Publish Date:Aug 11, 2018
Publish Date:Aug 11, 2018
Publish Date:Aug 10, 2018
Publish Date:Aug 10, 2018
Publish Date:Aug 9, 2018
Publish Date:Aug 8, 2018
Publish Date:Aug 7, 2018
Publish Date:Aug 7, 2018
Publish Date:Aug 7, 2018
Publish Date:Aug 6, 2018

LATEST NEWS
ALSO ON TELUGUONE N E W S
  రామ్‌గోపాల్‌వర్మ శిష్యుడు అజయ్‌ భూపతి దర్శకత్వంలో వచ్చిన 'ఆర్‌ఎక్స్‌ 100' యూత్ ని బాగా ఆకట్టుకొని ఘన విజయం సాధించింది.. ఈ సినిమాను రీమేక్‌ చేసేందుకు ఇతర భాషల నుంచి ఆఫర్లు వస్తున్నాయి.. త్వరలో ఈ సినిమాను తమిళ్ లో రీమేక్ చేయబోతున్నట్టు తెలుస్తోంది.. ఒకవైపు హీరోగా చేస్తూనే మరోవైపు వైవిధ్యమైన పాత్రలు చేస్తూ తనకంటూ ప్రత్యేక గుర్తింపు తెచ్చుకున్న ఆది తమిళ వెర్షన్‌లో హీరోగా నటించనున్నారు.. తెలుగులో హీరో,హీరోయిన్లుగా కార్తికేయ, పాయల్‌ రాజ్‌పుత్‌ నటించిన విషయం తెలిసిందే.. తమిళ వెర్షన్‌లో హీరోగా ఆది చేస్తుండగా..  లిప్‌లాక్‌లతో సంచలనం సృష్టించిన పాయల్‌ రాజ్‌పుత్‌ స్థానంలో ఏ హీరోయిన్‌ను ఎంపిక చేస్తారన్నది ఆసక్తికరంగా మారింది.. చూద్దాం మరి తెలుగు యువతను ఆకట్టుకున్న 'ఆర్‌ఎక్స్‌ 100 ' తమిళ యువతను ఏ మేరకు ఆకట్టుకుంటుందో.
  కలర్స్‌ టీవీ షో ద్వారా బుల్లితెరకు పరిచయమైన స్వాతి.. కలర్స్‌ స్వాతిగా ప్రేక్షకులకు దగ్గరయ్యారు.. ఆడవారి మాటలకు అర్థాలే వేరులే, అష్టాచెమ్మా, స్వామిరారా, కార్తికేయ వంటి సినిమాలతో వెండితెర మీద సందడి చేసిన స్వాతి, త్వరలో పెళ్లిపీటలు ఎక్కబోతున్నారు.. కొంత కాలంగా స్వాతి, మలేషియన్ ఎయిర్‌లైన్స్ లో పైలట్‌గా బాధ్యతలు నిర్వర్తిస్తున్న వికాస్‌ అనే వ్యక్తితో ప్రేమలో ఉన్నారు.. ఇరు కుటుంబాల అంగీకారంతో, ఆగస్ట్‌ 30న హైదరాబాద్‌లో రాత్రి 7.30 గంటల సమయంలో వివాహ వేడుక జరగబోతున్నట్లు తెలుస్తోంది.. కాగా వివాహం తర్వాత స్వాతి తన భర్తతో కలిసి ఇండోనేషియాలో స్థిరపడనున్నట్టు సమాచారం.
  హీరోయిన్ సోనాలి బింద్రే గత కొంతకాలంగా కాన్సర్ తో బాధపడుతున్న విషయం తెలిసిందే.. ప్రస్తుతం ఆమె న్యూయార్క్‌లో చికిత్స పొందుతున్నారు.. కాగా ఆమె కుమారుడు ఈరోజు తన 13వ పుట్టినరోజును జరుపుకుంటున్నాడు.. ఈ నేపథ్యంలో ఇండియాలో ఉన్న కుమారుడ్ని కలవలేని ఆమె భావోద్వేగంతో సోషల్‌మీడియాలో పోస్ట్‌ చేశారు.. ‘రణ్‌వీర్‌.. నా సూర్యుడు, చంద్రుడు, నక్షత్రాలు, ఆకాశం.. నేను కాస్త ఎక్కువ భావోద్వేగానికి‌ గురవుతున్నానేమో.. అయినా సరే, నీ 13వ పుట్టినరోజుకు ఆ అర్హత ఉంది.. వావ్‌, ఇప్పుడు నువ్వు టీనేజర్‌వి.. ఆ నిజాన్ని నమ్మడానికి నాకు కాస్త సమయం పడుతుంది.. నీ మానవత్వం, బలం, దయ పట్ల నేను ఎంత గర్వంగా ఉన్నానో చెప్పలేను.. నా బుజ్జి కుమారుడికి పుట్టినరోజు శుభాకాంక్షలు.. మనం కలిసి ఉండలేకపోయిన తొలి పుట్టినరోజు ఇది.. నిన్ను చాలా మిస్‌ అవుతున్నా.. నీకు నా అమితమైన ప్రేమ ఎప్పటికీ ఉంటుంది’ అని సోనాలి పోస్ట్‌ చేసారు.
  బాలకృష్ణ కథానాయకుడిగా క్రిష్ దర్శకత్వంలో వస్తున్న ఎన్టీఆర్ బయోపిక్ గురించి రోజుకో వార్త చక్కర్లు కొడుతోంది.. ఇప్పటికే ఈ సినిమాలో కృష్ణ పాత్రలో మహేష్ బాబు, బాలకృష్ణ పాత్రలో తారక్ కనిపిస్తారని వార్తలు వచ్చిన విషయం తెలిసిందే.. అయితే ఇప్పుడు మరో ఆసక్తికరమైన వార్త వినిపిస్తోంది.. ఎన్టీఆర్ టైములో హీరోగా ఎంట్రీ ఇచ్చి తరువాత మెగాస్టార్ రేంజ్ కి ఎదిగిన చిరంజీవి పాత్ర కూడా ఈ సినిమాలో ఉంటుందట.. చిరు పాత్రలో వరుణ్ తేజ్ కనిపించబోతున్నట్టు తెలుస్తోంది.. ఇప్పటికే క్రిష్, వరుణ్ తేజ్ ని అడగగా వరుణ్ కూడా ఓకే చెప్పినట్టు తెలుస్తోంది.. ఇలా ఒకే సినిమాలో ఇంతమంది హీరోలు కనిపించడం అంటే ప్రేక్షకులకు కన్నుల పండుగ అనే చెప్పుకోవాలి.
హీరో, విలన్ అనే తేడా లేకుండా విభిన్న పాత్రలు చేస్తూ మెప్పిస్తున్న రానా.. త్వరలో కొత్త అవతారం ఎత్తబోతున్నారు.. కొత్త అవతారం అంటే సినిమాలో పాత్ర కాదులేండి.. త్వరలో రానా సమర్పణలో ఒక సినిమా మన ముందుకి రాబోతుంది.. ఆ సినిమా పేరు కేరాఫ్ కంచరపాలెం.     వైజాగ్‌ దగ్గరలో ఉన్న కంచెర‌పాలెం నేప‌థ్యంలో సాగే భిన్న‌మైన ప్రేమ‌క‌థ ఇది.. వెంకటేశ్‌ మహా దర్శకత్వంలో నూతన నటీనటులతో తెరకెక్కిన ఈ సినిమాని చూసిన రానా, న‌చ్చి తానే విడుద‌ల చేయ‌డానికి ముందుకొచ్చారు.. కాగా, ఈ సినిమా ట్రైలర్‌ను ఆగస్టు 15న, సినిమాను సెప్టెంబరు 7న విడుదల చేయనున్నట్లు రానా ప్రకటించారు.. మరోవైపు ఈ సినిమాకి సంబంధించిన పోస్టర్స్ ని సోషల్ మీడియాలో పోస్ట్ చేసిన రానా.. 'ఈ ప్రేమకథతో వయసు అనే సంఖ్యకు సంకెళ్లు వేద్దాం.. ప్రేమ- అవధులు లేనిది, అభిప్రాయాలకు అందనిది.. మీ మొదటి ప్రేమని గుర్తుచేసి గిలిగింతలు పెట్టే కథ' అంటూ ట్వీట్స్ చేసారు.. మరి రానా చెప్పినట్టు కంచరపాలెం సినిమా తొలిప్రేమను గుర్తుచేస్తూ గిలిగింతలు పెడుతుందో లేదో తెలియాలంటే సెప్టెంబరు 7 వరకు ఆగాల్సిందే.  
