ముఖ్యాంశాలు
• దేశంలోనే తొలి స్వదేశీ హై-స్పీడ్ రైలు బీ28 (భారత్ 28) బెంగళూరులోని బిఈఎమ్ఎల్ ఆదిత్య ప్లాంట్లో తయారవుతోంది. పరీక్షా వేగం గంటకు 280 కిలో మీటర్లు. వాణిజ్య వేగం 249 కిలో మీటర్లు. 8 కోచ్ లు.  557 మంది ప్రయాణికులు.
• కానీ ఈ కారిడార్ ను గంటకు 320 కిలో మీటర్ల  వేగంతో వెళ్లేలా నిర్మించారు. మొదటి రైలు ఆ వేగాన్ని అందుకోదు.  ఇదే  బుల్లెట్ ట్రైన్  అనే పేరుకు, వాస్తవానికి మధ్య ఉన్న తేడా.
• ప్రాజెక్ట్ అంచనా వ్యయం  1.08 లక్షల కోట్ల  రూపాయల నుంచి 1.98, 2.1 లక్షల కోట్లకు పెరిగింది. దాదాపు 83 శాతం పెరుగుదల. ప్రారంభ లక్ష్యం 2022.  ఇప్పుడు 2030 నాటికి పూర్తి అవుతుంది.  
• అంతర్జాతీయ హై స్పీడ్ రైలు ప్రమాణాల ప్రకారం 249 కిలో మీటర్ల  వేగం నిజంగానే  హై స్పీడ్  కానీ దీన్ని షింకాన్సెన్   అని పిలవలేం.
• బడ్జెట్ 2026-27లో ప్రకటించిన ఏడు కొత్త కారిడార్లకు  16 లక్షల కోట్లు అవసరం. ఇది ఒక పూర్తి సంవత్సరం రైల్వే మొత్తం మూలధన వ్యయం కంటే దాదాపు ఐదున్నర రెట్లు ఎక్కువ.
• గువాహటి వరకు పొడిగింపు రాజకీయ ప్రకటన మాత్రమే. మార్గం, ఖర్చు, కాలపరిమితి, సాంకేతిక పరిష్కారం వంటివి ఏవీ ఇంకా లేవు.  

నవంబర్ 1న రైల్వే మంత్రి అశ్విని వైష్ణవ్ బెంగళూరులోని బీఈఎమ్ఎల్ ఆదిత్య ప్లాంట్ ను సందర్శించి, దేశంలోనే తొలి స్వదేశీ హై-స్పీడ్ రైలు బీ28  తయారీ పురోగతిని సమీక్షించారు. అదే వారాంతంలో, ప్రధాని నరేంద్ర మోదీ ఉత్తర బుల్లెట్ ట్రైన్ కారిడార్ కు ఆమోదం తెలిపారనీ, దానిని సిలిగురి నుంచి గువాహటి వరకు పొడిగించనున్నట్లు ఆయన ప్రకటించారు. ఈ రెండు ప్రకటనలు ఒకే సందేశాన్ని ఇచ్చాయి.  భారత్ ఇకపై సాంకేతికతను దిగుమతి చేసుకునే దేశం కాదు, తన బుల్లెట్ ట్రైన్ తానే నిర్మిస్తోంది. ఈ వాదనలో నిజం ఉంది.  కానీ దానితో పాటు చెప్పాల్సిన మూడు అంకెలు కూడా ఉన్నాయి: 249, 83 శాతం, 2030.

చారిత్రక నేపథ్యం

హై స్పీడ్ రైలు గురించి భారతదేశంలో ఆలోచన కొత్తదేమీ కాదు. 2014లోనే  డైమండ్ క్వాడ్రిలేటరల్ పేరుతో నాలుగు ప్రధాన నగరాలను అనుసంధానించే ప్రతిపాదన వచ్చింది. కానీ ఆచరణలో మొదటి అడుగు 2015 డిసెంబర్ లో పడింది.  జపాన్ ప్రధాని షింజో అబే భారత్ వచ్చిన సందర్భంగా..  ముంబై, అహ్మదాబాద్ కారిడార్ కోసం జపాన్ అత్యంత సాఫీగా రుణం ఇచ్చే ఒప్పందం కుదిరింది. 2017 సెప్టెంబర్లో ప్రధాని మోదీ, అబే కలిసి శంకుస్థాపన చేశారు. అప్పటి లక్ష్యం 2022. 

