జగన్ ప్రతిపక్షం లో ఉన్న సమయంలో ఆయనతో యాగాలు చేయించి మరీ తన ఆశీస్సులతో ఆయనను సీఎం పదవిలో కూర్చోబెట్టారు శారదా పీఠాధిపతి స్వరూపానంద స్వామి. అప్పటి నుండి స్వామి వారి హవా ఏపీలో అప్రతిహతంగా సాగుతోంది. దీంతో ఇటు ఏపీలోని ఉన్నతాధికారులతో పాటు బడా బడా నేతలు కూడా శారదా పీఠానికి క్యూ కడుతున్నారు. అయితే కొద్దీ రోజుల క్రితం తన పుట్టినరోజుకు అన్ని దేవాలయాల్లో పూజలు చేయించాలనే ఆర్డర్లు ఇప్పించి ఆ తరువాత ఆ విషయం వివాదం కావడంతో ఆ తరువాత వెనక్కు తగ్గారు. ఇప్పుడు ఎక్కడ ఏ దేవాలయంలో ఎవరు ట్రస్టీగా ఉండాలనేది కూడా ఆయనే డిసైడ్ చేసేస్తున్నారు.   తాజాగా భీమిలి దగ్గర గుడిలోవలో ఉన్న రంగనాథ స్వామి ఆలయం విషయంలో కూడా అదే జరిగింది. ట్రస్టు బోర్డులో ఎవరెవరిని అపాయింట్ చేయాలో స్వరూపానందస్వామి పేర్లు ఇస్తే.. అక్కడి అధికారులు దానిని ఆమోదించేసారు. ఈ నియామకాలకు దేవాదాయశాఖ కమిషనర్ దగ్గర నుంచి కూడా అప్రూవల్ వచ్చేసిందట. అయితే ఎటొచ్చి స్థానిక ఎమ్మెల్యే ప్లస్ మంత్రి కూడా అయిన అవంతి శ్రీనివాసరావుకు మాత్రం అసలు సమాచారం లేదట. అయితే తీరా తెలిశాక ఆయన మండిపడ్డారట. ఫైనల్ గా ఆ రికమెండేషన్ ఎవరు చేశారో తెలిశాక పాపం గప్ చుప్ గా నోరు మూసుకున్నారని సమాచారం.
గ్రేటర్ హైదరాబాద్ ఎన్నికల ప్రచారంలో ఎవరూ కరోనా మార్గదర్శకాలు పాటించడం లేదు. మాస్కులు కూడా లేకుండానే గుంపులు గుంపులుగా తిరుగుతూ ప్రచారం చేస్తున్నారు. ప్రచారంలో ఎక్కడా శానిటైజర్లు వాడటం లేదు. రాజకీయ నేతలు కూడా మాస్కులు లేకుండానే ప్రచారంలో పాల్గొంటున్నారు. దీంతో హైదరాబాద్ లో మళ్లీ కరోనా మహమ్మారి విజృంభిస్తుందేమోనన్న ఆందోళన వ్యక్తమవుతోంది. దీనిపై స్పందించిన రాష్ట్ర ఎన్నికల సంఘం.. రాజకీయ పార్టీలకు మరోక సారి కరోనా మర్గదర్శకాలు జారీ చేసింది.    ఎన్నికల సందర్భంగా నిర్వహించే ఇంటింటి ప్రచారం, రోడ్‌షోలు, ర్యాలీల్లో అన్ని రాజకీయ పార్టీలు, అభ్యర్ధులు, కార్యకర్తలు కచ్చితంగా కరోనా కోడ్‌ నిబంధనలు పాటించాల్సిందేనని ఆదేశించింది. పలు పార్టీలు ఎన్నికల సంఘం జారీ చేసిన కోవిడ్‌ నిబంధనలు పాటించడం లేదని గుర్తు చేసిన ఎన్నిక సంఘం.. ఎట్టి పరిస్థితుల్లోనూ కోవిడ్‌ నిబంధనలు ఉల్లంఘించరాదని సూచించింది. నిబంధనలు పాటించని వారిపై చర్యలు తీసుకుంటామని స్పష్టంచేసింది. అన్నిపార్టీల అభ్యర్ధులు, వారి కార్యకర్తలు ఎన్నికల ప్రచారం సందర్భంగా తప్పని సరిగా ముఖానికి మాస్క్‌ ధరించాలి. అలాగే శానిటైజర్లను వినియోగిస్తూ భౌతిక దూరం పాటించాలని సూచించింది.    ఇంటింటి ప్రచారానికి వెళ్లినప్పుడు అభ్యర్ధితో పాటు ఐదుగురు మాత్రమే వెళ్లాలని ఎన్నికల సంఘం స్పష్టమైన ఆదేశాలు జారీ చేసింది. ఇతరులు ప్రచారంలో పాల్గొంటే తప్పని సరిగా ఫేస్‌మాస్క్‌ ధరించాలని ఎన్నికల కమిషన్ సూచించింది. తప్పని సరిగా శానిటైజర్‌ వినియోగిస్తూ భౌతిక దూరం పాటించాలని సూచించింది. రోడ్‌షోలు, ర్యాలీలు నిర్వహించే సమయంలోనూ తప్పని సరిగా ఫేస్‌మాస్క్‌లను ప్రతి ఒక్కరూ ధరించేలా చూడాలని... చేతులను శానిటైజర్‌తో శుభ్రం చేసుకోవాలని..సమావేశాలు, బహిరంగ సభల్లోనూ భౌతిక దూరం తప్పని సరి అని రాష్ట్ర ఎన్నికల సంఘం స్పష్టంచేసింది.
రోహింగ్యాలు.. పాకిస్తాన్.. సర్జికల్ స్ట్రైక్.. కూల్చేస్తాం.. తరమికొడతాం. ఇవి గ్రేటర్ హైదరాబాద్ మున్సిపల్ కార్పొరేషన్ ఎన్నికల ప్రచారంలో వినిపిస్తున్న మాటలు. స్థానిక ఎన్నికల్లో సాధారణంగా స్థానిక సమస్యలే కీలకంగా ఉంటాయి. స్థానిక సమస్యలు, ప్రజల అవసరాల అంశాలపైనే గతంలో ప్రచారాలు జరిగేవి. కాని ఈసారి జీహెచ్ఎంసీ ఎన్నికల్లో స్థానిక అంశాల ప్రస్తావనే రావడం లేదు. జాతీయ , అంతర్జాతీయ అంశాలు గ్రేటర్ ఎన్నికల్లో ప్రచారాస్త్రాలుగా మారిపోయాయి. జీహెచ్ఎంసీ ఎన్నికల ప్రచారంలో నేతల మధ్య మాటల తూటాలు పేలుతున్నాయి. విద్వేషపూరిత ప్రసంగాలు, రెచ్చగొట్టే వ్యాఖ్యలు చేస్తూ కలకలం రేపుతున్నారు లీడర్లు.    నిన్నటి వరకు ప్రశాంతంగా ఉన్న హైదరాబాద్ నగరంలో నేతల విద్వేశపూరిత ప్రసంగాలు దుమారం రేపుతున్నాయి. అన్ని పార్టీల నేతలు పోటీపడీ మరీ నోటికి పనిచెబుతున్నారు. ఒకరిని మించి మరొకరు రెచ్చగొట్టే ప్రసంగాలతో విరుచుకుపడుతున్నారు. ఇష్టమెచ్చినట్లుగా మాట్లాడుతూ అలజడి రేపుతున్నారు. జనం సమస్యలు పట్టించుకోకుండా.. కాంట్రవర్సీ కామెంట్లతో కాక రేపుతున్నారు. ప్రచారాల తీరు, నేతల దూకుడుతో గ్రేటర్ హైదరాబాద్ ఎన్నికల ప్రచారం దారి తప్పిందనే అభిప్రాయం వ్యక్తమవుతోంది. గ్రేటర్ ఎన్నికల్లో జరుగుతున్న ఉద్రిక్త పరిస్థితులతో నగర ప్రజల్లో ఆందోళన కూడా పెరుగుతోంది.    