సినిమా ఇండస్ట్రీలో క్యాస్టింగ్ కౌచ్ పేరుతో మహిళలను లైంగికంగా వంచిస్తున్నారని ఇప్పటికే చాలా మంది నటీమణులు బహిరంగంగా కామెంట్స్ చేశారు. 'మీటూ' పేరుతో ఓ ఉద్యమం కూడా చేశారు. తాజాగా ఇదే అంశంపై 'కార్తీకదీపం' సీరియల్ లో పనిమనిషి ప్రియమణి పాత్ర‌ను చేస్తున్న శ్రీ‌దివ్య‌ కొన్ని కామెంట్స్ చేసింది. రీసెంట్ గా ఓ యూట్యూబ్ ఛానెల్ కి ఇంటర్వ్యూ ఇచ్చిన ఆమె తన కెరీర్ సంగతులతో పాటు క్యాస్టింగ్ కౌచ్ విషయాలపై స్పందించింది.

'కమిట్మెంట్' అనేది ఇండస్ట్రీలో ఉంటుందని.. తాను కూడా అలాంటి పరిస్థితులను ఎదుర్కొన్నట్లు ఆమె చెప్పింది. ఇండస్ట్రీకి వచ్చే ప్రతి అమ్మాయికి ఇలాంటి సందర్భం ఏదొక చోట ఎదురవుతూనే ఉంటుందని.. అయితే అందుకు అంగీకారం తెలపడమా..? లేదా అనేది వారి వారి వ్యక్తిగత అభిప్రాయాలపై ఆధారపడి ఉంటుందని తెలిపింది. సినిమా ఇండస్ట్రీలోనే కాకుండా అన్ని రంగాల్లో క్యాస్టింగ్ కౌచ్ అనేది ఉందని.. ఒక అమ్మాయి బయట పని చేస్తుందంటే కచ్చితంగా ఏదొక సమస్య ఉంటుందని చెప్పింది ప్రియమణి.

అయితే లైంగిక దోపిడీ విషయంలో వార్నింగ్ లాంటివి ఇస్తే ఇక కెరీర్ అక్కడితో ముగిసిపోతుందని ఆమె చేసిన కామెంట్స్ హాట్ టాపిక్ గా మారాయి. తన విషయంలో క్యాస్టింగ్ కౌచ్ సందర్భాలు ఎదురైనప్పుడు సింపుల్ గా నవ్వుతూ బయటకొచ్చానని చెప్పుకొచ్చింది. ప్రస్తుతం ఆమె 'పుష్ప' సినిమాలో నటిస్తున్నట్లు చెప్పింది. అందులో కూడా పనిమ‌నిషి క్యారెక్టరే అని.. రియల్ లైఫ్ లో పనిమనిషి ఎలా ఉంటుందో అచ్చం అలాగే కనిపిస్తానని చెప్పుకొచ్చింది.