Home  
Politics

అమితాబ్‌ @ 72

  బాలీవుడ్ సూపర్‌స్టార్ ‘బిగ్ బి’ అమితాబ్ బచ్చన్ శనివారం నాడు తన 72వ పుట్టినరోజు పండుగను తన కుటుంబ సభ్యుల మధ్య ఆనందోత్సాహాలతో జరుపుకున్నారు. కొద్ది రోజుల క్రితం వరకు జ్వరంతో బాధపడిన అమితాబ్ ఇప్పుడు పూర్తిగా కుదురుకున్నారు. అమితాబ్ భార్య, కుమారుడు, కుమార్తె, కోడలుతో కలసి జరుపుకున్న బర్త్ డే ఫొటోను అమితాబ్ తనయుడు అభిషేక్ బచ్చన్ సోషల్ మీడియాలో పోస్ట్ చేశాడు.

భర్తని పాతేసి నాట్లు వేసిన మహా ఇల్లాలు

  చిత్తూరు జిల్లాలో ఒక మహా ఇల్లాలు తన ప్రియుడి కోసం భర్తని చంపేసి పొలంలో పాతేసింది. తర్వాత భర్తని పాతిన చోట వరి నాట్లు కూడా వేసింది. ఈ కేసులో ఇంకో దారుణం ఏమిటంటే, భర్తని చంపడానికి ఆమె ప్రియుడితోపాటు తన కొడుకు సహకారం కూడా తీసుకుంది. చిత్తూరు జిల్లా నాగులాపురం మండలం గోపాలపురంలో ఈ దారుణమైన సంఘటన జరిగింది. అయితే చనిపోయిన వ్యక్తి తల్లిదండ్రులు తమ కుమారుడు కనిపించడం లేదని పోలీసులకు ఫిర్యాదు చేయడంతో ఈ దారుణ సంఘటన బయటపడింది.

జగన్ ఇంటి ముందు రైతుల ఆందోళన

  వైసీపీ నాయకుడు జగన్మోహన్‌రెడ్డి లోటస్ పాండ్ ఇంటిముందు రైతులు భారీ సంఖ్యలో చేరి ఆందోళన చేస్తున్నారు. వీరంతా గుంటూరు జిల్లా గురజాల నియోజకవర్గానికి చెందిన రైతులు. జగన్‌కి చెందిన ఇండస్ట్రీస్‌కి గురజాల నియోజవర్గంలో గతంలో ప్రభుత్వం కేటాయించిన దాదాపు 613 ఎకరాల భూములను వినియోగంలోకి తేనందుకు ఆంధ్రప్రదేశ్ ప్రభుత్వం లీజును రద్దు చేసిన విషయం తెలిసిందే. అంతకు నాలుగు రోజుల ముందు ఈ భూములు వినియోగంలోకి రాకపోవడంతో భూముల మొదటి సొంతదారులైన రైతులు ఈ పొలాల్లో పండించిన పంటలను సరస్వతి ఇండస్ట్రీస్‌కి చెందిన వారు ట్రాక్టర్లతో దున్నే ప్రయత్నం చేశారు. అప్పుడు రైతులు అడ్డుకోవడంతో వారిని గాయపరిచారు. ఆ సంఘటనలో గాయపడిన రైతులను తీసుకుని గురజాల ప్రాంతానికి చెందిన రైతులందరూ జగన్ ఇంటి ముందు ఆందోళన కార్యక్రమం చేస్తున్నారు.

హైదరాబాద్‌లో బాణాసంచా దుకాణంలో పేలుడు

  హైదరాబాద్‌లో పేలుడు సంఘటన జరిగింది. బేగంపేటలోని అజీజ్ ప్లాజా ఎదురుగా పేలుడు సంభవించింది. ఈ కాంప్లెక్స్‌లో ఎదురుగా వున్న బాణాసంచా దుకాణంలో ఈ పేలుడు జరిగింది. బాణాసంచా అంటుకున్న కారణంగా మంటలు ఎగసిపడుతున్నాయి. అయితే వాటిని అదుపులోకి తేవడానికి అగ్నిమాపక సిబ్బంది ప్రయత్నిస్తున్నారు. కొద్ది సంవత్సరాల క్రితం ఇదే ప్రాంతంలో బాణాసంచా దుకాణంలో అగ్నిప్రమాదం జరగడంతో కొంతమంది మరణించారు.