బీజేవైఎం చీఫ్, బెంగళూరు బీజేపీ ఎంపీ తేజస్వీ సూర్య రాకతో మొదలైన గ్రేటర్‌ రాజకీయ వేడి తారాస్థాయికి చేరింది. మంగళవారం హైదరాబాద్‌ లో పర్యటించిన సూర్య.. ఎంఐఎం నేతలపై ఘాటు వ్యాఖ్యలు చేశారు. ఎంపీ అసదుద్దీన్‌ ఒవైసీ పాకిస్తాన్‌ ఏజెంట్‌గా పనిచేస్తున్నారని విమర్శించారు.అసద్ ను పాకిస్తాన్‌ జాతిపిత మహ్మద్‌ అలీ జిన్నాతో పోల్చారు సూర్య. దేశ విభజన సమయంలో హైదరాబాద్‌ సంస్థానాన్ని పాకిస్తాన్‌లో విలీనం చేయాలని జిన్నా డిమాండ్‌ చేశారని, ఒవైసీ కూడా అదే ఆలోచన విధానం ఉన్న వ్యక్తి అని వివాదాస్పద వ్యాఖ్యలు చేశారు. హైదరాబాద్‌లో పెద్ద ఎత్తున రొహింగ్యాలు, పాకిస్తాన్‌ ఓట్లు ఉన్నాయని.. పాకిస్తాన్‌ మద్దతు దారులే ఎంఐఎం పార్టీలో ఉన్నారని వ్యాఖ్యానించారు. తేజస్వి సూర్య విమర్శలపై ఒవైసీ ఘాటుగా స్పందించారు. హైదరాబాద్‌లో పాకిస్తాన్‌, రొహింగ్యా ఓటర్లు ఉంటే కేంద్రహోం మంత్రి అమిత్‌ షా ఏం చేస్తున్నారు..? నిద్రపోతున్నారా? అంటూ ప్రశ్నించారు. కేంద్ర ప్రభుత్వ అనుమతితోనే భాగ్యనగరంలో రొహింగ్యాలకు షెల్టర్‌ ఇచ్చారని ఒవైసీ గుర్తుచేశారు.    ఇక తెలంగాణ బీజేపీ అధ్యక్షుడు బండి సంజయ్‌ వివాదాస్పద వ్యాఖ్యలతో అలజడి సృష్టిస్తున్నారు. గ్రేటర్‌ ఎన్నికల్లో బీజేపీ విజయం సాధిస్తే పాతబస్తీలో సర్జికల్‌ స్ట్రైక్‌ చేస్తామన్న ఆయన వ్యాఖ్యలు తీవ్ర కలకలం రేపాయి. సంజయ్‌ కామెంట్స్‌ తెలంగాణలోనే కాకుండా దేశ వ్యాప్తంగానూ హాట్‌ టాపిక్‌గా మారాయి. సంజయ్ వ్యాఖ్యలపై దుమారం రేగుతుండగానే.. ఎంఐఎం శాసనసభా పక్ష నేత అక్బరుద్దీన్ రెచ్చిపోయారు. అక్రమ కట్టడాల తొలగింపుపై మాట్లాడుతూ.. మాజీ ప్రధానమంత్రి పీవీ నరసింహారావు, మాజీ సీఎం ఎన్టీఆర్‌ ఘాట్స్‌ను కూల్చివేయాలంటూ అనుచిత వ్యాఖ్యలు చేశారు. అక్భర్ కామెంట్లకు కౌంటరిచ్చిన బండి సంజయ్.. పీవీ, ఎన్టీఆర్ సమాధులు కూల్చివేస్తే రెండు గంటల్లో ఎంఐఎం కార్యాలయం దారుస్సలాంను నేలమట్టం చేస్తామని హెచ్చరించాారు. బండి సంజయ్. అక్బరుద్దీన్ వ్యాఖ్యలపై రాష్ట్ర వ్యాప్తంగా తీవ్ర విమర్శలు వ్యక్తమవుతున్నాయి.    గ్రేటర్‌ ఎన్నికల సందర్భంగా వివిధ పార్టీలకు చెందిన నాయకులు చేస్తున్న ప్రసంగాలపై నగర ప్రజల్లో ఆందోళన వ్యక్తమవుతోంది. గతంలో ఎప్పుడూ ఇలాంటి పరిస్థితి రాలేదని, ప్రస్తుత పరిణామాలతో ఎప్పుడు ఏం జరుగుతుందోనన్న భయం వస్తుందని చెబుతున్నారు. గ్రేటర్ ప్రచారంలో జరుగుతున్న పరిణామాలపై సోషల్‌ మీడియా వేదికగా నెటిజన్లు తీవ్ర ఆందోళన వ్యక్తం చేస్తున్నారు. ప్రజల మధ్య చిచ్చుపెట్టే విధంగా రెచ్చగొట్టే ప్రసంగాలు చేస్తున్నారని అసంతృప్తి వ్యక్తం చేస్తున్నారు. ప్రజలను ఆకట్టుకునే విధంగా పథకాలు, మేనిఫేస్టోలు తయారుచేసి, ఓటర్లను ఆకర్శించాలే గానీ ఇలా రెచ్చగొట్టే విధంగా వ్యాఖ్యలు చేయవద్దని హితవు పలుకుతున్నారు.
జనాలను రెచ్చగొట్టే పోస్టులు చేస్తున్న వారిపై కఠిన చర్యలు తీసుకుంటామని తెలంగాణ డీజీపీ మహేందర్ రెడ్డి హెచ్చరించారు. గ్రేటర్ ఎన్నికలను ఆసరాగా తీసుకొని విధ్వంసక శక్తులు మత కల్లోలాలకు కుట్ర చేస్తున్నాయని చెప్పారు. శాంతిభద్రతలకు భంగం కలిగేలా వ్యవహిరిస్తే కఠినచర్యలు తప్పవని.. కుట్రలకు పాల్పడితే ఉపేక్షించేది లేదని ఆయన హెచ్చరించారు. తన కార్యాలయంలో నిర్వహించిన మీడియా సమావేశంలో డీజీపీ మాట్లాడారు. సోషల్ మీడియా పైన పోలీస్ శాఖ పటిష్టమైన నిఘా ఏర్పాటు చేసిందన్నారు. నూతన టెక్నాలజీని ఉపయోగించి అలాంటి వారిని గుర్తిస్తున్నామన్నారు. వదంతులు, నకిలీ వార్తల గురించి తెలిస్తే సమీపంలోని పోలీస్‌స్టేషన్‌కు తెలియజేయాలన్నారు.    తెలంగాణ రాష్ట్రం శాంతి భద్రతలకు నిలయంగా ఉందని డీజీపీ మహేందర్‌రెడ్డి అన్నారు. గత ఆరేళ్లుగా ప్రజల సహకారంతో ఎలాంటి అసాంఘిక సంఘటనలు జరగకుండా పోలీస్‌ శాఖ అన్ని చర్యలు తీసుకుందని వెల్లడించారు. జీహెచ్‌ఎంసీ ఎన్నికల్లో ప్రజలు నిర్భయంగా ఓటు హక్కును వినియోగించుకోవాలని సూచించారు. శాంతి భద్రతల పరిరక్షణ విషయంలో ప్రజలందరూ అప్రమత్తంగా ఉండాలని, సోషల్ మీడియాలో ఎవరైనా తప్పుడు ప్రచారాలు చేస్తే వాటిని ఎవ్వరు ఫార్వర్డ్‌‌ చేయ్యొద్దని తెలిపారు. జీహెచ్‌ఎంసీ ఎన్నికలు శాంతియుత వాతావరణంలో జరిగేలా చూడాలని కోరారు.    గ్రేటర్ పరిధిలోని మూడు కమిషనరేట్లలో 51,500 మందితో భారీ భద్రత ఏర్పాటు చేశామని, ఎమర్జెన్సీ కోసం బ్లూ కోడ్స్ సీనియర్ అధికారులను అందుబాటులో ఉంచామని డీజీపీ తెలిపారు.ఇప్పటి వరకు రాజకీయ నాయకులపై 50 కేసులు నమోదు చేశామని తెలిపారు. సర్జికల్ స్ట్రైక్ చేస్తాం అన్న నేతలపై కేసులు నమోదు చేస్తామని వెల్లడించారు. రోహింగ్యాలపై ఇప్పటి వరకు 50 నుంచి 60 కేసులు నమోదు చేశామని, క్రిమినల్ చరిత్ర ఉన్న వారే మత విద్వేషాలు రెచ్చగొడుతున్నారన్నారు. ఓయూ రిజిస్టర్ ఇచ్చిన ఫిర్యాదుతో బెంగళూరు ఎంపీ తేజస్వి సూర్య పై కేసు నమోదు చేశామని డీజీపీ మహేందర్‌రెడ్డి తెలిపారు.
