ఫేస్బుక్ సీవోవో (చీఫ్ ఆపరేటింగ్ ఆఫీసర్) ష్రేల్ సాండ్బర్గ్ భర్త డేవిడ్ గోల్డ్బర్గ్ ట్రెడ్మిల్పై ప్రమాదవశాత్తు మరణించారు. ట్రెడ్మిల్పై వ్యాయామం చేస్తూ అదుపుతప్పి కింద పడి తలకు గాయం తగలడంతో ఆయన చనిపోయినట్టు సమాచారం. కుటుంబంతో కలిసి విహారయాత్రకు వెళ్లిన ఆయన వ్యాయామానికని వెళ్లి ఎంతసేపైనా తిరిగి రాకపోవడంతో అనుమానం వచ్చి బంధువులు ఆరా తీశారు. దీంతో ఆయన ఒక హోటల్ జిమ్ లో ట్రెడ్ మిల్ పక్కన పడిపోయి ఉండటంతో వెంటనే అతనిని ఆస్పత్రికి తరలించగా చికిత్స పొందుతూ ప్రాణాలు కోల్పోయారు. భర్త మరణం తనకు తీరని లోటని.. తన కెరీర్లో ఎదగడంలో తన భర్త పాత్ర చాలా ఉందని... తను నిజమైన భాగస్వామి అంటూ నివాళులర్పించారు సాండ్బర్గ్. ఈ సంఘటన పై ఫేస్బుక్ సీఈవో మార్క్ జుకర్ బర్గ్ స్పందిస్తూ గోల్డ్బర్గ్ చాలా మంచి మనిషి ఆయనతో పరిచయం తన అదృష్టమంటూ సాండ్బర్గ్కు తన సంతాపాన్ని తెలియజేశారు.