ఇది కూడా చదవండి: ఇండియాకి ఎఫ్ డీఐలు: నిజంగా వస్తున్నాయా.. అంకెల మాయాజాలమా?

ఆ ప్రాజెక్ట్ మూలరూపం స్పష్టంగా జపాన్ మోడలే. షింకాన్సెన్ ట్రాక్, షింకాన్సెన్ రోలింగ్ స్టాక్, షింకాన్సెన్ సిగ్నలింగ్,  అన్నీ కలిపి ఒకే ప్యాకేజీ. కానీ తొమ్మిదేళ్లలో మూడు విషయాలు మారాయి. మొదటిది..  కోవిడ్ మహమ్మారి.. రెండోది  మహారాష్ట్రలో 2019 తర్వాత ప్రభుత్వం మారడంతో భూసేకరణ దాదాపు నిలిచిపోవడం.  అది 2024 ఎన్నికల తర్వాతే పూర్తిగా పరిష్కారమైంది. మూడోది, ఇది అత్యంత ముఖ్యమైనది.  జపాన్ ఈ5 రైలుసెట్ ఉత్పత్తిని నిలిపివేయడం, ఈ10 రైలుసెట్ 2034 కంటే ముందు అందుబాటులో ఉండకపోవడం. 

దీంతో 2024లో భారత ప్రభుత్వం ఒక వ్యూహాత్మక నిర్ణయం తీసుకుంది. స్వదేశీ రైలుసెట్ తయారు చేయాలి, సిగ్నలింగ్ సిస్టమ్ యూరోపియన్ టెక్నాలజీతో ఉండాలి. 2025 జూన్లో సిగ్నలింగ్ ఒప్పందం భారత, యూరోపియన్ జాయింట్ వెంచర్ కు  దాదాపు 4,100 కోట్ల రూపాయలకు ఖరారైంది.  అంటే ఇప్పుడు నడుస్తున్నది ఒక  హైబ్రిడ్ ప్రాజెక్ట్. జపాన్ సివిల్ నిర్మాణం, యూరోపియన్ సిగ్నలింగ్, భారతీయ రైలుసెట్. ఇది ఆచరణాత్మకమైన పరిష్కారమే  కానీ,  ఇది 2015లో ప్రకటించిన ప్రాజెక్ట్ కాదు.

