కాశ్మీర్, జార్ఖండ్ ఎన్నికల షెడ్యూలు విడుదల

జమ్ము కాశ్మీర్, జార్ఖండ్ రాష్ట్రాల అసెంబ్లీ ఎన్నికలకు ప్రధాన ఎన్నికల కమిషనర్ వి.ఎస్. సంపత్ షెడ్యూలు విడుదల చేశారు. జమ్ము కాశ్మీర్ రాష్ట్రంలోని 87 అసెంబ్లీ స్థానాలకు జార్ఖండ్ రాష్ట్రంలోని 81 అసెంబ్లీ స్థానాలకు, పోలింగ్ జరగనుంది. ఎన్నికలు నవంబర్ 25వ తేదీ నుంచి మొదలవుతాయి. డిసెంబర్ 23న ఓట్ల లెక్కింపు, ఫలితాల విడుదల ఉంటాయి. ఈ రెండు రాష్ట్రాల ఎన్నికలతోపాటు ఢిల్లీ అసెంబ్లీలోని మెహరోలి, తుగ్లకాబాద్, కృష్ణానగర్ అసెంబ్లీ స్థానాలకు కూడా ఉప ఎన్నికలు జరుగుతాయి. ఈ మూడు స్థానాలకు జమ్ము కాశ్మీర్ తొలిదశతో పాటు జరుగుతాయి. ఓటర్లు తాము ఏ అభ్యర్థికీ ఓటు వేయడం లేదని తిరస్కరించే ‘నోటా’కు కూడా ఈ ఎన్నికలలో అవకాశం వుంటుంది. జమ్ము కాశ్మీర్లో మొత్తం 10,050, జార్ఖండ్ లో మొత్తం 24,648 పోలింగ్ కేంద్రాలుంటాయి. జమ్ము కాశ్మీర్, జార్ఖండ్ ఎన్నికలకు సంబంధించి ముఖ్యమైన తేదీలివి. రెండు రాష్ట్రాలకు తొలిదశ ఎన్నికలు - నవంబర్ 25, రెండు రాష్ట్రాలకు రెండోదశ ఎన్నికలు - డిసెంబర్ 2, రెండు రాష్ట్రాలకు మూడోదశ ఎన్నికలు - డిసెంబర్ 9, రెండు రాష్ట్రాలకు నాలుగోదశ ఎన్నికలు - డిసెంబర్ 14, రెండు రాష్ట్రాలకు ఐదోదశ ఎన్నికలు - డిసెంబర్ 20, రెండు రాష్ట్రాల ఓట్ల లెక్కింపు - డిసెంబర్ 23.