవసరమైతే కేసీఆర్‌ని జైల్లో పెడతామని కేంద్ర మంత్రి జేడీ శీలం ప్రకటించడం సంచలనం సృష్టించింది. ఆయన ఈ కామెంట్ పోలవరం ప్రాజెక్టు విషయంలో చేశారు. పోలవరం ప్రాజెక్టు నూటికి నూరు శాతం చట్టబద్ధమైన ప్రాజెక్టు అని, పోలవరం ప్రాజెక్టుకు అడ్డు పడితే కేసీఆర్‌ని జైల్లో పెట్టి అయినా పోలవరం ప్రాజెక్టుని పూర్తి చేస్తామని జేడీ శీలం చెప్పారు. కాంగ్రెస్ పార్టీ మళ్ళీ అధికారంలోకి వస్తుందన్న నమ్మకం వున్న జేడీ శీలం అమాయకత్వానికి మొదట అందరూ జాలిపడాలి. ఇదిలావుంటే, విభజన వల్ల ఎవరీకి నష్టం లేదని, సీమాంధ్రులు దోచుకుంటున్నారని మొత్తుకుంటున్న మారీచుల బారి నుంచి సీమాంధ్రులు విభజన పుణ్యమా అని తప్పించుకుంటున్నారని ఆయన వ్యాఖ్యానించారు.
      త్వరలో జరగనున్న శాసన సభ ఎన్నికల్లో బరిలోకి దిగే టీఆర్ఎస్ అభ్యర్థుల పేర్లను ఆ పార్టీ అధినేత కేసీఆర్ ఖరారు చేశారు. 69 మంది అభ్యర్థులతో కూడిన తొలి జాబితాను ఆయన విడుదల చేశారు. కేసీఆర్ గజ్వేల్ నుంచి పోటీ చేయనున్నారు. తొలి జాబితలో 55 శాతం సీట్లు బలహీన వర్గాలకు కేటాయించామని కేసీఆర్ తెలిపారు. అలాగే ఏ పార్టీలతో పొత్తులు లేవని...వచ్చే ఎన్నికల్లో ఒంటరిగా బరిలోగి దిగనున్నట్లు ఆయన స్పష్టం చేశారు. టీఆర్ఎస్ పార్టీ 69 మంది అసెంబ్లీ అభ్యర్ధులు వీరే: గజ్వేల్- కేసీఆర్, హుజూరాబాద్- ఈటెలరాజేందర్, సిద్దిపేట-హరీశ్‌రావు, బాన్సువాడ- పోచారం శ్రీనివాస్‌రెడ్డి ఆదిలాబాద్-జోగు రామన్న పరిగి- కొప్పుల ఈశ్వర్, బోథ్-జి. నగేశ్, కొల్లాపూర్- జూపల్లి కృష్ణారావు, ముథోల్- వేణుగోపాలచారి, తాండూర్-పి. మహేందర్‌రెడ్డి డోర్నకల్- సత్యవతి రాథోడ్, ధర్మపురి- కొప్పుల ఈశ్వర్, వరంగల్ (వెన్ట్)-దాస్యం వినయ్ భాస్కర్, వేములవాడ- సి.హెచ్ రమేశ్ బాబు కరీంనగర్ - గంగుల కమలాకర్ కోరుట్ల - విద్యాసాగర్ రావు చెన్నూరు- నల్లాల ఓదేలు ఎల్లారెడ్డి- ఏనుగు రవీందర్ రెడ్డి జుక్కల్ - హన్మంత్ షిండే కామారెడ్డి- గంప గోవర్ధన్ రామగుండం- సోమారపు సత్యనారాయణ స్టేషన్ ఘన్ పూర్ - టీ. రాజయ్య సిర్పూర్ - కావేటి సమ్మయ్య చేవెళ్ల - కే. ఎస్ రత్నం సిరిసిల్ల- కే.టీ. రామారావు మక్తల్ - వై ఎల్లారెడ్డి కల్వకుర్తి- జైపాల్ యాదవ్ సికింద్రాబాద్- టి. పద్మారావు భూపాలపల్లి- ఎస్ మధుసుదానాచారి సూర్యాపేట-జగదీశ్వర్ రెడ్డి మహబూబ్ నగర్- వి. శ్రీనివాస్ గౌడ్ వనపర్తి- నిరంజన్ రెడ్డి సత్తుపల్లి- పిడమర్తి రవి నర్సంపేట- సుదర్శన్ రెడ్డి మలుగు- అజ్మీరా చందులాల్ జడ్చర్ల - సి. లక్ష్మారెడ్డి వరంగల్ ( ఈస్ట్)- కొండా సురేఖ బోధన్- షకీల్ అహ్మద్ ఆలేరు - గొంగడి సునీత అచ్చంపేట- గువ్వల బాలరాజు పాలకూర్తి- ఎన్ సుధాకర్ రావు దేవరకద్ర- ఎ. వెంకటేశ్వరరెడ్డి మానకొండూరు- రసమయి బాలకిషన్ హుస్నాబాద్ -వి. సతీష్ కుమార్ ఆలంపూర్ - ఎమ్ శ్రీనాథ్ జనగాం- ముత్తిరెడ్డి యాదగిరి రెడ్డి దేవరకొండ- లాలు నాయక్ పెద్దపల్లి- డి. మనోహర్ రెడ్డి, వికారాబాద్ -బి. సంజీవరావు గద్వాల- కృష్ణమోహన్ రెడ్డి నకిరేకల్ - వీరేశం మేడ్చల్ - సుధీర్ రెడ్డి జోగిపేట- బాబుమోహన్ మెదక్ - పద్మాదేవేందర్ రెడ్డి వర్ధన్నపేట- రమేశ్ నిర్మల్ - శ్రీహరిరావు బెల్లంపల్లి- చిన్నయ్య నాగర్ కర్నూల్ - మర్రి జనార్ధన్ రెడ్డి ఖానాపూర్ - రేఖానాయక్ ఆర్మూర్ - ఏ. జీవన్ రెడ్డి ఆసిఫాబాద్ - కోవా లక్ష్మీ బాల్కొండ - వి. ప్రశాంత్ రెడ్డి పటాన్‌చెరు - మహిపాల్‌రెడ్డి సంగారెడ్డి - చింతా ప్రభాకర్
      టైటానియం కుంభకోణం కేసులో కేవీపీతో పాటు వైకాపా అధినేత జగన్ మోహన్ రెడ్డికి కూడా సంబంధం వుందని టిడిపి అధినేత చంద్రబాబు నాయుడు ఆరోపి౦చారు. డబ్బుల కోసం అంతర్జాతీయ క్రిమినల్స్ తో చేతులు కలిపి దేశం పరువు తీశారని మండిపడ్డారు. బెయిల్ కోసం వెయ్యి కోట్లు చెల్లించిన వ్యక్తులతో బేరసారాలు చేసారని అన్నారు. క్రిమినల్స్‌తో కలిసి ప్రపంచమంతా నెట్‌వర్క్ ఏర్పాటు చేసుకున్నారని, ఆ డబ్బు తెచ్చి ఇక్కడ ఓటుకు రూ. వెయ్యి, రెండు వేలు పంచి పెడుతున్నారని, లక్ష కోట్లు సంపాదించి ఎన్నికల్లో ఐదు, పది వేల కోట్లు ఖర్చు చేయడం వీరికి ఒక లెక్క కాదని చెప్పారు. ఇలాంటి వ్యక్తులు దేశాన్ని కాపాడతారా లేక అమ్మేస్తారా అని ప్రశ్నించారు. నాకు ఎవరిపైనా వ్యక్తిగతంగా కోపం లేదని, ప్రజల సొమ్మును దోపిడీ చేసిన వారిని వదిలిపెట్టామని హెచ్చరించారు.

మండలి పోరులో కమ్యూనిస్టులు.. కేసీఆర్ నయా ప్లాన్! 

రాజకీయ వ్యూహాల్లో తెలంగాణ సీఎం కేసీఆర్ దిట్ట అంటుంటారు. పరిస్థితులు బాగున్నప్పుడు ఒకలా,,, తనకు అనుకూలంగా లేనప్పుడు మరోలా ఆయన అడుగులు వేస్తుంటారు. అవసరమైతే పూర్తి భిన్నమైన వైఖరులు కూడా తీసుకుంటారు. ఎంతకైనా తెగిస్తారు. అందుకే కేసీఆర్ కు మాటమీద నిలబడరనే ఆరోపణలున్నాయి. అవేమి పట్టించుకోని కేసీఆర్.. తాను అనుకున్నది సాధించేందుకు వెనక్కి తగ్గరనే అభిప్రాయం ఉంది. తెలంగాణలో త్వరలో జరగనున్న పట్టభద్రుల శాసనమండలి ఎన్నికల్లోనూ కేసీఆర్ ఇదే తరహా కొత్త ఎత్తులు వేస్తున్నారు.    కేసీఆర్ సర్కార్ పై ఉద్యోగులు, నిరుద్యోగుల్లో తీవ్ర వ్యతిరేకత ఉంది. టీఆర్ఎస్ నేతలే ఈ విషయాన్ని బహిరంగంగా చెబుతున్నారు. త్వరలో జరగనున్న రెండు పట్టభద్రుల ఎమ్మెల్సీ ఎన్నికల్లో మెజార్టీ ఓటర్లు వీరే. అందుకే మండలి ఎన్నికలు కారు పార్టీని టెన్షన్ పెట్టిస్తున్నాయి. అధికార పార్టీ నుంచి పోటీ చేసేందుకు అభ్యర్థులు కూడా ముందుకు రాని పరిస్థితి ఉంది. పార్టీ పరిస్థితిని అంచనా వేసిన గులాబీ బాస్ మండలి ఎన్నికల్లో గెలుపు కోసం మరో స్కెచ్ వేస్తున్నట్లు కనిపిస్తోంది. ప్రభుత్వ వ్యతిరేక ఓటు ఒకవైపు వెళ్లకుండా, చీలిపోయేలా ఆయన ప్లాన్ చేస్తున్నారని తెలుస్తోంది. వీలైనంత ఎక్కువ మంది అభ్యర్థులు మండలి బరిలో ఉండేలా పావులు కదుపుతున్నారు. కేసీఆర్ ప్లాన్ లో భాగంగానే మండలి ఎన్నికల్లో కమ్యూనిస్టులు పోటీ చేయాలని నిర్ణయించారనే ప్రచారం జరుగుతోంది. అందుకే టీజేఎస్ అధ్యక్షుడు కోదండరామ్ కు వామపక్షాలు మద్దతు ఇవ్వడం లేదని తెలుస్తోంది.   గత అసెంబ్లీ ఎన్నికల్లో కాంగ్రెస్, టీడీపీ, టీజేఎస్ తో కలిసి కమ్యూనిస్టులు పోటీ చేశారు. ఎన్నికల తర్వాత కూడా కోదండరామ్ తో కలిసి పలు ఉద్యమాలు చేశారు. వామపక్ష పోరాట కార్యక్రమాలకు కోదండరామ్ తప్పనిసరిగా హాజరవుతూ వస్తున్నారు. ఇంతవరకు బాగానే ఉన్నా ఇప్పుడే యూటర్న్ తీసుకుంటున్నారు కమ్యూనిస్టు నేతలు. టీజేఏసీ చైర్మెన్ గా తెలంగాణ ఉద్యమాన్ని నడిపించిన, ఇంతకాలం తమ ఉద్యమాలకు మద్దతుగా  కోదండరామ్ ఎమ్మెల్సీ బరిలో ఉంటుంటే మాత్రం ఆయనకు సపోర్ట్ చేయడం లేదు. కోదండరామ్ కు మద్దతు ఇవ్వాలని టీజేఎస్ అధికారికంగా లేఖలు రాసినా కమ్యూనిస్టు పార్టీలు స్పందించలేదని సమాచారం.    శాసనమండలి ఎన్నికలో పోటీ చేయబోతున్న కోదండరామ్ కు వామపక్షాలు సపోర్ట్ చేయకపోవడం ఇప్పుడు చర్చనీయాంశంగా మారింది. వామపక్షాల తీరుపై రాజకీయ వర్గాల్లో ఆసక్తికర చర్చలు జరుగుతున్నాయి. గత పట్టభద్రుల మండలి ఎన్నికల్లో కమ్యూనిస్టులు పోటీ చేయలేదు. అలాంటిది ఇప్పుడు ఎందుకు పోటీలో ఉంటున్నారనే ప్రశ్నలు వస్తున్నాయి. కేసీఆర్ చెప్పడం వల్లే మండలి ఎన్నికల్లో పోటీ చేయాలని నిర్ణయించాయనే అభిప్రాయం వ్యక్తమవుతోంది. కాంగ్రెస్, బీజేపీ, కోదండరామ్ తో పాటు వామపక్ష అభ్యర్థి, పోటీలో ఉంటే ప్రభుత్వ వ్యతిరేక ఓటు చీలి పోతుందని, అంతిమంగా అది అధికార పార్టీకి లాభిస్తుందని రాజకీయ విశ్లేషకులు అంచనా వేస్తున్నారు. అందుకే కేసీఆర్ డైరెక్టుగా వారితో పొత్తు పెట్టుకోకుండా.. మండలి ఎన్నికల్లో మరో దారిలో వస్తున్నారని చెబుతున్నారు.    అసెంబ్లీ సమావేశం సందర్భంగా సీపీఐ రాష్ట్ర కార్యదర్శి చాడా వెంకట్ రెడ్డితో కలిసి కేసీఆర్ లంచ్ చేశారు. దుబ్బాక అసెంబ్లీ ఉప ఎన్నికతో పాటు మండలి పట్టభద్రుల ఎమ్మెల్సీ ఎన్నికలపై మాట్లాడటానికే చాడాను కేసీఆర్ పిలిపించినట్లు అప్పుడే ప్రచారం జరిగింది. కాని సీపీఐ నేతలు మాత్రం ఖండించారు. కొత్త రెవిన్యూ చట్టం గురించే చాడాతో ముఖ్యమంత్రి మాట్లాడారని వివరణ ఇచ్చారు. అయితే తాజాగా జరుగుతున్న పరిణామాలతో ఎన్నికల గురించే కేసీఆర్ సీపీఐ నేతతో మాట్లాడినట్లు అంతా అభిప్రాయపడుతున్నారు. దుబ్బాక అసెంబ్లీ ఉప ఎన్నికపైనా కమ్యూనిస్టులు ఇంకా తమ వైఖరిని ప్రకటించకపోవడాన్ని వారు గుర్తు చేస్తున్నారు. దుబ్బాకలోనూ అధికార పార్టీకి వామపక్ష పార్టీలు మద్దతు ఇవ్వొచ్చని చెబుతున్నారు.

సీనియర్ల దక్కని చోటు.. జీవీఎల్ కు అదే మైనసా! 

