మహేష్ కృష్ణగారి అబ్బాయంట
on Dec 19, 2013
మహేష్ "1" చిత్ర ఆడియో విడుదల కార్యక్రమం నిన్న శిల్పకళా వేదికలో ఘనంగా జరిగింది. సూపర్ స్టార్ కృష్ణ ఈ ఆడియో వేడుకకు ముఖ్య అతిధిగా వచ్చారు. ఈ సందర్భంగా కృష్ణ మాట్లాడుతో... "ప్రతి సినిమా కూడా విడుదల తరువాత రికార్డులను బ్రేక్ చేస్తుంది. కానీ ఈ చిత్రం విడుదలకు ముందే రికార్డులు సాధిస్తుంది. ఈ చిత్రం మహేష్ కెరీర్ లోనే బ్లాక్ బస్టర్ హిట్ చిత్రంగా నిలుస్తుంది" అని అన్నారు.
మహేష్ మాట్లాడుతూ... "బిజినెస్ మాన్" షూటింగ్ సమయంలో సుకుమార్ నాకు "1" కథ చెప్పారు. కానీ అయన టెన్షన్ లో సరిగ్గా చెప్పలేకపోయారు. కానీ తర్వాత నేనే ఆయనకు ఫోన్ చేసి కథ చాలా బాగుంది. మనం చేద్దామని అన్నాను. సుకుమార్ ఆలోచనలకూ హ్యాట్సాఫ్. నేను, దేవిశ్రీప్రసాద్ కలిసి సినిమా చేయాలని ఎప్పటినుంచో అనుకుంటున్నాం. కానీ కుదరలేదు. ఈ సినిమా ద్వారా కుదిరింది. దేవి అద్భుతమైన సంగీతాన్ని అందించాడు. అక్కడే ఉన్న యాంకర్ ఈ పాటలోని "who are you" అని మహేష్ ను సరదాగా అడిగితే.. "నేను కృష్ణగారి అబ్బాయి మహేష్ ని" అని నవ్వుతూ చెప్పారు.
సుకుమార్ మాట్లాడుతూ... "మహేష్ తో కలిసి నువ్వు పనిచెయ్ అని, మహేష్ తో కలిసి పనిచేసిన దర్శకులందరూ నాతో అనేవారు. అలా ఎందుకు అన్నారో ఇప్పుడు తెలుస్తుంది. ఆయన ఒక అద్భుతం. ఆయనతో ఇలా పనిచేయడానికే ఈ సినిమా షూటింగ్ కు రెండేళ్ళు పట్టింది. దేవి మరోసారి అద్భుతమైన సంగీతం అందించాడు" అని అన్నారు.
ఈ వేడుకకు నమ్రత, గౌతమ్, సంజయ్, సుధీర్, హీరోయిన్ కృతిసనన్ లతో పాటు పలువురు దర్శక, నిర్మాతలు విచ్చేసి చిత్రం విజయం సాధించాలని కోరారు. 14రీల్స్ బ్యానర్లో అనిల్ సుంకర, గోపి ఆచంట, రామ్ ఆచంట కలిసి సంయుక్తంగా నిర్మిస్తున్నారు. యాక్షన్ ఎంటర్ టైనర్ గా రూపొందుతున్న ఈ సినిమాలో కృతిసనన్ హీరోయిన్ గా నటిస్తుంది. సంక్రాంతి కానుకగా ఈ సినిమాను విడుదల చేయనున్నారు.