ఓంకార్ ప్ర‌యోక్త‌గా స్టార్ మా ఛానెల్ లో ప్రసారమవుతోన్న సిక్స్త్ సెన్స్ సీజన్ 4 కి టీవీ సెలెబ్రిటీలను గెస్ట్ లుగా తీసుకొస్తున్నారు. తాజాగా ఈ షోకి నిర్మాత, నటుడు బండ్ల గణేశ్‌ వచ్చారు. ఎప్పటిలానే షోలోకి ఎంట్రీ ఇవ్వగానే.. ''వెంకటేశ్వర స్వామికి ఏం ఉత్సవాలు చేస్తారో.. డాలర్ శేషాద్రికి తెలియదా.. అలాగే పవర్ స్టార్ గురించి బండ్ల గణేష్‌కి తెలియదా.. ఆయన నా దేవర‌.. నా ఆస్తి.. నా సర్వస్వం.. ఈశ్వరా.. పవనేశ్వరా.. పవరేశ్వరా.." అంటూ పవన్ క‌ల్యాణ్‌పై తనకున్న అభిమానాన్ని చాటుకున్నారు.

అయితే ఈ షోకి బండ్ల గణేష్ తనతో పాటు తన కూతురు జననిని కూడా తీసుకొచ్చారు. ఈ సందర్భంగా తన కూతురు జనని కోరిన రెండు కోరికలను బయటపెట్టారు. తన కూతురు వయసు 18 ఏళ్లు అని.. ఈ 18 ఏళ్లలో తనను రెండే ప్రశ్నలు అడిగిందని చెప్పారు. "అందులో ఒకటి.. పవన్ కళ్యాణ్ తో మళ్లీ బ్లాక్‌బస్టర్ సినిమా ఎప్పుడు తీస్తావ్..? రెండోది.. ఓంకార్ అన్నయ్య షోకి వెళ్తే నన్ను కూడా తీసుకెళ్లు అని.. అందుకే నా కూతుర్ని షోకి తీసుకొచ్చా.. అదీ నీకున్న క్రెడిబిలిటీ.ష‌ అంటూ ఓంకార్ పై ప్రశంసలు కురిపించాడు బండ్ల గణేశ్‌.

ఈ మధ్యకాలంలో బండ్ల గణేశ్‌ తన స్పీచ్ లతో అదరగొడుతున్నాడు. ఆయన ఎక్కడ ఏం మాట్లాడినా సంచలనం అవుతోంది. ఇప్పుడు సిక్స్త్ సెన్స్ షోలో కూడా తన మార్క్ చూపించి అదరగొట్టాడు. తన కూతురుని మొదటిసారి ఆన్ స్క్రీన్ మీదకు తీసుకొచ్చి పరిచయం చేశారు. ఈ షోలో బండ్ల గ‌ణేశ్ ఇంకేం మాట్లాడారో చూడాలంటే వ‌చ్చే శ‌ని, ఆదివారాల్లో రాత్రి 9 గంట‌ల‌కు స్టార్ మాలో ప్ర‌సారం కానున్న ఎపిసోడ్ చూడాల్సిందే.