సంఘటనల కాలక్రమం

డిసెంబర్ 2015: జపాన్ ఓడీఏ రుణ ఒప్పందం. ముంబై, అహ్మదాబాద్ కారిడార్ ఆమోదం.
సెప్టెంబర్ 2017: ప్రధాని మోదీ, అబే శంకుస్థాపన; లక్ష్యం 2022 నాటికి పూర్తి.
జనవరి 2019: జాతీయ వన్యప్రాణి బోర్డు అనుమతి.  థానే క్రీక్ ఫ్లెమింగో అభయారణ్యం నుంచి 3.27 హెక్టార్లు, ఎకో-సెన్సిటివ్ జోన్ నుంచి 97.5 హెక్టార్లు, సంజయ్ గాంధీ జాతీయ ఉద్యానవనం నుంచి 32.75 హెక్టార్ల అటవీ భూమి మళ్లింపు.  2019–2022: మహారాష్ట్రలో భూసేకరణ నిలిచిపోవడం. గోద్రెజ్ అండ్ బాయ్స్ భూమి వివాదం కోర్టుకు. ఫిబ్రవరి 2023: బాంబే హైకోర్టు, ఆ తర్వాత సుప్రీంకోర్టు భూసేకరణను సమర్థించాయి.
2024: స్వదేశీ రైలుసెట్, యూరోపియన్ సిగ్నలింగ్ నిర్ణయం.
జూన్ 2025: సిగ్నలింగ్ ఒప్పందం.
ఫిబ్రవరి 2026: బడ్జెట్లో ఏడు కొత్త హై స్పీడ్ కారిడార్ల ప్రకటన.  4,000 కిలోమీటర్లు,   16 లక్షల కోట్లు కేటాయింపు.  
ఆగస్ట్ 2026: సవరించిన వ్యయంతో కేబినెట్ నోట్ దాదాపు  2.1 లక్షల కోట్లు. 
అక్టోబర్ 2026: 62.16 శాతం భౌతిక పురోగతి.  ఇప్పటివరకు  90,967 కోట్ల రూపాయల వ్యయం.  
నవంబర్ 1, 2026: వైష్ణవ్ బీఈఎమ్ఎల్ ఆదిత్య ప్లాంట్ సందర్శన. మోదీ ఉత్తర కారిడార్ ఆమోదం.  గువాహటి వరకూ పొడిగింపు ప్రకటన. 
మే–జూన్ 2027 లక్ష్యం: సూరత్, వాపి 100 కిలోమీటర్ల విభాగంలో ట్రయల్ రన్లు. ఆగస్ట్ 2027  లక్ష్యం : ఆ విభాగంలో వాణిజ్య సేవలు. డిసెంబర్ 2030 లక్ష్యం. పూర్తి 508 కిలోమీటర్ల 

న్యాయపరమైన అంశాలు

ఈ ప్రాజెక్ట్ చట్టపరంగా మూడు పెద్ద ప్రశ్నలను ఎదుర్కొంది.  భూసేకరణ, పర్యావరణం,  ఆర్థిక బాధ్యత. భూసేకరణలో అత్యంత చర్చనీయాంశమైనది గోద్రెజ్ అండ్ బాయ్స్ కేసు. విఖ్రోలిలోని 39 వేల 252 చదరపు మీటర్లు అంటే,  సుమారు 9.69 ఎకరాల  భూమిని సేకరించి, అక్టోబర్ 2022లో 264 కోట్ల రూపాయల పరిహారం ప్రకటించారు. కంపెనీ వాదన ప్రకారం మొదట  572 కోట్ల రూపాయలు ఆఫర్ చేశారు. అసలు సమస్య కేవలం పరిహారం మాత్రమే కాదు.  2019 ఆగస్టు నోటిఫికేషన్ ద్వారా ఈ ప్రాజెక్ట్ ను భూసేకరణ చట్టం   కింద  సోషల్ ఇంపాక్ట్ అసెస్మెంట్  నుంచి మినహాయించడాన్ని కూడా సవాలు చేశారు. 
బాంబే హైకోర్టు ఫిబ్రవరి 9, 2023న ఆ సవాలును తిరస్కరించింది. ప్రాజెక్ట్ జాతీయ ప్రాముఖ్యత కలిగినది, ప్రజా ప్రయోజనంలో ఉన్నది.  ప్రైవేట్ ప్రయోజనం కంటే సామూహిక ప్రయోజనమే గెలుస్తుంది  అని తీర్పునిచ్చింది. ఫిబ్రవరి 24, 2023న సుప్రీంకోర్టు కూడా అప్పీల్ ను విచారించడానికి నిరాకరించింది. ప్రధాన న్యాయమూర్తి డి.వై. చంద్రచూడ్ వ్యాఖ్య చాలా స్పష్టంగా ఉంది.. చాలా నీళ్లు పారిపోయాయి. స్వాధీనం చేసుకున్నారు, నిర్మాణం మొదలైంది. ఇప్పుడు మిగిలినది పరిహారం ప్రశ్న మాత్రమే. ఇది జాతీయ ప్రాజెక్ట్.  కంపెనీకి అదనపు పరిహారం కోరే హక్కును కల్పించారు  2026 ఏప్రిల్లో బాంబే హైకోర్టు మరో రెండు పిటిషన్లను కూడా తిరస్కరించింది.  అంటే పరిహారం వివాదం ఇంకా కొనసాగుతోంది.

