English | Telugu
'డ్యాన్స్ ఐకాన్' షో జడ్జిగా రమ్యకృష్ణ.. కొత్త రమ్యని చూస్తారు!
Updated : Sep 12, 2022
విభిన్న పాత్రలతో నటిగా ఎంతో గుర్తింపు తెచ్చుకున్న రమ్యకృష్ణ ప్రముఖ ఓటీటీ వేదిక ఆహాలో ప్రసారమయ్యే 'డ్యాన్స్ ఐకాన్' షో కోసం జడ్జిగా మారారు. ఆమెతో పాటు ప్రముఖ కొరియోగ్రాఫర్ శేఖర్ మాస్టర్ కూడా జడ్జిగా ఈ షోతో డిజిటల్ ఎంట్రీ ఇస్తున్నారు. ఓంకార్ యాంకర్ గా, నిర్మాతగా వ్యవహరిస్తున్న ఈ షో ఇటీవల గ్రాండ్ గా లాంచ్ అయింది. లాంచ్ ఎపిసోడ్ నిన్న(సెప్టెంబర్ 11న) ఆహాలో స్ట్రీమ్ అయింది. సెప్టెంబర్ 17 నుండి ప్రతి శని, ఆదివారాల్లో రాత్రి 9 గంటలకు ఈ షో ప్రసారం కానుంది.
ఓటీటీలో న్యాయనిర్ణేతగా తన అరంగేట్రం గురించి రమ్యకృష్ణ మాట్లాడుతూ.. "డ్యాన్స్ ఐకాన్ వంటి షోతో ఆహాలో జడ్జిగా ఎంట్రీ ఇవ్వడం సంతోషంగా ఉంది. ఇలాంటి ఫార్మాట్ ఈమధ్య కాలంలో ఎవరూ చేయలేదు. ఈ షో ద్వారా అందరూ కొత్త రమ్యని చూస్తారు" అన్నారు.
ఓంకార్ మాట్లాడుతూ.. "రమ్యకృష్ణ గారు ఈ షోకి జడ్జిగా వ్యవహరించడం చాలా ఆనందంగా ఉంది. ఆమెతో పని చేయాలనే నా కల ఈ షోతో నెరవేరడం సంతోషంగా ఉంది. ఈ షో ద్వారా నాన్ స్టాప్ ఎంటర్టైన్మెంట్ అందిస్తాం" అన్నారు.
రమ్యకృష్ణ ఎంతోమందికి రోల్ మోడల్. డ్యాన్స్ పై ఎంతో అవగాహన ఉన్న ఆమె డ్యాన్స్ ఐకాన్ కు జడ్జిగా రావడం సంతోషంగా ఉందని ఆహా సీఈఓ అజిత్ ఠాకూర్ అన్నారు.