తెరాస ప్రభుత్వం, ముఖ్యమంత్రి కేసీఆర్, ఆయన కుటుంబ సభ్యుల అవినీతికి సంబంధించి మంగళవారం పది బాణాలు సంధించిన బీజేపీ రాష్ట్ర అధ్యక్షుడు, బండి సంజయ్, బుధవారం మరో కొన్ని ప్రశ్నలు సంధించారు. ఈసారి బండి, తెరాస ఎన్నికల మేనిఫెస్టో మీద దృష్టిని కేంద్రీకరించారు. ముఖ్యంగా డబుల్ బెడ్ రూమ్ ఇల్లా విషయంలో తెరాస ప్రభుత్వం వైఫల్యాలను ఆయన ఎండకట్టారు. 

2014లో 32 పేజీలు, 2018లో 16 పేజీల ఎన్నికల మ్యానిఫెస్టోను విడుదల చేసి తెలంగాణ ప్రజలకు మీరు అనేక హామీలు ఇచ్చారు. ఇందులో ఎన్ని అమలు చేశారు..? ఎన్ని అమలు చేయలేదు..? దీనిపై చర్చించడానికి మీరు సిద్ధమేనా..?అని బండి సంజయ్ ముఖ్యమంత్రి కేసీఆర్’కు సవాలు విసిరారు. అలాగే, కేసీఆర్ మాటలను ఆయనకే అప్పగిస్తూ. ఇరుకైన ఇంట్లో ఆలుమగలు కాపురం చేయడమే కష్టం.. అల్లుడు బిడ్డా వస్తే తలదాచుకునేదెలా..? గత ప్రభుత్వాలు ఇరుకైన ఇళ్లు పేదలకు ఇచ్చింది.. టీఆర్ఎస్ అధికారంలోకి రాగానే డబుల్ బెడ్రూం ఇళ్లు నిర్మించి ఇస్తామని 2014, 2018 ఎన్నికల ప్రచార సభల్లో మీరు హామీ ఇచ్చిన మాట వాస్తవం కాదా..?అని ప్రశ్నించారు. 

అలాగే ముఖ్యమంత్రి ఎక్కడెక్కడ, ఎప్పుడెప్పుడు ఎలాంటి హామీలు ఇచ్చింది గుర్తుచేస్తూ, జనవరి 11, 2015న వరంగల్ లో 4 నెలల్లో డబుల్ బెడ్రూం ఇళ్లు కట్టిస్తానని ఇచ్చిన హామీని గుర్తుచేస్తూ ఈ హామీఏమైంది, ఇప్పటివరకు ఎన్ని ఇళ్లు కట్టించారు..? అని ప్రశ్నించారు. అంతే కాదు, ఇంకా తెరాస ఎన్నికల ప్రణాళిక, ముఖ్యమంత్రి కేసీఆర్ హామీలకు సంబదించి బండి సంజయ్ సంధించిన మరికొన్ని ప్రశ్నలు 