తెలంగాణలో ఎన్నికల సమరం ప్రారంభమైంది. ఇందుకు సంకేతంగా అధికార తెలంగాణ రాష్ట్ర సమితి, ప్రతిపక్ష కాంగ్రెస్ పార్టీలు ఒకే రోజు సమర శంఖం పూరించాయి. కాంగ్రెస్ పార్టీ జాతీయ అధ్యక్షుడు రాహుల్ గాంధీ హైదరాబాద్‌లో మహిళలతో సమావేశం నిర్వహించారు. అది జరిగిన కొద్ది గంటలకే తెలంగాణ రాఫ్ట్ర సమితి అధ్యక్షుడు, ముఖ్యమంత్రి కె.చంద్రశేఖర రావు పార్టీ కార్యవర్గ సమావేశం నిర్వహించారు. అనంతరం జరిగిన విలేకరుల సమావేశంలో తన ఎన్నికల ప్రణాళికను కూడా వెల్లడించారు.  అంతే కాదు... ముందస్తు ఎన్నికలకు వెళ్తున్నామనే సంకేతాలను కూడా ఇచ్చారు. అయితే గడువుకు ఆరు నెలల ముందు ఎన్నికలకు వెళ్తే అవి ముందస్తు ఎన్నికలు కావని కొత్త సూత్రీకరణలకు కూడా తెర తీసారు.     అంటే నవంబర్, డిసెంబర్ నెలల్లో ఆయన ఎన్నికలకు వెళ్లే యోచనలో ఉన్నట్లు వస్తున్న వార్తలు ని.మయ్యేలా ఉన్నాయి. అంతే కాదు... ఈ సెప్టెంబర్ నెలలోనే తమ అభ్యర్ధులను సైతం ప్రకటిస్తామని ముఖ్యమంత్రి కె.చంద్రశేఖర రావు ప్రకటించారు. తెలంగాణలో వంద స్థానాల్లో విజయం సాధిస్తామని, తిరిగి మళ్లీ తమదే అధికారమనే ధీమాను సైతం వ్యక్తం చేశారు.  ఈ ప్రకటనను ఆయన ఆత్మవిశ్వాసంగా చూడాలా... లేక అతి విశ్వాసంగా చూడాలో పరిశీలకులు లెక్కలు తీస్తున్నారు. ఆత్మ విశ్వాసంగా పరిగణించాలంటే కె.చంద్రశేఖర రావు గడచిన నాలుగేళ్లుగా చేపట్టిన పలు పథకాల అమలును బేరీజు వేయాలి. అలాగే ఆయన చేపట్టిన సంక్షేమ కార్యక్రమాలను కూడా పరిగణలోకి తీసుకోవాలి. రైతులకు ఇచ్చిన పెట్టుబడి పథకం, మహిళలకు ప్రకటించిన కెసీఆర్ కిట్, డబుల్ బెడ్ రూం ఇళ్లు, కల్యాణ లక్ష్మి వంటి పథకాలు ఆయన్ని తిరిగి అధికారంలో కూర్చోపెడతాయని అధికార పార్టీ అంచనా వేస్తోంది. అలాగే మిషన్ భగీరథ, చెరువులు పునరుద్ధరణ, నిరుద్యోగులకు ఉద్యోగ భద్రత వంటివి కూడా కలిసొచ్చే అంశాలుగానే వారు చూస్తున్నారు. అయితే ఇవన్నీ పైకి కనిపించే పథకాలే అయినా... వాటి వెనుక దాగి ఉన్న అవినీతి ప్రతిపక్షాలకు ఈ సారి ఎన్నికల ఆయుదం కానుంది.     ఇక కాంగ్రెస్ పార్టీ జాతీయ అధ్యక్షుడుగా ఎంపికైన తర్వాత రాహుల్ గాంధీ తెలంగాణకు తొలి సారి వచ్చారు. ఇక నుంచి ప్రతి నెలా ఇక్కడకు వస్తారని కాంగ్రెస్ పార్టీ నాయకులు ప్రకటించారు. హైదరాబాద్‌లో తన తొలి పర్యటన ప్రారంభించిన రాహుల్ గాంధీకి ఇక్కడ మంచి స్వాగతమే లభించిందని చెప్పాలి. ఈమధ్య ఆయన తన ప్రసంగాలలోనూ, లోక్‌సభలోనూ రాహుల్ గాంధీ పరిణితి చెందిన రాజకీయ నాయకుడిలా వ్యవహరించారు. కన్నుకొట్టడం వంటి చిలిపి పనులను మినహాయిస్తే ఏడాది క్రితం రాహుల్ గాంధీకీ... ఈనాటి రాహుల్ గాంధీకి మధ్య తేడాను స్పష్టంగా గమనించవచ్చు. ప్రధానమంత్రిని లోక్‌సభలో తన ప్రసంగం అనంతరం కౌగలించుకున్న రాహుల్ గాంధీ జాతీయ స్ధాయిలో అందరి చూపు తన వైపు తిప్పుకున్నారు. హైదరాబాద్ పర్యటనలో కూడా ఆయన చేసిన ప్రసంగం ఇక్కడి ఏలికలకు కాసింత ఇబ్బందుల పాలు చేసిందనే చెప్పాలి. అందుకే హడావుడిగా... అది కూడా రాహుల్ గాంధీ వచ్చిన రోజే తెలంగాణ రాష్ట్ర సమితి కార్యవర్గ సమావేశం ఏర్పాటు చేయడం అధికార పార్టీలో ఆందోళనను తెలియజేస్తున్నాయి. ఈసారి ఎన్నికల్లో ప్రధాన పాత్ర సెటిలర్లదే. వీరి మద్దతు ఎవరికి ఉంటుందో వారే అధికార పీఠాన్ని కైవసం చేసుకోవచ్చు. అందుకే అటు తెలంగాణ రాష్ట్ర సమితి, ఇటు కాంగ్రెస్ పార్టీ కూడా సెటిలర్లకు వరాల జల్లు కురిపిస్తున్నారు.     సెటిలర్లను ఆకర్షించేందుకు కాంగ్రెస్ పార్టీ కాసింత ముందుగానే స్పందించింది. విభజనతో తీవ్రంగా నష్టపోయిన ఆంధ్రప్రదేశ్‌కు తాము అధికారంలోకి రాగానే ప్రత్యేక హోదా ఇస్తామని ప్రకటించింది. ఈ ఆయుధాన్ని తెలంగాణలో సెటిల్ అయిన వారిపై ప్రయోగిస్తోంది తెలంగాణ కాంగ్రెస్. ఆంధ్రప్రదేశ్‌కు ప్రత్యేక హోదా ఇస్తే మాకూ ఇవ్వాలని ప్రకటించిన తెలంగాణ రాష్ట్ర సమితి సెటిలర్ల ఓట్లను అడిగే నైతిక హక్కును కోల్పోయింది. ఢిల్లీలోనూ, హైదరాబాద్ లోనూ కూడా టిఆర్ఎస్ నాయకులు ఆంధ్రప్రదేశ్‌కు ప్రత్యేక హోదా ఇస్తామన్నారంటే తెలంగాణకు అన్యాయం చేసినట్లే అని ప్రకటనలు  చేశారు. దీంతో సెటిలర్ల ఆలోచనలు మారే అవకాశం ఉంది. ఈ విషయాన్ని గమనించిన తెరాస అధినేత కె.చంద్రశేఖర రావు దిద్దుబాటు చర్యలకూ ఉపక్రమించారు. ఇందులో భాగంగా దశాబ్దాలుగా ఇక్కడ ఉన్న వారందరూ తెలంగాణ వాసులే అని ప్రకటించారు. అయితే, సెటిలర్లు ఆయన మాటలను నమ్ముతారో... లేక తమ బంధువులు, స్నేహితులు ఉన్న ఆంధ్రప్రదేశ్‌కు ప్రత్యేక హోదా ఇస్తామన్న కాంగ్రెస్‌ పార్టీకి విశ్వసిస్తారో వేచి చూడాలి. మొత్తానికి ఆరు నెలల ముందే తెలంగాణలో ఎన్నికల నగారా మోగనుందని మాత్రం తేటతెల్లం అయ్యింది.
కులం అడ్డుగోడల్ని కూలగొడదాం… ఇలాంటి మాటలు మేధావులు మొదలు మీడియా వాళ్ల దాకా అందరూ మాట్లాడతారు! కానీ, నిజంగా మన దేశంలో కుల నిర్మూలన ఉద్యమం పెద్దగా ఏం జరగటం లేదు. ప్రభుత్వం నుంచీ స్టార్ట్ సినిమాల దాకా అంతటా కులాన్ని పటిష్టం చేసే మాటలు, చర్యలే తప్ప మరొకటి కనిపించవు. అలాంటి కోవలో కుల రిజర్వేషన్లు కూడా వస్తాయి. అసలు కులం ఆధారంగా ఇంకా రిజర్వేషన్లు అవసరమా? అవసరమే అయినా కూడా ఇంకెంత కాలం వరకూ? ఇలాంటి మౌలికమైన ప్రశ్నలు చర్చకు రావాల్సిన సమయంలో దేశ వ్యాప్తంగా కొత్త కొత్త కులాలు తమకూ రిజర్వేషన్లు కావాలంటూ బరిలోకి దిగుతున్నాయి. రాజకీయ నేతలు కూడా తమ ఓట్ల లావాదేవీల్లో భాగంగా వాట్ని వెన్నుతట్టి ప్రొత్సహిస్తున్నారు. కులం అంటే అధికార పక్షాలు భయపడతాయి. ప్రతిపక్షం గజగజ వణికిపోతుంది. కులంతో పెట్టుకునే మోధుడంటూ ఎవరూ లేకుండాపోయారు!     కేంద్రంలో వున్న బీజేపీ నిజానికి ఒకప్పుడు కుల రిజర్వేషన్లకు వ్యతిరేకం. ఆరెస్సెస్ అయితే బాహాటంగానే రిజర్వేషన్లపై రివ్యూ జరగాలనేది. కానీ, పూర్తి మెజార్టీతో తొలిసారి మోదీ ప్రభుత్వం గద్దెనెక్కాక ఒక్కసారిగా స్వరం మారిపోయింది! స్వయంగా ప్రధానే తన తాజా ఇంటర్వ్యూలో… కుల రిజర్వేషన్లు ఇంకా చాలా కాలం భద్రంగా వుండబోతున్నాయని తేల్చి చెప్పారు! మరోవైపు బీజేపీకే చెందిన నితిన్ గడ్కరీ మరాఠా ప్రజల రిజర్వేషన్ ఉద్యమంపై స్పందిస్తూ … అసలు గవర్నమెంట్ ఉద్యోగాలు ఎక్కుడున్నాయని ఎదురు ప్రశ్నవేశారు! అంటే… రిజర్వేషన్ల గోలంతా ఓట్ల మాయాజాలమే తప్ప నిజంగా రిజర్వేషన్లు వున్న వాడికీ, లేని వాడికి, ఎవరికీ అవతల ఉద్యోగాలు లేవన్నమాట! ఇంత మాత్రం దానికి జనాన్ని పొలిటీషన్స్ జనాన్ని రెచ్చగొట్టి పబ్బం గడుపుకోవటం దేనికి?     జాతీయ స్థాయి నుంచీ రాష్ట్ర స్థాయికొస్తే… ఏపీలో కాపు రిజర్వేషన్ల వివాదం కాక రేపుతోంది. అసలు కాపులకి బీసీ స్టేటస్ ఇవ్వాలా? వద్దా? ఇస్తే ఎలా ఇవ్వాలి? ఇవ్వకపోతే కాపు సోదరుల డిమాండ్లు మరో మార్గంలో ఎలా పరిష్కరించాలి? ఇవీ చర్చించాల్సిన ప్రశ్నలు! కానీ, వాటికి బదులు రాజకీయ డ్రామా నడుస్తోంది. చంద్రబాబు ఒకవైపు ఇచ్చిన మాట ప్రకారం అసెంబ్లీలో తీర్మానం చేయించేశారు. బంతి కేంద్రం కోర్టులోకి తోశారు. కాపులకి రిజర్వేషన్లు ఇప్పుడు మోదీ సర్కార్ చేతిలో వున్నాయి! మరి దిల్లీ ప్రభుత్వం అంగీకరిస్తుందా? వాళ్లు సుప్రీమ్ రూల్స్ అంటూ నెపాన్ని అత్యున్నత న్యాయస్థానంపై నెట్టేస్తారు! అలా కాపుల రిజర్వేషన్ కోరికని కోల్డ్ స్టోరేజ్ లో పెట్టేస్తారు!     కేంద్ర , రాష్ట్ర అధికార పక్షాలు కాపుల రిజర్వేషన్లపై తాత్సారం చేస్తుండటంతో జగన్, పవన్ లాంటి నేతలు కాపుల వివాదంతో చలి కాచుకునే ప్రయత్నం చేస్తున్నారు. అయితే, అందులోనూ క్లారిటీ లేదు. రోజుకో మాట మాట్లాడుతుంటారు. కులాల గురించి పెద్దగా మాట్లాడని జనసేనానికి అదేదో 9వ షెడ్యూల్ అనే మాట వాడి ఒక కామెంట్ చేసేశారు. ఆ మార్గంలో ఎప్పటికి కాపులకు రిజర్వేషన్లు లభిస్తాయి? దేవుడికే తెలియాలి! ఇక జగన్ దైతే మరీ పెద్ద డైలామా! ఆయన ఓ రోజు నా చేతుల్లో ఏం లేదు అంటారు. అంతా కేంద్రం చేయాల్సిందే అంటూ కుండ బద్ధలు కొడతారు. తెల్లారే సరికి కాపు ఓట్లు మొత్తానికి మొత్తంగా తుడిచి పెట్టుకుపోతాయని గ్రహించి యూటర్న్ తీసుకుంటారు. కాపులకు బీసీ హోదా విషయంలో నేను రెడీనే… కాకపోతే చంద్రబాబు కంటే రెట్టింపు నిధులు కాపు కార్పొరేషన్ కు కేటాయిస్తా అంటూ చెబుతారు!     జగన్ రోజుకో మాట మాట్లాడుతుండటంతో కాపు ఉద్యమ నేత ముద్రగడ కూడా ఆయనకు రివర్స్ అయ్యారు. జగన్ తమకు పదివేల కోట్లు ఇవ్వటం కాదు మేమే ఇరవై వేల కోట్లు ఆయనకు ఇస్తాం. సీఎంగా కాపు కులస్థుడ్ని కూర్చోబెట్టండని సవాల్ విసిరారు! మొత్తంగా ఈ వివాదం జగన్ సెల్ఫ్ గోల్స్ లో అతి పెద్దదిగా మారింది. ఆయన చేసిన ఒక్క వ్యాఖ్య ఇప్పుడు కాపు ఓటర్లని, కాపు నాయకుల్ని ఇద్దర్నీ జగన్ కు దూరం చేస్తోంది. అదే సమయంలో తమ కులానికే చెందిన పవన్ కళ్యాణ్ ఈసారి ఎన్నికల్లో పూర్తి స్థాయి రాజకీయ నేతగా అవతరించనున్నాడు కాబట్టి కాపులు ఆయన వైపు వెళ్లే అవకాశాలు కూడా పుష్కలంగా కనిపిస్తున్నాయి. వాళ్లు జనసేన వైపు వెళ్లినా, టీడీపీ వైపు మళ్లినా… నష్టం మాత్రం కాబోయే సీఎంని అనుకుంటున్న జగన్ కే! కాపు రిజర్వేషన్ల విషయంలో నోరు జారిన జగన్ ఇప్పుడు ఎంత ఇబ్బంది పడుతున్నారో చూస్తే… మన దేశ తలపండిన పొలిటీషన్ప్ ఎవ్వరూ , ఎందుకు రిజర్వేషన్ల కొరివితో తలగొక్కోరో స్పష్టంగా అర్థమవుతుంది. కానీ, కుల ఉద్యమాలు, కుల రిజర్వేషన్ల విషయంలో తేరుకోవాల్సింది జనమే! ఎందుకంటే అన్ని పోరాటాల తరువాత లాభపడేది ఏదో ఒక రాజకీయ పక్షమే తప్ప నిజమైన నిరుపేద జనం కాదు! ఎందుకంటే, రిజర్వేషన్ ఆధారంగా ఇవ్వబోయే ఉద్యోగాలు అంటూ ప్రస్తుత ప్రైవేటీకరణ ప్రపంచంలో పెద్దగా లేవనే చెప్పాలి!