సీనియర్ ఐపీఎస్ అధికారి ఏబీ వెంకటేశ్వరరావుకు సుప్రీంకోర్టులో చుక్కెదురైంది. ఆయన సస్పెన్షన్‌ విషయంలో ఏపీ హైకోర్టు ఇచ్చిన ఆదేశాలపై సుప్రీంకోర్టు స్టే విధించింది.    గత ప్రభుత్వ హయాంలో ఇంటెలిజెన్స్‌ చీఫ్‌గా ఉన్న ఏబీ వెంకటేశ్వరరావు.. నిఘా పరికరాల కొనుగోళ్లలో అక్రమాలకు పాల్పడ్డారని ఆరోపిస్తూ ఆయనను రాష్ట్ర ప్రభుత్వం సస్పెండ్‌ చేసిన విషయం విదితమే. ఏపీ ప్రభుత్వ నిర్ణయాన్ని క్యాట్ కూడా సమర్థించింది. ప్రభుత్వం జారీ చేసిన సస్పెన్షన్‌ ఉత్తర్వులను రద్దు చేయాలని ఏబీ దాఖలు చేసిన పిటిషన్‌ను క్యాట్‌ కొట్టివేసింది. ఈ క్రమంలో ఆయన హైకోర్టును ఆశ్రయించగా సస్పెన్షన్‌ పై హైకోర్టు స్టే ఇచ్చింది.   హైకోర్టు ఆదేశాలను ఏపీ ప్రభుత్వం సుప్రీంకోర్టులో సవాల్ చేసింది. తాజాగా ఈ పిటిషన్ ను విచారించిన ధర్మాసనం హైకోర్టు ఆదేశాలపై స్టే విధించింది. తదుపరి ఆదేశాలు ఇచ్చేంత వరకు స్టే కొనసాగుతుందని తెలిపింది. మూడు వారాల్లోగా సమాధానం చెప్పాలని ఏబీ వెంకటేశ్వరరావుకు నోటీసులు జారీ చేసింది. ఛార్జిషీట్ ను ఏబీ వెంకటేశ్వరరావుకు సమర్పించాలని ప్రభుత్వాన్ని ఆదేశించింది.
గ్రేటర్ హైదరాబాద్‌లో అందరికీ ఉచితంగా కరోనా వ్యాక్సిన్ అందిస్తామని బీజేపీ హామీ ఇచ్చింది. గ్రేటర్‌లో అధికారంలోకి వస్తే ఎల్‌ఆర్‌ఎస్ రద్దు చేస్తామని ప్రకటించింది. నగరంలోని అన్ని ప్రాంతాలకు మెట్రో రైలు, ఎంఎంటీఎస్‌ సేవలు అందిస్తామని తెలిపింది. విద్యార్థులకు ఉచితంగా ట్యాబ్‌లు, వై-ఫై సౌకర్యం కల్పిస్తామని హామీ ఇచ్చింది. పేదలకు వంద యూనిట్ల లోపు ఉచిత విద్యుత్ ఇస్తామని మేనిఫెస్టోలో ప్రకటించింది. ప్రైవేట్ పాఠశాలల ఫీజుల నియంత్రణకు చర్యలు తీసుకుంటామని, లంచాలు లేని, నూటికి నూరుశాతం పారదర్శక జీహెచ్ఎంసీ పాలన సాగిస్తామని తెలిపింది.    మహిళల కోసం ఐదేళ్లలో 15 కొత్త మహిళా పోలీస్‌స్టేషన్ల ఏర్పాటు, మహిళల కోసం నగరంలో కిలోమీటరుకో టాయిలెట్, టూవీలర్లు, ఆటోలపై ఇప్పటివరకు ఉన్న చలాన్లు రద్దు, గ్రేటర్‌లో ఇంటింటికి నల్లా కనెక్షన్, 24 గంటలు ఉచితంగా మంచినీరు సరఫరా, కులవృత్తులకు ఉచిత విద్యుత్ , ఎస్సీ కాలనీలు, బస్తీల్లో ఆస్తిపన్ను మాఫీ, వరదల నివారణకు సమగ్ర ప్రణాళిక, వరదసాయం కింద అర్హులందరికీ రూ.25 వేల చొప్పున నగదు ఇస్తామని ఎన్నికల మేనిఫెస్టోలో ప్రకటించింది బీజేపీ.    మహారాష్ట్ర మాజీ ముఖ్యమంత్రి దేవేంద్ర ఫడ్నవీస్ చేతుల మీదగా గ్రేటర్ హైదరాబాద్ బీజేపీ మేనిఫెస్టో విడుదలైంది. సామాన్యుడి ఆకాంక్షల మేరకే మేనిఫెస్టో విడుదల చేస్తున్నామని, ప్రజల సలహాలు స్వీకరించి మేనిఫెస్టోను రూపొందించామని ఫడ్నవీస్ తెలిపారు. కరోనా పేరుతో హైదరాబాద్‌లోని ప్రైవేట్ ఆస్పత్రులు సామాన్యులను దోచుకున్నాయని చెప్పారు. ఎల్‌ఆర్‌ఎస్ ద్వారా ప్రజలపై రూ.15 వేల కోట్ల భారం మోపారని ఆరోపించారు. రాజ్యాంగాన్ని మోడీ సర్కారు కాపాడుతోందని చెప్పారు. ఓటు బ్యాంకు కోసం చేసిన తప్పిదాల వల్లే హైదరాబాద్ మునిగిపోయిందని, ప్రధానమంత్రి ఆవాస్ యోజన పథకాన్ని టీఆర్ఎస్ ప్రభుత్వం నిర్లక్ష్యం చేసిందని తెలిపారు.
గ్రేటర్‌ హైదరాబాద్‌ ఎన్నికల బరిలో 49 మంది నేర చరిత్ర గల అభ్యర్థులు పోటీ చేస్తున్నారు. టీఆర్‌ఎస్‌, బీజేపీ, కాంగ్రెస్‌, మజ్లిస్‌ అభ్యర్థుల అఫిడవిట్లను రాష్ట్ర ఎన్నికల కమిషన్‌ వెబ్‌సైట్‌ నుంచి తీసుకుని విశ్లేషించిన ఫోరం ఫర్‌ గుడ్‌ గవర్నెన్స్‌ సంస్థ ఈ వివరాలు వెల్లడించింది. నేరచరిత కలిగిన అభ్యర్థులు పార్టీల వారిగా చూస్తే టీఆర్‌ఎస్‌ నుంచి 13 మంది, బీజేపీ తరపున 17 మంది, కాంగ్రెస్‌ నుంచి 12, మజ్లిస్‌ నుంచి ఏడుగురు ఉన్నారు. ఎన్నికల బరిలో ఉన్న ఆరుగురి మహిళా అభ్యర్థులపైనా కేసులున్నాయని ఎఫ్‌జీజీ తెలిపింది. గ్రేటర్‌లో నేరచరిత్ర కలిగిన వారు పోటీ చేస్తున్న వార్డుల సంఖ్య 41 కాగా .. మల్కాజ్‌గిరిలో పోటీ చేస్తున్న ప్రధాన పార్టీల అభ్యర్థులందరికీ నేరచరిత్ర ఉందని ఎఫ్‌జీజీ సంస్థ కార్యదర్శి పద్మనాభరెడ్డి తెలిపారు.    కేపీహెచ్‌బీ కాలనీ డివిజన్ నుంచి బీజేపీ తరఫున పోటీ చేస్తున్న ప్రీతం కుమార్‌ రెడ్డిపై అత్యధికంగా 9 కేసులు ఉన్నాయి. ఆ తర్వాత షాలిబండ 48 వార్డు నుంచి పోటీ చేస్తున్న ఎంఐఎం అభ్యర్ధి మహ్మద్‌ ముస్తఫా అలీపైన 7 కేసులు ఉన్నాయి. మారెడ్‌పల్లి వార్డు బీజేపీ అభ్యర్థి టి. శ్రీనివాస్‌ రెడ్డిపై 5 కేసులు, మోండా మార్కెట్‌ నుంచి టీఆర్‌ఎస్‌ తరఫున బరిలో దిగిన ఆకుల రూపపైన 5 కేసులు ఉన్నాయని ఎఫ్‌జీజీ వెల్లడించింది. మిగతా వారిలో కొందరిపై నాలుగు, మరికొందరిపై మూడు, రెండు కేసులు ఉండగా చాలా మంది అభ్యర్ధులు కేవలం ఒకే కేసులో నిందితులుగా ఉన్నారు.   గత గ్రేటర్‌ ఎన్నికల్లో 72 మంది నేరచరితులకు వివిధ పార్టీలు టికెట్లు ఇవ్వగా ఈ సారి 49 మందే ఉన్నారు. పోటీ చేస్తున్న వారిలో నేర చరిత్ర ఉన్న వారు తగ్గడం శుభపరిణామని పద్మనాభరెడ్డి చెప్పారు. ఇదే పరిస్థితి కొనసాగితే భవిష్యత్‌లో నేరమయ రాజకీయాలు తగ్గిపోతాయని ఆయన ఆశాభావం వ్యక్తం చేశారు. హైదరాబాద్‌ లో నెలకొన్న ప్రస్తుత పరిస్థితుల నేపథ్యంలో మంచి నాయకుల్ని ఎన్నుకోవాల్సిన అవసరం ఎంతైనా ఉందని, ప్రజలు జాగ్రత్తగా ఓటు వేసి తమకు అవసరమైన వారిని ఎన్నుకోవాలని పద్మనాభరెడ్డి విజ్ఞప్తి చేశారు. 