భారతీయ జనతా పార్టీ కొత్త జాతీయ కమిటిలో తెలుగు రాష్ట్రాల నుంచి నలుగురికి చోటు దక్కగా.. గతంలో కమిటీలో పనిచేసిన ముగ్గురు సీనియర్లను తప్పించారు. ఇప్పటివరకు బీజేపీ ప్రధాన కార్యదర్శులుగా ఉన్న రాంమాధవ్‌, మురళీధర్‌రావులను తప్పించారు. జాతీయ అధికార ప్రతినిధిగా ఉన్న జీవీఎల్ నరసింహరావును ఈసారి జాతీయ కమిటీలోకి తీసుకోలేదు. ఈ ముగ్గురు సీనియర్ నేతలకు జేపీ నడ్డా టీమ్ వో  చోటు దక్కకపోవడంపై ఆసక్తి కర చర్చ జరుగుతోంది. బీజేపీలోనే భిన్న వాదనలు వినిపిస్తున్నాయి.                      రాజ్యసభ సభ్యుడిగా ఉన్న జీవీఎల్‌ నరసింహారావు ఆంధ్రప్రదేశ్‌ వ్యవహారాల్లో తలదూర్చి వైసీపీకి అనుకూలంగా వ్యవహరిస్తున్నారన్న ఆరోపణలు చాలా కాలంగా ఉన్నాయి. అన్ని అంశాల్లోనూ జీవీఎల్ వైఖరి వైసీపీకి అనుకూలంగా, టీడీపీకి వ్యతిరేకంగా ఉంటుందనే గతంలోనే హైకమాండ్ కు కొందరు నేతలు ఫిర్యాదులు చేశారు. అమరావతి విషయంలోనూ రాష్ట్ర నేతల అభిప్రాయానికి భిన్నంగా జీవీఎల్ ప్రకటనలు ఇచ్చేవారనే విమర్శలు బీజేపీలోనే ఉన్నాయి. జగన్ ప్రభుత్వంపై వచ్చే అవినీతి ఆరోపణల విషయంలోనూ జీవీఎల్ ప్రకటనలు రాష్ట్ర పార్టీకి ఇబ్బందికరంగా మారాయి. వైసీపీ ప్రభుత్వ వైఫల్యాలపై ప్రజల్లో పోరాడాలని భావించిన రాష్ట్ర నేతలకు జీవీఎల్ ప్రకటనలు చాలా సార్లు అడ్డంకులు కల్పించాయి. దీంతో రాష్ట్ర నేతల నుంచి వచ్చిన అభిప్రాయాలు.. కొన్ని రోజులుగా జరుగుతున్న పరిణామాలను పరిశీలించాకే జీవీఎల్ ను అధికార ప్రతినిధి బాధ్యతల నుంచి హైకమాండ్ తప్పించిందని  బీజేపీ వర్గాల్లో  ప్రచారం జరుగుతోంది.    జాతీయ కమిటీలో స్థానం కోల్పోయిన తెలంగాణకు చెందిన సీనియర్ నేత మురళీధర్‌రావుపైనా ఇదే రకమైన చర్చ జరుగుతోంది. తెలంగాణ ముఖ్యమంత్రి కేసీఆర్ కు మురళీధర్ సన్నిహితంగా ఉంటారనే ఆరోపణలున్నాయి. తెలంగాణ ప్రభుత్వంపై పోరాటంలో ఆయన ఎప్పడూ యాక్టివ్ గా లేరని తెలంగాణ బీజేపీ నేతలు చెబుతున్నారు. ఈ కారణంగానే ఆయనను తప్పించారని సమాచారం. కరీంనగర్ కు చెందిన బండి సంజయ్ పార్టీ అధ్యక్షుడిగా ఉన్నందున.. అదే జిల్లాకు చెందిన మురళీధర్ రావును జాతీయ కమిటి నుంచి తప్పించారనే చర్చ కూడా జరుగుతోంది. ఉత్తర తెలంగాణ వ్యక్తికి పార్టీ అధ్యక్ష బాధ్యతలు ఇచ్చినందున..దక్షిణ తెలంగాణకు చెందిన డీకే అరుణకు వైస్ ప్రెసిడెంట్ పోస్ట్ కట్టబెట్టారని భావిస్తున్నారు.    పార్టీ సినియర్ నేత రాంమాధవ్ ను జాతీయ కమిటి నుంచి తప్పిస్తారని చాలా  కాలంగా ప్రచారం జరుగుతోంది. రాంమాధవ్‌ను గత కొంతకాలంగా పార్టీ వివిధ బాధ్యతల నుంచి తప్పిస్తూ వస్తున్నారు. ప్రధాని నరేంద్రమోడీ త్వరలో తన కేబినెట్‌ను విస్తరించనున్నట్లు, అందులో రాంమాధవ్ కు అవకాశం కల్పిస్తారని పార్టీ వర్గాలు చెబుతున్నాయి. అందుకే రాంమాధవ్ కు జాతీయ కమిటీలో చోటు దక్కలేదంటున్నారు.    భారతీయ జనతా పార్టీ కొత్త జాతీయ కమిటీలో తెలుగు రాష్ట్రాలకు సముచిత ప్రాధాన్యత దక్కింది. ఏపీ నుంచి ఇద్దరు, తెలంగాణ నుంచి ఇద్దరు నేతలతు జేపీ నడ్డా టీమ్ లో చోటు దక్కింది. తెలంగాణకు చెందిన మాజీ మంత్రి డీకే అరుణకు వైస్ ప్రెసిడెంట్  ఏపీ నుంచి  దగ్గుబాటి పురందేశ్వరికి  జాతీయ ప్రధాన కార్యదర్శి పదవి దక్కింది. కార్యదర్శిగా ఉన్న సత్యకుమార్‌ను అదే పదవిలో కొనసాగిస్తున్నారు. తెలంగాణ రాష్ట్ర శాఖ మాజీ అధ్యక్షుడు కె.లక్ష్మణ్‌ను ఓబీసీ మోర్చా జాతీయ అధ్యక్షుడిగా నియమించారు.

ఎస్పీ బాలు మృతికి రామోజీరావుకు ముడిపెడుతూ చిల్లర రాతలు

సోషల్ మీడియా వేదికగా కొందరు సన్నాసులు రెచ్చిపోతున్నారు. అసత్యాలు ప్రచారం చేస్తూ పైశాచికానందం పొందుతున్నారు. చీప్ పబ్లిసిటి కోసం, సొంత ప్రయోజనాల కోసం ప్రముఖులను బద్నాం చేస్తున్నారు. ఏపీలో కొన్ని వర్గాలే టార్గెట్ గా ఈ కుట్రలు చేస్తున్నారు. కావాలని బురద చల్లుతూ సిగ్గు లేని వెధవలు సంతోష పడుతున్నారు. అనారోగ్యంతో చనిపోయిన గాన గంధర్వుడు ఎస్పీ బాల సుబ్రమణ్యం మరణంపైనా పిచ్చోళ్లలా పిచ్చి రాతలు రాస్తున్నారు. ఈనాడు సంస్థల అధినేత రామోజీరావుపై బురద చల్లుతూ వికృత చేష్టలకు దిగారు బుద్ది, జ్ఞానం లేని చిల్లరగాళ్లు. ఎస్పీ బాలు చావుకు రామోజీరావుకు ముడిపెడుతూ చిల్లర రాతలకు దిగారు. రామోజీ రావు బలవంతం మీదే ఈటీవీ ప్రోగ్రామ్ లో పాల్గొనేందుకు చెన్నై నుంచి బాలసుబ్రమణ్యం హైదారాబాద్ వచ్చారని.. రామోజీ ఫిల్మ్ సిటీకి రావడంతోనే బాలుకి కరోనా సోకిందని  ప్రచారం చేస్తున్నారు. ఈటీవీ ఈవెంట్ లో పాల్గొన్న చాలా మంది కళాకారులకు కరోనా సోకిందని.. బాలు తప్ప అందరూ కోలుకున్నారని ఫేస్ బుక్ పేజీల్లో, వెబ్ సైట్లలో ఇష్టమెచ్చినట్లుగా రాసుకొచ్చారు. రామోజీ ఫిల్మ్  సిటీకి వెళ్లడం వల్లే బాలు చావు తెచ్చుకొన్నాడని, ఈ పాపం రామోజీ రావుదే నంటూ పైశాచికత్వం ప్రదర్శించారు.    అయితే సోషల్ మీడియాలో సన్నాసులు  ప్రచారం చేస్తున్నదంతా పచ్చి బూటకమని తేలిపోయింది. ఇటీవల కాలంలో రామోజీ ఫిల్మ్ స్టూడియోలో ఈటీవీ ప్రోగ్రామ్స్ ఏమి జరగలేదు. కరోనా సమయంలో ఈటీవికి సంబంధించి ఎలాంటి ఈవెంట్లు జరగలేదు. ఎస్పీ బాల సుబ్రమణ్యం పాల్గొన్నది ఈటీవీ ప్రోగ్రామ్ కానే కాదు. జూలై 18న హైదరాబాద్ వచ్చిన ఎస్పీ బాలు, చరణ్ లు మౌనరాగం మురళీ 100వ ఎల్పీ ఈవెంట్ లో పాల్గొన్నారు. ఆ కార్యక్రమానికి ఈటీవికి  ఎలాంటి సంబంధం లేదు. కాని ఈ విషయంపై కావాలనే కుట్రపూరితంగా రాతలు రాస్తున్నారు కొందరు వెధవలు. ఈటీవీ ప్రోగ్రామ్ లో పాల్గొనేందుకు రామోజీరావు బలవంతం మీద.. బాల సుబ్రమణ్యం హైదరాబాద్ వచ్చారని  కొందరు సన్నాసులు సోషల్ మీడియాలో అసత్య ప్రచారం చేస్తున్నారు.    ఈనాడు సంస్థల అధినేత రామోజీ రావు ఎస్పీ బాల సుబ్రమణ్యం మీద ఎంతో అప్యాయత చూపేవారు. పాడుతా తీయగా కార్యక్రమంటే రామోజీ రావుకు అత్యంత ఇష్టం. అందుకే ఎస్పీ బాలుతో నిర్వహించేవారు. బాలూనే ఈ విషయాన్ని చాలా వేదికలపై చెప్పారు. రామోజీరావు తనకెంతో ఇచ్చారని, తానే ఆయనేమి ఇవ్వలేదని చెప్పుకునేవారు. పాడుతా తీయగా కార్యక్రమంతో తన గౌరవం మరింత పెరిగిందని తెలిపేవారు బాలు. ఈ కార్యక్రమంతో తన పేరు కూడా ఎస్పీ బాలు కాకుండా పాడుతా తీయగా బాలుగా మారిందని చెబుతూ నవ్వుకునేవారు. అంతేకాదు ఓ ఈవెంట్ లో వేదికపైనే రామోజీ రావుకి సాష్టాంగ నమస్కారం చేశారు బాలసుబ్రమణ్యం. రామోజీ కూడా బాలును ఎంతో అప్యాయతతో ఆలింగనం చేసుకుని ఆయన పట్ల తనకున్న అభిమానాన్ని చాటుకున్నారు. అందుకే ఎప్పుడు మీడియా ముందుకు రాని రామోజీ రావు.. బాలు మరణంపై మాత్రం మీడియా ముందుకు వచ్చి తమ సంతాపం తెలిపారు. తన జీవిత కాలంలో రామోజీ మీడియా ముందుకు వచ్చి మాట్లాడడం ఇది కేవలం రెండోసారి మాత్రమే. మార్గదర్శి మీద అప్పటి వైఎస్సార్ సర్కార్ కుట్ర పూర్వక కేసు పెట్టినపుడు తమ ఖాతాదారులకు భరోసా కల్పించడానికి మెుదటి సారి రామోజీ మీడియా ముందుకు వచ్చారు. ఆయన చిన్న కొడుకు చనిపోయినపుడు కూడా మీడియా ముందుకు రాలేదు రామోజీ రావు. దీన్ని బట్టే చెప్పవచ్చు రామోజీకి, ఎస్పీ బాలు మీద ఉన్న గౌరవం, వారి మధ్య ఉన్న స్నేహం, ప్రేమ.    రామోజీ, ఎస్పీ బాలు మధ్య మంచి అనురాగ బంధాలుండగా.. కొందరు దుర్మార్గలు చావులోనూ చిల్లర చేష్టలకు దిగడం తెలుగు ప్రజలను విస్మయపరుస్తోంది. అయితే రామోజీరావుపై అసత్య ప్రచారం వెనుక పెద్ద కుట్రే ఉన్నట్లు కనిపిస్తోంది. ప్రభుత్వంలోని కొందరు పెద్దల డైరెక్షన్ లోనే ఇదంతా జరుగుతుందని సమాచారం. ఏపీలో కొంత కాలంగా కమ్మ నేతలు, కమ్మ వ్యాపారులు, కమ్మ సామాజిక వర్గంలోని ప్రముఖుల టార్గెట్ అయ్యారు. ఆ వర్గం వారిపైనే కేసులు నమోదవుతున్నాయి. ఇటీవల ఆలయాలపైనా దాడులు జరుగుతున్నాయి. రోజూ ఏదో ఒక చోట ఆలయంపై దాడి జరుగుతూనే ఉంది. ఏపీలో జరుగుతున్న పరిణామాలపై ప్రజలు తీవ్ర ఆగ్రహంగా ఉన్నారు. దీంతో ప్రజల దృష్టిని ఈ అంశంపై నుంచి మరల్చడానికే ఇలాంటి కుట్రలకు తెరలేపారని తెలుస్తోంది. బ్రహ్మణ, కమ్మ వర్గాల మధ్య చిచ్చు పెట్టాలన్నదే  చిల్లర కుట్రదారుల పన్నాగమని సమాచారం. ఎస్పీ బాలు బ్రహ్మణుడు కావడంతో అతని చావుకు రామోజీ రావు కారణమనే చిల్లర రాతలకు దిగారు. తమ ప్రచారంతో బ్రహ్మణులంతా కమ్మ వర్గాన్ని టార్గెట్ చేయాలన్నది వారి ప్లాన్ లో భాగమని భావిస్తున్నారు.   ఎస్పీ బాలసుబ్రమణ్యం మరణాన్ని రామోజీ రావుకు అంటగడుతూ చేస్తున్న ప్రచారంపై ప్రజలు భగ్గుమంటున్నారు. ప్రచారం కోసం ఇంతగా దిగజారడమేంటని ప్రశ్నిస్తున్నారు. సోషల్ మీడియా వేదికగా ప్రముఖులపై చిల్లర ప్రచారం చేసే వారిని కఠినంగా శిక్షించాలని డిమాండ్ చేస్తున్నారు. లేదంటే ఇలాంటి ఘటనలు మళ్లీ మళ్లీ జరగవచ్చనే ఆందోళన జనాల్లో వ్యక్తమవుతోంది.

రకుల్‌ పిటీషన్‌... కేంద్రానికి ఢిల్లీ హైకోర్టు నోటీసులు

  సుశాంత్‌ సింగ్‌ రాజ్‌పుత్‌ కేసులో డ్రగ్స్‌ కోణాన్ని వెలికితీసే పనిలో నార్కోటిక్స్‌ కంట్రోల్‌ బ్యూరో (ఎన్సీబీ) బిజీగా ఉంది. ఇప్పటికే కేసులో రియా చక్రవర్తి, ఆమె సోదరుడు షోవిక్‌ సహా కొందరిని అరెస్ట్‌ చేశారు. బాలీవుడ్‌ స్టార్‌ హీరోయిన్లు దీపికా పదుకొనే, శ్రద్ధా కపూర్‌, సారా అలీ ఖాన్‌, రకుల్‌కి సమన్లు ఇచ్చారు. విచారణ చేపట్టారు. అయితే, మీడియాలో డ్రగ్స్‌ కేసుకు సంబంధించి తన పేరు మీద కథనాలు, వార్తలు ప్రసారం కాకుండా చూడాలని ఢిల్లీ హైకోర్టుకు రకుల్‌ వెళ్ళారు. ఈ సంగతి తెలిసిందే. రకుల్‌ పిటీషన్‌ స్వీకరించిన ఢిల్లీ హైకోర్టు, తాజాగా ఈ కేసు విషయమై కేంద్రం సహా కొంతమందికి నోటీసులు జారీ చేసింది. రకుల్‌ మీద వస్తున్న కథనాలపై చర్యలు తీసుకోవాలని కోరింది. రకుల్‌ సైతం డ్రగ్స్‌ తీసుకున్నట్టు సుశాంత్‌ ప్రియురాలు, ఆల్రెడీ కేసులో అరెస్ట్‌ అయిన రియా చక్రవర్తి చెప్పినట్టు వార్తలు వచ్చాయి. డ్రగ్స్‌ గురించి రియాతో డిస్కస్‌ చేసిన మాట వాస్తవమే కానీ తానెప్పుడూ డ్రగ్స్‌ తీసుకోలేదని ఎన్సీబీకి రకుల్‌ చెప్పిందట. ఈ కేసు ఇంకెన్ని మలుపులు తిరుగుతుందో చూడాలి.

కంగ‌న రూటే స‌ప‌రేటు.. ఒక‌వైపు కాంట్ర‌వ‌ర్సీస్‌.. ఇంకోవైపు డాన్స్ రిహార్స‌ల్స్‌!