దేశంలో రాజకీయాలు రసకందాయంలో పడ్డాయి. జాతీయ స్ధాయిలోనే కాదు... రాష్ట్రాల్లో కూడా రాజకీయాలు రోజురోజుకూ కొత్త మలుపులు తీసుకుంటున్నాయి. ఉత్తరాదిలో ఒకలాంటి రాజకీయాలు జరుగుతూంటే... దక్షిణాదిలో మరో విధంగా రాజకీయాలున్నాయి. దక్షిణాదిలోని తెలుగు రాష్ట్రాల్లో మరీ ప్రత్యేకంగా ఉన్నాయి రాజకీయాలు. అవునంటే కాదనిలే... కాదంటే అవుననిలే అన్నట్లుగా రాజకీయాల రూపము, స్వరూపమూ రెండూ పూర్తి స్ధాయిలో మారిపోతున్నాయి. ఈ రోజు ఉన్న రాజకీయాలు రేపు ఉండడం లేదు. నిన్న జరిగిన రాజకీయాలు రేపు ఎలా ఉంటాయో తెలియడం లేదు. అంతా చిందర వందర గందరగోళంగా మారుతున్నాయి. నిన్నటి వరకూ ముందస్తుకు వెళ్దామా... వద్దా అని సంశయంలో ఉన్న తెలంగాణ రాష్ట్ర సమితి అధ్యక్షుడు, తెలంగాణ ముఖ్యమంత్రి కె.చంద్రశేఖర రావు తాజాగా ముందస్తుకు వెళ్లిపోవాలని నిర్ణయించేసుకున్నారు. వారం రోజుల క్రితం ఢిల్లీ వెళ్లి ప్రధాన మంత్రి నరేంద్ర మోదీని, వివిధ శాఖల కేంద్ర మంత్రులను కలుసుకున్న కె.చంద్రశేఖరావు అక్కడి నుంచి వచ్చిన వెంటనే చకచకా పావులు కదపుతున్నారు. ముందస్తుకు వెళ్లిపోదాం.... అందరూ సిద్ధంగా ఉండండి అంటూ పార్టీ శ్రేణులకు పిలుపు కూడా ఇస్తున్నారు. ముందస్తుకు వెళ్లాలన్న ప్రధానమంత్రి నరేంద్ర మోదీ ఆలోచనకు ఇక్కడ ముఖ్యమంత్రి కె.చంద్రశేఖర రావు ముందుగా తలుపులు తీస్తున్నారు. అంతే కాదు.... ఎన్నాళ్ల నుంచో దేశవ్యాప్తంగా రాజకీయ వర్గాల నాలుకలపై నానుతున్న జమిలి ఎన్నికలకు కూడా ఇదే మంచి సమయం అని సంకేతాలు ఇస్తున్నారు. మరోవైపు ప్రధానమంత్రి నరేంద్ర మోదీ కూడా ముందస్తు ఎన్నికలకు వెళ్లేందుకు తన వంతు ప్రయత్నాలను రోజురోజుకు తీవ్రం చేస్తున్నారు.     ఇందుకోసం తన మిత్ర పక్షాలను ముందుగా ముందుకు తోస్తున్నారు. అందులో భాగమే తెలంగాణ ముఖ్యమంత్రి కె.చంద్రశేఖర రావు ముందస్తు పచ్చ జెండా ఊపుతున్నారు. తెలంగాణ ముఖ్యమంత్రి ఈ ముందస్తు వెనుక ప్రధానమంత్రి నరేంద్ర మోదీ ఉన్నారనే విషయం ప్రతిపక్షాలకు... ముఖ్యంగా ఆంధ్రప్రదేశ్ ముఖ్యమంత్రి నారా చంద్రబాబు నాయుడికి తెలియజేయడమే ఈ ఇద్దరు నాయకుల వెనుక ఉన్న బహిరంగ రహస్యం. భారతీయ జనతా పార్టీకి, తెలంగాణ రాష్ట్ర సమతికి ఉన్న స్నేహం ఎంత గాఢమైనదో ఈమధ్య జరిగిన రాజ్యసభ  ఉపాధ్యక్ష ఎన్నికే బహిర్గతం చేసింది. ఈ స్నేహం ఇప్పుడు వికసించి ముందస్తుకు ముహూర్తం నిర్ణయించింది. ప్రధానమంత్రి నరేంద్రమోదీ, తెలంగాణ ముఖ్యమంత్రి కె.చంద్రశేఖర రావుల ముందస్తు మాయాజాలంలో పడేది లేదని ఆంధ్రప్రదేశ్ ముఖ్యమంత్రి నారా చంద్రబాబు నాయుడు భీష్మించుకున్నారు. అంతే కాదు... లోక్‌సభ, శాసనసభలకు ఒకేసారి నిర్వహిద్దామనుకున్న జమిలి ఎన్నికలకు కూడా ఆయన ససేమిరా అంటున్నారు. దీని వెనుక భారతీయ జనతా పార్టీ కుట్ర ఉందన్నది చంద్రబాబు నాయుడి ఆలోచన. జమిలి ఎన్నికలకు వెళ్లడం వల్ల కేంద్రంలో అధికారంలో ఉన్న వారికి కలిసి వస్తుందన్నది చంద్రబాబు నాయుడి నమ్మకం. ఇంతకు ముందు ఒక్క కాంగ్రెస్ పార్టీ అధికారంలో ఉన్నప్పుడు తప్ప మిగిలిన అన్ని సమయాల్లోనూ చంద్రబాబు నాయుడికి పెద్దగా ఇబ్బంది కలగలేదు. ఈ సారి మాత్రం తనను నమ్మించి నట్టేట ముంచిన భారతీయ జనతా పార్టీకి కేంద్రంలోనే కాదు... ఏ రాష్ట్రంలోనూ కూడా మేలు జరగరాదన్నది చంద్రబాబు నాయుడి ఆలోచన. భారతీయ జనతా పార్టీ కారణంగా తాను ఆంధ్రప్రదేశ్ ప్రజలలో చులకనయ్యానని, వారి మోసం తాను తెలుసుకోలేకపోయానని చంద్రబాబు నాయుడు ఆవేదన చెందుతున్నారు.      కేంద్ర ప్రభుత్వం... ముఖ్యంగా ప్రధాని నరేంద్రమోదీ, భారతీయ జనతా పార్టీ అధ్యక్షుడు అమిత్ షాలను ఎదుర్కొనేందుకు.... వారిని ఢీకొట్టేందుకు చంద్రబాబు నాయుడు జమిలి ఎన్నికల జరగొద్దు అని జాతీయ స్ధాయిలో ప్రచారం చేస్తున్నారు. ఇందుకోసం తనతో కలిసి వచ్చే పార్టీలతో జత కట్టాలని నిర్ణయించుకున్నారు. ఇందుకు తెలుగుదేశం పార్టీకి బద్ద శత్రువైన కాంగ్రెస్ పార్టీ కూడా మినహాయింపు కాదు. జమిలి ఎన్నికలకు ఏ పార్టీ కూడా తమ మద్దతు ఇవ్వకుండా చంద్రబాబు నాయుడు చక్రం తిప్పే అవకాశం ఉంది. ఇందుకోసం ఆయన జాతీయ స్ధాయిలో అన్ని పార్టీలతోనూ సమావేశాలు నిర్వహించే అవకాశమూ ఉంది. ముఖ్యంగా కర్నాటకలోని జెడీయు, త్రణమూల్ కాంగ్రెస్, శివసేనలతో పాటు వామపక్ష పార్టీలతో కలిసి చంద్రబాబు నాయుడు జాతీయ స్ధాయిలో జమిలి వ్యతిరేక పోరాటం చేసే అవకాశమూ లేకపోలేదు. మొత్తానికి తెలుగు రాష్ట్రాల ముఖ్యమంత్రులు ఒకరు ముందస్తుతో పాటు జమిలి ఎన్నికలకు... మరొకరు ముందు లేదు... జమిలి ఎన్నికలు అంత కంటే లేవూ అని అంటున్నారు. ఈ రెంటిలో ఏది జరిగినా తెలుగు రాష్ట్రాలు ఓడిపోయి భారతీయ జనతా పార్టీ గెలిచినట్లే. ఎందుకంటే వీరిద్దరి మధ్య చిచ్చు పెట్టి లాభపడాలనుకుంటున్న జాతీయ పార్టీల వాంఛ తీరుతుంది. ఎటొచ్చి ఈ విషయమై తెలుగు రాష్ట్రాల ముఖ్యమంత్రులకు అర్ధం కావడం లేదు. పిట్ట పోరు... పిట్ట పోరు పిల్లి తీర్చినట్లు అన్న చందంగా ఉంది పరిస్ధితి.  