కరోనా సెకండ్ వేవ్ నేపథ్యంలో ప్రపంచం మొత్తం ఈ మహమ్మారి నుండి కాపాడే వ్యాక్సిన్ కోసం ఎదురుచూస్తోంది. సామాన్యులలో ఎంతో ఆసక్తిని రేపుతున్న ఆక్స్ ఫర్డ్ వ్యాక్సిన్ తుది దశ ట్రయల్ లో ఉన్న సంగతి తెలిసిందే. అయితే తాజాగా ఈ వ్యాక్సిన్ గురించి ఆక్స్ ఫర్డ్ యూనివర్సిటీ, ఆస్ట్రాజెనికా ఫార్మాలు మరో సంచలన విషయం ప్రకటించాయి. తాము రూపొందించిన కరోనా వ్యాక్సిన్ తయారీ ప్రక్రియలో తప్పు జరిగిపోయిందని, దీంతో వ్యాక్సిన్ ట్రయల్స్ లో వచ్చిన ప్రాధమిక ఫలితాలు అనేక ప్రశ్నలను రేపాయని ఆ సంస్థ ఒక ప్రకటనలో తెలిపింది. తామిచ్చిన వ్యాక్సిన్ డోస్ లను తీసుకున్న వారిలో కరోనా నిరోధక శక్తి భారీగా పెరిగిందని ఆక్స్ ఫర్డ్ ప్రకటించిన కొన్ని రోజుల తరువాత, కొంతమంది వాలంటీర్లు రెండు డోస్ లను తీసుకున్నా, వారిలో వ్యాధి నిరోధకత పెంపొందలేదని వార్తలు వస్తున్న నేపథ్యంలో తాజాగా ఆస్ట్రాజెనికా ఫార్మా స్పందించింది. ఆ వాలంటీర్లు తీసుకున్న వ్యాక్సిన్ తయారీలో తప్పు జరిగిందని తెలిపింది.   అసలు విషయం ఏంటంటే ఆక్స్ ఫర్డ్ వ్యాక్సిన్ తక్కువ డోస్ తీసుకున్న వారిలో కరోనా వైరస్ ను ఎదుర్కునే శక్తి ఎక్కువగా ఉందని, అయితే నిర్దేశించిన రెండు డోస్ లను తీసుకున్న వారిలో మాత్రం రోగనిరోధక శక్తి ఆశించిన స్థాయిలో లేదని తన ట్రయల్స్ ఫలితాల రిపోర్టులో పేర్కొన్న సంగతి తెలిసిందే. వ్యాక్సిన్ తక్కువ డోస్ తీసుకున్న వారిలో 90 శాతం పనితీరు కనిపించిందని, అయితే రెండు డోస్ లను పొందిన వారిలో ఇది 62 శాతంగా నమోదైందని ఆస్ట్రాజెనికా వెల్లడించింది. ప్రస్తుతం బ్రిటన్ తో పాటు బ్రెజిల్ లోనూ ఈ వ్యాక్సిన్ పైన పెద్ద ఎత్తున ట్రయల్స్ జరుగుతున్నాయి. ఆస్ట్రాజెనికా ఈ రెండు దేశాల్లో జరుగుతున్నా ట్రయల్స్ ఫలితాలను విడుదల చేయగా వాటిలో ఈ తేడాలు కనిపించాయి. దీంతో ప్రజలలో ఈ వ్యాక్సిన్ పై గందరగోళం నెలకొంటున్నది.
గ్రేటర్ హైదరాబాద్ ఎన్నికల ప్రచారంలో నేతలు చేస్తున్న హాట్ కామెంట్స్ కాక రేపుతున్నాయి. అక్బరుద్దీన్, బండి సంజయ్ వ్యాఖ్యలపై తీవ్రంగా స్పందించారు కాంగ్రెస్ వర్కింగ్ ప్రెసిడెంట్, మల్కాజ్ గిరి ఎంపీ రేవంత్ రెడ్డి. బీజేపీ, ఎంఐఎం నేతల మధ్య ప్రతిరోజు రాత్రి ఫోన్ కాన్ఫరెన్స్ నడుస్తోందని ఆరోపించారు. ఫోన్ కాన్ఫరెన్స్ కు అమిత్ షానే సంధానకర్తగా ఉన్నారని చెప్పారు. రాత్రి సమయంలో బండి సంజయ్, అరవింద్, అసద్, అక్బరుద్దీన్ స్క్రిప్ట్ తయారు చేసుకోవడం..ఉదయం సురభి నాటకానికి తెర లేపుతున్నారని రేవంత్ రెడ్డి విమర్శించారు.   పీవీ, ఎన్టీఆర్ లాంటి మహానేతల పేర్లను బీజేపీ, ఎంఐఎంలు రాజకీయ ప్రయోజనాలకు వాడుకోవడం దుర్మార్గమని రేవంత్ రెడ్డి విమర్శించారు. సొంత పార్టీ నేతలైన అద్వానీ, జోషి, కల్యాణ్ సింగ్ లను గౌరవించుకోలేని బీజేపీ.. పరాయి పార్టీ నేతలపై ప్రేమ ఒలకబోస్తోందని ఎద్దేవా చేశారు. పీవీ, ఎన్టీఆర్ లపై నిజంగా బీజేపీకి ప్రేమ ఉంటే వారిద్దరికి భారతరత్న ఇవ్వాలని డిమాండ్ చేశారు. ఈ నెల 29న హైదరాబాద్ కు వస్తున్న అమిత్ షా.. ఆ మహానేతల ఘాట్లను సందర్శించి, అక్కడే ప్రకటన చేయాలని రేవంత్ రెడ్డి అన్నారు. ఎన్నికల తర్వాత పీవీ, ఎన్టీఆర్ పేరు కూడా బీజేపీ ఉచ్ఛరించదని తెలిపారు. ఎన్నికల తర్వాత పీవీ, ఎన్టీఆర్ పేరు కూడా బీజేపీ ఉచ్ఛరించదన్నారు. ప్రజలు ఇలాంటి ఎమోషన్స్ విషయంలో అప్రమత్తంగా ఉండాలన్నారు రేవంత్ రెడ్డి.
రైతుల ఆందోళనతో దేశ రాజధాని ఢిల్లీ సరిహద్దుల్లో హై టెన్షన్‌ నెలకొంది. కేంద్ర ప్రభుత్వం ప్రవేశపెట్టిన వ్యవసాయ బిల్లును వ్యతిరేకిస్తూ రైతు, కార్మిక సంఘాలు చేపట్టిన ఛలో ఢిల్లీ కార్యక్రమం ఉద్రిక్తంగా మారింది. పంజాబ్‌ నుంచి వేలాది మంది రైతులు హర్యానా మీదుగా రాజధాని వస్తుండగా... వారిని అడ్డుకునేందుకు హర్యానా సర్కార్‌ పెద్ద ఎత్తున పోలీసు బలగాలను మోహరించింది. బారికేడ్లు పెట్టి ఎక్కడిక్కడ రైతులను, కార్మిక సంఘాల నేతలను అడ్డుకుంటోంది. పంజాబ్‌, ఉత్తర ప్రదేశ్‌, రాజస్తాన్‌ హర్యానా రాష్ట్రాల నుంచి పెద్ద ఎత్తున రైతులు ఢిల్లీకి బయలుదేరడంతో ఢిల్లీ ప్రభుత్వం సైతం అప్రమత్తమైంది. రైతులను జల ఫిరంగులు ప్రయోగిస్తూ ఎవరినీ కూడా నగరం లోపలకు అనుమతించకుండా అడ్డుకుంటున్నారు. ఢిల్లీ సరిహద్దులైన గురుగ్రామ్, ఫరీదాబాద్ వద్ద కూడా భారీ భద్రతా ఏర్పాట్లు చేశారు.    రైతుల నిరసనలతో రెండు రోజుల పాటు పంజాబ్‌కు బస్సు సర్వీసులను హర్యానా ప్రభుత్వం నిలిపివేసింది. హర్యానాలో బారీగేట్లను పెట్టి ట్రాఫిక్‌ను మళ్లించారు. పంజాబ్‌కు చెందిన వేలాది రైతులు కాంగ్రెస్ పార్టీ నేతృత్వంలో కవాతుగా ఢిల్లీకి బయలుదేరారు. వారంతా హర్యానా సరిహద్దు వద్ద సమావేశమయ్యారు. దీంతో వారిని అడ్డుకునేందుకు హర్యానా ప్రభుత్వం తన భద్రతా సిబ్బందిని సరిహద్దుల దగ్గర మోహరించింది. కరోనావైరస్ వ్యాప్తి విజృంభిస్తున్న తరుణంలో ఢిల్లీ ప్రభుత్వం నగరంలో ఎటువంటి ర్యాలీని అనుమతించడం లేదు. దీంతో ఢిల్లీ సరిహద్దులో తీవ్ర ఉద్రిక్తతలు నెలకొన్నాయి.