పర్యావరణ విషయంలో రెండు ప్రధాన అనుమతులు: 2019 జనవరిలో వన్యప్రాణి క్లియరెన్స్,   డిసెంబర్ 2022లో బాంబే హైకోర్టు థానే, నవీ ముంబై, పాల్ఘర్ ప్రాంతాల్లో 21,997 మడ్  చెట్లను నరికేందుకు అనుమతి ఇచ్చింది. ప్రారంభంలో సంస్థ 53 వేల చెట్లు కావాలని కోరింది.  కోర్టు 1,10,000 మడ్ మొక్కల పెంపకం షరతు విధించింది. పర్యావరణ సంస్థ బాంబే ఎన్విరాన్మెంట్ యాక్షన్ గ్రూప్ వ్యతిరేకించినప్పటికీ, కోర్టు  ప్రజా ప్రయోజనం, ప్రజా హితం ఆధారంగా అనుమతి ఇచ్చింది. అంతకు ముందు, పర్యావరణ అనుమతిని ఇచ్చిన నిపుణుల కమిటీ ఒక ముఖ్యమైన షరతు పెట్టింది.  థానే క్రీక్లో పని మొదలుపెట్టే ముందు, లక్షకు పైగా ఫ్లెమింగోలు ఆశ్రయించే ఆ మడుగులపై నిర్మాణ కంపనాల ప్రభావాన్ని అధ్యయనం చేయాలి. 

ఆర్థిక బాధ్యత ప్రశ్న ఇక్కడే కీలకం. జపాన్ అంతర్జాతీయ సహకార సంస్థ (జేఐసీఏ ఇచ్చినది ప్రాజెక్ట్ ఫైనాన్స్ కాదు.  ఇది భారత రాష్ట్రపతి పేరు మీద, ఆర్థిక వ్యవహారాల శాఖ ద్వారా తీసుకున్న సార్వభౌమ రుణం. వడ్డీ 0.1 శాతం, కాలపరిమితి 50 సంవత్సరాలు.  15 సంవత్సరాల మారటోరియం.  నిజంగా అత్యంత సాఫీ షరతులు. కానీ ఆ రుణం పాత వ్యయానికి  1.08 లక్షల కోట్ల రూపాయలకు లెక్కించబడింది. ఇప్పుడు బిల్లు  2 లక్షల కోట్ల రూపాయలకు చేరింది.  జేఐసీఏ వాటా మొత్తం వ్యయంలో మూడో వంతు కంటే తక్కువే. మిగిలిన దాదాపు  90,000 కోట్లు కేంద్ర బడ్జెట్ నుంచి, అంటే పన్ను చెల్లింపుదారుల నుంచి రావాలి. అదనపు విదేశీ రుణం తీసుకోబోమని రైల్వే శాఖ స్పష్టం చేసింది.