రాజకీయాల్లో బాగా రాటుదేలిన నేతలు రెండు వ్యూహాలు అమలు చేస్తుంటారు! ప్లాన్ A… ఇది ఏంటంటే… తమ మీద ఆరోపణలు వచ్చినప్పుడు ఎదురు దాడి చేయటం! ఇక ప్లాన్ B… దీంట్లో భాగంగా తమ మీద వచ్చిన ఆరోపణ గురించి అస్సలు మాట్లాడరు! కాకపోతే, మరో దారిలో ఆరోపణలు ఎదుర్కొంటోన్న తామే బాధితులమని ప్రచారం చేసుకుంటారు. తమకు ఓటు వేసే ఆలోచనలో వున్నవార్ని మరింతగా ఒడిసి పట్టుకునేలా సానుభూతి సంపాదించుకుంటూ వుంటారు! ఇదంతా చెప్పుకోటానికి కారణం… జగన్!     జగన్ ఏనాటికైనా ఏపీ ముఖ్యమంత్రి అవ్వొచ్చు. కానీ, అదెప్పుడో ఎవరూ చెప్పలేని పరిస్థితి. అందుక్కారణం ఆయన మీద వున్న తీవ్రమైన ఆర్దిక అభియోగాలే! ఏ క్షణాన జైలుకి వెళతారో తెలియని పరిస్థితి. మరోవైపు ఏ జిల్లాలో ఎన్ని వందల కిలో మీటర్ల దూరంలో పాదయాత్రలో వున్నా ఆయన ప్రతీ శుక్రవారం కోర్టుకు వచ్చి వెళుతుంటారు. ఇలాంటి సంకట స్థితి మరే రాజకీయ నేతకు ప్రస్తుతం లేదు. మరీ ముఖ్యంగా, ఒక రాష్ట్ర ప్రధాన ప్రతిపక్ష నేత ప్రతీ వారం కోర్టుకు హాజరు కావటం కూడా దేశంలో ఎక్కడా లేదు. మరి ఇలాంటి జగన్ని ఓటర్లు ఎందుకు నమ్మాలి? దీని వల్లే ఆయనను అభిమానించే వాళ్లు ఎంతగా ఓట్లు వేసినా చంద్రబాబు సీఎం అయ్యారు గత ఎన్నికల్లో! అవినీతిని, అనుభవాన్ని రెండిట్నీ దృష్టిలో పెట్టుకునే ఓటర్లు జగన్ ను ప్రతిపక్షానికి పరిమితం చేశారు!     2014 పోతే పోయింది 2019 నాదే అనుకుంటున్న జగన్ వీలు చిక్కినప్పుడల్లా ప్లాన్ బీ అమలు చేస్తున్నారు. అంటే… సానుభూతి ఫార్ములా అన్నమాట! తండ్రి వైఎస్ మరణించాక నెలలు,సంవత్సరాల తరబడి ఓదార్పు యాత్ర చేసిన జగన్ ఇప్పుడు పాదయాత్ర చేస్తున్నారు. అంతలోనే ఈడీ ఆయనకు షాకిస్తూ భార్య భారతీ పేరును కూడా ఛార్జ్ షీట్ లో దాఖలు చేసింది! అదే విషయం మీడియాలో వచ్చింది. వెంటనే జగన్ అసలు పక్కన పెట్టి కొసరు మీద దృష్టి పెట్టారు. భారతి పేరు కూడా ఛార్జ్ షిట్ లో ఎందుకు చేరింది? ఆమెకు జగన్ అవినీతితో సంబంధం వుందా? అసలు తన భార్య పేరు ఛార్జ్ షిట్లో వుందనే వార్త నిజం కాదా? మీడియా చెప్పిందంతా అబద్ధమేనా? … ఇలాంటి విషయాలేవీ వైసీపీ అధినేత మాట్లాడలేదు. తెలివిగా ‘’నా భార్యని కూడా టార్గెట్ చేశారు’’ అంటూ సింపతీ యాంగిల్ తీసుకొచ్చారు!     కొన్ని రోజుల క్రితం పవన్ కళ్యాణ్ మూడు పెళ్లిల్లు చేసుకున్నాడు అంటూ స్వయంగా జగనే వ్యక్తిగత విమర్శలు చేశారు! ఇప్పుడు మాత్రం మీడియా తన భార్యని అనవసరంగా వివాదంలోకి లాగుతోందని బాధపడిపోయారు! వ్యక్తిగత దాడి తాము చేస్తే ఒక న్యాయం... ఎదుటి వారు చేస్తే మరో తర్కం! ఇదీ వరస! అసలింతకీ మీడియా చెప్పింది కరెక్టా? తప్పా? జగన్ ఎదుర్కొంటోన్న అవినీతి ఆరోపణల్లో భారతికి ప్రమేయం వుందని ఈడీ భావిస్తోందా? లేదా? వీటికి జగన్ వద్ద సమాధానం లేదు! ఆయన చెప్పుకొచ్చే ఏకైక పాయింట్… ‘’ నా భార్య పేరు ఛార్జిషీట్లో వుందని మీడియాకు ఎలా తెలిసింది? ‘’ ఇదొక్కటే!     జగన్ తన భార్య గురించి వస్తోన్న వార్తల్ని ఖండించకుండా కేవలం మీడియాను అనుమానించటం, అలాగే, తన కుటుంబాన్ని రోడ్డుకీడుస్తున్నారని వాపోవటం చూస్తుంటే… సానుభూతి కోణం తప్ప మరేదీ కనిపించటం లేదు. అయితే, జగన్ అమలు చేసిన ప్లాన్ బీ ఎంత వరకూ రిజల్ట్స్ ఇస్తుంది? ఎన్నికలు వస్తేగానీ తెలియదు. గతంలో వైఎస్ మరణించిన అనంతరం వెల్లువెత్తిన సానుభూతి తనని సీఎం చేస్తుందని జగన్ బలంగానే భావించారు. కానీ, అలా జరగలేదు. మరి ఇప్పుడు ఏమవుతుందో…
భారత రాజకీయ వ్యవస్థలో నేరగాళ్ల నిరోధాన్ని దేశ అత్యున్నత న్యాయస్థానం కట్టడి చేయనుందా..?. దేశ రాజకీయ వ్యవస్థలో  నానాటికి పెరుగుతున్న నేరగాళ్ల ప్రమేయం సుప్రీం చొరవతో తగ్గనుందా...? దేశంలోని జాతీయ, ప్రాంతీయ పార్టీలలో రౌడీలు, గుండాలు, వివిధ కేసుల్లో కీలకమైన నేరగాళ్లుగా నమోదైన వారు చట్ట సభలలో ఠీవిగా కూర్చుంటున్నారు. ప్రజలకు సంబంధించిన పలు కీలక చట్టాలకు వారు ఆమోద ముద్ర వేస్తున్నారు. ఇది దేశానికి అంత మంచిది కాదు. నేరాలూ, ఘోరాలు వివిధ కుంభకోణాలతో సంబంధం ఉన్నవారు, మహిళలపై అత్యాచారలు చేసిన వారు, భార్యల, బంధువులను హత్య చేసిన కేసులలో ఉన్నవారు చట్ట సభలకు ఎన్నికవుతున్నారు. వారి ప్రభావంతో కీలకమైన బిల్లుల పాస్ అవుతున్నాయి. అంతే కాదు నేరగాళ్లకు కఠిన శిక్షలు వేసేందుకు రూపొందించిన బిల్లులకు సభలలోకొన్ని ఆమోదం పొందడంలేదు.      ఇది దేశానికి క్షేమకరం కాదు. 2014 సంవత్సరం లెక్కల ప్రకారం శాసన కర్తలలో దాదాపు 34 శాతం మందికి నేర చరిత్ర ఉందని వెల్లడయింది. గడచిన నాలుగేళ్లలో ఈ సంఖ్య దాదాపు 10 శాతం పెరిగిందని ఓ అంచన. తెలుగు రాష్ట్రాలైన తెలంగాణ‌, ఆంధ్రప్రదేశ్, బిహార్, ప‌శ్చిమ బెంగాల్, మ‌హారాష్ట్ర, త‌మిళ‌నాడు, ఉత్తర‌ప్రదేశ్ స‌హా ప‌లు రాష్ట్రాల నుంచి నేర చ‌రిత్ర ఉన్న వారు ప్రజాప్రతినిధులుగా ఎన్నికవుతున్నారు. ఇది ఆయా రాష్ట్రాల ప్రజ‌ల‌ను క‌ల‌వ‌ర‌పెడుతోంది. పార్లమెంటు, శాసన సభలలో నానాటికి పెరిగిపోతున్న నేరగాళ్లను నిరోదించాలంటూ పబ్లిక్‌ ఇంట్రేస్ట్ ఫౌండేషన్ సంస్థ సుప్రీం కోర్టులో వ్యాజ్యం వేసింది. దీనిపై ప్రారంభమైన విచారణలో ప్రధాన న్యాయమూర్తి జస్టిస్ దీపక్ మిశ్రా ఆధ్వర్యంలో జస్టిస్ ఆర్.ఎఫ్. నారీమన్, జస్టిస్ ఏ.ఎం. ఖన్విల్కర్, జస్టిస్ డి.వై. చంద్రచూడ్, జస్టిస్ ఇందు మల్హోత్రాలతో కూడిన ఐదుగురు సభ్యుల రాజ్యాంగ‌ ధర్మాసనం ఈ విచారణను చేపట్టింది. భారత దేశ న్యాయ, రాజకీయ చరిత్రలో ఇది ఓ మైలురాయి. ప్రభుత్వ న్యాయ‌వాదుల‌కు, సుప్రీంకోర్టు న్యాయ‌మూర్తుల‌కు మ‌ధ్య ఆస‌క్తిక‌ర‌మైన చ‌ర్చ జ‌రిగింది.     ఈ సంద‌ర్భంగా సుప్రీంకోర్టు న్యాయ‌మూర్తులు చేసిన వ్యాఖ్యలు కొన్నిదేశ రాజ‌కీయ ప‌రిస్థితుల‌కు అద్దం ప‌డుతున్నాయి. దేశ రాజ‌కీయ వ్యవ‌స్ధలో నేర చ‌రిత్ర ఉన్న వారి జోక్యం పెర‌గ‌రాద‌ని సుప్రీంకోర్టు న్యాయ‌మూర్తులు అన్నారు. దీనిపై వారు ఆందోళ‌న వ్యక్తం చేశారు. దేశంలో ఇంతవరకూ రాజకీయాలకు న్యాయస్థానాలకు మధ్య ఎప్పుడూ ఇంతటి వైరం లేదు. ఈ వ్యాజ్యంపై సుప్రీం కోర్టు చేసిన వ్యాఖ్యలు దేశ రాజకీయ వ్యవస్థకు మచ్చుతునకలు. దేశంలో రాజకీయ వ్యవస్థ నేరపూరితం కాకూడదంటూనే పార్లమెంటు, న్యాయవ్యవస్థల మధ్య ఓ లక్ష్మణరేఖ ఉందని, దాన్ని ఇరువురూ దాటకూడదని సుప్రీం పేర్కొంది. ఈ వ్యాఖ్యలను ఆషామాషీగా చూడకూడదు. అలాగే కేంద్ర ప్రభుత్వం, సుప్రీం కోర్టుల మధ్య వివాదంగానూ  పరిగణించరాదు. గత కొంతకాలంగా కేంద్రం, సుప్రీం ఉప్పూ, నిప్పుగా ఉన్నాయి. రాజకీయాలలో నేరచరితుల పాత్రపై ఈ రెండు వ్యవస్థలు ఒకరిపై ఒకరు మండిపడుతున్నారు. ఈ సందర్భంలో సుప్రీం రాజకీయ వ్యవస్థపై చేసిన వ్యాఖ్యలు రాజకీయ నాయకులను కలవర పెడతాయి. అయితే సుప్రీం కనబరచిన తీరును మాత్రం దేశ ప్రజలు హర్షిస్తారు. చట్టసభలలో ప్రజలకు ఉపయోగపడే చట్టాలను చేయడంలో నేరగాళ్ల పాత్ర లేకుండా చేసేందుకు సుప్రీం వ్యక్తం చేసిన అభిప్రాయాలు కొంత వరకూ దోహదపడతాయి. ఇది భారత రాజకీయ వ్యవస్థకు శుభ పరిణామం. భవిష‌్యత్తులో రాజకీయ వ్యవస్థ మరింత బాగుపడడానికి శుభశూచకం. దేశంలో అత్యున్నత న్యాయస్థానం వ్యవహరించిన తీరు సదా అభినందనీయం. దేశానికి ముందు ముందు మంచిరోజులు వస్తాయనడానికి ఓ నిదర్శనం.