తిరుపతిలో మేమే పోటీ చేస్తాం   ఏకపక్షంగా అభ్యర్ధిని ఎలా ప్రకటిస్తారు?   అమరావతి-పోలవరంపై స్పష్టత కావలసిందే   జనసేన-బీజేపీ సమన్వయ కమిటీ కావాలన్న పవన్   నద్దాతో జనసేనాధిపతి భేటీ   బీజేపీ ఏపీ నాయకత్వ పనితీరుపై జనసేనాధిపతి పవన్‌కల్యాణ్.. ఆ పార్టీ జాతీయ దళపతి నద్దాకు ఫిర్యాదు చేశారా? అమరావతిపై జీవీఎల్, సోము, విష్ణువర్దన్‌రెడ్డి చేస్తున్న వ్యాఖ్యలను, జనసేనాధిపతి కమలదళపతికి ఫిర్యాదు చేశారా? అమరావతిలోనే రాజధాని ఉండాలన్న విషయంపై బీజేపీ స్పష్టత ఇవ్వాలని కోరారా? వీటికి మించి... తిరుపతి లోక్‌సభ ఎన్నికలో తమ పార్టీ పోటీచేస్తుందని స్పష్టం చేశారా? అసలు తమతో సంప్రదింకుండానే ఎంపీ జీవీఎల్.. బీజేపీ అభ్యర్ధి పోటీ చేస్తారని ప్రకటించడంపై పవన్ అగ్గిరాముడయ్యారా?.. తాజాగా ఢిల్లీలో బీజేపీ బాస్ నద్దాతో, జనసేనాధిపతి పవన్ భేటీ వివరాలివేనని జనసేన వర్గాలు చెబుతున్నాయి.   జనసేన  వర్గాల సమాచారం ప్రకారం... రానున్న తిరుపతి లోక్‌సభ ఉప ఎన్నికలో,  జనసేన కచ్చితంగా పోటీ చేస్తుందని పవన్ స్పష్టం చేశారట. బీజేపీ నాయకత్వ సూచన ప్రకారం తాము గ్రేటర్ హైదరాబాద్ ఎన్నికల్లో పోటీ నుంచి విరమించుకున్నందున, తిరుపతి లోక్‌సభ తమకే ఇవ్వాలని పవన్, బీజేపీ బాసును కోరారట. బీజేపీతో మిత్రపక్షంగా ఉన్న తమ అభిప్రాయం తెలుసుకోకుండా, తమతో చర్చింకుండానే తిరుపతిలో బీజేపీ పోటీ చేస్తుందని ఎంపీ జీవీఎల్ నరసింహారావు ప్రకటించడంపై పవన్ ఆగ్రహం వ్యక్తం చేసినట్లు  చెబుతున్నారు. అసలు తాము తిరుపతి విషయంలో ఎలాంటి నిర్ణయం ప్రకటించలేదని, అయితే ఏదో లీకు వార్తలకు బీజేపీ నేతలు  స్పందించడమంటే.. తమను అవమానించినట్లేనని వ్యాఖ్యానించినట్లు తెలిసింది.   అదేవిధంగా అమరావతి అంశంపై,  రాష్ట్ర బీజేపీ నాయకత్వం వ్యవహారశైలిపై పవన్ ఫిర్యాదు చేశారట. రాజధాని అమరావతిలోనే ఉండాలన్నది జనసేన విస్పష్ట విధానమని, కానీ జీవీఎల్-సోము వీర్రాజు-విష్ణువర్దన్‌రెడ్డి అందుకు విరుద్ధమైన ప్రకటలిచ్చి,  రైతుల్లో గందరగోళం రేపడాన్ని నద్దా వద్ద ప్రస్తావించినట్లు సమాచారం. బీజేపీ అమరావతికి అనుకూలమని చెబితేనే, తాను మీకు మద్దతునిచ్చిన విషయాన్ని నద్దాకు గుర్తు చేశారట. దీనిపై ఏపీ నాయకత్వం స్పష్టతనివ్వాలని సూచించారు. రాష్ట్ర  బీజేపీ నాయకత్వం, తాము ఆశించిన స్థాయిలో జగన్ ప్రభుత్వంపై పోరాడటం లేదని.. కొన్ని సంఘటనలు-అంశాలను నద్దా దృష్టికి తీసుకువెళ్లినట్లు సమాచారం.   అటు పోలవరంపైనా గందరగోళం నెలకొందని, ఆ ప్రాజెక్టును కేంద్రమే చేపట్టాలని పవన్ కోరారట. అయితే ఆ విషయంలో కేంద్రం ఒకే అభిప్రాయంతో ఉందని, రాష్ట్ర ప్రభుత్వం నుంచి పూర్తి సమాచారం రావడంలో ఆలస్యమవతుతోందని నద్దా వివరించారట. రెండు పార్టీల మధ్య కీలక అంశాల్లో అభిప్రాయబేధాలు తలెత్తుతున్నందున, తక్షణమే రెండు పార్టీలతో సమన్వయ కమిటీ వేయాలని పవన్ సూచించారట.  అందుకు నద్దా అంగీకరించినట్లు చెబుతున్నారు. తాము హైదరాబాద్‌కు వస్తున్నందున, మరోసారి అక్కడ చర్చిద్దామని పవన్‌తో అన్నారట.  -మార్తి సుబ్రహ్మణ్యం
తెలంగాణ రాజకీయాల్లో ఫైర్ బ్రాండ్ నాయకురాలిగా పేరున్న విజయశాంతి రాజకీయ భవిష్యత్ పై సస్పెన్స్ కొనసాగుతోంది. ప్రస్తుతం కాంగ్రెస్ ప్రచార కమిటీ చైర్మెన్ గా ఉన్న విజయశాంతి.. కొంత కాలంగా ఆ పార్టీకి దూరంగా ఉంటున్నారు. ప్రజాక్షేత్రంలో తిరగకున్నా సోషల్ మీడియాలో యాక్టివ్ గా ఉంటున్నారు రాములమ్మ. టీఆర్ఎస్ సర్కార్, సీఎం కేసీఆర్ పని తీరుపై ఆమె ఘాటుగా ఆరోపణలు సంధిస్తూ ట్వీట్లు చేస్తున్నారు. కేసీఆర్, కేటీఆర్ లను వ్యక్తిగతంగానూ టార్గెట్ చేస్తున్నారు విజయశాంతి. అదే సమయంలో కేంద్ర ప్రభుత్వాన్ని, ప్రధాని మోడీని ప్రశంసిస్తూ ట్వీట్లు చేస్తున్నారు. దీంతో ఆమె బీజేపీలో చేరతారనే ప్రచారం కొన్ని రోజులుగా జరుగుతోంది. కాని కమలం గూటికి ఇంకా చేరలేదు రాములమ్మ.    దుబ్బాక ఉప ఎన్నిక సమయంలోనే విజయశాంతితో సమావేశమయ్యారు కేంద్ర మంత్రి కిషన్ రెడ్డి. మెదక్ జిల్లాకు గతంలో ఎంపీగా ప్రాతినిధ్యం వహించిన రాములమ్మ దుబ్బాకలో కాంగ్రెస్ తరపున ప్రచారం కూడా చేయలేదు. దీంతో అప్పుడే ఆమె బీజేపీలో చేరతారని భావించారు. కాని ఎందుకో ఆమె జాయినింగ్ ఆగిపోయింది. దుబ్బాకలో రఘునందన్ రావు విజయంతో ఆమె బీజేపీలో చేరడం ఖాయమనుకున్నారు. అది కూడా జరగలేదు. గ్రేటర్ ఎన్నికలకు ముందు విజయశాంతి కాషాయ కండువా కప్పుకుంటారని ప్రచారం జరిగింది. ఈనెల 14న రాములమ్మ ఢిల్లీకి వెళుతున్నారని, జేపీ నడ్డా సమక్షంలో బీజేపీలో చేరుతారని ప్రచారం జరిగింది. కాని ఆమె ఢిల్లీ వెళ్లలేదు.. బీజేపీలో చేరలేదు. గ్రేటర్ పోలింగ్ సమయం దగ్గరపడుతున్నా విజయశాంతి కమలం గూటి చేరే ముహుర్తం ఇంకా ఫిక్స్ కాలేదు.    