  క‌రోనా మ‌హ‌మ్మారి వ్యాప్తి ఆగ‌కుండా విజృంభిస్తున్న‌ప్ప‌టికీ, ఇంత కాలం ప‌ని ఆపి కూర్చున్న సినీ, టెలివిజ‌న్ రంగాలు.. కొన్ని వారాలుగా నెమ్మ‌దిగా ప‌నులను పునఃప్రారంభిస్తూ వ‌స్తున్నాయి. అదే విధంగా త‌లైవి సినిమా షూటింగ్‌లో పాల్గొనేందుకు ఫైర్‌బ్రాండ్ కంగ‌నా ర‌నౌత్ కూడా ప్రిపేర్ అవుతున్నారు. లేటెస్ట్‌గా త‌న ఇన్‌స్టాగ్రామ్ స్టోరీస్‌లో ఆమె షేర్ చేసిన పోస్ట్ దీన్ని తెలియ‌జేస్తోంది. "ఫైన‌ల్లీ బ్యాక్ టు వ‌ర్క్" అనే కాప్ష‌న్‌తో త‌న అసిస్టెంట్ కొరియోగ్రాఫ‌ర్‌తో డాన్స్ రిహార్స‌ల్ చేస్తూ తీసుకున్న సెల్ఫీని ఆమె షేర్ చేశారు. కంగ‌న ప్ర‌స్తుతం త‌న స్వ‌స్థ‌లం హిమాచ‌ల్ ప్ర‌దేశ్‌లోని మ‌నాలిలో ఉంటున్నారు. త‌మిళ‌నాడు మాజీ ముఖ్య‌మంత్రి జ‌య‌ల‌లిత బ‌యోపిక్‌గా త‌యార‌వుతున్న త‌లైవిలో ఓ పాట కోసం ఆమె అక్క‌డే డాన్స్ రిహార్స‌ల్స్ చేస్తున్నారు. దానికి సంబంధించి అసిస్టెంట్ కొరియోగ్రాఫ‌ర్ ప్ర‌స‌న్న‌బాబు త‌న ఇన్‌స్టాగ్రామ్ అకౌంట్‌లో ర‌నౌత్‌తో దిగిన సెల్ఫీని షేర్ చేశాడు. అందులో ఫ్రెండ్స్ టీ-ష‌ర్ట్ వేసుకున్న కంగ‌న.. సెల్ఫీ కోసం న‌వ్వుతూ నిల్చున్నారు. "ఫైన‌ల్లీ బ్యాక్ టు వ‌ర్క్‌. జ‌య‌ల‌లిత మేడ‌మ్ బ‌యోపిక్ 'త‌లైవి' కోసం డాన్స్ రిహార్స‌ల్ స్టార్ట్ చేశాం. బోల్డ్ అండ్ ద బ్యూటిఫుల్‌, మోస్ట్ హంబుల్ ప‌ర్స‌న్‌, ఇన్‌స్పైరింగ్ స్టార్ యాక్ట్రెస్ కంగ‌నా ర‌నౌత్ మేడ‌మ్‌తో అద్భుత‌మైన రిహార్స‌ల్ టైమ్ గ‌డిపాను. సాంగ్ షూట్ కోసం ఆస‌క్తిగా ఎదురుచూస్తున్నా. ఈ పాట‌కు నా మాస్ట‌ర్, ఎవ‌ర్‌గ్రీన్ బృంద మాస్ట‌ర్ కొరియోగ్ర‌ఫీ అందిస్తున్నారు" అని రాసుకొచ్చాడు ప్ర‌స‌న్న‌. ఆ ఫొటోనే త‌న ఇన్‌స్టాగ్రామ్ స్టోరీలో షేర్ చేశారు కంగ‌న‌.

వ‌య‌సులో బాగా చిన్న హీరోయిన్ల‌తో రొమాన్స్ బాగుండ‌దు!

  'సవ్యసాచి' చిత్రంలో ప్రతినాయకుడిగా నటించడం ద్వారా తొలిసారి నేరుగా తెలుగు ప్రేక్ష‌కుల ముందుకు వ‌చ్చిన‌ మాధవన్... 'నిశ్శబ్దం'తో మరోసారి ప‌ల‌క‌రించ‌బోతున్నాడు. అనుష్క ప్రధాన పాత్రలో నటించిన ఈ సినిమాలో అతడు సెల‌బ్రిటీ మ్యుజీషియ‌న్‌గా నటించాడు. గతంలో మాధవన్ అంటే 'సఖి' తరహా రొమాంటిక్ సినిమాలు గుర్తొచ్చేవి. ఇప్పుడు అతడు హారర్, థ్రిల్లర్ సినిమాల్లో ఎక్కువ నటిస్తున్నాడు. అలాగని, రొమాన్స్‌కి దూరం కావడం లేదంటున్నాడు. "రొమాన్స్ వయసుకు తగ్గట్టు ఉండాలి. 2030లో కూడా హీరోయిన్లతో రొమాన్స్ చేస్తాను. అయితే, ఆ కథలు నా వయసుకు తగ్గట్టు ఉండాలి. చాలా సినిమాల్లో తమ కంటే వయసులో చాలా చిన్నవాళ్లు అయిన హీరోయిన్లను హీరోలు రొమాన్స్ చేస్తూ ఉంటారు. ఇద్దరినీ చూస్తే మంచిగా అనిపించదు" అని మాధవన్ అన్నాడు. మొదట 'నిశ్శబ్దం'ను డైలాగులు లేకుండా మూకీ సినిమాగా తీయాలని అనుకున్నారట. హారర్ థ్రిల్లర్ కనుక ప్రేక్షకులకు అర్థం అవుతుందో? లేదో? అని అనుష్క పాత్రకు కాకుండా మిగతా పాత్రలకు కొన్ని డైలాగులు యాడ్ చేశామని మాధవన్ తెలిపాడు. ఈ సినిమాలో చెవిటి, మూగ అమ్మాయి పాత్రలో అనుష్క నటించారు. అక్టోబర్ 2న అమెజాన్ ప్రైమ్ లో సినిమా విడుదల అవుతోంది.

న‌టునిగా మోహ‌న్‌బాబు బ‌లాలేమిటో తెలుసా?

  యాక్ట‌ర్లు ఎంత‌మందో ఉంటారు. కానీ అన్ని ర‌సాలు స‌మ‌పాళ్ల‌లో రంగ‌రించి న‌టించే న‌వ‌ర‌స న‌టులు కొంద‌రే ఉంటారు. అలాంటి వారిలో ముందు వ‌రుస‌లో ఉండే న‌టుడు మోహ‌న్‌బాబు. విల‌న్‌గా ముఖంగా క్రూర‌త్వాన్ని అద్భుతంగా ప్ర‌ద‌ర్శించే ఆయ‌న‌, అదే క్రూర‌త్వంలో కామెడీని కూడా మిక్స్ చేసి వ‌హ్వా అనిపించ‌గ‌ల విల‌క్ష‌ణ న‌టుడు మోహ‌న్‌బాబు. మొద‌ట డైరెక్ష‌న్ డిపార్ట్‌మెంట్‌లో అసిస్టెంట్ డైరెక్ట‌ర్ స్థాయి నుండి న‌టుడిగా మారి విల‌న్ గిరికి ఎదిగి, అక్క‌డి నుంచి హీరోగా ఒకానొక ద‌శ‌లో టాప్ రేంజికి చేరుకోవ‌డం అంటే ఆషామాషీ వ్య‌వ‌హారం కాదు. అది ఆయ‌న‌కే చెల్లింది. కావాల్సినంత ఎత్తు, విన‌సొంపైన డైలాగ్ డెలివ‌రీ సొంతం చేసుకున్న మోహ‌న్‌బాబు హీరోగా న‌టిస్తూ కామెడీతో ప‌లికే ఊత‌ప‌దాలు, మేన‌రిజాలు ఇటు మాస్‌నీ, అటు క్లాస్‌నీ ఉర్రూత‌లూగించాయి. అయితే ఆయ‌న సినిమాల్లో డ‌బుల్ మీనింగ్స్ ఉంటాయ‌నే విమ‌ర్శ లేక‌పోలేదు. ప్రొడ్యూస‌ర్‌గా మోహ‌న్‌బాబు ఎన్నో విజ‌యాలు సాధించారు. టాప్ స్టార్స్ సినిమాలతో పాటు త‌న సినిమాల‌ను ధైర్యంగా రిలీజ్ చేసి బ్లాక్‌బ‌స్ట‌ర్స్ అందుకున్నారు. హీరోగా త‌న ప్ర‌తిభ‌ను త‌న సొంత చిత్రాల ద్వారానే ఎక్కువ‌గా రుజువు చేసుకున్నారు. కొన్ని సినిమాలు ఆయ‌న‌ను క‌లెక్ష‌న్ కింగ్‌ను చేశాయి. అన్ని సినిమాలూ ఆయ‌న‌ను డైలాగ్ కింగ్‌గా నిరూపించాయి. ఇప్పుడు త‌న‌కు బాగా న‌చ్చిన పాత్ర‌ల‌నే ఎంపిక చేసుకుంటూ న‌టుడిగా త‌న ప‌య‌నాన్ని కొన‌సాగిస్తున్నారు మోహ‌న్‌బాబు.

దాసూ... మళ్ళీ రష్మికతో జత‌ కట్టేనా బాసు?

  డాక్టర్ ఎం.కె. దాస్ పాత్రలో నాని నటించిన సినిమా 'దేవ దాస్'. అందులో నానికి జంటగా రష్మిక మంద‌న్న‌ నటించారు. వాళ్ళిద్దరి కాంబినేషన్‌లో అదే తొలి సినిమా. ఇప్పుడు మరోసారి దాసుతో రష్మిక జంట కట్టే అవకాశాలు ఉన్నాయని ఫిలింనగర్ టాక్. ప్రస్తుతం నాని 'టక్ జగదీశ్' చేస్తున్నారు. కరోనా వల్ల షూటింగుకి అంతరాయం ఏర్పడింది. త్వరలో మళ్ళీ సినిమాను సెట్స్ మీదకు తీసుకువెళ్లి డిసెంబర్ కి కంప్లీట్ చేయాలని ప్లాన్ చేస్తున్నారు. దీని తరవాత 'టాక్సీవాలా' ఫేమ్ రాహుల్ సాంకృత్యాన్‌ దర్శకత్వంలో సితార ఎంటర్టైన్మెంట్స్ నిర్మాణంలో 'శ్యామ్ సింగ రాయ్' చిత్రీకరణ ప్రారంభించనున్నారు. 'శ్యామ్ సింగ రాయ్'లో నానితో 'ఎంసీఏ'లో నటించిన సాయి పల్లవి హీరోయిన్. కథలో మరో రెండు కీలక పాత్రలు ఉన్నాయట. అందులో ఓ పాత్రకు నిత్యా మీనన్ ను తీసుకోవాలని ముందు అనుకున్నారు. నిత్యా ఏమన్నదో? ఇప్పుడు రష్మికా మందన్నా అయితే ఎలా ఉంటుందని ఆలోచిస్తున్నారట. కథలో కీలకమైన పాత్ర కావడంతో ఆమె ఓకే అంటుందని ఆశిస్తున్నారు. అల్లు అర్జున్ 'పుష్ప'లో రష్మిక హీరోయిన్. ఆ సినిమా షూటింగ్ షెడ్యూల్స్ బట్టి మిగతావి అడ్జస్ట్ చేసుకోవాలి.

రాజకీయాలకు బలౌతున్న ఐఏఎస్ అధికారులు

ఇద్దరు అధికారులు దివంగత వై ఎస్ రాజశేఖరరెడ్డి ముఖ్యమంత్రిగా ఉన్నప్పుడు కీలకమైన శాఖలు నిర్వహించిన వారు. ప్రస్తుత ముఖ్యమంత్రి జగన్ చేతిలో వీరిద్దరూ తీరని అవమానాలకు గురౌతున్నారు. తండ్రి చేతిలో ఎత్తులు చుసిన వారు తనయుడి చేతిలో లోతులు చూస్తున్నారు. వారిద్దరూ సీనియర్ ఐఏఎస్ అధికారులు. ఒకరినైతే మెడపట్టుకుని బయటకు గెంటేశారు. మరొకరిని కులం పేరుతో కుళ్లపొడుస్తున్నారు. విచిత్రం ఏమిటంటే ఈ ఇద్దరు అధికారులూ కూడా చంద్రబాబు అంటే గిట్టనివారే. ఇద్దరు అధికారులు కూడా చంద్రబాబు ముఖ్యమంత్రిగా ఉన్నప్పుడు చిన్న చూపుకు గురి అయిన వారే. ఒకరు బలయ్యారు.. మరొకరు అవుతున్నారు. ఆ ఇద్దరూ ఎవరంటే ఒకరు ఎల్‌వి సుబ్రహ్మణ్యం. రెండో వారు నిమ్మగడ్డ రమేష్ కుమార్. చంద్రబాబు ముఖ్యమంత్రిగా ఉన్న సమయంలో సీనియర్ అయినా ఎల్‌వి సుబ్రహ్మణ్యంకు జగన్ కేసుల్లో సహా ముద్దాయిగా ఉన్నారని ప్రాధాన్య పోస్టులు ఇవ్వలేదు. ఒక సందర్భంలో కీలకమైన వైద్య ఆరోగ్య శాఖ కార్యదర్శి పోస్టు ఇచ్చినా మళ్ళీ ఆయనను అక్కడ నుంచి తీసి అత్యంత చిన్నదైన యువజన శాఖకు మార్చారు. ఇక రమేష్ కుమార్ పరిష్తితి కూడా దాదాపుగా అంతే. చంద్రబాబు హయాంలో ఆయనకు ఏ కీలక శాఖ లభించలేదు. ఈ ఇద్దరూ వై ఎస్ రాజశేఖరరెడ్డి ముఖ్యమంత్రిగా ఉన్నప్పుడే ప్రతిభకు తగిన గుర్తింపు పొందారు. ఎల్‌వి సుబ్రహ్మణ్యం, రమేష్ కుమార్ ఇద్దరూ ఆర్ధిక శాఖను నిర్వహించిన వారే. ఆర్ధిక శాఖలో ఈ ఇద్దరిదీ ప్రత్యేకమైన శైలి అని వారితో సాన్నిహిత్యం ఉన్న అధికారులు అంటారు. రాష్ట్రంలో ఆర్ధిక క్రమశిక్షణ తీసుకురావడంలో బిల్లుల చెల్లింపు తదితర విషయాలలో ఎలాంటి వివాదాలు రాకుండా చూసిన వారన్న విషయాన్ని మర్చిపోలేం అని చెప్తున్నారు. ఆర్ధిక క్రమశిక్షణ తీసుకురావడం, జవాబుదారీతనం, దుబారా తగ్గించడం వంటి విషయాల్లో ఈ ఇద్దరూ అనేక చర్యలు తీసుకున్నారు.వీరికి ఇంకో పోలిక కూడా ఉంది. నిమ్మగడ్డ రమేష్ కుమార్, ఎల్‌వి సుబ్రహ్మణ్యం ఇద్దరూ కూడా తిరుమల తిరుపతి దేవస్థానం ట్రస్టు బోర్డు ముఖ్య కార్యనిర్వహణాధికారులుగా పని చేశారు. ఈ ఇద్దరి హయాంలో తిరుమల పవిత్రత రెండింతలు పెరగడమే కాకుండా క్రమ శిక్షణ ఉండేదన్న విషయం మర్చిపోరాదు. భక్తుల సౌకర్యార్ధం ఈ ఇద్దరి హయాంలో పలు కీలక నిర్ణయాలు తీసుకున్నారు. ఎంతో సీనియర్ రాజకీయ నాయకులు ట్రస్టు బోర్డు చైర్మన్లుగా ఉన్నా కూడా ఎల్‌వి సుబ్రహ్మణ్యం, రమేష్ కుమార్ ఈవోలుగా ఉన్నప్పుడు వీరు చెప్పినట్లే నడచుకునేవారన్న పేరుండేది. వృత్తి పట్ల అంతటి నిబద్ధతతో ఈ ఇద్దరు అధికారులు పని చేశారు. అత్యంత సీనియర్ అయిన ఎల్‌వి సుబ్రహ్మణ్యం ను పక్కన పెట్టి ఆయన కన్నా జూనియర్లకు చంద్రబాబునాయుడు చీఫ్ సెక్రటరీ పదవిని అప్పగించారు. అయినా ఎల్‌వి సుబ్రహ్మణ్యం ఎలాంటి వివాదాస్పద వ్యాఖ్యలు చెయ్యని విషయం మనం చూసాం. సార్వత్రిక ఎన్నికల సమయంలో అప్పటి రాష్ట్ర ప్రభుత్వ ప్రధాన కార్యదర్శి పునేటాను పక్కన పెట్టి కేంద్ర ఎన్నికల సంఘం ఎల్‌వి సుబ్రహ్మణ్యంను రాష్ట్ర ప్రభుత్వ ప్రధాన కార్యదర్శిగా నియమించింది. ఎన్నికల కమీషన్ ప్రధాన కార్యదర్శిగా నియమించాక సహ ముద్దాయిని సిఎస్ గా ఎలా నియమిస్తారని విమర్శించారు కూడా.   ఆ తర్వాత ముఖ్యమంత్రి అయిన జగన్ ఎల్‌వీ ని కొనసాగించగా జగన్ ను అందరూ మెచ్చుకున్నారు కూడా. అయితే ఏమైందో ఏమూ కానీ కొద్ది కాలంలోనే ఎల్‌వి ని అత్యంత అవమానకరంగా పదవి నుంచి జగన్ తొలగించిన విధానం కూడా తెలిసిందే. ఇప్పుడు నిమ్మగడ్డ రమేష్ కుమార్ కు కూడా దాదాపుగా అలానే జరిగింది. ఆయనను రాష్ట్ర ఎన్నికల అధికారిగా నియమించడం చంద్రబాబుకు అస్సలు ఇష్టం లేదు. చంద్రబాబు దగ్గర పని చేయడం రమేష్ కుమార్ కూ ఇష్టం లేదని అంటారు. అయితే తన కార్యదర్శిగా పని చేసిన రమేష్ కుమార్ కు రాష్ట్ర ఎన్నికల సంఘానికి నియమించాలని అప్పటి గవర్నర్ ఇ ఎస్ ఎల్ నర్సింహన్ చంద్రబాబుపై వత్తిడి తెచ్చారనీ. గత్యంతరం లేని పరిస్థితుల్లో చంద్రబాబు రమేష్ కుమార్ కు రాష్ట్ర ఎన్నికల సంఘాన్ని అప్పగించారనీ అంటున్నారు. రమేష్ కుమార్ పేరు బదులు వేరే అధికారి పేరు రాష్ట్ర ఎన్నికల సంఘానికి సిఫారసు చేశామని చంద్రబాబు కూడా చెప్పారు. అటువంటి రమేష్ కుమార్ ఇప్పుడు చంద్రబాబు ఏజెంటుగా జగన్ చేతిలో ముద్ర వేయించుకోవడం దురదృష్టం. ఈ ఇద్దరూ ముక్కుసూటిగా మాట్లాడే అధికారులు. ఎలాంటి మొహమాటం లేకుండా విధులు నిర్వర్తించే వారన్న పేరుంది. అలాంటి ఈ ఇద్దరూ కూడా అత్యంత ఘోరమైన అవమానాన్ని పొందారు. ఈ అవమానాలకు వీరు అర్హులు కాదని మాత్రం కచ్చితంగా చెప్పవచ్చని అధికార వర్గాలు అనుకుంటున్నారు. నాయకులు తమ స్వంత ప్రయోజనాల కోసం అఖిల భారత సర్వీసు అధికారులకు కులాలు, ప్రాంతాలు అంటగట్టడం ఏంటని కొందరు ఆవేదన చెందుతున్నారు.