రాఫెల్ యుద్ధ విమానాల కొనుగోలు వివాదం నానాటికీ రాజకుంటోంది. గత పార్లమెంట్ సమావేశాల్లో ఉభయ సభలను కుదిపేసిన రాఫెల్ యుద్ధ విమానాల కొనుగోలు వ్యవహారం తాజాగా భారతీయ జనతా పార్టీ మాజీ నాయకుల నుంచి విమర్శలకు దారి తీసింది. దీంతో భారతీయ జనతా పార్టీ పరిస్ధితి కుడితిలో పడ్డ ఎలుకలా మారింది. లోక్‌సభలోను, రాజ్యసభలోనూ  భారతీయ జనతా పార్టీని... ముఖ్యంగా ప్రధానమంత్రి నరేంద్ర మోదీ, రక్షణ శాఖ మంత్రి, తెలుగు వారి కోడలు నిర్మలా సీతారామన్ మెడకు చుట్టుకుంది. ఇన్నాళ్లూ ప్రతిపక్షాలు...ముఖ్యంగా కాంగ్రెస్ అధ్యక్షుడు రాహుల్ గాంధీ మాత్రమే రాఫెల్ యుద్ధ విమానాల కొనుగోలుపై విరుచుకుపడ్డారు.   దీంతో ఈ అంశంపై దేశవ్యాప్తంగా అందరూ ఈ కుంభకోణంలో ఏమీ లేదని, ప్రతిపక్షాలు చేస్తున్న అనవసర వివాదమనే భావించాలరు. అయితే తాజాగా భారతీయ జనతా పార్టీ సీనియర్ నాయకులు, వాజపేయి ప్రభుత్వంలో  మంత్రులుగా చేసిన యశ్వంత్ సిన్హా, అరుణ్ శౌరి రాఫెల్ యుద్ధ విమానాల కొనుగోలులో  పెద్ద కుంభకోణమే జరిగిందంటూ రోడెక్కారు.  దీంతో బిజెపి ప్రభుత్వం రక్షణలో పడింది. మరో ముఖ్యంగా రాజీవ్ గాంధీ ప్రభుత్వ హయాంలో బోఫోర్స్ కుంభకోణాన్ని వెలికి తీసి జాతీయ స్థాయిలో ఆ మాటకొస్తే అంతర్జాతీయ స్ధాయిలో పేరు తెచ్చుకున్న సీనియర్ జర్నలిస్టు అరుణ్ శౌరీ ఈ రాఫెల్ ఉదంతంపై పెదవి విప్పడంతో జాతీయ స్ధాయిలో అందరి చూపు రాఫెల్ వైపు మళ్లింది. అరుణ్ శౌరి అయితే ఈ రాఫెల్ యుద్ధ విమానాల కొనుగోలు వ్యవహారం బోఫోర్స్ కంటే చాలా పెద్ద కుంభకోణమని తేల్చారు.   ఈ ఇద్దరు సీనియర్ నేతలు ఏకంగా ప్రధాని నరేంద్ర మోదీయే ఈ రాఫెల్ కుంభకోణానికి సూత్రధారి అని నిప్పులు చెరిగారు. ఈ కుంభకోణం నుంచి బయటపడేందుకు ప్రధానమంత్రి వ్యవహరించిన తీరు పలు అనుమానాలకు దారి తీస్తోందని వారిద్దరు ఆరోసిస్తున్నారు. అయితే వాస్తవాలు కూడా వారి వాదనకే బలాన్ని చేకూరుస్తున్నాయి. ముఖ్యంగా రక్షణ శాఖ మంత్రి, తెలుగు వారి కోడలు నిర్మలా సీతారామన్ మార్చి మార్చి చేస్తున్న ప్రకటనలు కూడా రాఫెల్ యుద్ధ విమానాల కొనుగోలు అంశంపై అనుమానాలు రెకెత్తిస్తోంది. ఇంతకు ముందు చేసుకున్న విమానాల కొనుగోలు ఒప్పందాన్ని ఎందుకు రద్దు చేసుకున్నారన్నది అందరినీ దొలుస్తున్న ప్రశ్న. ఇలా చేయాలని వైమానిక దళం ప్రభుత్వాన్ని కోరిందా. అలా అయితే సంబంధిత పత్రాలు ఏమయ్యాయి అన్నది ప్రధాన ప్రశ్న. వేల కోట్ల రూపాయల ఒప్పందానికి చెందిన పత్రాలు అన్నీ ప్రభుత్వం దగ్గర జాగ్రత్తగా ఉండాలి కదా... అన్నది మౌలిక ప్రశ్న. పాత ఒప్పందాల రద్దు అనంతరం కొత్త ఒప్పందాలను వైమానిక దళం పరిశీలించిందా...? లేక ఆర్ధిక లబ్ది కోసం ప్రభుత్వమే ఈ ఒప్పందాలను మార్చిందా...? అన్నది మరో ప్రధాన ప్రశ్న. ఒకవేళ రెండోదే జరిగితే దీనికి పూర్తి బాధ్యత నరేంద్రమోదీ, రక్షణమంత్రి నిర్మాల సీతారామన్‌లదే అవుతుంది. తమకు ఎలాంటి విమానాలు కావాలో... వాటి నాణ్యత, ధర వంటివి నిర్ణయించాల్సింది రక్షణ శాఖే. వారిని సంప్రదించకుండా ఈ రాఫెల్ యుద్ధ విమానాల కొనుగోలు వ్యవహారం నడిచిందంటే ఇందులో ప్రభుత్వ పాత్ర ఉన్నట్లుగానే భావించాలి.     రాఫెల్ యుద్ధ విమానాల తొలి కొనుగోలు ఒప్పందాన్ని రద్దు చేసుకున్న తర్వాత ప్రభుత్వం మళ్లీ మరోసారి కొనుగోలు చేయడానికి టెండర్లు పిలవాలి కదా... ? కాని ప్రభుత్వం అలా ఎందుకు చేయలేదన్నది దేశమంతా అడుగుతున్న ప్రశ్న. దీనికి ప్రధాని, రక్షణ మంత్రి సమాధానం చెప్పాల్సి ఉంది. కుంభకోణంలో ప్రధాన అంశం ఈ కాంట్రాక్ట్‌ను రక్షణ వ్యవహారాలు, యుద్ధ విమానాల కొనుగోలు అంశాలపై కనీస అనుభవం కూడా లేని అనీల్ అంబానీ సంస్ధకు అప్పగించడం కూడా వివాదమవుతోంది. ఇది దేశ ప్రజలను దిగ్బ్రాంతికి గురి చేస్తున్న వ్యవహారంగా మారింది. ఎన్నికలు సమీపిస్తున్న తరుణంలో ప్రభుత్వం ఈ యుద్ధ విమానాల కొనుగోలు వ్యవహారంలో అడ్డంగా దొరికిపోయే అవకాశాలే ఎక్కువగా కనిపిస్తున్నాయి. ఈ కుంభకోణం గురించి ముందే ప్రధాన మంత్రి ఊహించి ప్రభుత్వ రక్షణ కోసం కీలకమైన రక్షణ శాఖకు మహిళను మంత్రిని చేశారా... ? అనే అనుమానాలు వస్తున్నాయి. ఇప్పటికే యుద్ధ విమానాలకు సంబంధించిన డబ్బు చేతులు మారిందంటున్నారు. అదే జరిగితే విమానాలు ఇంకా ఎందుకు రాలేదన్నది కూడా పెద్ద ప్రశ్న.     ఈ 36 విమానాలు ఒప్పందం కుదిరిన రెండేళ్లలో వస్తాయని అప్పట్లో చెప్పిన ప్రభుత్వం ఇప్పటి వరకూ ఒక్క విమానం కూడా భారత్‌కు చేరకపోవడానికి ఏమని సమాధానం చెప్తారు. ప్రధానమంత్రి నరేంద్ర మోదీని, భారతీయ జనతా పార్టీని ఏ విషయంలోనూ ఇరుకున్న పెట్టలేకపోతున్న ప్రతిపక్షాలకు ఈ రాఫెల్ విమానాల కొనుగోలు వ్యవహారం పెద్ద ఆయుధమనే చెప్పాలి. ఈ ఆయుధంతోనే రాబో‍యే ఎన్నికల్లో ప్రతిపక్షాలు... మరీ ముఖ్యంగా కాంగ్రెస్ పార్టీ భారతీయ జనతా పార్టీని ఎదుర్కోనుంది. చూడాలి.. రానున్న ఏడాది కాలంలో ఇంకెన్ని కుంభకోణాలు బయట పడతాయో...? బయటపడిన కుంభకోణాలు ఎలా తెరమరుగవుతాయో....? తేలాలంటే మరో ఏడాది ఆగాల్సిందే....  