రాజకీయ, సామాజిక, మీడియా కోణాలు

మొదట, నిజాయితీగా చెప్పాల్సిన   విషయం:  బీ28 సాధారణ తయారీ కాదు. ఇంటిగ్రల్ కోచ్ ఫ్యాక్టరీకు 866.87 కోట్ల రూపాయల ఒప్పందం ఇచ్చింది.  రెండు ఎనిమిది కోచ్ ల ప్రోటోటైప్ రైలుసెట్ల డిజైన్, తయారీ, కమిషనింగ్ కోసం. ఒక్కో రైలు ఖర్చు సుమారు  390 నుంచి 400 కోట్ల రూపాయలు.   జపాన్, యూరప్ రైళ్లు చల్లని వాతావరణానికి అనుగుణంగారూపొందించబడతాయి. బీ28 భారత వేడి, దుమ్ము, వర్షాన్ని తట్టుకునేలా రూపొందుతున్నాయి. 50 డిగ్రీల వేడి నుంచి తీవ్రమైన చలి వరకు వాతావరణ పరీక్షలు జరుగుతాయి. ఇది నిజంగా సామర్థ్య నిర్మాణమే. రెండోది, ఈ సామర్థ్యాన్ని అతిగా చెప్పకూడదు. కారిడార్ డిజైన్ వేగం గంటకు 320 కిలోమీటర్లు. బీ28 వాణిజ్య వేగం 249 కిలోమీటర్లు.  అంటే సివిల్ నిర్మాణం 320 కిలోమీటర్లకు  సిద్ధమైనా..  మొదటి రైలు ఆ వేగంతో పరుగెత్తదు. అంతర్జాతీయ ప్రమాణాల ప్రకారం 200 కిలోమీటర్ల పైన వేగం  హై-స్పీడ్  అనే కేటగిరీలోకి వస్తుంది.  కాబట్టి 249 కిలోమీటర్లు  నిజంగా హై-స్పీడ్. కానీ దాన్ని షింకాన్సెన్తో సమానం చేయడం తప్పుదారి పట్టించేదే. జపాన్ నిపుణులు కూడా వేర్వేరు వ్యవస్థలను ఒకే కారిడార్లో కలపడంపై భద్రతా ఆందోళన వ్యక్తం చేశారు.
మూడోది, మీడియా.. 20 ఫీచర్లు అని చెప్పి ప్రచురించిన జాబితాలో వాస్తవానికి 22 అంశాలు ఉన్నాయి.  ఇది చిన్న విషయమే కావచ్చు, కానీ ప్రకటనల ఉత్సాహానికి, నిర్మాణ వాస్తవానికి మధ్య ఉన్న అంతరాన్ని ఇది సూచిస్తుంది. పెద్ద విషయం ఏమిటంటే, ఖర్చు రెట్టింపు కావడం, గడువులు మారడం.  ఇవి ప్రధాన హెడ్లైన్లు  కావు. 2022 నాటి లక్ష్యం ఇప్పుడు 2027కి, ఆ తర్వాత 2030కి మారింది. ఇదే సమయంలో కొత్త ఏడు కారిడార్ల ప్రకటన వచ్చింది. 

నాలుగోది, గువాహటి ప్రకటన వెనుక ఉన్న రాజకీయ స్వభావం. అస్సాం ముఖ్యమంత్రి హిమంత బిస్వా శర్మ తన ఎక్స్ పోస్టులో ప్రధాని, రైల్వే మంత్రికి కృతజ్ఞతలు తెలుపుతూ,  ఇసిలియే, మోదీ కహీం నహీ జాయేగా" అని రాశారు.  అంటే ఈ ప్రకటన కేవలం సాంకేతిక ప్రకటన కాదు.  ఇది రాజకీయ సందేశం కూడా. అది తప్పు కాదు.  ప్రజాస్వామ్యంలో ప్రభుత్వాలు తమ పనిని ప్రచారం చేసుకుంటాయి. కానీ పాత్రికేయులు  ప్రకటనను, ప్రాజెక్ట్ను వేరు చేసి చూడాలి.

ఐదోది, ఒక ముఖ్యమైన భౌగోళిక వాస్తవం. సిలిగురి కారిడార్ చికెన్స్ నెక్ దగ్గర భూభాగం వెడల్పు 22 కిలోమీటర్లు మాత్రమే, కొన్ని చోట్ల 16 కిలోమీటర్లు. ఇప్పటికే జాతీయ రహదారి, రైలు మార్గం ఉన్నాయి. బుల్లెట్ ట్రైన్ ఇప్పటికే ఉన్న మార్గంలో పరుగెత్తదు.  పూర్తిగా వేరే లైన్ కావాలి. భూగర్భంలోనా, పైనా  అన్నది నిర్ణయం కాలేదు. రెండూ ఖరీదైనవే. అంటే గువాహటి ప్రకటన ఒక ఆశ మాత్రమే. ఖరారైన  ప్రాజెక్ట్ కాదు.