బీజేపీలో విజయశాంతి చేరిక ఆలస్యమవుతుండగా.. శాసనమండలి చైర్మెన్ స్వామి గౌడ్ ఢిల్లీకి వెళ్లి జేపీ నడ్డా సమక్షంలో కాషాయ కండువా కప్పుకున్నారు. స్వామి గౌడ్ బీజేపీలో చేరడం.. ఎప్పటి నుంచో ప్రచారం జరుగుతున్నా విజయశాంతి ఇంకా జాయిన్ కాకపోవడం చర్చనీయాంశంగా మారింది. విజయశాంతి బీజేపీలో చేరుతారని రాష్ట్ర నేతలు కూడా చెబుతూ వస్తున్నారు. కాని ముహుర్తం ఫిక్స్ చేయడం లేదు. దీంతో విజయశాంతి బీజేపీలో చేరికపై కొత్త చర్చలు మొదలయ్యాయి. విజయశాంతి పార్టీలో చేరికకు బీజేపీ హైకమాండ్ ఇంకా సిగ్నల్ ఇవ్వలేదనే చర్చ జరుగుతోంది. దీనికి కొన్ని బలమైన కారణాలు ఉన్నాయంటున్నారు.    రాజకీయాల్లో విజయశాంతికి ఐరెన్ లెగ్ అనే ప్రచారం ఉంది. ఆమె ఏ పార్టీలో చేరినా ఆ పార్టీకి వ్యతిరేక ఫలితాలు వస్తాయని చెబుతుంటారు. 2009లో విజయశాంతి టీఆర్ఎస్ లో చేరగా.. ఆ సంవత్సరం జరిగిన సార్వత్రిక ఎన్నికల్లో టీఆర్ఎస్ కు ఆశించిన ఫలితాలు రాలేదు. 56 నియోజకవర్గాల్లో పోటీ చేసి కేవలం 10 ఎమ్మెల్యే సీట్లనే గెలుచుకుంది. కేసీఆర్ తో పాటు ఆమె మాత్రం ఎంపీలుగా విజయం సాధించారు. 2014లో రాములమ్మ కాంగ్రెస్ లో చేరగా.. ఆ పార్టీ అసెంబ్లీ ఎన్నికల్లో ఘోరంగా ఓడిపోయింది. 2018 అసెంబ్లీ ఎన్నికలకు విజయశాంతిని ప్రచార కమిటి చైర్మెన్ గా నియమించింది కాంగ్రెస్. ఆ ఎన్నికల్లోనూ కాంగ్రెస్ కథ మారలేదు. దీంతో విజయశాంతి ఏ పార్టీలో ఉంటే ఆ పార్టీకి మంచి ఫలితాలు రావనే సెంటిమెంట్ క్రియేట్ అయింది. ఈ నేపథ్యంలోనే విజయశాంతి చేరికపై బీజేపీ నేతలు మల్లగుల్లాలు పడుతున్నారని చెబుతున్నారు. విజయశాంతికి ఉన్న ఐరెన్ లెగ్ ముద్ర కమలనాధులను భయపెడుతున్నట్లు తెలుస్తోంది. గ్రేటర్ ఎన్నికలకు ముందు ఆమె పార్టీలో చేరితే వ్యతిరేక ఫలితాలు వస్తాయోమనన్న ఆందోళన కొందరు బీజేపీ నేతలు వ్యక్తం చేస్తున్నారట. అందుకే గ్రేటర్ ఎన్నికల తర్వాతే విజయశాంతిని పార్టీలో చేర్చుకోవాలని బీజేపీ నిర్ణయించిందని చెబుతున్నారు.
గడ్డి కుంభకోణంలో ప్రస్తుతం జార్ఖండ్ లోని రాంచి జైలులో శిక్ష అనుభవిస్తున్న బీహార్ మాజీ సీఎం లాలూ ప్రసాద్ యాదవ్ ఓ ఎన్డీయే ఎమ్మెల్యేకు ఫోన్ చేసి స్పీకర్ ఎన్నికల్లో ఓటింగ్ కు దూరంగా ఉండాలని మాట్లాడినట్టుగా బయటపడిన ఆడియో టేపులు తాజాగా బీహార్ లో కలకలం రేపుతున్నాయి. జుడిషియల్ కస్టడీలో ఉన్న లాలూ ఫోన్ ఎలా వినియోగించారన్న విషయాన్ని తేల్చేందుకు జార్ఖండ్ సర్కారు విచారణకు ఆదేశించినట్లు ఆ రాష్ట్ర జైళ్ల శాఖ ఐజీ వీరేంద్ర భూషణ్ వెల్లడించారు. రాంచీ డిప్యూటీ కమిషనర్, ఎస్పీ, బిస్రా ముండా జైలు సూపరింటెండెంట్ ల ఆధ్వర్యంలో ఈ విచారణ జరుగుతుందని ఆయన వెల్లడించారు.   అంతేకాకుండా ఆ ఆడియో క్లిప్ ను తాను కూడా విన్నానని, దాని ఆధారంగానే తాము విచారణకు ఆదేశించామని భూషణ్ వెల్లడించారు. జ్యుడీషియల్ కస్టడీలో ఉన్న వారికి జైలు మాన్యువల్ ప్రకారం మొబైల్ ఫోన్ అందుబాటులో ఉండే అవకాశం లేదని, ఆయన ఫోన్ వాడుంటే, ఎవరి ఫోన్ ను వాడారన్న విషయాన్ని కూడా విచారణలో తేలుస్తామని తెలిపారు. మొత్తంగా ఈ వ్యవహారానికి బాధ్యులైన వారిపై కఠిన చర్యలు తీసుకుంటామని అయన అన్నారు. ప్రస్తుతం లాలూ ప్రసాద్ యాదవ్ ఉన్నతాధికారుల అనుమతితో రిమ్స్ డైరెక్టర్ బంగళాలో జ్యుడీషియల్ కస్టడీలో ఉన్న సంగతి తెలిసిందే. దీంతో లాలూను కలవడానికి వచ్చే వారి విషయంలో రాంచీ జిల్లా అధికారులే నిర్ణయాలు తీసుకుంటున్నారు. ఆయనను మళ్ళీ జైలుకు పంపేందుకు ఇప్పటికే అనుమతి కోరుతూ జార్ఖండ్ హైకోర్టులో ఒక పిటిషన్ విచారణలో ఉంది. వైద్యులు ఒకసారి ఆయనను పరిశీలించి, ఆరోగ్యం విషయంలో నివేదిక ఇస్తే, దాన్ని బట్టి తాము నిర్ణయం తీసుకుంటామని అధికారులు వెల్లడించారు.
పీవీ ఘాట్, ఎన్టీఆర్ ఘాట్‌లను కూల్చాలన్న ఎంఐఎం నేత అక్బరుద్దీన్ వ్యాఖ్యలపై మండిపడ్డారు విజయశాంతి. అక్భరుద్దీన్ ఒవైసీకి, ఎంఐఎం నేతలకు ఆమె చురకలంటించారు. అక్బరుద్దీన్ ఒవైసీ జీ ఆక్రమణల పేరుతో పీవీ ఘాట్, ఎన్టీఆర్ ఘాట్‌లను కూల్చాలని డిమాండ్ చేస్తే, మరి కొందరు ప్రజలు ఎఫ్‌టీఎల్ వాటర్ సమస్యలో ఉంది కాబట్టి తాజ్‌మహల్‌ని కూల్చమని అనవచ్చని విజయశాంతి ట్వీట్ చేశారు. ట్రాఫిక్‌కు అడ్డంగా ఉంది కనుక చార్మినార్‌ను కూల్చాలని కూడా అనవచ్చని ఆమె అన్నారు. ఈ విధమైన ప్రకటనలు అక్బరుద్దీన్ ఒవైసీ జీ ఎర్రగడ్డ ప్రాంతంలో మాట్లాడినప్పుడు చేసినందువల్ల.. స్థల ప్రభావంగా భావించి పెద్దగా స్పందించనవసరం లేదని అభిప్రాయపడుతున్నానని విజయశాంతి చురకలంటించారు.