  ఫుడ్‌ని ఎంజాయ్‌ చేయాలని ఎవరికి మాత్రం ఉండదు. కానీ ఎప్పుడూ అదే ఫుడ్‌ అంటే బోర్‌ కొట్టక మానదు. అలాగని ప్రతిసారీ కొత్తరకం ఫుడ్‌ని ట్రై చేయలేం కదా! అందుకనే ఓ చిట్కా కనిపెట్టారు పరిశోధకులు. తినే ఆహారాన్ని మార్చలేకపోవచ్చు. కానీ ఆ ఆహారాన్ని తినే పద్ధతిని మారిస్తే ఎలా ఉంటుందో గమనించే ప్రయత్నం చేశారు. ఆ పరిశోధన ఇదిగో...   అమెరికాలోని ఒహియో స్టేట్‌ యూనివర్శిటీకి చెందిన పరిశోధకులు ఈ ఎక్స్‌పరిమెంట్‌ చేశారు. దీనికోసం వాళ్లు ఓ 68 మందిని ఎంచుకున్నారు. వాళ్లలో సగం మందిని ఎప్పటిలాగే చేతుల్తో పాప్‌కార్న్ తినమని చెప్పారు. మరికొందరినేమో వెరైటీగా chop sticksతో తినమని సూచించారు. ఇలా తిన్నవారు పాప్‌కార్న్‌ ఎప్పుడూ లేనంత రుచిగా ఉన్నాయని చెప్పుకొచ్చారు.   ఈ ఎక్స్‌పరిమెంట్‌ ఎంతవరకు నిజమో తెలుసుకునేందుకు, ఈసారి 300 మందికి ఆన్‌లైన్లో ఒక పని అప్పచెప్పారుట పరిశోధకులు. ‘మీరు కాస్త వెరైటీగా నీళ్లు తాగి చూడమని వాళ్లకి చెప్పార’ట. దాంతో జనం రకరకాలుగా ఈ ప్రయోగాన్ని ట్రై చేశారు. కొంతమంది మందు గ్లాసులో నీళ్లు పోసుకుని తాగితే, కొంతమంది నాలుకతో చప్పరించారు. ఇలా చేసినవాళ్లంతా కూడా నీళ్లు ఎప్పుడూ లేనంత రుచిగా ఉన్నాయని చెప్పారు.   ఇంతకీ ఇలా ఎందుకు జరుగుతోందో తెలుసా! మనం ఏదన్నా ఆహారాన్ని వెరైటీగా ట్రై చేసినప్పుడు, దాన్ని మొదటిసారి తింటున్న ఫీలింగ్‌ కలుగుతుందట. అందుకనే మనం దాని టేస్ట్‌ని ఎంజాయ్‌ చేయగలుగుతాం. పిల్లలతో వాళ్లకి ఇష్టం లేని ఫుడ్‌ తినిపించడానికైనా, మనం తినే ఫుడ్‌ని ఇంకా బాగా ఎంజాయ్ చేయాలన్నా ఈ చిట్కా పాటించి చూడమంటున్నారు పరిశోధకులు. - Nirjara  
  మనిషన్నాక రకరకాల లక్ష్యాలు ఉంటాయి. కానీ కొంతమంది మాత్రమే తాము ఏర్పరుచుకున్న గోల్స్‌ని చేరుకుంటారు. వాళ్లే విజేతలుగా నిలుస్తారు. మిగతావారంతా తమకి దొరికన దాంతో సంతృప్తి పడిపోతూ ఉంటారు. ఇలా ఎందుకు జరుగుతుంది అనే అనుమానం వచ్చింది కొంతమంది పరిశోధకులకి. అంతే! వెంటనే ఓ పరిశోధన మొదలుపెట్టేశారు. అందులో తేలిన విషయాలు మనందరికీ ఉపయోగమే. ఇంతకీ ఆ పరిశోధన ఏమిటంటే.... మనలో చాలామంది లైఫ్‌లో ఎప్పుడో ఒకప్పుడు ‘రేపటి నుంచి రోజూ పొద్దునే లేవాలి’ అనే గోల్‌ సెట్ చేసుకునే ఉంటారు. కానీ అదేం చిత్రమో కానీ ఎప్పుడు అలా అనుకున్నా ఏదో ఒక ఇబ్బంది వస్తూనే ఉంటుంది. మొదటి రోజు రాత్రి పడుకోవడం లేట్‌ అవుతుంది, రెండోరోజు ఎవరో చుట్టాలు ఇంటికి వస్తారు, మూడో రోజు రాత్రి అసలు నిద్రే పట్టదు... ఇలాంటి కారణాలతో ఏ రోజుకి ఆ రోజు పొద్దున లేవడం కుదరనే కుదరదు. దాంతో ఇక ఆ గోల్‌ని పక్కన పెట్టేస్తారు. ఇలా గోల్‌ సెట్‌ చేసుకున్న తర్వాత వరుసపెట్టి ఇబ్బందులు తలెత్తడాన్ని ACTION CRISIS అని పిలుస్తారట. ఈ యాక్షన్‌ క్రైసిస్‌లో ఏం జరుగుతుంది. దాన్ని overcome చేయడం ఎలా అనే దిశగా పరిశోధకులు ఆలోచించారు. ఈ పరిశోధన కోసం వాళ్లు కొంతమంది వ్యక్తులకు వేర్వేరు గోల్స్ ఇచ్చారు. వాటిని సాధించే క్రమంలో ఇబ్బందులు ఎదురైనప్పుడు వాళ్లకి ఎలాంటి ఆలోచనలు ఏర్పడ్డాయో చెప్పమన్నారు. ఆశ్చర్యంగా గోల్‌ ఏదైనా కూడా, అందులో ఇబ్బందులు తలెత్తినప్పుడు ఒకే తరహా ఆలోచనలు వచ్చాయట. ‘అసలు ఈ గోల్‌ చేరుకోవాల్సిన ఉపయోగం ఉందా?’ అన్న అనుమానం మొదలైంది. అప్పటివరకూ గోల్‌కి ఉన్న లాభాల గురించి ఆలోచించినవాళ్లంతా, దానికి సంబంధించిన నష్టాల గురించి ఆలోచించడం మొదలుపెట్టారు. ఒకటికి రెండు ఇబ్బందులు రాగానే తాము లక్ష్యం చేరుకోగలమనే నమ్మకాన్ని కోల్పోయారు. లక్ష్యాన్ని చేరుకునేందుకు ఇంకా ఏం చేయాలని ఆలోచించడం బదులు, దాన్ని ఎలా వదిలించుకునే మార్గాలు వెతకడం మొదలుపెట్టారు. దాంతో ఇక లక్ష్యం నిదానంగా కరిగిపోతుంది. ACTION CRISIS ఏర్పడినప్పుడు నిబ్బరంగా ఉండగిలిగితేనే లక్ష్యాన్ని సాధించగలం అని పరిశోధకులు తేల్చారు. ఆ కాస్త సమయంలో లక్ష్యాన్ని దూరం చేసుకోవడం కంటే, దాన్ని ఎలాగైనా సాధించేందుకు ఉపాయాన్ని ఆలోచించగలిగితే గోల్‌ రీచ్ అవ్వగలం. ఇందులో లక్ష్యాన్ని ఏర్పరుచుకున్న వ్యక్తితో పాటు... అతని చుట్టుపక్కల ఉండే స్నేహితులు, టీచర్లు, కుటుంబం పాత్ర కూడా చాలా ఉందట. వాళ్ల ప్రోత్సాహం, సహాయం ఉంటే కనుక నమ్మకం చెదిరిపోకుండా ఉంటుందట. - నిర్జర.  
  తన కోపమే తన శత్రువు అంటారు. నిజమే. కోపంలో తప్పొప్పులు గుర్తుకు రావు. చిన్నా, పెద్దా చూడం. ఫలితం ఏంటన్నది ఆలోచించం. ఒక్క మాటలో చెప్పాలంటే కోపం విచక్షణని దూరం చేస్తుంది. కోపం వల్ల నష్టాలు అంటూ ఎంత చెప్పుకున్నా కోపం రాకుండా మాత్రం వుండదు. కోపం ఎప్పుడొస్తుంది, ఎందుకు వస్తుంది, ఎవరిమీద వస్తుంది అంటూ విశ్లేషణలు మొదలుపెట్టామంటే సమాధానాలు మాత్రం కచ్చితంగా ఒక్కలా మాత్రం వుండవు. ఉదాహరణకి మనకి ఎంతో కోపం తెప్పించిన సంఘటన వేరేవాళ్ళకి చాలా సాధారణమైన విషయంగా కనిపించవచ్చు. అలాగే వేరేవాళ్ళు ఆవేశంతో ఊగిపోయే విషయం మనకి అతి సామాన్యమైనదిగా అనిపించవచ్చు. అంతేకాదు, ఒకసారి మనకి ఎంతో కోపం తెప్పించిన విషయం మరోసారి మామూలు విషయంగా తోచవచ్చు. తేడా సంఘటనలోగానీ, ఆ పరిస్థితుల్లోగానీ, వ్యక్తుల్లోకానీ వుండదు. తేడా అంటూ వుంటే అది మనలోనే వుంటుంది. మన మానసిక స్థితిపై ఆధారపడే మనలో భావావేశాలు కలుగుతాయని మనందరికీ తెలిసిందే. కోపం గురించి ఇంత చెప్పుకున్నాం సరే. మరి ఆ కోపాన్ని వదలగలమా? పూర్తిగా అయితే సాధ్యం కాదు. మరి మార్గం ఏమిటి? మంచిదంటూ మచ్చిక చేసుకోవటమే! అది ఎలా?   