ఆంధ్ర లో బీజేపీ 'పంచ్' తంత్రం...

  * దిగుమతి నాయకులు, బిజినెస్ లీడర్లు, లాబీయిస్టులు కలిసి బీ జె పి ని ఎటు నడిపిస్తారో....  * ఇంతకీ స్థానిక సమరం లో సత్తా చూపించే ట్యాలెంట్ ఆ పార్టీకి ఉన్నట్టా, లేనట్టా....  * జి వి ఎల్ ఋతుపవనాల్లాంటి వారు... ఇలావచ్చి అలా పలకరించి, అటు నుంచి ఆటే మాయమైపోతారు  * సి ఎం రమేష్ లాబీ మాస్టర్ గా ఢిల్లీ లో ప్రసిద్ధులు.. నోకియా మాదిరి ఈయన కూడా కనెక్టింగ్ పీపుల్ నినాదాన్ని బలంగా నమ్మిన వారు  * సుజనా చౌదరి... గత్యంతరం లేని పరిస్థితుల్లో అమరావతి నినాదాన్ని భుజాన వేసుకుని చందమామ కథలో విక్రమార్కుడి మాదిరి ... వై ఎస్ ఆర్ సి పి లోని బేతాళుడి తో జగడమాడుతుంటారు  * టీ జీ వెంకటేష్.. అవసరార్ధ రాజకీయాల కు కేరాఫ్ అడ్రెస్ .... రాయలసీమ అనేది ఈయనకు ట్యాగ్ లైన్ ...దురదపుట్టినప్పుడు గోక్కోవటానికి ఉపయోగపడే ఆరో వేలుగా ఆయన ఆ నినాదాన్ని బాగా వాడేస్తారు..  * అంగ వంగ కళింగ రాజ్యాలను అవలీలగా గెలిచిన చక్రవర్తి, చివరకు ఆముదాలవలస లో ఓడిపోయినట్టు, రాష్ట్ర బీ జె పి అధ్యక్షుడు కన్నా లక్ష్మీ నారాయణ , చివరకు పవన్ కళ్యాణ్ తో కలిసి స్థానిక సమరం లో బీజేపీకి కాస్తో కూస్తో ఉన్న ఇమేజ్ ని పణం గాపెట్టే సాహసానికి ఒడిగట్టారు  ఆ ఐదుగురూ ఇంతకీ ఏమి చేస్తున్నట్టు..భారతీయ జనతా పార్టీ దిగుమతుల విభాగం నుంచి డంప్ అయిన జి వి ఎల్ నరసింహారావు , అలాగే తెలుగు దేశం నుంచి బీ జె పి లోకి దిగుమతి అయిన సుజనా చౌదరి, సి ఎం రమేష్, టీ జీ వెంకటేష్ , కాంగ్రెస్ లో నుంచి బీ జె పి లోకి షిఫ్ట్ అయిన  బీ జె పి అధ్యక్షుడు కన్నా లక్ష్మీ  నారాయణ కలిసి ఈ స్థానిక సమరం లో రాష్ట్రం మొత్తం మీద కనీసం ఒక్కొక్కరికి 50 చొప్పున 250 మంది ఎం పి టి సి లు, జెడ్ పీ టి సి లను  గెలిపించుకురాగలరా అనేది చాలా పెద్ద సందేహం గా కనిపిస్తోంది. ఎందుకంటే, నిన్ననే విజన్ డాక్యుమెంట్ ని కలిసి ఆవిష్కరించిన బీ జె పి , జన సేన కంబైన్ నేతలు , చాలా పెద్ద  దృశ్యాన్నే జనం ముందు ఆవిష్కరించే ప్రయత్నం చేశారు. వై ఎస్ ఆర్ సి పి, తెలుగుదేశం పార్టీ లకు తామే ప్రత్యామ్నాయమన్నట్టు గా ప్రకటించుకున్న ఈ ఐదుగురిదీ  వాస్తవానికి తలో దారీ.. ఎవరు , ఎప్పుడు, ఎందుకు, ఎలా మాట్లాడతారో తెలీని గందర గోళం ....  జి వి ఎల్ నరసింహ రావు ది అయితే సొంత రాజ్యాంగం, పూర్తిగా పార్టీ రాష్ట్ర శాఖ తో  గానీ, లేదా బీ జె పి లో ఉన్నతెలుగుదేశం మాజీ లతో  కానీ ఈయనకు ఎలాంటి సంబంధాలు ఉండవు.  రాష్ట్రాన్ని ఎప్పుడైనా పలకరించడానికి రుతు పవనాల మాదిరి అలా చుట్టపు చూపు గా వచ్చేసి ,  ఇలా మాయమైపోయే  జి వి ఎల్ వ్యవస్థ ల గురించి రాష్ట్ర బీ జె పి లో ఎవరికీ ఎలాంటి క్లూలు ఉండవు. ఈయన దారి రహదారి. ఈయన వ్యవస్థ ఇలాఉంటే, బీ జె పి లో ఉంటూ కూడా ఇంకాతెలుగు దేశం ఎజెండా , జెండా రెండూ మోస్తున్నట్టు కనిపించే సుజనా చౌదరి ఒక్క అమరావతి అంశం మీద తప్పించి, ఇతరత్రా ఏదీ మాట్లాడటానికి ఎక్కువగాఇష్టపడరు. జీ వీ ఎల్ కు, సుజనా కూ క్షణం పడదు. ఆయన ఎడ్డెం అంటే ఈయన తెడ్డెం అనే రకం.. ఏ మాత్రం పొసగని,పొంతన లేని పరస్పర భిన్నమైన అభిప్రాయాలు గల వీరిద్దరూ ఉత్తర ధృవం, దక్షిణ ధృవం మాదిరి ఒకే పార్టీ లో ఉంటూ కూడా కామన్  ఎజెండా తో పని చేసిన దాఖలాలు ఇప్పటివరకూ అయితే లేవు.   ఇహ, సి ఎం రమేష్ గురించి వేరే చెప్పనక్కర్లేదు. ఆయన తన బిజినెస్ వ్యవహారాలను బీ జె పి తో ముడి కట్టేసి, ఏ పార్టీ లో ప్రయాణిస్తున్నాడో కూడా మర్చే పోయి, మొన్నటికి మొన్న పరిమళ్ నత్వాని ని జగన్ మోహన్ రెడ్డి దగ్గర ప్రవేశ పెట్టడం లో కీలక పాత్ర పోషించిన  ఘనుడు. గుర్తు చేస్తే కానీ తానూ బీ జె పి లో ఉన్నాననే విషయం గుర్తుండని ఈయన కు  బీ జె పి, జన సేన కలిసి పోటీ  చేస్తున్న విషయం తెలుసో లేదో అని కూడాపార్టీ శ్రేణులు గుసగుస లాడుకుంటున్నాయి.  ఇహ వీరందరినీ సమన్వయము చేసుకుని  ముందుకెళ్తున్నట్టు భావిస్తూ , బాహ్య ప్రపంచం ముందు ఆవిష్కృతమయ్యే  వ్యక్తి మరెవరో కాదు... సాక్షాత్తూ  రాష్ట్ర బీ జె పి అధ్యక్షుడు కన్నా లక్ష్మీ నారాయణ. ఈయన, పవన్ కళ్యాణ్ తో కలిసి ప్రయాణించటానికి అంతగాసుముఖం గా లేదు...కారణమేమిటంటే, చంద్రబాబు నాయుడు లాంటి యోధులతో పోరాడిన తన రాజకీయం , చివరకు ఇలా ఏ పూట ఎక్కడ ఉంటారో కూడా తెలీని పవన్ కళ్యాణ్ పార్టీతో కలిసి పని చేయాల్సిన దుస్థితికి దిగజారటమేమిటని  తరచూ తనలో తానె కుమిలి పోతున్నట్టు సమాచారం.  ఇహ, టీ జీ వెంకటేష్ అయితే మరీను..... రాయలసీమ నినాదాన్ని తన ట్యాగ్ లైన్ గాచేసుకుని కాలక్షేపం చేసేస్తూ... ప్రస్తుతానికి బీ జె పి లో నివసిస్తూ ....ఈ స్థానిక ఎన్నికల సమరం లో తన పాత్ర ఏమిటో కూడాతెలీకుండా జీవనం వెళ్లదీస్తున్నారు. మొత్తానికి ఈ పంచ పాండవులు స్థానిక సమరం లో తమ 'పంచ్ ' పవర్ ఏమిటో ఈ నెలాఖరు లోగా చుపిస్తారేమోననే బోలెడు , ఇంకా గంపెడాశతో బీ జె పి అభిమానులు ఆత్రంగా ఎదురు చూస్తున్నారు.