ఇక్కడ మూడు కఠినమైన ప్రశ్నలు ఉన్నాయి. మొదటిది ఖర్చు. ప్రాజెక్ట్  1.08 లక్షల కోట్లతో మొదలై, ఇప్పుడు 1.98 నుంచి 2.1 లక్షల కోట్ల రూపాయలకు చేరింది. కిలోమీటరుకు ఖర్చు సుమారు 213 కోట్ల నుంచి 390 కోట్లకు పెరిగింది.   ఇది ప్రపంచంలోనే అత్యంత ఖరీదైన హై స్పీడ్ రైలు ప్రాజెక్టుల జాబితాలో చేరుతుంది.
రెండోది, ఈ డబ్బుకు ప్రతిఫలం. బడ్జెట్ 2026, 27లో ప్రకటించిన ఏడు కారిడార్లకు  16 లక్షల కోట్ల రూపాయలు అవసరమని రైల్వే శాఖ అంచనా వేసింది.  అదే బడ్జెట్ లో రైల్వే మొత్తం మూలధన వ్యయం 2.93 లక్షల కోట్లరూపాయలు.  అంటే కొత్త ఏడు కారిడార్ల ఖర్చు, ఒక సంవత్సరం మొత్తం రైల్వే పెట్టుబడికి దాదాపు ఐదున్నర రెట్లు ఎక్కువ. 

హైదరాబాద్ బెంగళూరు 2 గంటలు, హైదరాబాద్ చెన్నై 2 గంటల 55 నిమిషాలు, పుణె, హైదరాబాద్ 1 గంట 55 నిమిషాలు అని ప్రకటించారు. ఇవి ఆకర్షణీయమైన సంఖ్యలే.  కానీ ఇంకా ఒక్క కారిడార్ కూ భూసేకరణ, డీపీఆర్ నిధుల ఆమోదం జరగలేదు.
మూడోది, ప్రయాణికుల సంఖ్య.ఎన్ హెచ్ఎస్ఆర్సీఎల్  తన వెబ్ సైట్ లో చెప్పినది..  ప్రారంభంలో ఒక దిశలో రోజుకు 17 వేల900 మంది. 2053 నాటికి ఒక దిశలో 92,900 మంది  అంటే రెండు దిశల్లో సుమారు 36 వేల మంది రోజుకు.  2016లో పార్లమెంటుకు చెప్పిన అంచనాలకు ఇది దాదాపు సరిపోతుంది. కానీ ఆ అంచనాపై సందేహం ఉంది.  ఆర్థికంగా లాభదాయకం కావాలంటే రోజుకు 88 వేలు,  1,18,000 మంది ప్రయాణికులు అవసరమని ఐఐఎమ్ అహ్మదాబాద్ అధ్యయనం 2016లోనే హెచ్చరించింది. ఈ వ్యత్యాసం ఇంకా పరిష్కారం కాలేదు. అందుకేఎన్ హెచ్ ఎస్ ఆర్ సీఎల్  2025లో కొత్త రైడర్షిప్ అధ్యయనం కోసం టెండర్ పిలిచింది.