జంట హత్యల కేసు... యండమూరి దోషి

  అమెరికాలో రెండేళ్ళ క్రితం తెలుగువారైన సాన్వీ అనే పదినెలల పాపని, ఆమె అమ్మమ్మ సత్యవతి వెన్నాని అమెరికాలోనే నివసించే యండమూరి రఘునందన్ అనే యువకుడు దారుణంగా హత్య చేశాడు. 2012లో అక్టోబర్ 22న పెన్సిల్వేనియాలో ఈ హత్యలు జరిగాయి. అప్పటి నుంచి ఈ కేసు మీద అమెరికాలో విచారణ జరుగుతోంది. ఇద్దరు అమెరికన్ల సహకారంతో యండమూరి రఘునందన్ ఈ హత్యలు చేసినట్టు కోర్టు నిర్ధారించింది. రఘునందన్‌కి ఇంకా శిక్ష ఖరారు చేయాల్సి వుంది. అయితే యండమూరి రఘునందన్‌కి మరణశిక్ష విధించే అవకాశం వుందని తెలుస్తోంది.

హుదూద్‌తో భారీ విధ్వంసం.. నాసా హెచ్చరిక

  హుదూద్ తుఫాను భారీ విధ్వంసం సృష్టించే ప్రమాదం వుందని నాసా శాస్త్రవేత్తలు భారత ప్రభుత్వాన్ని హెచ్చరించారు. విశాఖ తీరం వైపు శరవేగంగా దూసుకొస్తున్న హుదూద్ తుఫాను స్వభావానికి సంబంధించిన వివరాలను నాసా వెల్లడించింది. హుదూద్ తీవ్రత చాలా ఎక్కువగా ఉంటుందని, తీరం దాటే సమయంలో 185 కి.మీ. వేగంతో ఈదురు గాలులు వీస్తాయని తెలిపింది. ఉరుములు-మెరుపులతో హుదూద్ బీభత్సం చేయొచ్చని శాస్త్రవేత్తలు పేర్కొన్నారు. జాతీయ రహదారులపై రాకపోకలను పూర్తిగా నిషేదించాలని వారు సూచించారు.

ఇంతకీ భవ్యశ్రీ ఎక్కడుందో

  హైదరాబాద్‌‌కు చెందిన సాఫ్ట్‌వేర్ ఇంజనీర్‌ విజయవాడకు చెందిన యువతి భవ్యశ్రీ మిస్సింగ్ కేసులో దర్యాప్తు సస్పెన్స్ సినిమాలా సాగుతోంది. ఆమె మొబైల్ సిగ్నల్ శుక్రవారం వరకు దొరకలేదు. శుక్రవారం సాయంత్రం సిగ్నల్ దొరికింది. ఆ సిగ్నల్స్ ప్రకారం ఆమె తూర్పు గోదావరి జిల్లాలో వున్నట్టు పోలీసులు భావించారు. అయితే ఆ తర్వాత ఆమె సెల్ ఫోన్ సిగ్నల్స్ విశాఖపట్టణానికి మారిపోయాయి. సెల్ సిగ్నల్స్ ప్రకారం భవ్యశ్రీ విశాఖపట్నం జిల్లా పాడేరులోని గెస్ట్ హౌస్‌లో వున్నట్టు పోలీసులు గుర్తించారు. అయితే అక్కడకు వెళ్ళిన పోలీసులకు గెస్ట్ హౌస్ రూమ్‌లో భవ్యశ్రీ కనిపించలేదు. పోలీసులు వెళ్ళిన సమయంలో రూమ్‌లో టీవీ ఆన్ చేసి వుంది. ఆమె మాత్రం కనిపించలేదు. తాము వస్తున్న విషయాన్ని గ్రహించి ఆమె అక్కడ నుంచి మరో చోటికి వెళ్ళిపోయిందని పోలీసులు అనుమానిస్తున్నారు. తన మిస్సింగ్ గురించి మీడియాలో నిరంతరం కవరేజ్ వస్తూ వుండటంతో వాటిని గమనిస్తూ భవ్యశ్రీ తమకు కనిపించకుండా తప్పించుకుంటోందని కూడా పోలీసులు అనుమానిస్తున్నారు. భవ్యశ్రీ ఇలా ఎందుకు చేస్తోందో కూడా అర్థంకాని విధంగా వుందంటున్నారు. అసలు భవ్యశ్రీ  సెల్ ఫోన్ భవ్యశ్రీ దగ్గరే వుందా.. మరెవరిదగ్గరైనా వుందా, వాళ్ళు ఇలా గేమ్ ఆడుతున్నారా అనే విషయంలో కూడా అంతుబట్టకుండా వుందని అంటున్నారు. సాధ్యమైనంత త్వరలో ఈ సస్పెన్స్‌కి తెరదించుతామని చెబుతున్నారు.

