దేవుడి మీద నమ్మకం ఉండటంలో తప్పులేదు. ఏదైనా పని మొదలు పెట్టేముందు.. ఇష్ట దైవాన్ని పూజిస్తే శుభం జరుగుతుందని ఎందరో నమ్ముతారు. దానికి వల్ల ఒక పాజిటివ్ ఫీలింగ్ తో పనిని మొదలుపెడతాం. దాంతో మంచి ఫలితాలు వస్తాయి. ఇంతవరకు బాగానే ఉంది కానీ.. కొందరు మాత్రం తమ టాలెంట్ కంటే కూడా.. స్వామిజీలనే ఎక్కువగా నమ్ముతుంటారు. ఏవోవో పూజలు చేసేసి.. ఆ పూజల వల్ల తమ కెరీర్ దూసుకుపోతుంది అనుకుంటారు.

వివాదాస్పద జ్యోతిస్యుడు వేణుస్వామి గురించి ప్రత్యేకంగా పరిచయం అక్కర్లేదు. జ్యోతిష్యం పేరుతో సినీ ప్రముఖల వ్యక్తిగత జీవితాల గురించి వివాదాస్పద వ్యాఖ్యలు చేసి విమర్శలు ఎదుర్కొంటాడు. అయినప్పటికీ కొందరు సినీ జనాలు వేణుస్వామిని నమ్ముతుంటారు. ముఖ్యంగా కొందరు హీరోయిన్లు వేణుస్వామి చేత ప్రత్యేక పూజలు చేయించుకోవడం చూస్తున్నాం. గతంలో స్టార్ హీరోయిన్ రష్మిక మందన్నా సైతం వేణుస్వామి చేత పూజలు చేయించుకున్నట్లు ప్రచారం జరిగింది. ఆ లిస్టులో డింపుల్ హయాతి, అషు రెడ్డి వంటి భామల పేర్లు ఉన్నాయి. ఇక ఇప్పుడు మరో ప్రముఖ హీరోయిన్ నిధి అగర్వాల్ ఆ లిస్టులో చేరింది.

'సవ్యసాచి'తో టాలీవుడ్ కి హీరోయిన్ గా పరిచయమైన నిధి అగర్వాల్.. తక్కువ సినిమాలతోనే యువతలో మంచి గుర్తింపు తెచ్చుకుంది. ప్రస్తుతం ఆమె చేతిలో బడా సినిమాలు ఉన్నాయి. పవన్ కళ్యాణ్ సరసన నటించిన 'హరి హర వీరమల్లు' చిత్రం జూలై 24 ప్రేక్షకుల ముందుకు రానుంది. అలాగే ప్రభాస్ తో స్క్రీన్ షేర్ చేసుకుంటున్న 'ది రాజా సాబ్' డిసెంబర్ 5న విడుదల కానుంది. ఈ రెండు సినిమాల తర్వాత మరికొన్ని భారీ ఆఫర్లు నిధిని వరించే అవకాశముంది. ఇప్పటికే, వెంకటేష్-త్రివిక్రమ్ కాంబినేషన్ లో తెరకెక్కనున్న మూవీలో హీరోయిన్ గా నిధి అగర్వాల్ లాక్ అయినట్లు సమాచారం. ఇలా వరుస క్రేజీ సినిమాలతో అలరించడానికి సిద్ధమవుతున్న నిధి.. తాజాగా వేణుస్వామితో ప్రత్యేక పూజలు చేయించుకోవడం హాట్ టాపిక్ గా మారింది.

నిధి అగర్వాల్ కోసం పూజ జరిపించి, ఆమెను ఆశీర్వదించినట్లు తెలుపుతూ.. తాజాగా వేణుస్వామి సోషల్ మీడియా వేదికగా వీడియోలు పంచుకున్నాడు. వేణుస్వామితో పూజలు చేయించుకున్న తర్వాత పలువురు హీరోయిన్ల కెరీర్ పీక్స్ వెళ్ళిందనే అభిప్రాయాలు ఇండస్ట్రీ వర్గాల్లో ఉన్నాయి. ఆ నమ్మకంతోనే నిధి కూడా గతంలో ఓసారి పూజలు చేయించుకున్నట్లు తెలుస్తోంది. ఆ పూజల తర్వాత ఆమెకు మంచి ఆఫర్స్ వచ్చాయట. అందుకే ఇప్పుడు మరోసారి పూజలు చేయించుకున్నట్లు సమాచారం. ఈ పూజ తర్వాత తన కెరీర్ మరింత ఊపందుకుంటుందని నిధి భావిస్తున్నట్టు వినికిడి. మరి ఆమె ఆశలు నెరవేరుతాయో లేదో చూడాలి.

అయితే వేణుస్వామితో నిధి అగర్వాల్ పూజలు చేయించుకోవడంపై భిన్నాభిప్రాయాలు వ్యక్తమవుతున్నాయి. కొందరు నిధిపై విమర్శలు గుప్పిస్తున్నారు. నీ టాలెంట్ వల్ల ఆఫర్స్ వస్తాయి కానీ.. ఆయన పూజల వల్ల ఎందుకొస్తాయని కామెంట్స్ చేస్తున్నారు.