 2030 బేస్ ఇయర్ గా తీసుకుని, 30 సంవత్సరాల అంచనాలు. అంటే 2015 నాటి ఫీజిబిలిటీ స్టడీ ఇప్పుడు పాతబడిపోయింది. కొత్త అధ్యయనం రావాల్సి ఉంది.
నాలుగోది, సామాజిక న్యాయం. పాల్ఘర్ జిల్లాలోని గిరిజన గ్రామాల్లో బుల్లెట్ ట్రైన్ గురించి అడిగినప్పుడు, తమకు తాగునీరు, పోషకాహారం, పాఠశాలలు కావాలని, ఈ రైలు తమకు ఉపయోగపడదని ప్రజలు కుండబద్దలు కొట్టారు. ఇది ప్రాజెక్ట్ తప్పు అని కాదు. కానీ ఒక ప్రాజెక్ట్ ప్రయోజనం ఎవరికి చేరుతుంది అనే ప్రశ్నను తప్పించుకోలేము. రైల్వే మంత్రి చెప్పినట్లుగా, ఛార్జీలు విమాన టికెట్ కంటే తక్కువగా ఉంటాయి.  ఇది స్వాగతించదగిన హామీ. కానీ ఛార్జీల నిర్ణయం ఇంకా జరగలేదు.  2016 నాటి ప్రతిపాదన ప్రకారం ముంబై, అహ్మదాబాద్ ఛార్జీ ఏసీ ఫస్ట్ క్లాస్ కంటే 1.5 రెట్లు, అంటే సుమారు  3,300 ఉండేది.
అయిదోది, సాంకేతిక స్వావలంబన వర్సెస్ సాంకేతిక అప్పు.  మేక్ ఇన్ ఇండియా నిజంగా సాధించినది ఒకటి ఉంది.  రైలుసెట్ తయారీ సామర్థ్యం. కానీ సిగ్నలింగ్ యూరోపియన్, ట్రాక్ జపనీస్, నిర్మాణ డిజైన్ జపనీస్. అంటే  స్వదేశీ బుల్లెట్ ట్రైన్ అనే మాట పూర్తి స్వదేశీ వ్యవస్థను సూచించదు.  అది ఒక భాగాన్ని మాత్రమే సూచిస్తుంది. ఇది తప్పు కాదు.  సాంకేతికత నేర్చుకోవడం ఇలాగే జరుగుతుంది. కానీ ప్రచారంలో ఈ వ్యత్యాసం తరచుగా కనుమరుగవుతుంది.

ఇక పోతే ఈ వ్యాసంలోని సంఖ్యలు పలు మూలాలతో సరిపోల్చి నిర్ధారించబడ్డాయి. గమనించవలసిన అంశాలు:  మొదటి వాణిజ్య విభాగం  సూరత్, వాపి  వంద కిలోమీటర్లు  అని రైల్వే మంత్రిత్వ శాఖ తెలిపింది.  కొన్ని నివేదికలు  సూరత్–బిలిమోరా  లేదా  సబర్మతి, –వాపి 2028  అని చెబుతున్నాయి.  ఈ విభాగం విషయంలో అధికారిక సమాచారం ఒకటే కాదు.  పూర్తి మార్గం పూర్తి కాలం గురించి డిసెంబర్ 2030 అని మీడియా వార్తలు  చెబుతున్నాయి.  గతంలో రైల్వే మంత్రి డిసెంబర్ 2029 అని చెప్పారు.  గడువులు పలుమార్లు మారాయి.  అలాగే 21 కిలోమీటర్లు భూగర్భ మార్గం  అనేది బీకేసీ–థానే విభాగం మొత్తం.  అందులో   7 కిలోమీటర్లు. సముద్రం కింద ఉంటుంది. ఈ రెండూ వేర్వేరు కొలతలు. ఇకపోతే  బీ28 రైలుసెట్ ఇంకా అనేక పరీక్షలు, చట్టబద్ధమైన ధృవీకరణలు పూర్తి చేయాల్సి ఉంది. ప్రోటోటైప్ సిద్ధమైన తర్వాత కూడా ట్రయల్ రన్ దశ మిగిలి ఉంది. కాబట్టి ఆగస్ట్ 2027 వాణిజ్య సేవలు ఒక లక్ష్యం మాత్రమే, హామీ కాదు.

మీకు నచ్చవచ్చు: స్టార్ లింక్ కిల్ స్విచ్ వివాదం: ఆధునిక పోరాటంలో ఆయుధం కాదు.. కమ్యూనికేషన్ పవర్ ముఖ్యం.!

వ్యూహాత్మక స్వయంప్రతిపత్తి: అసమాన అంచనాలు.. రాజకీయాలు.!

-సీతారాం కంఠంనేని 

ఈ విశ్లేషణ మీకు నచ్చినట్లయితే, దయచేసి మా  https://TeluguOne.com  పోర్టల్‌ను అనుసరించండి, మీ స్నేహితులతో పంచుకోండి, అలాగే మీ విలువైన అభిప్రాయాలను తెలియజేయండి.   

[India First Bullet Train B28, BEML Aditya Plant Bengaluru, Mumbai Ahmedabad High Speed Rail, Ashwini Vaishnaw, Review, High Speed Rail Corridors India, TeluguOne]