రోడ్డు ప్రమాదం: 23 మంది మృతి

  హైతీలో దారుణమైన రోడ్డు ప్రమాదం జరిగింది. ప్రయాణికులతో వున్న బస్సు లోయలో పడిపోవడంతో 23 మంది మరణించారు. మరో 40 మంది గాయపడ్డారు. క్షతగాత్రులను ఆస్పత్రికి తరలించి చికిత్స అందిస్తున్నారు. వారిలో కొందరి పరిస్థితి విషమంగా వుంది. ప్రమాద స్థలం నుంచి ఇప్పటి వరకు 18 మృతదేహలను వెలికి తీశారు. ఆస్పత్రిలో చికిత్స పొందుతూ ఐదుగురు మరణించారు. బస్సు బ్రేకులు ఫెయిల్ అవడం వల్ల ఈ ప్రమాదం జరిగినట్టు తెలుస్తోంది.

హుదూద్ తుఫాన్ ప్రభావం: రైళ్ళ రద్దు

  హుదూద్ తుఫాన్ ప్రభావంతో రైళ్ల రాకపోకలకు అంతరాయం ఏర్పడింది. ఈస్ట్ కోస్ట్ రైల్వే పలు రైళ్లను దారి మళ్లించగా, పెద్ద సంఖ్యలో రైళ్లను రద్దు చేసింది. మొత్తం 27 ఎక్స్ ప్రెస్ రైళ్లను రద్దు చేసిన రైల్వే అధికారులు, పది ప్యాసింజర్ సర్వీసులను నిలిపివేశారు. 31 రైళ్లను దారి మళ్లించారు. హుదూద్ తుఫాను ప్రభావం అధికంగా ఉండొచ్చని భావిస్తున్న ప్రాంతాల్లోని రైల్వే స్టేషన్లలో ప్రయాణికుల భద్రత కోసం రైల్వేశాఖ అనేక చర్యలు తీసుకుంది. ఆహార పదార్ధాలు, అవసరమైన సామగ్రి సిద్ధం చేసి వుంచింది.

