తెలంగాణ పౌర కార్డులకు బ్రేక్?

తెలంగాణ రాష్ట్ర ప్రభుత్వం తెలంగాణ రాష్ట్రంలోని ప్రజలకు పౌర గుర్తింపు కార్డులు ఇస్తామని ప్రకటించిన విషయం తెలిసిందే. తెలంగాణ ప్రజలకు గుర్తింపు కార్డులు ఇవ్వాలని తహతహలాడుతున్న ముఖ్యమంత్రి కేసీఆర్ న్యాయపరమైన ఇబ్బందులు వస్తాయని తెలిసినా తెలంగాణ గుర్తింపు కార్డులు ఇవ్వాలనే డిసైడ్ అయ్యారు. ఆ విషయాన్ని బుధవారం నాడు ప్రకటించారు కూడా. అయితే పౌరులకు గుర్తింపు కార్డులు ఇవ్వడం అనేది కేవలం కేంద్ర ప్రభుత్వం మాత్రమే చేయాల్సిన పని అని, ఏ రాష్ట్రానికి ఆ రాష్ట్రం విడివిడిగా ఇలా గుర్తింపు కార్డులు ఇవ్వడానికి వీల్లేదని తెలంగాణ రాష్ట్ర అధికారులు ముఖ్యమంత్రి కేసీఆర్‌కి చెప్పినట్టు తెలుస్తోంది. అయినప్పటికీ ఈ విషయంలో ముందుకు వెళ్తే రాజ్యాంగపరమైన ఇబ్బందులు ఎదుర్కోవాల్సి వస్తుందని హెచ్చరించినట్టు తెలుస్తోంది. ఈ నేపథ్యంలో కేసీఆర్ తెలంగాణ గుర్తింపు కార్డుల ఆలోచనను విరమించుకునే అవకాశాలు వున్నాయని తెలుస్తోంది.అయితే ఈ విషయం మీద ఇంతవరకు అధికారికంగా ప్రకటన వెలువడలేదు.