ఏపీలో వంద కోట్ల దందా.. రియల్ క్రైమ్ స్టోరీ

సినిమాలలో ఎన్నో క్రైమ్ స్టోరీలు, ఎన్నో కిడ్నాప్ సీన్లు చూసుంటారు. అయితే.. కాకినాడలో జరిగిన ఈ రియల్ స్టోరీ ముందు ఆ రీల్ స్టోరీలన్నీ చిన్నబోతాయి. పేరున్న రాజకీయ నాయకులు, పలుకుబడి ఉన్న అధికారులు.. ఇలా భారీ తారాగణం నటించిన.. ఆ రియల్ స్టోరీ టైటిల్ వచ్చేసి.. "ఓ కిడ్నాప్, వంద కోట్ల స్కాం". 'నేనే రాజు నేనే మంత్రి' మూవీలో ఒక డైలాగ్ ఉంటుంది. మీరు ఏ పార్టీకి ఓటేసినా మేమే అధికారంలో ఉంటామని. అవును.. కొందరు రాజకీయ నాయకులు.. ఎన్నికల్లో ప్రజలు ఏ పార్టీని గెలిపిస్తే.. ఆ పార్టీలోకి జంప్ చేస్తారు. అలాగే అధికారులు కూడా.. ఏ పార్టీ అధికారంలోకి వస్తే ఆ పార్టీ నేతలని కాకాపడుతూ వారి ఆటలు సాగిస్తుంటారు. ఈ రియల్ స్టోరీ వింటే అది నిజమని మీకే అర్ధమవుతుంది. కాకినాడలోని సర్పవరంకి చెందిన ఆకుల గోవిందరాజు అనే వ్యక్తికి భోగాపురంలో వంద కోట్ల విలువైన 18 ఎకరాల ల్యాండ్ ఉంది. ఈ ఒక్క విషయం చాలదా.. మాఫియా కన్ను ఆయన మీద పడటానికి. ఎక్కడో ఆకాశంలో ఎగురుతున్న గద్దకి కింద ఉన్న కోడిపిల్ల కనిపించినట్టు.. మాఫియా వాళ్ళకి ఎక్కడున్నా విలువైన ల్యాండ్స్ కనిపిస్తాయి కదా. అలాగే, బలగ ప్రకాష్ అనే మాఫియా లీడర్ కి.. ఆకుల గోవిందరాజుకి చెందిన ల్యాండ్ పై కన్నుపడింది. ఇంకేముంది ఏకంగా పోలీసులనే రంగంలోకి దింపాడు. ఇక పోలీసులైతే ఓ అడుగు ముందుకేసి ఏకంగా కిడ్నాప్ కే తెరలేపారు. 2017.. సెప్టెంబర్ 19 .... శూన్యమాసం.. అమావాస్య.. మంగళవారం.. మధ్యాహ్నానికి- సాయంత్రానికి నడుమ సూర్యుడు మండిపోతున్న సమయం... అబ్బా ఏమన్నా ముహూర్తమా... శూన్యమాసం.. అమావాస్య.. మంగళవారం.. ఇదే కిడ్నాప్ కి సరైన ముహూర్తం అనుకున్నారేమో పోలీసులు... AP 30 AB 6655 నెంబర్ గల ఇన్నోవా కార్ లో.. పోలీసులు ఆకుల గోవిందరాజు ఇంటికి వచ్చారు. కారు నెంబర్ ఫ్యాన్సీగా ఉన్నా, ఆ ఖాకీలు చేసే పని మాత్రం ఏ మాత్రం పద్దతిగా లేదు. వాళ్ళు చేసే పనేంటో ఆ చుట్టుపక్కల ఉన్నవారికి తెలియదు. కొత్త మొహాలు కావడంతో.. చుట్టుపక్కల వారు కొందరు ఆశ్చర్యంతో, కొందరు అనుమానంతో చూస్తున్నారు. వాళ్ళు అలా చూస్తుండగానే.. దొంగల రూపంలో వచ్చిన పోలీసులు.. గోవిందరాజుని ఇన్నోవాలో పడేసి.. జెట్ స్పీడ్ లో హైవే ఎక్కారు. పోలీసుల భాషలో చెప్పాలంటే దీనినే కిడ్నాప్ అంటారు. కారు హైవే మీద దూసుకెళ్తుంది. ఆ స్పీడ్ చూస్తే.. అంబులెన్స్ డ్రైవర్ కావాల్సిన వ్యక్తి ఇన్నోవా డ్రైవ్ చేస్తున్నాడేమో అనిపిస్తుంది. డ్రైవర్ స్టీరింగ్ పట్టుకుంటే.. మనం ఖాళీగా ఉండి ఏం చేస్తాం అనుకున్నారేమో.. మిగతా పోలీసులు గోవిందరాజు పనిపెట్టారు. కారు.. కాకినాడ నుంచి భోగాపురం చేరేవరకు.. అంటే దాదాపు నాలుగు గంటల పాటు... గోవిందరాజుని భయపెట్టారు.. బెదిరించారు.. చిత్రహింసలు పెట్టారు. ఒక్కమాటలో చెప్పాలంటే నరకం చూపించారు. కారు సాయంత్రం 6 గంటలకు భోగాపురం సబ్ రిజిస్టార్ ఆఫీస్ కి చేరుకుంది. ఖాకీలకు భయపడ్డాడో, కాసులకు కక్కుర్తి పడ్డాడో తెలియదు కానీ.. సబ్ రిజిస్టార్ పందిళ్లపల్లి రామకృష్ణ.. సాయంత్రం 4:30 కే రిజిస్ట్రేషన్ కాగితాలు సిద్ధం చేసి.. పదేళ్ల తర్వాత ఫారెన్ నుంచి రిటర్న్ వస్తున్న ఫ్రెండ్ కోసం ఎదురుచూస్తున్నట్టు.. గుమ్మం వైపు చూస్తూ పోలీసుల కోసం ఎదురుచూస్తున్నాడు. ఇంతలో పోలీసులు గోవిందరాజుని తీసుకొని గుమ్మంలోకి అడుగు పెట్టనే పెట్టారు. గుమ్మంలో వాళ్ళ అడుగు పడిందో లేదో.. సబ్ రిజిస్టార్ మోహంలో వెలుగు వచ్చింది. గోవిందరాజు మోహంలో భయం పెరిగింది. భయంతో చూస్తుండగా ఎదురుగా కుర్చీలో కూర్చొని ఉన్న మాఫియా లీడర్ బలగ ప్రకాష్ కనిపించాడు. జర్నీలో పోలీసుల చిత్రహింసలతో భయపడిపోయిన గోవిందరాజు.. బలగ ప్రకాష్ ని చూసి మరింత భయపడ్డాడు. బలగ ప్రకాష్.. పోలీసుల మాదిరి సాగదియ్యలేదు.. కమర్షియల్ సినిమాల్లో విలన్ లాగా ఒక్కటే డైలాగ్ కొట్టాడు.. "సంతకం పెడతావా? సమాధిలో పడుకుంటావా?".... ఆ ఒక్క డైలాగ్ తో గోవిందరాజు భయం చావుభయంగా మారిపోయింది. ఎదురుగా మాఫియా లీడర్.. చుట్టూ భోగాపురం సీఐ నర్సింహారావు, ఎస్సైలు తారక్, మహేష్.. హెడ్ కానిస్టేబుల్ గోవిందరావు.. ఉన్నారు. ఎస్సైల పేర్లు తారక్, మహేష్ అని హీరోల పేర్లు ఉన్నాయి కానీ.. వాళ్ళ బిహేవియర్ మాత్రం పెద్ద విలన్ల పక్కన ఉండే చెంచా విలన్లు లాగా ఉంది. అన్యాయాన్ని అడ్డుకోవాల్సిన పోలీసులే.. మాఫియా లీడర్ తో కలిసిపోయి.. చిత్రహింసలు చేసి బెదిరిస్తుంటే.. తప్పనిసరి పరిస్థితుల్లో, వంద కోట్లు కంటే విలువైన ప్రాణం కోసం, అన్యాయం ముందు తలవంచి గోవిందరాజు సంతకం పెట్టాడు. ఆ ఒక్క సంతకంతో.. గోవిందరాజు మొహంలో తప్ప.. అక్కడున్న అందరి మొహాల్లో లక్ష్మీకళ ఉట్టిపడింది. అన్నట్టు ఇంత జరుగుతున్నా అక్కడ ఇతరులు ఎవరూ లేరా? అని మీకు అనుమానం రావొచ్చు. అక్కడ నిజంగానే ఎవరూ లేరు.. ఎందుకంటే వాళ్ళు పెట్టిన ముహూర్తం అలాంటిది మరి. శూన్యమాసం-అమావాస్య.. బుద్ధి ఉన్నోడు ఎవడైనా రిజిస్ట్రేషన్ పెట్టుకుంటాడా? వీళ్లంటే.. వంద కోట్ల కబ్జా ల్యాండ్ కాబట్టి.. బుద్ధిని పక్కనపెట్టి.. బెదిరించి.. రిజిస్ట్రేషన్ చేపించుకున్నారు. ఇప్పుడు అర్థమైందా వాళ్ళ శూన్యమాసం-అమావాస్య కాన్సెప్ట్ ఏంటో?!!.. ఈ కిడ్నాప్- కబ్జా వ్యవహారంపై.. సర్పవరం పోలీస్ స్టేషన్ లో 330/217 నెంబర్ తో కేస్ రిజిస్టర్ అయింది. అదేంటో.. FIR కూడా అయిన తరువాత.. చార్జిషీట్ దాఖలు చేయడానికి.. రాజమౌళి RRR చేయడానికి తీసుకునే టైం కన్నా ఎక్కువ తీసుకుంటున్నారు సర్పవరం పోలీసులు. రెండున్నరేళ్లుగా నాన్చుతూనే ఉన్నారు. ఈ విషయం గురించి.. ఏపీ హ్యూమన్ రైట్స్ కమిషన్ కి కాకినాడ పోలీసులు రిపోర్ట్ కూడా పంపారు. కానీ చార్జిషీట్ దాఖలు చేసే విషయంలో సర్పవరం సీఐ డిలే చేస్తూనే ఉన్నాడు. ఏంటి ఆ సీఐ ధైర్యం?.. భయపడితే భయపడటానికి ఆయన పోస్ట్ మ్యాన్ కాదు.. పోలీసోడు.. దానికితోడు పొలిటిషీయన్స్ సపోర్ట్ ఉన్నోడు. అవును.. ఈ వ్యవహారంలో.. బడా పొలిటిషీయన్స్ సపోర్ట్ కూడా ఉంది. అదే పోలీసుల ధైర్యం... శ్రీకాకుళం జిల్లాకి చెందిన మాజీ మంత్రి, ప్రస్తుత టీడీపీ నేత.. అలాగే గత ప్రభుత్వ హయాంలో విప్ గా పనిచేసిన నేత.. వీరిద్దరి సాయంతో సర్పవరం పోలీస్ స్టేషన్ ని ఫుల్ గా influence చేసే ప్రయత్నం బలంగా నడుస్తుంది. అందుకే చార్జిషీట్ కి మోక్షం కలగట్లేదు. ఇంత పెద్ద కిడ్నాప్- కబ్జా జరిగితే అస్సలు చర్యలే తీసుకోకుండా ఎలా ఉన్నారని అనుకుంటున్నారేమో... అబ్బో చాలా పెద్ద చర్య తీసుకున్నారు. భోగాపురం ఇన్స్పెక్టర్ ని బదిలీ చేసారు. అదేంటి!!.. అంత జరిగితే కేవలం బదిలీనా అనుకోవద్దు.. రాజకీయ ఒత్తిళ్లు అలాంటివి మరి.. అర్థంచేసుకోవాలి... ఇంకో విషయం ఏంటంటే.. ఈ వ్యవహారం డీజీపీ ఆఫీస్ కి కూడా చేరింది. మరి ఇంకేంటి.. వెంటనే అందరి మీద చర్యలు తీసుకొని ఉంటారుగా అంటారా? అబ్బో.. మీరు పవర్ ఫుల్ పోలీస్ ఆఫీసర్ సినిమాలు చూసి బాగా మోసపోయారు... అలాంటి పప్పులు ఇక్కడ ఉడకవు. వాస్తవానికైతే... CRPC 41A కింద డీజీపీ నియమించే ఓ సీనియర్ అధికారి.. విచారణ జరిపి.. తదుపరి చర్యల వరకు.. ఆ సీఐని సస్పెండ్ చేసే అవకాశముంది. కానీ ఇక్కడ అలాంటిదేం జరగలేదు. ఏదో ఫార్మాలిటీకి బదిలీతో సరిపెట్టారు. గోవిందరాజు ని బెదిరించి వంద కోట్ల విలువైన ల్యాండ్ అన్యాయంగా లాక్కున్నారు. అయినా తప్పు చేసిన వాళ్ళు బాగానే ఉన్నారు. పైగా గోవిందరాజునే ఇంకా టార్చర్ చేస్తున్నారు. రాజకీయ ఒత్తిళ్లలో భాగంగా.. ప్రస్తుత సర్పవరం సీఐ మరియు అర్బన్ డీఎస్పీ.. గోవిందరాజుని పదేపదే తిప్పించుకుంటున్నారు. ఇక కాకినాడలో ఉద్యోగం వెలగపెడుతున్న.. ఇప్పటి ఓ మంత్రిగారి బావమరిది.. రంగంలోకి దిగడంతో ఈ కేసు మరింత డైల్యూట్ అయింది. అసలే భోగాపురంలో ఎయిర్ పోర్ట్ అంటున్నారు. రెక్కలున్న విమానాలు వస్తున్నాయి అంటే.. ఆటోమేటిక్ గా భూముల ధరలకు రెక్కలొస్తాయి కదా.. అందుకే పోలీసులు- పొలిటీషియన్స్ అండతో మాఫియా ఇంతలా రెచ్చిపోతుంది. అంతేకాదు.. ఈ వ్యవహారం వెనుక.. 2017 ప్రాంతంలో ఉత్తరాంధ్ర జిల్లాల్లో పనిచేసిన ఓ కలెక్టర్ మరియు ఎస్పీ పాత్ర ఉన్నట్టు.. సెక్రటేరియట్ వర్గాల వద్ద స్పష్టమైన సమాచారం ఉంది. టీడీపీ పెద్దతలకాయలకు సన్నిహితులైన ఈ ఐఏఎస్, ఐపీఎస్ లు.. వైసీపీ ప్రభుత్వ హయాంలో కూడా తమ హవా కొనసాగించడం... అందరినీ ముక్కు, మూతి ఇలా అన్నింటి మీదా వేలేసుకునేలా చేస్తుంది. ఇంతకీ ఆ ఐఏఎస్ & ఐపీఎస్ ఎవరు? * ఒకరు.. పరుల అవినీతి మీద కాంతివంతంగా దండెత్తే ఐఏఎస్... * ఇంకొకరు.. పొద్దునలేస్తే సుభాషితాలు చెప్పే పాలమీగడ లాంటి ఐపీఎస్.. ఈయనకి టెక్నాలజీ మీద గ్రిప్ బాగా ఎక్కువ. ఈ వ్యవహారంలో వీరిద్దరి పాత్ర కూడా ప్రముఖంగా ఉంది. 'వంద గొడ్లను తిన్న రాబందు కూడా ఒక్క గాలివానకు కూలిపోతుంది' అన్నట్టు.. ఈ అవినీతి రాబందులను భయపెట్టే గాలివాన ఇప్పుడిప్పుడే మొదలవుతుంది. మాఫియా లీడర్ బలగ ప్రకాష్ కనుసన్నల్లో.. ఐఏఎస్, ఐపీఎస్లు, పోలీసులు, పొలిటీషియన్స్ అండతో జరిగిన ఈ అన్యాయంపై.. గోవిందరాజు కొద్ది నెలలుగా పోరాడుతూనే ఉన్నాడు. న్యాయం కోసం ఆయన ఎక్కని గుమ్మం దిగని గుమ్మం లేదు. సన్నిహితుల సాయంతో న్యాయం కోసం పోరాడుతున్నాడు. ఆ పోరాడంతో కొన్ని విషయాలు కూడా వెలుగులోకి వచ్చాయి. వాస్తవానికి అప్పుడు జరిగింది తప్పుడు రిజిస్ట్రేషన్ అని పేర్కొంటూ... భోగాపురం రిజిస్టార్ డాక్యుమెంట్ రైటర్.. 2019 అక్టోబర్ 19 తేదీన.. 164 CRPC స్టేట్మెంట్ ని.. కాకినాడ ఫస్ట్ అడిషనల్ జ్యూడిషల్ సివిల్ జడ్జ్.. ముందట ఇచ్చాడు. అంతేకాదు.. సీసీ కెమెరాలతో దొంగలని పట్టుకునే పోలీసులు.. ఆ సీసీ కెమెరాల పుణ్యమా అని అడ్డంగా బుక్ అయ్యారు. సర్పవరం లో కిడ్నాప్ చేసి.. భోగాపురం తీసుకెళ్లిన.. నాలుగు గంటల తతంగమంతా.. పలు చోట్ల సీసీ కెమెరాలలో రికార్డు అయింది. క్షవరం అయితే కానీ ఇవరం రాదని.. సీసీ కెమెరాలు చూసి దోషులని పట్టుకునే పోలీసులు.. ఆ సీసీ కెమెరాల సంగతి మర్చిపోయి ఇలా దొరికిపోవడం కామెడీగా ఉంది. మొత్తానికి కొద్దికొద్దిగా కదులుతున్న తీగతో.. దందా చేసి ఇన్నాళ్లు డొంకలో దాక్కున్నవారు.. ఇప్పుడిప్పుడే భయంతో వణుకుతున్నారు. ముఖ్యంగా డీజీపీకి కంప్లైంట్ వెళ్లడంతో ఐఏఎస్, ఐపీఎస్ ఒణికిపోతున్నారట. మరి ముఖ్యంగా ఆ ఐపీఎస్ అయితే.. డైపర్ వేసుకొని తిరుగుతున్నాడని టాక్... ఇప్పటికే ఆ ఐపీఎస్ గడిచిన రెండు నెలల్లో.. బలగ ప్రకాష్ టీం తో.. ఒకే హోటల్ లో 17 సార్లు సిట్టింగ్ వేశాడు. దీన్నిబట్టే అర్థంచేసుకోవచ్చు ఆ ఐపీఎస్ ఎంతలా వణికిపోతున్నాడో!! తప్పుని సరిదిద్దాల్సిన పోలీసులే.. ఇంత పెద్ద తప్పు చేశారు. ఈ విషయం డీజీపీ దృష్టికి కూడా వెళ్ళింది. మరి ఆయన ఈ కిడ్నాప్-కబ్జా వ్యవహారంలో ఇన్వాల్వ్ అయినవారిపై ఎలాంటి చర్యలు తీసుకుంటారు?.. బాధితుడికి ఎప్పుడు న్యాయం చేస్తారు? ఆయన ఇలాగే మౌనంగా ఉంటే ప్రజలకు పోలీసు వ్యవస్థ మీదే నమ్మకం పోతుంది. ఇక ఈ విషయంలో సర్కార్ కూడా అడుగు ముందుకేసి బాధితుడికి న్యాయం చేయాల్సిన అవసరముంది. అవినీతి రహిత పాలనే అందించడమే తమ లక్ష్యమని చెప్పుకునే అధికారపార్టీ.. అవినీతి-అన్యాయం చేసిన వారికి.. పరోక్షంగా అండగా ఉండటం ఎంత వరకు కరెక్ట్? గత ప్రభుత్వం మీద, అప్పుడు వారికి సన్నిహితంగా ఉన్న కొందరు అధికారులపైనా.. ఇప్పటి అధికారపార్టీ నేతలు పదేపదే అవినీతి ఆరోపణలు చేస్తుంటారు. మరి ఈ వ్యవహారం మీద ఎందుకు నోరు మెదపడం లేదు? ఇందులో తమ పార్టీ నేతలు కూడా ఉన్నారా? లేక పార్టీ సీనియర్ నేతైన మంత్రి గారి బావమరిది ఇన్వాల్వ్ అయ్యాడని వెనకడుగు వేస్తున్నారా? ప్రభుత్వం దీనిపై స్పందించాలి. ఈ భోగాపురం భాగోతం వెనుకున్న వారిపై ప్రభుత్వం కఠినంగా వ్యవహరించి.. బాధితుడికి న్యాయం చేయాలి. లేదంటే ప్రభుత్వం మీద కూడా నమ్మకం పోతుంది.  

క‌విత‌, ష‌ర్మిలా రాజ్య‌స‌భ‌కు వెళ్తారా?