వర్మకి శ్రీదేవి లాయర్ నోటీసులు

  దర్శకుడు రామ్‌గోపాల్ వర్మ తాను తీయబోయే ‘సావిత్రి’ అనే కళాఖండం తాలూకు స్టిల్స్ బయటపెట్టినప్పుడు కలకలం రేగిన విషయం తెలిసిందే. ఒక చిన్నకుర్రాడు తన టీచర్‌‌ని చూస్తున్న చిత్రాలు బయటపడగానే మహిళా సంఘాలు తీవ్ర నిరసనను వ్యక్తం చేశాయి. వర్మ ఏవోవే సుత్తి కబుర్లు చెప్పినప్పటికీ నిరసన ఆగలేదు. ఆ తర్వాత వర్మ ఆ సినిమా పేరును ‘శ్రీదేవి’ అని మార్చాడు. దాంతో ఇప్పుడు సినీ నటి శ్రీదేవి  వర్మకి నోటీసులు పంపింది. ఒక అసభ్యమైన సినిమాకి తన పేరు పెట్టడమేంటని ఆమె తన నోటీసులలో ప్రశ్నించింది. రామ్ గోపాల్ వర్మకి లాయర్లు పంపిన నోటీసులో- దక్షిణ, ఉత్తరాది భాషల్లో శ్రీదేవి నటిగా మంచి పేరుందని, ప్రభుత్వం నుంచి ప్రతిష్టాత్మక పురస్కారం అందుకున్న ఆమె పేరుని.. అందులోనూ అభ్యంతరకరంగా ఉంటుందేమోననే భావనను ప్రచార చిత్రాలు కల్పించిన నేపథ్యంలో ఆమె పేరుని టైటిల్‌గా వాడటం తగదని శ్రీదేవి తరఫు న్యాయవాది పేర్కొన్నారు. ఈ విషయమై శ్రీదేవి భర్త రామ్‌గోపాల్ వర్మను వివరణ కోరాలని ఫోన్ చేస్తే, వర్మ ఒక వాట్సప్ మెసేజ్ పంపి ఊరుకున్నాడని, ఇది పద్ధతి కాదని పేర్కొన్నారు. వర్మ గతంలో పలు ఇంటర్వ్యూల్లో శ్రీదేవి అంటే తనకు చాలా ఇష్టమని, ఆమె భర్త బోనీని చూస్తే అసూయగా ఉందని వర్మ పేర్కొనడాన్ని ఈ సందర్భంగా సదరు న్యాయవాది గుర్తు చేశారు. ఈ నోటీసు అందిన మూడు రోజుల్లోగా స్పందించకపోతే తాము తీసుకునే తదుపరి చర్యలు చాలా తీవ్రంగా ఉంటాయని కూడా శ్రీదేవి తరఫున ఆ నోటీసులలో న్యాయవాది తెలిపారు. ఈ చిత్రం టైటిల్ మార్చుతున్నట్లు రాతపూర్వకంగా ఇవ్వాలని, జాతీయ స్థాయి వార్తా పత్రికల్లో క్షమాపణలు చెబుతూ, ప్రకటన ఇవ్వాలని, వేరే కొత్త టైటిల్‌ని కూడా ప్రకటించాలని డిమాండ్ చేశారు.

60 అడుగులు ముందుకొచ్చిన సముద్రం

  హుదూద్ తుఫాను ప్రభావంతో విశాఖపట్టణం జిల్లా నక్కపల్లి మండలంలోని రాజయ్యపేట, బోయపాడు, బంగారంపేట గ్రామాల వద్ద సముద్రపు అలలు ఉవ్వెత్తున ఎగసిపడుతున్నాయి. సముద్రం దాదాపు 60 అడుగులు దాటి ముందుకు వచ్చిందని స్థానికులు చెబుతున్నారు. సముద్ర తీరాల్లోని మత్స్యకారులందరూ ముందు జాగ్రత్తగా తెప్పలు, పడవలు, వలలను సురక్షిత ప్రాంతాలకు చేర్చుకుంటున్నారు. ఆంధ్రప్రదేశ్‌ తీర ప్రాంతంలో లోతట్టు ప్రాంతాల్లో వున్న ప్రజలను పోలీసులు అప్రమత్తం చేస్తున్నారు. చాలామందిని లోతట్టు ప్రాంతాల నుంచి తరలిస్తున్నారు. మత్స్యకారులు సముద్రంలోకి వేటకి వెళ్ళకుండా పోలీసులు గస్తీ నిర్వహిస్తున్నారు.

నీట మునిగి ఇద్దరు చిన్నారులు మృతి

  అనంతపురం జిల్లా కళ్యాణదుర్గం మండటం దొడగట్ట గ్రామానికి చెందిన పవన్, సంతోష్ అనే ఇద్దరు చిన్నారులు నీటి కుంటలో పడి చనిపోయారు. ఈ ఇద్దరు పిల్లలూ శుక్రవారం నుంచే కనిపించడం లేదు. శనివారం ఉదయం గ్రామ సమీపంలో ఉన్న ఓ నీటి కుంట వద్ద చిన్నారుల మృతదేహాలను స్థానికులు గుర్తించి సమాచారం అందించారు. ఈ ఇద్దరూ నీటి కుంటలో పొరపాటున పడి మరణించారా లేక మరేవైనా కారణాలు ఉన్నాయా అనే విషయమై పోలీసులు దర్యాప్తు చేస్తున్నారు.