1.    కేసీఆర్ సారూ… అల్లుడు, బిడ్డ వస్తే ఎక్కడ పడుకోవాలి..? డబుల్ బెడ్రూం ఇళ్లు ఎప్పుడిస్తారు..? మీరిచ్చిన హామీ ఎప్పుడు నెరవేరుస్తారు..?
2. 2014 ఎన్నికల సందర్భంగా మీరు విడుదల చేసిన మ్యానిఫెస్టోలో పేజీ 14లో బలహీన వర్గాలకు గృహ నిర్మాణం అనే అంశం కింద ‘‘ఇల్లు లేని నిరుపేదలకు 125 గజాల స్థలంలో 3 లక్షల రూపాయల వ్యయంతో రెండు పడక గదులు, ఒక హాలు, ఒక వంటగది, స్నానాల గది, మరుగుదొడ్డి ఉన్న ఇంటిని ప్రభుత్వమే నిర్మించి ఇస్తుందని మీరు హామీ ఇచ్చారు. ఈ ఏడు సంవత్సరాల కాలంలో రాష్ట్రంలో ఎన్ని డబుల్ బెడ్రూం ఇళ్లు నిర్మించారు..? ఎన్ని పేదలకు ఇచ్చారు..? వాటికి లెక్కలు చెప్పగలరా..?
3. 2018 ఎన్నికల్లో డబుల్ బెడ్రూం ఇళ్ల నిర్మాణం కొనసాగిస్తూనే సొంత స్థలం ఉన్న అర్హులైన పేదలకు ఇంటి నిర్మాణం కోసం రూ.5 లక్షల నుంచి 6 లక్షల వరకు అందించడం జరుగుతుందని మీరు హామీ ఇచ్చారు. కనీసం ఒక్కరికైనా ప్రభుత్వం ఆర్థిక సహాయం అందించిందా..?
4.ప్రధానమంత్రి నరేంద్ర మోడీ నేతృత్వంలోని కేంద్ర ప్రభుత్వం 2 లక్షల 91 వేల ఇళ్లను తెలంగాణ రాష్ట్రానికి మంజూరు చేస్తే, అందులో ఎన్ని పూర్తి చేశారు..? వాటి వివరాలను ఇవ్వగలరా..
5. డబుల్ బెడ్రూం ఇళ్ల కోసం మొత్తం ఎన్నిదరఖాస్తులు వచ్చాయి..? అందులో అర్హత ఉన్నవి ఎన్ని..? వాటి వివరాలు ఇవ్వగలరా..?
6. ప్రధానమంత్రి ఆవాస్ యోజన పథకం కింద గ్రామీణ, పట్టణాల్లో ఇళ్లు పొందడానికి అర్హత ఉన్న లబ్ధిదారుల జాబితాను రాష్ట్ర ప్రభుత్వం ఎందుకు కేంద్ర ప్రభుత్వానికి సమర్పించడం లేదు..? ఇందులో ఏమైనా మతలబు ఉందా..?
7. కేంద్రం ఇప్పటికే మంజూరు చేసిన 2.91 లక్షల ఇళ్ల నిర్మాణం పూర్తిచేస్తే… తెలంగాణలో పేదల కోసం మరో 10 లక్షల ఇళ్లు కేంద్రం నుండి మంజూరు చేయించే బాధ్యత బీజేపీ తెలంగాణ శాఖది. కేంద్రం మంజూరు చేసిన 2.91 లక్షల ఇళ్ల నిర్మాణాన్ని సత్వరమే పూర్తి చేస్తామని మీరు హామీ ఇవ్వగలరా..?
8. వందల కోట్ల రూపాయలతో మీరు ఇంద్రభవనం లాంటి ప్రగతి భవన్ ను సంవత్సర కాలంలోనే నిర్మించుకున్నారు. మీరు 2014లో నిర్వహించిన సమగ్ర సర్వే ప్రకారమే 26.31 లక్షల మంది ఇల్లు లేని నిరుపేదలు రాష్ట్రంలో ఉన్నారు. 7 ఏళ్లు పూర్తవుతున్నా వారికి డబుల్ బెడ్రూం ఇళ్లు ఎందుకు నిర్మించి ఇవ్వలేకపోతున్నారు..? పేదల పట్ల మీకున్న ప్రేమ ఇదేనా..?
9. రాష్ట్రంలో ఇప్పటివరకు ఎన్ని డబుల్ బెడ్రూం ఇళ్లు నిర్మించారు..? ఎన్ని నిర్మాణంలో ఉన్నాయి..? అఖిలపక్ష నేతలను తీసుకెళ్లి, నిర్మాణాల్ని చూపించే దమ్ము, ధైర్యం మీ ప్రభుత్వానికి ఉందా..?
10. డబుల్ బెడ్రూం ఇళ్ల నిర్మాణానికి ఈ 7 సంవత్సరాల కాలంలో టీఆర్ఎస్ ప్రభుత్వం కేటాయించిన బడ్జెట్ ఎంత..? ఖర్చు చేసిందెంత..? కేంద్ర ప్రభుత్వం నుండి వచ్చిన నిధులెన్ని..? వాటి వివరాలను అందించగలరా..?
11.     గజ్వేల్, సిరిసిల్ల, సిద్దిపేట అసెంబ్లీ నియోజకవర్గాల్లో ఎన్ని డబుల్ బెడ్రూం ఇళ్లు నిర్మించారు..? మిగితా 116 అసెంబ్లీ నియోజకవర్గాల్లో ఎన్ని కట్టారు..?
అంటూ ముఖ్యమంత్రి పైకి  ప్రశ్నలు సంధించారు. అంతే .. ఈ ప్రశ్నల పరంపర ఇలాకొనాసగుతూనే ఉంటున్నదని, బాధ్యత గల పార్టీగా ప్రజల పక్షాన మరిన్ని ప్రశ్నలు సంధిస్తానన్నారు బండి సంజయ్