నెల్లూరు జిల్లా ఆత్మకూరు మండలం వాసిలి ప్రభుత్వ పాఠశాలలో ఒక టీచరమ్మ. ఆమె స్కూల్లో చదివే పిల్లల్ని కొట్టడం తన జన్మహక్కులా భావిస్తూ వుంటుంది. ఆ స్కూల్లో మూడో తరగతి చదువుతున్న ఓ బాలిక పలక మీద తనకు చెప్పిన పాఠాన్ని రాసి ఈ టీచరమ్మకి చూపించింది. నిన్ను నోట్ ‌బుక్‌లో రాయమంటే పలక మీద ఎందుకు రాశావంటూ గావు కేకలు వేసిన ఆ టీచరమ్మ విద్యార్థినిని చితకబాదింది. ఈ విషయం ఆ బాలిక తల్లిదండ్రులకు తెలిసి స్కూలుకు వచ్చి టీచరమ్మని ఈ విషయమై ప్రశ్నించారు. టీచరమ్మ మెట్టు దిగకుండా ఆ విద్యార్థిని తల్లిదండ్రులతో వాగ్వాదానికి దిగింది. ఇంతలో ఆ స్కూలు హెడ్ మాస్టర్ వచ్చి ఈ మొత్తం ఇష్యూలో టీచరమ్మదే తప్పని అంటూ విద్యార్థిని తల్లిదండ్రులకు మద్దతుగా నిలిచాడు. అంతే టీచరమ్మ గారి ఆగ్రహం హెడ్ మాస్టర్ వైపు టర్న్ అయింది. ఆయన మీద గయ్యిమని విరుచుకుపడింది. తనకు కాకుండా విద్యార్థి తల్లిందండ్రులకు మద్దతు ఇస్తావేంటని ఆయన్ని తిట్టడం మొదలుపెట్టింది. అక్కడితో ఆగకుండా కాలి చెప్పు తీసి హెడ్ మాస్టర్ని కొట్టింది. ఈ టీచరమ్మ నిర్వాకం చూసి అందరూ ఆశ్చర్యంతో నోళ్ళు తెరిచారు. ఈమె వ్యవహార శైలి మీద హెడ్ మాస్టర్ విద్యాశాఖ ఉన్నతాధికారులకు ఫిర్యాదు చేశాడు.