ప్రేమకు ప్రతిరూపం..మొగల్ చక్రవర్తుల వారసత్వ సంపదగా..యమునానది ఒడ్డున విలసిల్లుతున్న అపురూప కట్టడం తాజ్‌మహాల్. జీవితంలో ఒక్కసారైనా తాజ్‌మహాల్‌ను చూడాలనుకోని భారతీయుడు ఉండడు. అలాంటి వారికి ప్రభుత్వం షాక్ ఇవ్వనుంది. తాజ్‌మహాల్‌ సంరక్షణ చర్యల్లో భాగంగా పర్యాటకులను లోనికి అనుమతించడంపై నిబంధనలు విధించేందుకు ప్రతిపాదనలు సిద్ధమవుతున్నాయి. నాగపూర్‌కు చెందిన నేషనల్ ఎన్విరాన్‌మెంటల్ ఇంజనీరింగ్ రీసెర్చ్ ఇనిస్టిట్యూట్ నిర్వహించిన అధ్యయనం ప్రకారం పర్యాటకులు పోటెత్తుండటంతో తాజ్‌మహాల్ పరిసర ప్రాంతాల్లో పర్యావరణ మార్పులు వేగంగా జరుగుతున్నట్టు తేలింది. దీంతో అద్బుత కట్టడంపై ప్రభావం పడే ప్రమాదం ఉందని అధ్యయనం తెలిపింది. ఈ నేపథ్యంలో అప్రమత్తమైన ఆర్కియాలాజికల్ సర్వే ఆఫ్ ఇండియా తాజ్ సందర్శన వేళలను కుదించనున్నట్టు తెలిపింది.