వరంగల్: మహిళా రైతు ఆత్మహత్య

  తెలంగాణ రాష్ట్రంలోని వరంగల్ జిల్లాలో కరెంటు సమస్య కారణంగా అప్పులు చేసి పండిస్తున్న పంట ఎండిపోవడంతో పార్వతి అనే మహిళా రైతు పురుగుల మందు తాగి ఆత్మహత్య చేసుకుంది. వరంగల్ జిల్లా వర్ధన్నపేట మండలం రంధన్ తండాలో ఈ దారుణం జరిగింది. ఈ గ్రామానికి చెందిన పార్వతికి ఒకటిన్నర ఎకరాల పొలం ఉంది. అయితే రోజుకు రెండు మూడు గంటలు కూడా కరెంటు సక్రమంగా రాకపోవడంతో ఆ పొలం ఎండిపోయింది. డబ్బు మొత్తం పంటకే పెట్టడంతో తన కుమార్తెకు ఫీజు కూడా కట్టలేని పరిస్థితికి ఈ మహిళా రైతు చేరుకుంది. ఈ సమస్యలతో పార్వతి ఇంట్లో ఉన్న పురుగుల మందు తాగింది. ఆమెను వరంగల్ ఎంజీఎం ఆస్పత్రికి తరలించగా, అక్కడ చికిత్స పొందుతూ మృతిచెందింది.

మోడీని కలిసిన ఫేస్‌బుక్ మార్క్ జుకర్‌బర్గ్

  ప్రముఖ సోషల్ మీడియా వెబ్‌సైట్ ఫేస్‌బుక్ వ్యవస్థాపకుడు మార్క్ జుకర్‌బర్గ్ భారత ప్రధానమంత్రి నరేంద్రమోడీని కలిశారు. రెండు రోజుల పర్యటన కోసం ఇండియాకి వచ్చిన జుకర్‌బర్గ్ ఇక్కడ మోడీని కలవటంతోపాటు ఇంటర్నెట్ మీద జరిగే ఒక సదస్సులో కూడా పాల్గొంటారు. మోడీని కలిసిన అనంతరం జుకర్‌బర్గ్ మాట్లాడుతూ, ఫేస్‌బుక్ కారణంగా ప్రధాని నరేంద్రమోడీ గురించి భారతదేశంలోని మారుమూల గ్రామాలకు కూడా బాగా తెలిసిందని అన్నారు. భారతదేశంలో ఫేస్‌బుక్ సేవలను మరింత విస్తరించే ఆలోచన తనకు వుందని చెప్పారు. భారతదేశంలో ఇంకా వందకోట్ల మందికి ఇంటర్‌నెట్ సదుపాయం లభించాల్సి వుందని ఆయన అన్నారు. భారతదేశం తమకు చాలా ప్రధానమైన మార్కెట్ అని, ఇక్కడి మార్కెట్‌ని కాపాడుకుంటామని ఆయన ఈ సందర్భంగా చెప్పారు.

అయాం వెరీ సారీ... సత్య నాదెళ్ళ

  మహిళలను ఉద్దేశించి తాను చేసిన వివాదాస్పద వ్యాఖ్యలకు ప్రముఖ సాఫ్ట్ వేర్ నిపుణుడు, మైక్రోసాఫ్ట్ సిఇఓ సత్య నాదెళ్ల మహిళలను క్షమాపణ చెప్పారు.అమెరికాలోని అరిజోనాలో జరిగిన ఒక సంస్థాగత సమావేశ:లో ఆయన మాట్లాడుతూ మహిళలు తమ వేతనాల పెంపు గురించి అడగాల్సిన అవసరం లేదని, వ్యవస్థపై నమ్మకం ఉంచి తమ పని తాము చేసుకుపోవాలని అన్నారు. నాదెళ్ళ సత్య వ్యాఖ్యలు మహిళలను కించపరిచేలా వున్నాయంటూ సోషల్ మీడియాలో విమర్శలు వెల్లువెత్తాయి. దాంతో సత్య నాదెళ్ళ తన అభిప్రాయం తప్పని అంగీకరిస్తూ సారీ చెప్పారు.