గ్రేటర్ హైదరాబాద్ ఎన్నికల్లో మాటల తూటాలు పేలుతున్నాయి. ట్యాంక్ బండ్ వద్ద ఉన్న ఎన్టీఆర్, పీవీ నరసింహారావుల ఘాట్ లను కూల్చివేయాలన్న ఎంఐఎం శాసనసభ్యుడు అక్బరుద్దీన్ ఒవైసీ వ్యాఖ్యలు తీవ్ర దుమారం రేపుతున్నాయి. అక్భర్ వ్యాఖ్యలకు స్ట్రాంగ్ కౌంటరిచ్చింది బీజేపీ. పీవీ ఘాట్, ఎన్టీఆర్ ఘాట్ కు వెళ్లారు బీజేపీ రాష్ట్ర అధ్యక్షుడు బండి సంజయ్. ఆయన సందర్శనకు అనుమతి లేదని పోలీసులు తేల్చి చెప్పినప్పటికీ ఆయన అక్కడకు వెళ్లి నివాళులర్పించారు. అక్బరుద్దీన్‌పై విమర్శలు గుప్పించారు బండి సంజయ్. ఎన్టీఆర్ కాలిగోటికి ఎంఐఎం పార్టీ సరిపోదని అన్నారు. జీహెచ్ఎంసీ ఎన్నికల్లో టీఆర్ఎస్ కనుమరుగు కాబోతుందని చెప్పారు బండి సంజయ్.          ఎన్టీఆర్ పేరు పెట్టుకున్న కేటీఆర్.. డ్రామారావు అయ్యారని బండి సంజయ్ ఎద్దేవా చేశారు. పీవీ, ఎన్టీఆర్‌పై గౌరవం ఉంటే అక్బరుద్దీన్ వ్యాఖ్యలపై కేసీఆర్ వెంటనే స్పందించాలని.. ఆయన డిమాండ్ చేశారు. మత విద్వేషాల కుట్రలపై పక్కా సమాచారం ఉంటే ఎందుకు చర్యలు తీసుకోలేదని ఆయన ముఖ్యమంత్రిని నిలదీశారు. ఎన్టీఆర్‌కు భారత రత్న ఇవ్వాలని కేంద్ర ప్రభుత్వాన్ని కోరుతున్నామని చెప్పారు బండి సంజయ్.
ఫుట్‌బాల్ మాంత్రికుడు డీగో మారడోనా 60 ఏళ్ల వయసులో బుధవారం గుండె పోటుతో హఠాత్తుగా కన్నుమూశారు. అర్జెంటీనాలోని టిగ్రే పట్టణంలోని తన నివాసంలో ఆయన తుదిశ్వాస విడిచారు. నవంబరు మొదటి వారంలో మారడోనాకు మెదడులో రక్తం గడ్డకట్టడంతో శస్త్రచికిత్స జరిగింది. గతంలో జరిగిన ప్రమాదం వలన మారడోనాకు ఈ సమస్య వచ్చిందని న్యూరాలజిస్ట్ లీయోపోల్డో లాఖ్ గతంలోనే తెలిపారు. అయితే సర్జరీ తరువాత వారం రోజుల క్రితమే బ్యూనస్ ఏర్స్ హాస్పిటల్ నుంచి డిశ్చార్జి అయ్యారు. ప్రస్తుతం ఓ ప్రైవేట్ హోమ్‌లో ఉంటూ ఇప్పుడిప్పుడే కోలుకుంటున్నారు. కానీ అంతలోనే గుండె పోటు రావడంతో హఠాన్మరణం చెందారు మారడోనా.   అర్జెంటీనా తరఫున మారడోనా 91 మ్యాచ్‌ల్లో 34 గోల్స్‌ సాధించాడు. 16 ఏళ్ల వయసులో 1977లో హంగేరిపై మొదటి మ్యాచ్‌ ఆడాడు. 1978లో సొంతగడ్డపై జరిగిన వరల్డ్‌ కప్ లో డీగోకు చోటుదక్కలేదు. వయసు తక్కువ కావడంతో అతడిని టీమ్‌కు ఎంపిక చేయలేదు. 1979లో జరిగిన ఫిఫా యూత్‌ వరల్డ్‌ చాంపియన్‌షి్‌ప్సలో మారడోనా స్టార్‌ ఆఫ్‌ ది టోర్నీగా నిలిచాడు. స్కాట్లాండ్‌తో మ్యాచ్‌లో తొలి అంతర్జాతీయ గోల్‌ సాధించాడు. నాలుగుసార్లు ప్రపంచ కప్ ఫుట్‌బాల్ పోటీల్లో పాల్గొన్న మారడోనా 1986లో అర్జెంటీనా కు ప్రపంచ కప్ అందించారు. 1991లో డోపింగ్ పరీక్షల్లో పట్టుబడి ఏడాదిన్నరపాటు నిషేధానికి గురయ్యారు. 1997లో రిటైర్ అయ్యారు. ప్రస్తుతం అర్జెంటైనా జట్టుకు మేనేజర్‌గా వ్యవహరిస్తున్నారు. అయన కెరీర్‌, జీవితంలో మారడోనా అనేక ఆటుపోట్లను ఎదుర్కొన్నాడు. డ్రగ్స్‌ బారినపడి చావు అంచుల వరకు వెళ్లినా.. మళ్లీ రాగలిగాడు.
గ్రేటర్ హైదరాబాద్ ఎన్నికల ప్రచారం హోరాహోరీగా సాగుతోంది. గెలుపు కోసం అభ్యర్థులు తీవ్రంగా శ్రమిస్తున్నారు. టీఆర్ఎస్, బీజేపీలు ప్రచారంలో దూకుడుగా కనిపిస్తుండగా.. ప్రధాన ప్రతిపక్షం కాంగ్రెస్ మాత్రం వెనకబడిపోయినట్లు కనిపిస్తోంది. ముందు కొంత ఉత్సాహంగా ఉన్నా పోలింగ్ సమయం దగ్గర పడుతున్న కొద్ది కాంగ్రెస్ అభ్యర్థులు కాడి ఎత్తేస్తున్నట్లు కనిపిస్తుందనే చర్చ జరుగుతోంది. మల్కాజ్ గిరి ఎంపీ రేవంత్ రెడ్డి ఒక్కడే గ్రేటర్ లో కాంగ్రెస్ గెలుపు  కోసం ముమ్మర ప్రచారం చేస్తున్నారు. రేవంత్ రెడ్డ ప్రచారానికి ప్రజల్లోనూ మంచి స్పందన కనిపిస్తుంది. రేవంత్ రెడ్డి కూడా రోజు 10 డివిజన్ల వరకు రోడ్ షో నిర్వహిస్తున్నారు. అయితే  ఆయనకు మద్దతుగా ఇతర కాంగ్రెస్ నేతలెవరు గ్రేటర్ ప్రచారంలో యాక్టివ్ గా కనిపించడం లేదు. పీసీసీ ముఖ్య నేతలు కూడా హైదరాబాద్ ప్రచారంలో అంతంత మాత్రంగానే కనిపిస్తున్నారు.    గ్రేటర్ ఎన్నికలను సవాల్ గా తీసుకున్న బీజేపీ ప్రచారంలో  కేంద్రమంత్రులు, ఇతర రాష్ట్రాలు సీఎంలు, ఆ పార్టీ జాతీయ నేతలు పాల్గొంటున్నారు. టీఆర్ఎస్ అయితే రాష్ట్రంలోని ప్రజా ప్రతినిధులందరిని గ్రేటర్ లోనే మోహరించింది. డివిజన్ కో ఎమ్మెల్యే, ఎమ్మెల్సీ, ఎంపీని ఇంచార్జ్ గా పెట్టడంతో .. వారంతా గల్లి గల్లీ తిరిగి టీఆర్ఎస్ అభ్యర్థుల కోసం ఓట్లు అడుగుతున్నారు. ర్యాలీలు, సభలు నిర్వహిస్తూ హడావుడి చేస్తున్నారు. మంత్రి కేటీఆర్ కూడా ఉదయం హుషార్ హైదరాబాద్ సభలు, సాయంత్రం రోడ్ షోలు నిర్వహిస్తూ కారు ప్రచారాన్ని పరుగులు పెట్టిస్తున్నారు. కాంగ్రెస్ లో మాత్రం రేవంత్ రెడ్డి ఒక్కడే ఆ పార్టీ అభ్యర్థులకు దిక్కయ్యారని చెబుతున్నారు. ఇతర నేతలు చురుకుగా లేకపోవడం, ప్రచారానికి వచ్చినా ప్రజల నుంచి స్పందన లేకపోవడంతో.. కాంగ్రెస్ అభ్యర్థులంతా తమ డివిజన్ లో ప్రచారం చేయాలని రేవంత్ రెడ్డిని అభ్యర్థిస్తున్నారని చెబుతున్నారు. అయితే సమయం తక్కువగా ఉండటంతో రేవంత్ రెడ్డి కూడా అన్ని డివిజన్లకు వెళ్లలేకపోతున్నారని చెబుతున్నారు.   