కోపం నిజంగా మంచిది కాదంటారా? ఒకోసారి కోపం రావటం వల్ల మంచే జరిగింది అనుకుంటూ వుంటాం. కోపంలో పౌరుషంతో, పట్టుదలతో కష్టపడి మంచి ఫలితాలు సాధించవచ్చు అని వింటుంటాం. అదెలా? ఎలా అంటే కోపం అనేది నెగిటివ్ ఎమోషనే అయినా దానిని పాజిటివ్‌గా మార్చుకున్నప్పుడు కూడా మంచే చేస్తుంది. సరైన రీతిలో ఉపయోగించుకుంటే నిరంతరం ప్రేరణగా మారుతుంది. మనలోని మనకి తెలీని శక్తిని వెలికి తీస్తుంది. కోసం ఒకోసారి మనకి ఎక్కడలేని ధైర్యాన్ని కూడా ఇస్తుంది. నిజానికి కోపం కూడా అన్ని భావాలలాగే మనకు అత్యవసరమైన ఓ భావం. అయితే అది మంచిదా కాదా అన్నది దానిని మనం ఉపయోగించుకనే విధానంపై ఆధారపడి వుంటుంది. మనిషిలోని భావోద్వేగాలన్నిటిలోకి కోపం కీలకమైనది. కోపం వస్తే ఊగిపోవటం, ఎదుటివారిని తిట్టడం, శిక్షించడం వరకే మనకి తెలుసు. కానీ, కోపంతో తమకు తాము హాని చేసుకోవడం, అందరికీ దూరంగా వుండటం జరుగుతూ వుంటుంది. కొంతమంది ఒంటరిగా,  మూడీగా వుంటారు. ఎవరినీ ఏమీ అనరు. కానీ ఎవ్వరితోనూ మాట్లాడరు. కారణం బాధ అయి వుండొచ్చు అనుకుంటాం చాలాసార్లు. కానీ, ఒకోసారి తనమీద, పరిస్థితుల మీద, తన చుట్టూ వున్నవారిపైన కోపం, ఏమీ చేయలని అసహాయత మీద కోపం కొందరిని మౌనంగా మారుస్తుంది అంటున్నారు నిపుణులు. అంతెందుకు.. పిల్లలు కోపంతో మూతి ముడిచి దూరంగా కూర్చోవటం అమ్మలకి అనుభవమేగా. కోపాన్ని వ్యక్తీకరించేందుకు విధానం ఒక్కలా వుండదు. పరిస్థితులను బట్టి, వ్యక్తులను బట్టి మారుతూ వుంటుంది. కోపాన్ని జయించలేకపోయినా అదుపులో పెట్టుకోవడం సులువే. కోపం ఎందుకు, ఎవరిమీద వచ్చిందో అన్న విషయం ఒకోసారి మనకి గుర్తు వుండదు. కానీ, ఆ కోపాన్ని ఎవరో ఒకరిపై మనకి తెలియకుండానే చూపిస్తాం. నాకు కోపం రాలేదు అనుకుంటాం కానీ, ఆ భావావేశం మన ప్రవర్తనపై ప్రభావం చూపిస్తుందని గుర్తించం. ఉదాహరణకి చూడండి..  ఏ పనమ్మాయో రాలేదు. చేతినిండా పని. చిరాకుగా వుంటుంది. సరే చేసేది ఏముందని పనిలో పడతాం. అప్పుడు కోపం ఏం లేదు. కానీ, చిన్నవాడు పొరపాటున ఓ గ్లాసుడు నీళ్ళు హాలులో ఒంపగానే కయ్యిమని అరుస్తాం. చిన్నవాడికి ఏం అర్థంకాదు. గ్లాసుడు నీళ్ళకి అమ్మ ఎందుకు అంత అరిచిందని. మనకీ అర్థంకాదు ఎందుకంత కోపం వచ్చిందో. నిజానికి కారణం పనమ్మాయి రాని చిరాకు ఎక్కడో మనలో మనల్ని తొలిచేస్తూ కోపం ఈ విధంగా బయటపడింది అంతే. ఇది చిన్న ఉదాహరణే. సాధారణంగా జరిగేదే. కానీ, చాలాసార్లు మనం వ్యక్తంచేసే కోపానికి మూలం అప్పటి సంఘటనో, వ్యక్తో కాదంటే నమ్మగలరా! కానీ, నిజంగా నిజం అదేనట. ఈ ఒక్క విషయాన్ని గుర్తుపెట్టుకోగలిగితే, ఎప్పటికప్పుడు మన కోపాన్ని చెక్ చేసుకుంటూ వుండొచ్చు. ఈమధ్య ఓ యూనివర్సిటీవారు నిర్వహించిన ఓ అధ్యయనంలో తేలిన విషయం ఏమిటో తెలుసా? ఓ సగటు వ్యక్తి జీవితకాలంలో నిద్రకి కావలసిన సమయాన్ని తీసేస్తే మిగిలిన కాలంలో సగం కాలం కోపంతో గడుపుతాడట. ఆశ్చర్యంగా అనిపించినా నిజం అదే. ప్రతీ చిన్న విషయానికి కోపం తెచ్చుకోవడం ఈమధ్యకాలంలో సాధారణంగా మారిందని, ఆ ప్రభావం  ఆరోగ్యంపై, రిలేషన్స్‌పై ముఖ్యంగా పిల్లల వ్యక్తిత్వంపై చాలా ఉంటోందని చెబుతున్నారు ఆ అధ్యయనకర్తలు. ఆ కోపానికి కారణాలు వెతకడం మొదలుపెట్టగలిగితే లేదా ఆ కోపాన్ని నిర్మాణాత్మకంగా మార్చుకోవడం అలవాటు చేసుకోగలిగితే ఎన్నో సమస్యలకి దూరంగా వుండొచ్చు. -రమ
  2014 ఎన్నికల్లో ఘన విజయం సాధించిన బీజేపీ, దశాబ్దాల చరిత్ర ఉన్న కాంగ్రెస్ ని దెబ్బ తీసింది.. ఇక వచ్చే ఎన్నికల నాటికి కూడా కాంగ్రెస్ కోలుకోవడం కష్టమే అనుకున్నారంతా.. కానీ అనూహ్యంగా పరిస్థితులు మారిపోయాయి.. గత కొంతకాలంగా బీజేపీ మీద ప్రజల్లో వ్యతిరేకత మొదలైంది.. మరోవైపు మిత్రపక్షాలు కూడా కొన్ని బీజేపీకి దూరమయ్యాయి.. ఇవన్నీ కాంగ్రెస్ పాలిట వరంలా మారుతున్నాయి.. వచ్చే ఎన్నికల్లో ప్రధాని పదవి పొందటం కాదు, మోదీకి ప్రధాని పదవి అందకుండా చేయడమే లక్ష్యంగా కాంగ్రెస్ అడుగులు వేస్తుంది.. దానిలో భాగంగానే ప్రాంతీయ పార్టీలకు దగ్గరవుతుంది.. ఇదిలా ఉంటే త్వరలో జరగనున్న కొన్ని రాష్ట్రాల ఎన్నికల్లో కాంగ్రెస్ విజయం సాధించటం ఖాయమని సర్వేలు చెప్తున్నాయి.. రాజస్థాన్‌, మధ్యప్రదేశ్‌, ఛత్తీస్‌‌‌గడ్‌ రాష్ట్రాలలో ఏబీపీ-సీ ఓటర్‌ సర్వే నిర్వహించింది.. ఈ మూడు రాష్ట్రాల్లో బీజేపీకి షాక్ ఇస్తూ కాంగ్రెస్ విజయం సాధిస్తుందని సర్వే తెలిపింది.. రాజస్థాన్‌లో 200 సీట్లకు గాను 130 స్థానాలు, ఛత్తీగఢ్‌లో 90 స్థానాలకు గాను 54 సీట్లు, మధ్యప్రదేశ్‌లో 230 సీట్లకు గాను 117 స్థానాలు కాంగ్రెస్ కైవసం చేసుకుని అధికారంలోకి వస్తుందని సర్వే చెప్పింది.. ఈ సర్వేతో కాంగ్రెస్ లో మరింత ఉత్సాహం పెరుగుతుందేమో.
  జనసేన పార్టీ మేనిఫెస్టో విజన్‌ డాక్యుమెంట్‌‌ను భీమవరంలో ఆ పార్టీ అధ్యక్షుడు పవన్‌ కళ్యాణ్ విడుదల చేశారు.. విజన్‌ డాక్యుమెంట్లో పొందుపరిచిన అంశాలు.. రేషన్ కు బదులుగా మహిళల ఖాతాల్లో నెలకు రూ. 2500 నుంచి 3500 వరకు జమ,మహిళలకు 33 శాతం రాజకీయ రిజర్వేషన్లు, బీసీలకు రిజర్వేషన్లు మరో ఐదు శాతం పెంచే ఆలోచన, చట్టసభల్లో బీసీలకు రాజకీయ రిజర్వేషన్లు, కాపులకు 9వ షెడ్యూల్‌ కింద రిజర్వేషన్లు, ప్రభుత్వ ఉద్యోగులకు సీపీఎస్‌ విధానం రద్దు చేయడం, ఎస్సీ వర్గీకరణకు సామరస్య పరిష్కారం, ముస్లింల అభివృద్ధికి సచార్‌ విధానం అమలు, మహిళలకు ఉచితంగా గ్యాస్‌ సిలిండర్లు, అగ్రవర్ణాల్లోని పేద విద్యార్థులకు వసతి గృహాలు, అగ్రవర్ణాల్లోని పేదల అభివృద్ధికి కార్పొరేషన్ ఏర్పాటు, వృద్ధుల కోసం ప్రభుత్వ ఆశ్రమాలు.. జనసేన అధికారంలోకి వస్తే ఈ కార్యక్రమాలు చేపడుతుందని జనసేన పేర్కొంది.  
  టెన్నిస్ స్టార్ సానియా మీర్జా తాజాగా ఓ ఇంటర్వ్యూలో మాట్లాడుతూ తన పెళ్లి గురించి ఆసక్తికరమైన వ్యాఖ్యలు చేసారు.. 'మేమేదో  భారత్‌-పాకిస్థాన్‌లను కలపడానికి పెళ్లి చేసుకున్నామని చాలా మంది అపోహపడుతుంటారు.. ఇది నిజం కాదు.. సంవత్సరానికోసారి పాకిస్థాన్‌లోని మా అత్తగారి కుటుంబాన్ని కలవడానికే వెళతాను.. వాళ్లు నాపై అపారమైన ప్రేమ కురిపిస్తారు.. ఆ దేశం అంతా నన్ను వదిన అని సంభోదిస్తూ, గౌరవంగా చూస్తారు.. క్రికెట్‌ జట్టు కెప్టెన్‌గా నా భర్తను అక్కడి ప్రజలు అభిమానిస్తారు.. ఆ అభిమానమే నాపై ప్రేమగా మారింది.. షోయబ్‌ భారత్‌ వచ్చినప్పుడూ  ఇదే జరుగుతుంది.. అతడిపైనా ఇక్కడి ప్రజలు ప్రేమ చూపిస్తారు' అని తెలిపారు.