మావోయిస్టులు తుపాకులు వదిలిపెట్టాలి.. మోడీ...

  తుపాకులు పట్టి హింసామార్గంలో పయనిస్తున్న మావోయిస్టులు ఆ మార్గాన్ని విడిచిపెట్టాలని భారత ప్రధాని నరేంద్రమోడీ పిలుపు ఇచ్చారు. భుజాలపై తుపాకులు మోస్తున్న యువతరం వాటిని విసిరి పారేసి వాటి స్థానంలో నాగళ్ళను ఎత్తుకోవాలని మోడీ కోరారు. మహారాష్ట్ర ఎన్నికల ప్రచారం సందర్భంగా నక్సలైట్ల ప్రాబల్యం బాగా వున్న చంద్రపూర్ జిల్లా బ్రహ్మపురిలో ఆయన బహిరంగ సభలో మాట్లాడారు. ‘‘ఉగ్రవాదం వల్ల ఏదైనా ప్రయోజనం నెరవేరినట్టు చరిత్రలో లేదు. ఆ మార్గాన్ని పట్టినవారు బయటకి రావాలని కోరుతున్నాను’’ అని మోడీ అన్నారు.

దిక్కులు చూడకు రామయ్య స్వీట్ రివ్యూ

  తారాగణం: నాగశౌర్య, సనా మక్బూల్,అజయ్, ఇంద్రజ, బ్రహ్మాజీ తదితరులు సంగీతం: కీరవాణి, దర్శకత్వం: త్రికోటి, నిర్మాత: రజనీ కొర్రపాటి.   ‘అమెరికన్ బ్యూటీ’ అనే సూపర్ హిట్ ఇంగ్లిష్ సినిమా ప్రేరణతో తయారు చేసుకున్న కథ అనిపించే ‘దిక్కులు చూడకు రామయ్య’ తెలుగులో సరికొత్త కథాంశంతో చేసిన ప్రయత్నమనిచెప్పవచ్చు. పదిహేనేళ్లకే గోపాలకృష్ణ అలియాస్ క్రిష్ (అజయ్)కి భవాని (ఇంద్రజ)తో పెళ్లయిపోతుంది. చిన్న వయసులోనే ఇద్దరి బిడ్దల తండ్రి అయిపోతాడు. టీనేజ్‌ని సరిగ్గా ఎంజాయ్ చేయలేపోయాననే వెలితి క్రిష్‌లో ఉంటుంది. డిగ్రీ ఫస్ట్ ఇయర్ చదివే మధు (నాగశౌర్య) క్రిష్ కొడుకు. అయితే ఎంజాయ్ చేయాల్సిన వయసులో ఎంజాయ్ చేయలేదన్న బాధలో సమీత (సనా మక్బుల్) అనే అమ్మాయికి క్రిష్ సైట్ కొడుతూవుంటాడు. తనకు పెళ్ళి కాలేదని అబద్ధం చెప్పి ఆ అమ్మాయితో ఫ్రెండ్షిప్ చేస్తాడు. ఆ అమ్మాయినే మధు కూడా ప్రేమిస్తాడు. అయితే ఒక సందర్భంలో తన తండ్రి సమీతతో చనువుగా ఉంటున్నాడని తెలుస్తుంది. సమీత కూడా తన తండ్రిని పెళ్లాడటానికి రెడీగా ఉందని తెలుసుకున్న మధు, తన తల్లి కోసం ఏం చేశాడు? ఏ విధంగా తన తండ్రిని మార్చాడు? అనేది ఈ ‘దిక్కులు చూడకు రామయ్య’ సినిమా కథ.   ఈ చిత్రానికి హీరో నాగశౌర్య అయినా, కథాపరంగా అసలు హీరో అజయ్. తన కెరీర్‌లోనే చెప్పుకోదగ్గ పాత్రను ఇందులో అజయ్ చేశారు. తల్లి బాగుకోసం పరితపిస్తూ, తండ్రికి బుద్ధి చెప్పే పాత్రలో నాగశౌర్య చక్కగా ఇమిడిపోయాడు. తన పాత్రకు అన్ని విధాలుగా న్యాయం చేశాడు. సనా మక్బూల్ అందానికీ, అభినయానికీ ఆస్కారమున్న పాత్ర చేసింది. చాలాకాలం తర్వాత వెండితెరపై మెరిసిన ఇంద్రజ తల్లి పాత్రలో మెప్పించారు. బ్రహ్మాజీ చక్కని వినోదాన్ని పంచారు.   ఈ సినిమాలో ప్రేమ, బంధాలు, భావోద్వేగాలను చక్కగా ఆవిష్కరించారు. చక్కని వినోదంతో ప్రేక్షకులకు విసుగు రాకుండా జాగ్రత్త పడ్డారు. తన సంగీతంతో కీరవాణి సినిమాను మరో స్థాయిలో నిలబెట్టారాయన.