తెలంగాణ నుంచి రెండు రాజ్యసభ సీట్ల కోసం అధికార టీఆర్ఎస్‌లో పోటాపోటీ నెలకొంది. షెడ్యూల్‌ ప్రకారం రాజ్యసభ ద్వైవార్షిక ఎన్నికల నోటిఫికేషన్‌ మార్చి 6న జారీ కానుంది. 13వ తేదీ వరకు నామినేషన్ల దాఖలుకు అవకాశం ఉంది.  సామాజిక కోణంలో తమకు అవకాశం దక్కుతుందని పలువురు సీనియర్లు భావిస్తుండగా, ఇప్పటివరకు పార్టీ తరఫున రాజ్యసభ పదవులు దక్కని వర్గాల వారూ ఆశగా ఎదురుచూస్తున్నారు. పార్టీ అధినేత కేసీఆర్‌ నిర్ణయం కోసం ఉత్కంఠగా ఎదురుచూస్తున్నారు.  నిజామాబాద్‌ మాజీ ఎంపీ కవితను ఈసారి పార్టీ తరఫున రాజ్యసభకు పంపిస్తార‌నే ప్ర‌చారం విస్తృతంగా జరుగుతోంది. అయితే సి.ఎం. కేసీఆర్ ఆలోచ‌నే ఎలా వుందో ఎవ‌రూ అంచ‌నా వేయ‌లేక‌పోతున్నారు. కెటిఆర్ సి.ఎం. అవుతారా? క‌వితా రాజ్య‌స‌భ‌కు వెళ్తారా?  అయితే హ‌రిష్‌రావు ఈ ప‌రిణామాల‌పై ఎలా స్పందిస్తారు? అనే అంశంపై టిఆర్ ఎస్ కార్య‌క‌ర్త‌ల్లో విస్తృతంగా చ‌ర్చ జ‌రుగుతోంది. జాతీయ రాజకీయాల్లోకి వెళ్లాలనుకుంటున్న సీఎం కేసీఆర్‌ తన తరఫున ఢిల్లీ, ఇతర రాష్ట్రాల్లో ఫెడరల్‌ ఫ్రంట్‌ ఏర్పాటు ప్రయత్నాలకు నమ్మకమైన వారి కోసం అన్వేషిస్తున్నారు.  రాజ్యసభ సీటు భర్తీ సామాజిక కోణంలోనే ఉంటుందని టీఆర్‌ఎస్‌ ముఖ్యులు భావిస్తున్నారు. ఏపీ కోటాలో పదవీ విరమణ చేస్తున్న టీఆర్‌ఎస్‌ రాజ్యసభ సభ్యుడు కె.కేశవరావుకు వయసు రీత్యా ఈసారి అవకాశం ఉండకపోవచ్చన్న అంచనాలున్నాయి. రెడ్లకు అవకాశం లభిస్తే, మాజీ ఎంపీ పొంగులేటి శ్రీనివా్‌సరెడ్డి, మాజీీ స్పీకర్‌ కె.ఆర్‌.సురే్‌షరెడ్డి, ఎమ్మెల్సీ నాయిని నర్సింహారెడ్డి మధ్య పోటీ ఉంటుందని చెబుతున్నారు. కమ్మ సామాజిక వర్గానికి ఇవ్వాలనుకుంటే మండవ వెంకటేశ్వరావు, తుమ్మల నాగేశ్వరరావు పేర్లు పరిశీలించవచ్చని అంటున్నారు. బీసీలకు అవకాశం ఇస్తే సిరికొండ మధుసూదనాచారి, బస్వరాజు సారయ్య పేర్లు పరిశీలిస్తారని చెబుతున్నారు. ఎస్సీ కోటాలో భర్తీ చేయాలని భావిస్తే కడియం శ్రీహరి, మాజీ ఎంపీ మంద జగన్నాథం పేర్లు పరిశీలిస్తారని అంటున్నారు. ఎస్సీల్లోనే మాలలకు అవకాశం ఇవ్వాలని అనుకుంటే, టీఎ్‌సఐఐసీ చైర్మన్‌ గాదరి బాలమల్లు, ఎస్టీ అయితే సీతారాంనాయక్‌ పేరు ఉండొచ్చని అంటున్నారు. అనూహ్యంగా ఒక పారిశ్రామికవేత్తను టీఆర్‌ఎస్‌ తరఫున రాజ్యసభకు పంపాలని అనుకుంటే హెటిరో అధినేత పార్థసారథిరెడ్డి పేరు పరిశీలించవచ్చని చెబుతున్నారు.  ఆంధ్రప్రదేశ్ కు చెందిన రాజ్యసభ స్థానాలు ఎవరికీ కేటాయించాలని ఇన్నాళ్లు చర్చించిన అధికార పార్టీ ఓ నిర్ణయానికి వచ్చిందని తెలుస్తోంది. ఈ మేరకు ఏపీ నుంచి రాజ్యసభకు ప్రాతినిధ్యం వహించే వారి జాబితా సిద్ధమైనట్టు సమాచారం.  కీలకమైన పదవులు కావడంతో పార్టీ నమ్ముకున్నోళ్లు.. తమకు అండగా నిలబడిన వ్యక్తులను ఎంపిక చేసినట్లు పార్టీ వర్గాల్లో వార్త వినిపిస్తోంది.  మాజీ ఎంపీ వైవీ సుబ్బారెడ్డి - సజ్జల రామకృష్ణారెడ్డితో పాటు మాజీమంత్రి - ఏపీసీసీ మాజీ అధ్యక్షుడు రఘువీరారెడ్డి ఉన్నట్లు తెలుస్తోంది. అయితే రఘువీరారెడ్డి కాకుంటే సుప్రీంకోర్టు రిటైర్డ్ జస్టిస్ జాస్తి చలమేశ్వర్ కూడా ఉన్నట్లు వార్తలు వస్తున్నాయి. ఈ జాబితా ఫైనలైనట్టు తెలుస్తోంది.  షర్మిల ఆపద సమయంలో జ‌గ‌న్‌కు తోడుగా నిలిచారు. జగనన్న వదిలిన బాణాన్ని అంటూ పాదయాత్ర చేశారు. కష్టకాలంలో పార్టీకి షర్మిల పెద్ద దిక్కుగా నిలిచారు. తన సొంత మీడియా సాక్షి ప్రారంభించినప్పటి నుంచి సజ్జల రామకృష్ణారెడ్డి జగన్ తో ఉన్నారు. సాక్షి పత్రిక ఎడిటోరియల్ డైరెక్టర్ గా కొనసాగుతూనే జగన్ కు రాజకీయాలపై సలహాలు సూచనలు ఇచ్చారు. ఆ తర్వాత సజ్జలను పార్టీలోకి ఆహ్వానించి పెద్ద పదవే ఇచ్చారు. విజయ సాయిరెడ్డి తర్వాత జగన్ కు అత్యంత నమ్మకస్తుడు సజ్జలనే. ఆయన పార్టీలో జగన్ రాజకీయ సలహాదారుడిగా పార్టీ రాజకీయ వ్యవహారాల కమిటీలో పని చేశారు. ప్రస్తుతం ఆంధ్రప్రదేశ్ ప్రభుత్వ సలహాదారుడిగా కొనసాగుతున్నారు. కడప జిల్లాకు చెందిన వ్యక్తి. ఎప్పుడూ తన తోడు ఉండడంతో ఆయనను రాజ్యసభకు జగన్ పంపించనున్నట్టు తెలుస్తోంది. ప్రకాశం జిల్లాకు చెందిన వైవీ సుబ్బారెడ్డి జగన్ పార్టీ పెట్టినప్పటి నుంచి ఉన్నారు. గతంలో ప్రకాశం ఎంపీగా సుబ్బారెడ్డి పని చేశారు. ఈసారి జరిగిన ఎన్నికల్లో సుబ్బారెడ్డి పోటీ చేయలేదు. అప్పుడు ఆయన పదవులు ఆశించకపోవడంతో ఇప్పుడు రాజ్యసభకు పంపించాలని నిర్ణయానికి వచ్చారు. పార్టీలో కీలక నాయకుడిగా గుర్తింపు పొందిన సుబ్బారెడ్డిని రాజ్యసభకు పంపితే న్యాయం జరుగుతుందనే భావనలో జగన్ ఉన్నారంట. అనూహ్యంగా రాజ్యసభకు పంపే జాబితాలో ప్రస్తుతం కాంగ్రెస్ పార్టీ సీనియర్ నాయకుడు రఘువీరారెడ్డి ఉండడం గమనార్హం. అనంతపురము జిల్లాకు చెందిన రఘువీరారెడ్డికి పిలిచి మరి రాజ్యసభ సీటు ఇస్తామంటున్నారు. యాదవ సామాజికి వర్గానికి చెందిన రఘువీరారెడ్డి జగన్ తండ్రి వైఎస్సార్ తో మంచి అనుబంధం ఉంది. అయితే రఘువీరారెడ్డి కాకుంటే మరొకరిని కూడా దృష్టిలో పెట్టుకున్నారు. భారత అత్యున్నత న్యాయస్థానం సుప్రీంకోర్టు జడ్జిగా పని చేసిన జస్టిస్ జాస్తి చలమేశ్వర్ ను రాజ్యసభకు పంపించాలని భావిస్తున్నారంట.  కృష్ణాజిల్లా యాదవ సామాజిక వర్గానికి చెందిన చలమేశ్వర్ సేవలను వినియోగించుకునేలా పార్టీ ఒక నిర్ణయానికి వచ్చిందంట. ఎందుకంటే తరచూ జగన్ న్యాయస్థానాల్లో చిక్కులు ఎదుర్కొంటున్నారు. చలమేశ్వర్ సేవలు వినియోగించుకుంటే జగన్ సేఫ్ గా ఉండడంతో పాటు న్యాయ కోవిదుడికి గౌరవంగా రాజ్యసభను ఇద్దామనే ఆలోచనలో ఉన్నారంట.

అధికారంలో ఉంటే ఒకలా... ప్రతిపక్షంలో ఉంటే మరోలా... వైజాగ్ ఎపిసోడ్ నీతి ఏంటి?

రాజకీయాల్లో ఓడలు బళ్లు అవుతాయి. బళ్లు ఓడలవుతాయి. ప్రజాస్వామ్యంలో ఇది సాధారణమే. ప్రస్తుతం దేశంలోనూ, అనేక రాష్ట్రాల్లోనూ ఇదే జరుగుతోంది. నిన్నమొన్నటివరకు దేశంలోనూ, ఆయా రాష్ట్రాల్లో చక్రం తిప్పినవారంతా, అనామకులుగా మారిపోయారు. దశాబ్దాల తరబడి రాజ్యాన్ని ఏలినవారు, ఇప్పుడు సైడైపోవాల్సిన పరిస్థితులు ఏర్పడ్డాయి. తెలుగు రాష్ట్రాల్లో పలువురు ఉద్దండుల పరిస్థితి ఇప్పుడలాగే కనిపిస్తోంది. ఎంతోమంది ముఖ్యనేతలు తీవ్ర గడ్డుపరిస్థితులను ఎదుర్కొంటున్నారు. మళ్లీ వాళ్లకు మంచి రోజులు వస్తాయని మాత్రం కచ్చితంగా చెప్పలేని పరిస్థితులు కనిపిస్తున్నాయి. ఆంధ్రప్రదేశ్, తెలంగాణ రెండింటిలోనూ ఊహించని రాజకీయ మార్పులు జరగడంతో ఓడలు బళ్లు... బళ్లు ఓడలయ్యాయి.  అయితే, అధికారంలో ఉండగా ఒకలా, ప్రతిపక్షంలా ఉంటే మరోలా వ్యవహరించడం సర్వసాధారణంగా కనిపిస్తుంది. విపక్ష నేతగా ఉన్న సందర్భాల్లో నేతలు వ్యవహరించే తీరు ఒక్కోసారి సాధారణ ప్రజాస్వామిక సూత్రాలకు విరుద్ధంగా ఉంటుంది. నేటి ముఖ్యమంత్రి వైఎస్ జగన్మోహన్ రెడ్డి మూడేళ్ళ క్రితం విపక్ష నేతగా ఉన్నారు. అప్పట్లో ఆయన ప్రత్యేక హోదా కోసం పట్టుదలతో ఉన్నారు. క్యాండిల్ ర్యాలీ నిర్వహించేందుకు వైజాగ్ పర్యటనకు వెళ్లారు. అప్పటికే అక్కడ సీఐఐ పార్ట్ నర్ షిప్ సమ్మిట్ జరుగుతోంది. ఆ నేపథ్యంలో క్యాండిల్ ర్యాలీకి అనుమతిని ప్రభుత్వం నిరాకరించింది. అయినా కూడా జగన్ వైజాగ్ చేరుకున్నారు. అక్కడి నుంచి నగరంలోకి వెళ్లేందుకు ప్రయత్నించారు. అప్పట్లో పోలీసులు ఆయనను అడ్డుకున్నారు. తనను అడ్డుకోవడంపై అప్పట్లో విపక్ష నేతగా ఉన్న జగన్ తీవ్ర ఆగ్రహం వ్యక్తం చేశారు.  ఇక, ఇప్పడు ఏపీలో రాజధాని రగడ కొనసాగుతోంది. అందులో భాగంగా చంద్రబాబు చేపట్టిన వైజాగ్ యాత్రలో ఉద్రిక్తత చోటు చేసుకుంది. ఇందులో పోలీసులను తప్పు పట్టాల్సింది ఏమీ లేదు. అయితే, ఇలాంటి సమయంలో విపక్ష నాయకులు ప్రతిష్టాత్మకంగా తీసుకుంటారు. ఎలాగైనా పోలీసు వలయాన్ని ఛేదించుకోవాలని తాము అనుకున్నది చేయాలని చూస్తుంటారు. పొలిటికల్ మైలేజ్ పొందాలని ప్రయత్నిస్తుంటారు. చంద్రబాబు వైజాగ్ టూర్లోనూ అదే జరిగిందనే మాట వినిపిస్తోంది. నాయకులు విపక్షంలో ఉన్నప్పుడు పొలిటికల్ మైలేజ్ కోసం ప్రయత్నించడంలో తప్పు లేదు. కాకపోతే...ఆ ప్రయత్నాలు సమాజంలో ఉద్రిక్తతలు పెంచేవిగా మాత్రం ఉండకూడదంటున్నారు. అదే సమయంలో అధికారంలో ఉన్న నాయకులు ప్రజాస్వామ్యంలో విపక్షాలకు ఉండే ప్రాధాన్యాన్ని గుర్తించాలని సూచిస్తున్నారు. అధికారపక్షం, విపక్షం....రెండూ ప్రజాస్వామ్యానికి రెండు చక్రాల్లాంటివని, ఏ ఒక్కటి సరిగా లేకున్నా ప్రజాస్వామ్యం కుంటుపడుతుందని గుర్తుచేస్తున్నారు.

రాజీవ్ గాంధీ మరణించాక ఆ సీక్రెట్ బయటపెట్టిన వాజపేయి!!