మహాత్మాగాంధి సిద్ధాంతాలతో కొందరు అంగీకరించవచ్చు, లేదా విభేదించనూవచ్చు. కానీ స్వాతంత్ర్య సంగ్రామంలో ఆయన పాత్రని ఎవరూ కొట్టిపారేయలేరు. అహింసని సైతం ఒక ఆయుధంగా మార్చిన తీరుని మర్చిపోనూలేరు. తను ఏర్పరుచుకున్న నియమాల పట్ల ఆయనకు ఉన్న నిబద్ధతే గాంధీగారిని మిగతావారికంటే భిన్నంగా నిలిపిందన్నది వాస్తవం. అది సత్యాగ్రహం కావచ్చు, అహింసా సిద్ధాంతం కావచ్చు. ఆయన జీవనశైలిని గమనిస్తే ఇలాంటి నియమాలు చాలానే కనిపిస్తాయి. వాటిలో ఒకటి మేకపాలు తాగడం! ఎవరు ఎగతాళి చేసినా కూడా గాంధీగారు మేకపాలు మానేవారు కాదు. ఇంతకీ గాంధీగారు మేకపాలు తాగడం వెనుకనున్న కథ ఏమిటో, అసలు మేకపాలంటే కొందరికి ఎందుకంత అభిమానమో చూద్దాం...   మాటకు కట్టుబడి! గాంధీ ఒకప్పుడు పూర్తిగా శాకాహారానికే కట్టుబడి ఉండాలని నిర్ణయించుకున్నారు. ఇందులో భాగంగా మాంసమే కాకుండా ఇతర జంతువుల నుంచి వచ్చే పాలని కూడా ఆయన ముట్టుకోవడం మానేశారు. ఇలా ఒక ఆరేళ్లపాటు పాలకి దూరంగా ఉన్నారు కూడా! అయితే 1917లో ఆయనకు తీవ్రమైన అతిసార వ్యాధి పట్టుకుంది. మనిషి నీరసంతో కృశించిపోయాడు. అలాంటి స్థితిలో పాలు చాలా మేలు చేస్తాయని అందరూ సూచించినా, తన పాత నిర్ణయానికి కట్టుబడి ఆయన పాలని ముట్టుకోలేదు.   ఒక ఐడియా! గాంధీగారి పరిస్థితి చూసిన ఒక వైద్యుడు ఓ ఉపాయాన్ని సూచించాడు. ‘మీరు పాలని ముట్టుకోను అని నిర్ణయించుకున్నప్పుడు మీ మనసులో ఆవు లేదా గేదె పాలే మెదిలి ఉంటాయి కదా! అలంటప్పుడు మీ మాటని కాస్త సడలించి మేక పాలుని తీసుకోవచ్చు కదా!’ అన్నాడు. దీన్ని గాంధీగారి భార్య కస్తూరిబాయి కూడా సమర్థించడంతో, అప్పటి నుంచీ ఆయన మేకపాలని తీసుకోవడం మొదలుపెట్టారు.   నిజానికి గాంధీగారి దృష్టిలో పాలు అంత ఆరోగ్యకరం కాదు. వాటిద్వారా సదరు జంతువులలో ఉండే రోగకారకాలన్నీ మనకు అంటుకుంటాయని ఆయన అభిప్రాయం. అయితే శాకాహారులకు పూర్తిస్థాయి పోషకాలు అందాలంటే పాలు తప్ప మరో గత్యంతరం లేదని ఆయన తరువాత రోజుల్లో ఒప్పుకొనేవారు.   మేకపాలు ప్రత్యేకమేనా! గాంధీగారు మేకపాలు తాగడం మాట అటుంచి, చాలామంది నిపుణులు గేదెపాలకంటే మేకపాలు శ్రేష్టమని వాదిస్తున్నారు. వారి వాదనల ప్రకారం మేకపాలలో చాలా సుగుణాలే ఉన్నాయి.   - ఆవు/గేదెపాలకంటే మేకపాలలోని కొవ్వుకణాలు చిన్నగా ఉంటాయట. అందుకని ఇవి మిగతా పాలకంటే సులభంగా జీర్ణమవుతాయి.   - కొందరికి పాలు సరిపడవు. కారణం! వాటిలో ఉండే లాక్టోజ్‌ అనే పదార్థం. మేకపాలలో లాక్టోజ్‌ చాలా తక్కువ స్థాయిలో ఉండి పెద్దగా ఇబ్బందిని కలిగించదు. కేవలం లాక్టోజే కాదు. పాలల్లో ఉండే ‘A1 కేసిన్‌’ అనే మాంసకృత్తుల వల్ల చాలామందికి జీర్ణసంబంధమైన వ్యాధులు తలెత్తే అవకాశం ఉంది. అయితే మేకపాలలో ‘A1 కేసిన్‌’ బదులు ‘A2 కేసిన్‌’ ఎక్కువగా కనిపిస్తుంది. దీంతో జీర్ణసంబంధమైన ఇబ్బందులు దరిచేరవు.   - గేదెపాలకంటే మేకపాలలోనే ఎక్కువశాతం ఖనిజాలు లభిస్తాయి. ఇక విటమిన్లు, కొవ్వు సంగతి చెప్పనే అక్కర్లేదు. మేకపాలు మంచి కొలెస్ట్రాల్ (HDL) స్థాయిని పెంచుతాయంటున్నారు నిపుణులు.   - మేకపాలలో ఎక్కువ పోషకాలు ఉండటమే కాదు. ఇతర పాలతో పోలిస్తే ఈ పోషకాలని మన శరీరం మరింత సులువుగా గ్రహించగలదట.   - మేకపాలలో విటమిన్‌ A ఎక్కువగా ఉండటం వల్ల చర్మానికి కాంతినీ, మృదుత్వాన్నీ తీసుకువస్తుందట. పైగా చర్మానికి హాని కలిగించే బ్యాక్టీరియాను కూడా నివారించే శక్తి దీనికి ఉంది. అందుకనే కొంతమంది మేకపాలని చర్మానికి నేరుగా రాసుకుంటారు. మేకపాలతో చేసిన సబ్బులకు కూడా మంచి ఆదరణ ఉంది.   - శరీరంలో రోగనిరోధక శక్తిని పెంచే సెలేనియం అనే ఖనిజం మేకపాలలో ఎక్కువగా ఉంటుంది. జుట్టు మొదలుకొని థైరాయిడ్ వరకూ ఈ సెలేనియం మన శరీరానికి ఎంతో మేలు చేస్తుందట. ఇలా ఒకదాని తరువాత ఒకటిగా మేకపాల ప్రత్యేకతలు చాలానే కనిపిస్తాయి. గాంధీగారు చెప్పారని కాదు కానీ ఇప్పటికీ చాలామంది మేకపాలను మిగతా పాలతో సమానమైన విలువ కలిగనివా భావిస్తారు. ఇంత చదివిన తరువాత మేకపాల గురించి ఎలా ఎగతాళి చేయగలం!   - నిర్జర.
  వినడానికి వింతగా ఉంది కాదూ! కానీ ఇదెవ్వరో దారిన పోయే దాన్నయ్య చెప్పిన మాట కాదు... పోర్చుగల్‌లో కొంతమంది పరిశోధకులు తేల్చిన విషయం. మనలో చాలామందిలో ఒళ్లు పెరిగిపోవడానికి కారణం- శారీరక శ్రమ తక్కువగా చేస్తూ, ఎక్కువ కెలోరీలు ఉన్న ఆరాహాన్ని తీసుకోవడం అని తెలుసు. కానీ ఈమధ్యకాలంలో ఒబెసిటీకి మరో కారణం కూడా కనుగొన్నారు. అదే obesogens! ఇవి మన శరీరంలో కొవ్వుని ప్రభావితం చేసే ఒక రకమైన కెమికల్స్‌.   మన ఇంట్లో ఉండే కొన్ని పదార్థాలు ఈ obesogens పనితీరుని మార్చేస్తాయట. ఆహారపదార్థాలలో కనిపించే పెస్టిసైడ్స్, బ్యాటరీలలో ఉండే కాడ్మియం, బాత్రూం క్లీనర్లు, డియోడరెంట్లు... లాంటి నానారకాల కెమికల్స్ ఈ obesogens మీద పనిచేస్తుంటాయి. అలాగని వీటన్నింటికీ దూరంగా ఉండటం కష్టమే కదా! ఈ రోజుల్లో ఎన్ని జాగ్రత్తలు తీసుకున్నా ఈ కెమికల్స్ మన చుట్టూ కనిపిస్తూనే ఉంటాయి. కానీ obesogensని తీవ్రంగా ప్రభావితం చేసే ఒక వస్తువుని మాత్రం మనం కంట్రోల్‌ చేయగలం. అదే చెప్పులు!   చెప్పులతో మనం ఊరంతా తిరిగి వస్తాం. దాంతో వాటికి నానారకాల కెమికల్స్ అంటుకుని ఉంటాయి. చెప్పుల మీద పేరుకునే దుమ్ములో ఆ కెమికల్స్‌ భద్రంగా ఉంటాయి. అవి రకరకాల అనారోగ్యాలు ఎలాగూ కలిగిస్తాయి. ఇక obesogens మీద కూడా తమ ఎఫెక్ట్‌ చూపుతాయి. అందుకే చెప్పులని ఇంటి బయటే విడిచిపెట్టేయాలనీ, వాటిని ఎప్పటికప్పుడు శుభ్రం చేసుకుంటూ ఉండాలనీ పోర్చుగల్‌ పరిశోధకులు సూచిస్తున్నారు. ఇంట్లో దుమ్ముని కూడా ఎప్పటికప్పుడు దులిపేయడం, కార్పెట్లులాంటివి వాడకపోవడం వల్ల కూడా కెమికల్స్ పేరుకోకుండా జాగ్రత్త పడవచ్చని చెబుతున్నారు. https://www.youtube.com/watch?v=clFCJAz2o_0 - Nirjara    
ఇంట్లో ఏ కరెంటు వస్తువు ఉన్నా... అది votage fluctuationsని తట్టుకోవాలంటే ఒక ఎర్త్‌ వైర్ పెడతారు. మరి మన body పరిస్థితి ఏమిటి? మన శరీరం కూడా ఒక బ్యాటరీలాంటిదే కదా! అందులో ప్రతి అవయవం పనిచేయడానికి ఎంతో కొంత విద్యుత్తు అవసరమేగా. అందుకే నేలతో శరీరానికి నేరుగా సంబంధం ఉంటే... ఒంట్లో వైబ్రేషన్స్‌ కూడా perfectగా ఉంటాయని చెబుతున్నారు.     Earth నుంచి వచ్చే పాజిటివ్ ఎనర్జీ తీసుకోవడానికైనా, మన ఒంట్లో అధికంగా ఉన్న నెగెటివ్‌ వైబ్రేషన్స్‌ను వదిలించుకోవడానికైనా... చెప్పులు లేకుండా కాసేపు నేల మీద నడవడం మంచిదని సూచిస్తున్నారు. ఒకప్పుడు నేల మీద చెప్పులు లేకుండానే నడిచేవారు. రాత్రిపూట కూడా నేల మీదే పడుకునేవారు. దాని వల్ల భూమితో శరీరానికి నేరుగా సంబంధం ఉండేది. కానీ ఇప్పుడలా కాదు. ఇంట్లో కూడా చెప్పులు వేసుకునే తిరిగేస్తున్నారు. బయటకి వెళ్లినా ప్లాస్టిక్‌ లేదా రబ్బర్‌ చెప్పులు వేసకుంటున్నారు. ఇవి నేల నుంచి శరీరంలోకి ఎలాంటి ఎనర్జీ రాకుండా అడ్డుకుంటాయి. కాళ్లకి ఎలాంటి అడ్డూ లేకుండా నేల మీద నడవడాన్ని Grounding అని పిలుస్తారు. కేవలం Groundingతోనే రోగులను నయం చేసే Earthing Therapy అనే ట్రీట్‌మెంట్‌ కూడా ఇప్పుడు పాపులర్‌ అవుతోంది. ఈ ధెరపీతో చాలా రకాల సమస్యలు దూరమవుతాయని చెబుతున్నారు.     - Grounding వల్ల ఒంట్లో వాపు, నొప్పిలాంటి సమస్యలన్నీ తీరిపోతాయట. ఒక నాలుగువారాల పాటు ఇలా నడిస్తే... వెన్నునొప్పి, మోకాలి నొప్పులు, పొద్దున పూట కీళ్లు పట్టేయడం లాంటి సమస్యలలో మంచి రిలీఫ్‌ కనిపించినట్లు రీసెర్చ్‌లో తేలింది. - Grounding వల్ల stress కూడా చాలావరకు తగ్గిపోతుందని తెలిసింది. మన శరీరంలో cortisol అనే హార్మోన్‌ ఉంటుంది. ఈ హార్మోనుని గమనిస్తే, ఒంట్లో ఎంత stress ఉందో తెలిసిపోతుంది. నేల మీద పాదాల ఉంచి నడవటం వల్ల ఈ cortisol చాలావరకు తగ్గిపోయిందట. - Grounding వల్ల blood circulation మెరుగుపడుతుందని చెబుతున్నారు. Blood circulation బాగుంటేనే మన ఒంట్లో ప్రతి అవయవానికీ సక్రమంగా ఆక్సిజన్‌, విటమిన్స్ అందుతాయి. దాంతో చర్మం దగ్గర నుంచి గుండె దాకా అన్నీ ఆరోగ్యంగా ఉంటాయి. - భూమిలో లెక్కలేనన్ని electrons, antioxidants ఉంటాయి. చెప్పులు లేకుండా నడవటం వల్ల ఇవి మన శరీరానికి నేరుగా అందుతాయి. చూశారుగా! Grounding వల్ల ఎన్ని ఉపయోగాలు ఉన్నాయో. అందుకే రోజుకి ఒక అరగంటసేపన్నా... గడ్డి, నేల, ఇసుక ఉన్న ప్రదేశాలలో చెప్పులు లేకుండా నడిచి చూడండి. ఫలితం మీకే తెలుస్తుంది. - Nirjara