కరోనా ప్రభావం తెలంగాణ పదో తరగతి పరీక్షలపై పడింది. కరోనా వైరస్ నేపథ్యంలో, పరీక్షలను వాయిదా వేయాలంటూ రాష్ట్ర ప్రభుత్వాన్ని తెలంగాణ హైకోర్టు ఆదేశించింది. పదో తరగతి పరీక్షలు యథావిధిగా నిర్వహిస్తామని ఇదివరకే సీఎం కేసీఆర్ స్పష్టం చేసిన సంగతి తెలిసిందే. ఈ నేపథ్యంలో పదో తరగతి పరీక్షలు గురువారం ప్రారంభమయ్యాయి. అయితే కరోనా విజృంభిస్తుండటంతో శుక్రవారం నాడు ఈ విషయమై హైకోర్టు కీలక ఆదేశాలు జారీ చేసింది. పరీక్షలు వాయిదా వేయాలని ఆదేశించింది. అయితే, శనివారం జరగాల్సిన పరీక్ష యథాతథంగా జరగనుంది. సోమవారం నుంచి ఈనెల 30వరకు జరగాల్సిన పరీక్షలు వాయిదా పడనున్నాయి. కాగా.. ఈ నెల 29న అత్యున్నత స్థాయి సమావేశం తర్వాత తదుపరి నిర్ణయం తీసుకోవాలని ప్రభుత్వాన్ని హైకోర్టు ఆదేశించింది.