అమావాస్య రోజు చందమామని చూడాలనుకోవడం, రాజకీయాలలో విలువలు గురించి మాట్లాడాలనుకోవడం ఒకటే అంటుంటారు. అవును ఈ తరం రాజకీయాలను చూస్తే నిజమే అనిపిస్తుంది. ఒకరిపై ఒకరు హద్దు మీరి విమర్శలు చేసుకోవడమే తప్ప.. విలువైన రాజకీయాలు చేసేవారు ఎంతమంది ఉన్నారు ఈరోజుల్లో. ఎవరు అధికారంలోకి వచ్చినా ప్రతిపక్ష నేతల మీద కక్ష తీచుకోవాలన్న ధోరణే తప్ప.. ప్రజల కోసం ఒకరి సూచనలను ఒకరు గౌరవించుకుంటూ విలువైన రాజకీయాలు చేసేవారు ఎక్కడున్నారు?. ఈతరం రాజకీయ నాయకులు ముందుతరం వారిని చూసి ఎంతో నేర్చుకోవాలి. మాజీ ప్రధానులు రాజీవ్ గాంధీ- వాజపేయి మధ్య జరిగిన ఓ సంఘటన తెలిస్తే.. ఈ తరం రాజకీయ నాయకులు సిగ్గుతో తలదించుకుంటారు. అది రాజీవ్ గాంధీ ప్రధానిగా ఉన్న సమయం. అప్పుడు వాజపేయి ప్రతిపక్ష నేతగా ఉన్నారు. వారి మధ్య జరిగిన ఓ అపురూప సంఘటన గురించి ఇప్పుడు తెలుసుకుందాం.  " సార్..ప్రధానమంత్రి రాజీవ్ గాంధీ గారు లైన్ లో వున్నారు..మీతో మాట్లాడుతారుట ".. ఫోన్ పట్టుకుని వాజపేయి దగ్గరికి వచ్చి చెప్పాడు ఆయన వ్యక్తిగత కార్యదర్శి.." ఫోన్ అందుకున్న వాజపేయి ప్రధానమంత్రి తో రెండు నిమిషాలు మాట్లాడారు. ఫోన్ పెట్టేసి వాజపేయి కార్యదర్శి వంక చూసి "మనం ప్రధానమంత్రి తో పాటు ఐక్యరాజ్యసమితి సమావేశంలో పాల్గొనటానికి అమెరికా వెళ్తున్నాం.. ఏర్పాట్లు చూడండి" అనడంతో తను విన్నది నిజమేనా అని ఆశర్యంతో మరోమారు అటల్జీ ని అడిగి కన్ఫర్మ్ చేసుకున్నాడు కార్యదర్శి. " సార్..పత్రికలకు ప్రెస్ నోట్ పంపమంటారా?" నసిగాడు కార్యదర్శి వాజపేయి ఒక్క క్షణం అతనివంక చూసి నవ్వుతూ "నిక్షేపంగా" అన్నారు. ఈ వార్త అప్పట్లో ఇటు కాంగ్రెస్ పార్టీలోనూ, అటు బీజేపీ లోనూ పెద్ద దుమారం సృష్టించింది. రాజీవ్ గాంధీ నిర్ణయానికి కాంగ్రెస్ పార్టీలో సీనియర్లు సైతం ముక్కున వేలేసుకున్నారు. "సాక్షాత్తు ప్రధానమంత్రి హోదాలో ఐక్యరాజ్యసమితి ప్రతినిధుల సమావేశానికి అటెండ్ అవుతూ ప్రతిపక్షపార్టీ నేతను వెంటపెట్టుకెళ్లటం ఏంటి?" అంటూ పార్టీలో సన్నాయి నొక్కులు నొక్కారు. కానీ రాజీవ్ గాంధీ మాత్రం వాజపేయి ని తీసుకెళ్లడం వెనుక అసలు కారణాన్ని ఎవరికీ చెప్పలేదు. కానీ ఆయన మరణానంతరం వాజపేయే అసలు విషయాన్ని ప్రపంచానికి చెప్పారు.. ఆన్ టోల్డ్ వాజపేయి అనే పుస్తకం ద్వారా.. అదీ ఆయన మాటల్లోనే.. "1985 లోనే నాకు ఒక కిడ్నీ దెబ్బ తిని వైద్యం తీసుకుంటున్నా.1988 నాటికి రెండో కిడ్నీ కూడా దెబ్బతింది. డాక్టర్లు తక్షణం వైద్య చికిత్స అవసరం అన్నారు. ఇక్కడ కన్నా అమెరికాలో మెరుగైన వైద్యం అందుబాటులో ఉన్నందున అక్కడికి వెళ్లి ట్రీట్మెంట్ తీసుకోవాలని డాక్టర్లు సూచించారు. ఈ విషయం తెలుసుకున్న రాజీవ్ గాంధీ ఐక్యరాజ్యసమితి ప్రతినిధుల సమావేశానికి నన్ను కూడా రమ్మని ఫోన్ లో కోరారు. కానీ చివరగా ఆయన ఒక మాట చెపుతూ.. 'అటల్ జీ.. ఈ పర్యటనను పూర్తిగా మీ వైద్యానికి ఉపయోగించుకుని సంపూర్ణ ఆరోగ్యంతో ఇండియా కి రండి' అని చెప్పారు. ఈ రోజు నేను ప్రాణాలతో ఉన్నానంటే అది రాజీవ్ గాంధీ నాకు చేసిన ఉపకారం వల్లనే. నా కన్నా ఇరవై ఏళ్ళ చిన్నవాడు అయిన రాజీవ్ నాకు తమ్ముడిలాంటి వాడే" అని వాజపేయి అన్నారు. అది విలువలతో కూడిన రాజకీయమంటే. రాజీవ్ గాంధీ, వాజపేయి రాజకీయంగా ప్రత్యర్థులు కావచ్చు కానీ ఒకరినొకరు గౌరవించుకుంటూ విలువైన రాజకీయాలు చేశారు. వారిని చూసి ఈ తరం రాజకీయ నాయకులు ఎంతో నేర్చుకోవాలి. పొద్దున్న లేస్తే ఒకరిపై ఒకరు దుమ్మెత్తి పోసుకునే అధికార-ప్రతిపక్ష పార్టీల నాయకులు.. రాజకీయాలు పక్కన పెట్టి అప్పుడప్పుడన్నా నైతిక విలువలు పాటించాలన్న సూత్రం.. ఇలాంటి విషయాలు తెలుసుకుని అయినా పాటిస్తే బాగుండు..!

ఎలా స్పందిస్తారో మీ ఇష్టం!

అనగనగా ఓ అమ్మాయి. ఆ అమ్మాయికి చిన్నప్పుడే తండ్రి చనిపోవడంతో తల్లి నిబ్బరంగా సంసారాన్ని నెట్టుకొస్తూ ఉంది. కానీ కూతురు మాత్రం ప్రతి చిన్న కష్టానికీ కంగారుపడిపోయేది. ఏం చేయాలో పాలుపోక తెగ బాధపడిపోయేది. ‘ఇక ఈ కష్టాలను భరించడం నా వల్ల కాదమ్మా!’ అని ఓ రోజు తన తల్లితో తెగేసి చెప్పింది కూతురు. తల్లి, కూతరి వంక ఒక్క నిమిషం చూసింది. ఆ తరువాత మారుమాట్లాడకుండా ఆమెను వంటింట్లోకి తీసుకువెళ్లింది. తల్లి తనకేం చెప్పాలనుకుందో తెలియని అయోమయంలో కూతురు ఆమెను అనుసరించింది.   వంటింట్లోకి వెళ్లిన తల్లి ఒక మూడు పాత్రలు తీసుకుంది. ఒకదానిలో బంగాళదుంప, మరోదానిలో కోడిగుడ్డు, ఇంకోదానిలో కాఫీ గింజలు వేసి వాటిని పొయ్యి మీద పెట్టింది. తల్లి చేస్తున్న పని చాలా అసంబద్ధంగా తోచింది కూతురికి. అయినా మారు మాటాడకుండా చూస్తూ నిల్చొంది. ఒక పది నిమిషాలు అయిన తరువాత... ‘ఒకో గిన్నెలో ఏం జరిగిందో గమనించు’ అంటూ అడిగింది తల్లి. ‘గమనించడానికి ఏముంది! బంగాళదుంప వేడి నీటికి మెత్తబడిపోతుంది. కోడిగుడ్డు గట్టిపడిపోతుంది. కాఫీ గింజలతో కాఫీ తయారవుతుంది’ అంది కూతురు ఎగతాళిగా. ‘కదా! పైకి గట్టిగా కనిపించే బంగాళదుంప కాస్త వేడినీరు తగలగానే ఇట్టే మెత్తబడిపోయింది. చేయి తగిలితే చాలు చితికిపోయే కోడిగుడ్డేమో వేడినీటికి గట్టిపడిపోయింది. ఇక కాఫీ గింజలు మాత్రం తన చుట్టూ ఉన్న నీటిని తన ఉనికితో నింపేశాయి,’ అని చెప్పుకొచ్చింది తల్లి. తల్లి చేసిన వింత చేష్ట వెనుక ఏదో మంచిమాట దాగి ఉంటుందని అప్పటికి అర్థమైంది కూతురికి.   ‘మనం కూడా ఇంతే! అప్పటివరకూ ధైర్యంగా ఉన్నవారు కూడా కష్టాలు రాగానే ఇట్టే డీలా పడిపోతారు.. ఆ బంగాళదుంపలా. మరికొందరేమో కష్టాలు ఎదురయ్యేసరికి మొద్దుబారిపోతారు. అప్పటివరకూ సున్నితంగా ఉన్నవారు కూడా రాయిలా మారిపోతారు- కోడిగుడ్డులా. కానీ చాలా కొద్ది మంది మాత్రమే కష్టాలకు ఎదురీదుతారు. ఆ కష్టాలను సైతం తనకు అనుకూలంగా మార్చుకుంటారు. వాళ్ల స్వభావంతో, వారి చుట్టూ ఉన్న వాతావరణమే పూర్తిగా మారిపోతుంది... కాఫీ గింజల్లాగా! ఇప్పుడు చెప్పు నువ్వు ఎలా ఉండాలనుకుంటున్నావు?’ అని అడిగింది తల్లి. కూతురు మారు మాట్లాడకుండా చిరునవ్వుతో కాఫీని ఒక రెండు కప్పుల్లోకి సర్ది, ఒకదాన్ని తన తల్లికి అందించింది. మరోదాన్ని తను ఆస్వాదించేందుకు సిద్ధపడింది... జీవితాంతం!   - నిర్జర.

మంచి పాస్‌వర్డ్‌ కోసం 10 చిట్కాలు

ఇవాళ రేపట్లో కంప్యూటర్లో ఏదో ఒక అకౌంట్‌ లేకుండా పూట గడవడం లేదు. అది ఇంటర్నెట్‌ బ్యాంకింగ్‌ కావచ్చు, ఆన్‌లైన్‌ షాపింగ్‌ కావచ్చు... ఏదీ కాకపోయినా కనీసం ఈ-మెయిల్‌ అకౌంటన్నా కావచ్చు. వీటన్నింటికీ మంచి పాస్‌వర్డుని ఎంచుకోవడం ఒక సమస్యే! ఆ మన దగ్గరే ఏముందిలే నష్టపోయేందుకు అనుకోవడానికి కూడా లేదు. మన వ్యక్తిగత సమాచారాన్నీ, ఫైళ్లని తస్కరించడం దగ్గర్నుంచీ... మన కాంటాక్ట్‌ లిస్టులో ఉండేవారి మెయిల్స్‌కు తప్పుడు మెయిల్స్‌ పంపడం వరకూ హ్యాకర్లు దేనికైనా తెగించగలరు. ఎవరిపడితే వారి పాస్‌వర్డులను ఛేదించేందుకు ప్రత్యేకమైన సాఫ్టవేర్లు అందుబాటులో ఉన్నాయంటే నమ్మగలరా! అందుకే అలాంటి ప్రమాదాల బారిన పడకుండా ఉండేందుకు ఈ చిట్కాలు-   1- చిన్నపాటి పాస్‌వర్డులకు కాలం చెల్లిపోయింది. మీ పాస్‌వర్డు కనీసం 10 అక్షరాలకు పైనే ఉండాలంటున్నారు నిపుణులు. ఇక మరీ జాగ్రత్తగా ఉండాల్సిన సందర్భాలలో కనీసం 12 నుంచి 14 అక్షరాలు ఉండాలని సూచిస్తున్నారు.   2- పాస్‌వర్డులో కేవలం అక్షరాలే ఉంటే సరిపోదన్నది అందరికీ తెలిసిందే! అంకెలు, అంకెల దిగువున ఉండే సింబల్స్, క్యాపిటల్‌ లెటర్స్‌, స్మాల్‌ లెటర్స్ ఇలా కీబోర్డు మీద టైప్‌ చేయదగిన అన్ని రకాల సంకేతాలనీ వాడాల్సిందే!   3- మీకు సంబంధించిన వ్యక్తిగతమైన వివరాలని (ఉదా॥ పుట్టినరోజు, భార్యపేరు) పాస్‌వర్డులో ఉంచితే పాస్‌వర్డుని ఛేదించడం సులువైపోతుంది. అందుకే మీకు బాగా గుర్తుండి, మీ చుట్టుపక్కల వారికి ఏమాత్రం అవగాహన లేని (ఉదా॥ తల్లి తరఫు ఇంటి పేరు, పిల్లలకి పురుడు పోసిన డాక్టరు పేరు) పాస్‌వర్డులను ఎంచుకోవాలి.       4- నిఘంటువులో కనిపించే పదాలను (ఉదా॥ house, system, daughter) ఎట్టిపరిస్థితుల్లోనూ పాస్‌వర్డుగా ఉంచకూడదు. వీటిని పాస్‌వర్డు తస్కరించే సాఫ్టవేర్లు పసిగట్టేస్తాయి. My wife, happy home వంటి రోజువారీ వాక్యాలను కూడా ఇవి పట్టేస్తాయి.   5- చాలామంది బలమైన పాస్‌వర్డునే ఎంచుకొంటారు. కానీ పాస్‌వర్డు మర్చిపోయినప్పుడు కంప్యూటర్‌ అడిగే ప్రశ్నలకు గాను చాలా తేలికైనవి ఎంచుకొంటారు. ఫలితంగా ఎవరైనా సదరు ప్రశ్నలకు జవాబు చెప్పి మీ అకౌంటులోకి ప్రవేశించే అవకాశం ఇచ్చినట్లు అవుతుంది.       6- మనసులో ఏదో ఒక వాక్యాన్ని అనుకొని అందులోని పదాల తొలి అక్షరాలతో పాస్‌వర్డుని ఏర్పాటు చేసుకోవడం ఒక మంచి పద్ధతి. ఉదా॥ My Son was born on 14th January 2000 అన్న వాక్యాన్ని గుర్తుంచుకోవడం చాలా తేలిక. దీని ఆధారంగా MSWBO1422000 అన్న పాస్‌వర్డుని సృష్టించుకోవచ్చు.   7- వేర్వేరు అకౌంట్లకి ఒకటే పాస్‌వర్డుని ఎట్టిపరిస్థితుల్లోనూ వాడకూడదన్నది నిపుణులు హెచ్చరిక. ఒకవేళ అలా వాడాల్సి వచ్చినా, తప్పనిసరిగా అందులో ఎంతో కొంత మార్పు చేయవలసి ఉంటుంది. ఉదాహరణకు పైన ఎంచుకొన్న MSWBO1422000 పాస్‌వర్డుని AMAZONకి కూడా వాడాలనుకుంటే MSWBO-amaze-1422000 అంటూ పాస్‌వర్డుకి తగిన మార్పు చేయవచ్చు.       8- బ్యాంకింగ్‌ వంటి ఆర్థికపరమైన, గోప్యమైన లావాదేవీలు జరిపే ఖాతాలకి చెందిన పాస్‌వర్డుల విషయంలో మరీ జాగ్రత్తగా ఉండాలి. వీటిని తరచూ మారుస్తూ ఉండటం, మరే ఇతర పాస్‌వర్డులతో సంబంధం లేకుండా ఉంచడం అవసరం. ఇందుకోసం ఎలాంటి అనుమానం రాని పాస్‌వర్డులు కావాలనుకుంటే ఆన్‌లైన్లో http://passwordsgenerator.net/ వంటి సైట్లు ఉచితంగా క్లిష్టమైన పాస్‌వర్డులను అందిస్తాయి.   9- ఎట్టి పరిస్థితులలోనూ పాస్‌వర్డుని బయటవారితో పంచుకోకూడదు. ఇవాళ ఉన్న బంధం రేపు ఉంటుందని చెప్పలేం కదా! ఒకవేళ అలా ఎవరితోనన్నా పాస్‌వర్డుని పంచుకోవల్సిన సందర్భం వచ్చినా, ఎవరికన్నా పాస్‌వర్డు తెలిసిపోయిందన్న అనుమానం కలిగినా... వెంటనే దానిని మార్చివేయడం మంచింది.    10- ఈ రోజుల్లో పది రకాల ఖాతాలకు పది రకాల పాస్‌వర్డులు కావాల్సి వస్తోంది. పైగా అవి క్లిష్టంగా ఉండాలన్న నియమం ఎలాగూ ఉంది. దీంతో తరచూ ఏదో ఒక పాస్‌వర్డుని మర్చిపోవడం అతి సహజం. ఇందుకోసం వీటిని వీటిని ఎక్కడన్నా భద్రమైన చోట రాసి ఉంచుకోవడంలో తప్పులేదు. అయితే అలా రాసి ఉంచుకున్న కాగితాన్ని నిర్లక్ష్యంగా ఉంచితే మాత్రం అసలుకే ఎసరు తప్పదు! - నిర్జర.

అందుకే స్నేహితుడు కావాలి!