దళితుడు కాకుండా.. దరిద్రుడు ముఖ్యమంత్రి అయ్యాడు: రేవంత్‌రెడ్డి

  తెలంగాణ సీఎం కేసీఆర్‌ మీద తెలంగాణ తెలుగుదేశం పార్టీ నాయకుడు, ఎమ్మెల్యే రేవంత్ రెడ్డి తీవ్రంగా విరుచుకుపడ్డారు. కేసీఆర్‌ దళితుడిని తెలంగాణ ముఖ్యమంత్రిని చేస్తానని, అలా చేయకపోతే తన తల తెగ నరుక్కుంటానని చెప్పాడని, అధికారం వచ్చాక తెలంగాణ ప్రజల్ని, దళితుల్ని మోసం చేశాడని రేవంత్ రెడ్డి విమర్శించారు. దళితుడు ముఖ్యమంత్రి కావాల్సిన తెలంగాణకు ఓ దరిద్రుడు ముఖ్యమంత్రి అయ్యాడు అని రేవంత్ రెడ్డి వ్యాఖ్యానించారు. తన మంత్రివర్గంలోని వారిని టీడీపీ ఎమ్మెల్యేల ఇళ్ళ దగ్గర కేసీఆర్ కాపలాగా పెట్టాడని, టీటీడీపీ ఎమ్మెల్యేలను టీఆర్ఎస్‌లోకి తీసుకురాకపోతే మంత్రి పదవుల నుంచి తప్పిస్తానని కేసీఆర్ బెదిరిస్తున్నారని రేవంత్ రెడ్డి అన్నారు. ఏపీ ముఖ్యమంత్రి చంద్రబాబు లాగా బయట నుంచి విద్యుత్ కొనుగోలు చేయడం చేతకాకపోతే, చంద్రబాబును ఒప్పించి మేమే విద్యుత్ తీసుకువస్తామని టీడీపీ ఎమ్మెల్యేలు ఎర్రబెల్లి దయాకర్ రావు, రేవంత్ ఈ సందర్భంగా అన్నారు.

స్నానం చేస్తున్న యువతి ఫొటో తీసిన కానిస్టేబుల్

  కాపాడాల్సిన వాడే కంత్రీగాడిలా మారిపోయాడు. గుంటూరు జిల్లా మాచర్లలో ఎస్కార్ట్ కానిస్టేబుల్‌గా పనిచేస్తున్న అశోక్ అనే యువకుడు గుంటూరు ప్రభుత్వ ఆస్పత్రికి విధి నిర్వహణలో భాగంగా వచ్చారు. ఆస్పత్రిలోని స్నానాల గదిలో స్నానం చేస్తున్న ఓ యువతిని తన సెల్‌ఫోన్‌లో వున్న కెమెరాతో వీడియో షూట్ చేశాడు. ఈ విషయాన్ని గమనించిన ఆ యువతి భయంతో కేకలు వేయడంతో అక్కడ వున్నవారు కానిస్టేబుల్‌ అశోక్‌ని పట్టుకున్నారు. బాధితురాలి ఫిర్యాదు మేరకు గుంటూరు పోలీసులు కానిస్టేబుల్ అశోక్ మీద కేసు నమోదు చేశారు.