అదో పెద్ద అడవి. ఆ అడవిలో రకరకాల జంతువులు. వాటిలో సహజంగానే ఓ సింహమూ, ఓ జింకా ఉన్నాయి. ఒక రోజు ఆ సింహం జింకని చూడనే చూసింది. వెంటనే దాన్ని వేటాడేందుకు వెంటపడింది. సింహం నుంచి తప్పించుకోవడానికి జింక చాలా ప్రయత్నమే చేసింది. దాని నుంచి పరిగెడుతూ పరిగెడుతూ పొరపాటున ఒక చెరువులోకి పడిపోయింది. దాన్ని తరుముతూ సింహం కూడా చెరువులోకి దూకేసింది. ఆ చెరువు నిండా నీళ్లున్నా బాగుండేది. కానీ కరువుతో చెరువు సగానికి ఎండిపోయింది. బురదతో నిండిపోయింది. ఆ బురదలో ఒక పక్క జింక, మరోపక్క సింహం మోకాళ్ల లోతు వరకు కూరుకుపోయాయి. ‘‘హహ్హా! ఇంక నేను నీ వెనుక పరిగెత్తాల్సిన పని లేదు. ఈ బురదలో చిక్కుకున్న నీ ఎముకలు విరిచి, నీ లేత మాంసాన్ని రుచిచూస్తాను,’’ అంటూ నవ్వింది సింహం.   ‘‘నా మాంసపు రుచి తర్వాత. ముందు నువ్వు ఇక్కడి నుంచి ఎలా బయటపడగలవో ఆలోచించు,’’ అంటూ వెక్కిరించింది జింక. జింక మాటలకి కోపంగా సింహం ముందుకు కదలబోయింది. కానీ అది ఎంతగా కదులుతుంటే అంతగా బురదలో దిగబడిపోతోంది. ‘‘నిజమే నేను కదల్లేకపోతున్నాను. ఇప్పుడెలా!’’ అని బిక్కమొగం వేసింది సింహం. ‘‘నీకు ఎవరన్నా స్నేహితులు ఉన్నారా?’’ అని తాపీగా అడిగింది జింక.   ‘‘నేను ఈ అడవికి రాజుని. అంతా నన్ను చూసి భయపడేవాళ్లే కానీ స్నేహితులు ఎక్కడ ఉంటారు. నాకు బానిసలు, శత్రువులే కానీ స్నేహితులు ఉండరు,’’ అని గర్వంగా చెప్పింది సింహం. ‘‘కానీ నాకైతే చాలామంది స్నేహితులు ఉన్నారు. మేమంతా కలిసిమెలిసి ఉంటాం. నేను కనిపించకపోయేసరికి వాళ్లంతా నన్ను వెతుక్కుంటూ వస్తారు. ఎలాగైనా నన్ను రక్షిస్తారు,’’ అని నమ్మకంగా చెప్పింది జింక. ‘‘సరే! అదీ చూద్దాం... ’’ అని ధీమాగా అంది సింహం. ఆ బురద చెరువులో కాలం చాలా భారంగా గడిచింది. ఒకో గంటా గడిచెకొద్దీ సింహంలో అసహనం పెరిగిపోయింది. కానీ జింక మాత్రం నిశ్చింతగానే ఉంది. తన స్నేహితులు వస్తారనే నమ్మకం తనలో ఇసుమంతైనా తగ్గలేదు.   సాయంత్రం అయ్యింది. నిదానంగా చీకటి పడింది. అసలే ఆకలితో ఉన్న సింహం డీలాపడిపోయింది. కానీ తన స్నేహితుల మీద ఉన్న నమ్మకంతో జింక మాత్రం నిబ్బరంగా నిలబడి ఉంది. ఇంతలో.... చెట్ల చాటు నుంచి ఏవో శబ్దాలు వినిపించాయి. ముందు ఓ జింక పిల్ల చెరువువైపు తొంగిచూసింది. ఆ తర్వాత మరో జింక, దాని వెనుక ఇంకో జింక.... వరుస పెట్టి ఓ జింకల మంద చెరువుగట్టుకి చేరింది. వాటికి అక్కడి పరిస్థితి చిటికెలో అర్థమైపోయింది. ఎలాగొలా తన నేస్తాన్ని రక్షించుకోవాలని అనుకున్నాయి. తాళ్లే పడేశాయో, చేతులే చాచాయో... మొత్తానికి ఎలాగొలా బురదలో చిక్కుకున్న జింకని ఒడ్డుకి తెచ్చాయి. దాన్ని తీసుకుని అడుగులో అడుగు వేసుకుంటూ తిరిగి వెళ్లిపోయాయి.   తన కళ్ల ముందే జరుగుతున్నది చూసిన సింహానికి మతిచెడిపోయింది. కచ్చగా తను కూడా బురదలోంచి బయటపడాలని ఒకసారి విదిలించుకుంది. అంతే! అది మరింత లోతుకి జారిపోయింది. (ప్రచారంలో ఉన్న కథ ఆధారంగా) - నిర్జర.

ఆత్మబంధువులా నిలిస్తే ఆత్మహత్యలే వుండవు...

సంవత్సరానికి 1,35,445 మంది... ప్రతిరోజూ సగటున 242 మంది మగవారు, 129 ఆడవారు జీవితాన్ని వద్దనుకుని బలవంతంగా ప్రాణాలు వదులుతున్నారు మన భారతదేశంలో. అందులోనూ 15 నుంచి 29 సంవత్సరాల మధ్య ఉన్నవారే ఎక్కువట. ప్రపంచవ్యాప్తంగా ఆత్మహత్యల నివారణ దినోత్సవంగా పాటిస్తున్న ఈరోజున ఆత్మహత్యలని నివారించడానికి మనంగా ఏం చేయాలని ఆలోచించి తీరాలి. సమాజం, సామాజిక సంస్థలు, ప్రభుత్వం బాధ్యత ఎంతవుందో.. వ్యక్తులుగా, మన బాధ్యత కూడా అంతే వుందన్నది నిజం. అందుకే పెద్ద పెద్ద సిద్ధాంతాలని పక్కనపెట్టి సగటు మనిషిగా ఆలోచిస్తే మనతోపాటు మసలే మన కుటుంబంలోని వ్యక్తి లేదా స్నేహితుడు, బంధువు, సహోద్యోగి లేదా పక్కింటివారు... ఇలా మన పరిధుల్లో మనకి పరిచయం వున్నవారు, నిన్నటిదాకా మనతో వున్నవారు హఠాత్తుగా చడీచప్పుడు లేకుండా బలవంతంగా ప్రాణాలు తీసుకుంటున్నారంటే అందులో మన పాత్ర ఏం లేదా? మనం చేయగలిగింది ఏం లేదా? వీటిని ఆపడం సాధ్యం కాదా? చిన్న విషయమే.. అందరికీ తెలిసిన విషయమే.. మనందరి అనుభవంలోనిదే. మనసుకి బాధ కలిగితే పంచుకోవడానికి ఒక వ్యక్తి కావలసి వుంటుంది. ఎలాంటి ఆక్షేపణలు లేకుండా కేవలం మనసుపెట్టి వినే ఒక్క వ్యక్తి చాలు ఆ నిమిషానికి దేవుడిలా కనిపిస్తాడు. అందుకే వినటం నేర్చుకుందాం. ఎదుటి వ్యక్తికి మాట్లాడే అవకాశమిద్దాం. మనసులోని బాధనంతా వెళ్ళగక్కేందుకు కొంచెం సమయం ఇద్దాం. సత్సంబంధాలు, సాన్నిహిత్యం మనుషుల్లో భరోసాని, ధైర్యాన్ని, నమ్మకాన్ని కలిగిస్తాయి. ఆపద రాగానే పరిగెట్టుకు రాగలరు. బాధని పంచుకోగలరు. దీనికి చేయాల్సిందల్లా ఒక్కటే.. కొంచెం మానవ సంబంధాలపై దృష్టి పెడదాం. ఉదయం లేచి మనకి ఎదురుపడే ప్రతి ఒక్కరిని చిన్న చిరునవ్వుతో పలకరిద్దాం. ఇంట్లోని పనిమనిషి నుంచి ఆఫీసులోని ప్యూను దాకా అందరినీ కుశలం అడుగుదాం. నాలుగు కబుర్లు చెబుదాం. మన జీవితంలోని విశేషాలని పంచుకుందాం. వాళ్ళ జీవితంలోని విశేషాలని అడుగుదాం. బలమైన మానవ సంబంధాలు ఎప్పుడూ ధైర్యాన్నిస్తాయి. ఆత్మహత్య అనే భూతం ఎప్పుడు ఎవర్ని నిశ్శబ్దంగా కబళిస్తుందో తెలీదు. బతుకు పోరాటంలో ఎత్తుపల్లాలు సహజమని తెలిసీ ఆ క్షణానికి నైరాశ్యానికి లొంగిపోయే వారెందరో! సహాయం చేయగలమా, వారి సమస్యలని తీర్చగలమా అన్నది పక్కన పెడితే, తన బాధలనయితే వినగలం కదా! నాలుగు ధైర్య వచనాలు పలకగలం కదా! ఏదో ఒక దారినైతే చూపించగలం కదా! ఇలా జరగాలంటే ముందు మనం నలుగురికి అందుబాటులో వుండాలి. ఒంటరితనపు కంచుకోటని బద్దలు కొట్టుకుని బయటకి రావాలి. ఈరోజున ఆ నిర్ణయం తీసుకుందాం. ‘‘ఆత్మహత్యల నివారణకి వ్యక్తిగా నేనేం చేయగలను’’ అన్న ఒక చిన్న ఆలోచన చేద్దాం. నలుగురితో ఆ ఆలోచని పంచుకుందాం. నిస్సహాయంగా, నిర్వేదంగా జీవితానికి వీడ్కోలు పలికే దుస్థితి ఎవరికీ రావద్దు అంటే కొంచెం మానవత్వంతో ఆలోచిద్దాం. మానవ సంబంధాలని బలపర్చుకుందాం. -రమ  

ట్రావెలర్స్ డయేరియా గురించి విన్నారా!

కుటుంబసమేతంగా హాయిగా గడిపేందుకు ఏదో పుణ్యక్షేత్రానికని బయల్దేరతాం లేదా పండుగ రోజుల్లో ఓ నాలుగు ఊళ్లు తిరిగిరావాలని గడపదాటతాం. ఊరు దాటాక ఏదో ఒకటి తినక మానదు. జిహ్వచాపల్యం అణచుకోలేకో, ఆకలికి తట్టుకోలేకో ఎక్కడో అక్కడ కాస్త ఆహారం తీసుకుంటాం. అంతే! మన విహారయాత్రలో నిప్పులు పోస్తూ అజీర్ణం మొదలవుతుంది. కడుపులో నొప్పి, గ్యాస్, విరేచనాలతో మన సంబరం కాస్తా సద్దుమణిగిపోతుంది. ఇలాంటి పరిస్థితికి ఓ పేరు ఉంది... అదే ట్రావెలర్స్ డయేరియా! అపరిశుభ్రతే అసలు కారణం నలుగురూ తిరిగే చోట పరిస్థితులు ఏమంత పరిశుభ్రంగా ఉండవు. హోటల్లో వంట చేసేవారి దగ్గర్నుంచీ వడ్డించేవారి వరకూ ఎవరో ఒకరు అపరిశుభ్రమైన చేతులతో ఆహార పదార్థాలను ముట్టుకోవచ్చు. ఇలాంటి సమయంలో వారి చేతికి అంటుకుని ఉన్న E.coli వంటి సూక్ష్మక్రిముల ద్వారా ట్రావెలర్స్ డయేరియా (TD) సోకే ప్రమాదం ఉంది. ఇవీ లక్షణాలు అకస్మాత్తుగా విరేచనాలు మొదలవ్వడం, జ్వరం, వాంతులు వికారం, ఆకలి వేయకపోవడం, కడుపులో పోట్లు, పొట్ట ఉబ్బరం వంటి లక్షణాలు కనిపించవచ్చు. ఈ లక్షణాల నుంచి ఉపశమనం లభించేందుకు మందులు ఎలాగూ అందుబాటులో ఉంటాయి. వాటితో పాటుగా పుష్కలంగా నీరు తాగుతూ ఉండాలి. నీళ్ల విరేచనాలు అవుతుంటే ORS పొడి నీళ్లలో కలుపుకుని తాగాలి. ఒకవేళ విరేచనాలలో రక్తం పోతున్నా, జ్వరం ఉన్నా వెంటనే వైద్యుడిని సంప్రదించడమే మంచిది. పసిపిల్లలు, గర్భవతులలో TD లక్షణాలు కనిపిస్తే అశ్రద్ధ చేయకుండా అందుబాటులోని వైద్యుడిని సంప్రదించాల్సిందే! ఇవీ జాగ్రత్తలు TD వ్యాధి సాధారణంగా 3 నుంచి 7 రోజులల లోపు తగ్గిపోతుంది. చాలా అరుదైన సందర్భాలలో తప్ప ఇది ప్రాణాంతకం కాదు. కాబట్టి అట్టే కంగారుపడాల్సిన పని లేదు. అయితే బయట తిరిగే నాలుగు రోజులూ రోగంతో గడిచిపోతే అంతకు మించిన విషాదం ఏముంటుంది. TD సోకిన తరువాత కంగారుపడి మందులు వాడుతూ తిప్పలు పడేకంటే అసలు అది రాకుండా చూసుకోవడం మేలు కదా! అందుకోసం ఈ జాగ్రత్తలు తీసుకోవాలి... - అపరిశుభ్రంగా ఉన్న ప్రదేశాలలో ఆహారం తీసుకోకూడదు. దారి పొడుగూతా అలాంటి హోటళ్లే కనిపిస్తుంటే ఓ నాలుగు పళ్లు తిని ఆకలి చల్లార్చుకోవడం మంచిది. - పచ్చి కూరలు, ఉడకని పదార్థాలు ముట్టుకోకపోవడమే మేలు. - అపరిశుభ్రమైన నీటితో తయారయ్యే ఐస్తో చేసే జ్యూస్ల జోలికి పోకూడదు. - బయట తాగే నీటి విషయంలో చాలా జాగ్రత్త వహించాలి. మినరల్ వాటర్ కానీ, కాచి చల్లార్చిన నీరు కానీ తాగాలి. అలా కుదరకపోతే క్లోరిన్ లేదా అయోడిన్ బిళ్లలు కలుపుకొని తాగాలి. - నీరు అస్సలు బాగోలేదు అని అనుమానం ఉన్న చోట, ఆ నీటిని పుక్కిలించినా కూడా ప్రమాదమే! - ప్రయాణాలలో ఎక్కడపడితే అక్కడ మాంసాహారం ముట్టకూడదు. ఎందుకంటే మాంసంలో ఏమాత్రం అపరిశుభ్రత ఉన్నా, అది ఒకోసారి ప్రాణాంతకంగా మారవచ్చు. ముఖ్యంగా చేపల జోలికి అసలు పోవద్దని హెచ్చరిస్తూ ఉంటారు. ఇన్ని కబుర్లు చెబుతున్నారు. మరి నిత్యం అక్కడే ఉండిపోయే వారి పరిస్థితి ఏమిటి అన్న అనుమానం వచ్చిందా! నిజమే! అపరిశుభ్రమైన ప్రదేశాలలో నిరంతరం నివసించేవారికి కూడా మొదట్లో TD సోకి తీరుతుంది. కాకపోతే ఓ ఏడెనిమిదేళ్ల తరువాత వారి శరీరం ఆ సూక్ష్మక్రిములని తట్టుకునేందుకు అలవాటుపడిపోతుంది. కానీ మనకి అంత సమయం ఉండదు కదా! అందుకనే బయట తిరిగే నాలుగు రోజులు కాస్త జాగ్రత్తగా మెలగాల్సిందే! - నిర్జర.  

విటమిని ఇ ఎక్కువగా ఉండే కొబ్బరిపాలు

శరీరానికి కావల్సిన సూక్ష్మ పోషకాలు ఎక్కువగా లభించే పదార్థాల్లో కొబ్బరి పాలు ఒకటి. ఇందులో సోడియం, క్యాల్షియం, ఫాస్ప‌ర‌స్‌, ప్రోటీన్స్‌, పొటాషియం వంటి పోష‌కాలు స‌మృద్దిగా ఉంటాయి. అంతేకాదు క‌రోనాను అరిక‌ట్టే జింక్‌, బీ12 వంటి న్యూట్రియంట్స్ కూడా పుష్క‌లంగా లభిస్తాయి. ఇప్పుడు కొబ్బరిపాలు మార్కెట్ లో కూడా లభిస్తున్నాయి. అయితే ఇంట్లో తయారుచేసుకోవడం మంచిది. పచ్చి కొబ్బరిని తురిమి లేదా మిక్సీలో వేసి మెత్తగా చేయాలి. పలుచటి క్లాత్ తీసుకుని అందులో ఈ కొబ్బరి ముద్దను వేసి గట్టిగా పిండాలి. ఈ పాలను సన్నని మంటమీద ఐదు నిమిషాలు వేడి చేయాలి. ఆ తర్వాత చల్లారనివ్వాలి. ఇలా చేయడం వల్ల ఇందులో ఉండే పోషకాలు శరీరానికి అందుతాయి. సహజసిద్ధంగా లభించే కొబ్బరిపాలలో విటమిన్ ఇ ఎక్కువగా ఉంటుంది. ఆరోగ్యానికే కాదు అందానికి కూడా కొబ్బరిపాలు ఎంతో మేలు చేస్తాయి. చుండ్రు సమస్యతో బాధపడేవారు కొబ్బరిపాలను తలకు పట్టించి బాగా మసాజ్ చేస్తే చుండ్రు సమస్య తొలగిపోతుంది. జుట్టు పట్టులా మెరుస్తుంది.
Disclaimer:
All content included on this TeluguOne.com Portal including text, graphics, images, videos and audio clips, is the property of ObjectOne Information Systems Ltd. or our associates, and protected by copyright laws. The collection, arrangement and assembly of all content on this portal/ related channels is the exclusive property of ObjectOne Information Systems Ltd. or our associates and protected copyright laws.
You may not copy, reproduce, distribute, publish, display, perform, modify, create derivative works, transmit, or in any other way exploit any part of copyrighted material without permission from ObjectOne Information Systems Ltd or our associates.