తమ  పార్టీ నేతల సహకారం లేకపోవడం.. టీఆర్ఎస్, బీజేపీ దూకుడుగా ఉండటంతో కాంగ్రెస్ అభ్యర్థులు చాలా మంది గ్రేటర్ రేసు నుంచి ముందే తప్పుకున్నారనే ప్రచారం జరుగుతోంది. ఇప్పటికే కొంత మంది అభ్యర్థులు ప్రచారం కూడా ఆపేశారని చెబుతున్నారు. అధికార పార్టీతో పాటు బీజేపీ అభ్యర్థులు భారీగా ఖర్చు చేస్తుండటంతో.. వారిని తట్టుకోవడం సాధ్యం కాదని భావిస్తున్న కొందరు కాంగ్రెస్ అభ్యర్థులు ప్రచారం సమయంలోనే హ్యాండప్ అంటున్నారని సమాచారం. గ్రేటర్ లో 150 డివిజన్లు ఉండగా... పాతబస్తిలోనే 50 వరకు ఉన్నాయి. అక్కడ ఎంఐఎంకి తప్ప ఏ పార్టీకి ఆశలు ఉండవు. మిగిలిన వంద డివిజన్లలో టీఆర్ఎస్, బీజేపీ, కాంగ్రెస్ పోటీ పడుతున్నాయి. ఇందులో ఇప్పుడు కాంగ్రెస్ అభ్యర్థులు కేవలం 20 నుంచి 25 స్థానాల్లో మాత్రం ప్రత్యర్థులకు పోటీ ఇస్తుందని తెలుస్తోంది. ముందు దాదాపు 60 డివిజన్లలో కాంగ్రెస్ అభ్యర్థులు ఉత్సాహంగానే ప్రచారం చేసినా.. పరిస్థితులను బట్టి చాలా మంది హస్తం అభ్యర్థులు వెనక్కి తగ్గారని చెబుతున్నారు.   కాంగ్రెస్ అభ్యర్థులు గట్టి పోటీ ఇస్తున్న డివిజన్లు అన్ని మల్కాజ్ గిరి లోక్ సభ పరిధిలోనే ఉన్నాయని తెలుస్తోంది. ఎంపీ రేవంత్ రెడ్డి ప్రతిష్టాత్మకంగా తీసుకోవడం వల్లే అక్కడ కాంగ్రెస్ పోటీ ఇస్తుందని రాజకీయ వర్గాలు అంచనా వేస్తున్నాయి. తన ఎంపీ పరిధిలోకి వచ్చే మల్కాజ్ గిరి, ఎల్బీ నగర్, ఉప్పల్, కుత్బుల్లాపూర్ అసెంబ్లీ నియోజకవర్గాల్లో బలమైన అభ్యర్థులను బరిలోకి దింపారు రేవంత్ రెడ్డి. వారి కోసం ప్రచారం కూడా ముమ్మరంగా చేస్తున్నారు. దీంతో ఈ నాలుగు నియోజకవర్గాల పరిధిలోనే కాంగ్రెస్ అభ్యర్థులు రేసులో ఉన్నారని, మిగితా అన్ని నియోజకవర్గాల్లో ముందే చేతులెత్తేశారని చెబుతున్నారు. రేవంత్ రెడ్డి ప్రచారానికి మంచి స్పందన వస్తుండటంతో కుత్బుల్లాపూర్, ఉప్పల్, మల్కాజ్ గిరి నియోజకవర్గాల్లో కాంగ్రెస్ కు మంచి ఫలితాలు రావచ్చని చెబుతున్నారు. ఎల్బీ నగర్ లో రేవంత్ రెడ్డి క్రేజీ  ఉన్నప్పటికి.. కొందరు ముఖ్యనేతలు బీజేపీలో చేరడంతో  కాంగ్రెస్ కు బలమైన అభ్యర్థులు దొరకలేదని తెలుస్తోంది. మొత్తంగా గ్రేటర్ కాంగ్రెస్ గెలుపు భారమంతా రేవంత్ రెడ్డిపైనే పడిందని, ఆయన కూడా గట్టిగానే ప్రయత్నాలు చేస్తున్నారని కాంగ్రెస్ నేతలే చెబుతున్నారు. మరీ ఒకే ఒక్కడుగా పోరాడుతున్న రేవంత్ రెడ్డి.. జీహెచ్ఎంసీలో కాంగ్రెస్ కు ఎన్ని సీట్లు సాధించి పెడతారో చూడాలి మరీ...
తీవ్ర నిరాశ నిస్పృహలో ఉన్న కొన్ని అరాచక శక్తులు హైదరాబాద్ నగరంలో, తెలంగాణ రాష్ట్రంలో ఘర్షణలు సృష్టించి మత విద్వేషాలు రెచ్చగొట్టడానికి కుట్ర పన్నుతున్నాయని, వారి పట్ల అత్యంత కఠినంగా వ్యవహరించాలని ముఖ్యమంత్రి పోలీసు అధికారులను ఆదేశించారు. అరాచక శక్తుల కుట్రలకు సంబంధించి ప్రభుత్వానికి ఖచ్చితమైన సమాచారం ఉందని సిఎం అన్నారు. హైదరాబాద్ నగరంలో, తెలంగాణ రాష్ట్రంలో శాంతి భద్రతలు కాపాడడమే అత్యంత ప్రధానమని, సామరస్య వాతావరణాన్ని దెబ్బతీసి రాజకీయ ప్రయోజనం పొందాలనుకునే వ్యక్తులు, శక్తుల పట్ల అత్యంత కఠినంగా వ్యవహరించాలని, సంఘ విద్రోహ శక్తులను ఉక్కుపాదంతో అణచివేయాలని చెప్పారు. సంఘ విద్రోహ శక్తులను అణచివేసే విషయంలో పోలీసులకు ప్రభుత్వం పూర్తి స్వేచ్ఛ ఇస్తుందని సిఎం ప్రకటించారు.   రాష్ట్రంలో శాంతి భద్రతల పరిస్థితిపై ముఖ్యమంత్రి కేసీఆర్ బుధవారం ప్రగతి భవన్ లో ఉన్నత స్థాయి సమీక్ష నిర్వహించారు. ప్రభుత్వ ప్రధాన కార్యదర్శి సోమేశ్ కుమార్, డి.జి.పి. మహేందర్ రెడ్డి, హైదరాబాద్, సైబరాబాద్, రాచకొండ సిపిలు అంజనీ కుమార్, విసి సజ్జనార్, మహేశ్ భగవత్, అడిషనల్ డిజిపి జితేందర్, ఐజిలు స్టీఫెన్ రవీంద్ర, వై. నాగిరెడ్డి, నిజామాబాద్ ఐజి శివ శంకర్ రెడ్డి, వరంగల్ ఐజి ప్రమోద్ కుమార్ తదితరులు పాల్గొన్నారు.   జిహెచ్ఎంసి ఎన్నికల సందర్భంగా రాజకీయ లబ్ది పొందడానికి కొందరు అనేక కుట్రలు చేస్తున్నారు. మొదట సోషల్ మీడియా ద్వారా తప్పుడు ప్రచారాలు చేశారు. మార్ఫింగ్ ఫోటోలతో ప్రజలను ఏమార్చాలని చూశారు. తర్వాత మాటలతో కవ్వింపు చర్యలకు పూనుకున్నారు. అయినప్పటికీ సహజంగానే శాంతి కాముకులైన హైదరాబాద్ ప్రజలు వారి కవ్వింపు మాటలను, అబద్ధపు ప్రచారాన్ని పట్టించుకోలేదు. మత విద్వేషాలు రెచ్చగొట్టడానికి ఎన్ని మాటలు మాట్లాడినా ప్రజల నుంచి స్పందన రావడం లేదు. డబ్బులు పంచి ఓట్లు దండుకోవాలనే ప్రయత్నాలు కూడా హైదరాబాద్ లో నడవవు అని వారికి తెలిసింది. దీంతో వారు మరింత దిగజారి రాష్ట్రంలో, ముఖ్యంగా హైదరాబాద్ నగరంలో ఘర్షణలు సృష్టించి రాజకీయ లబ్ది పొందాలని చూస్తున్నారు. రాష్ట్రంలోని ఏ కరీంనగర్లోనో, వరంగల్ లోనో, ఖమ్మంలోనో, మరో చోటనో గొడవలు రాజేసి, దాన్ని హైదరాబాద్ లో విస్తృత ప్రచారం చేయాలని చూస్తున్నారు. హైదరాబాద్ నగరంలో కూడా ఏదో ఓ చోట గొడవ పెట్టుకోవాలని, దానికి మతం రంగు పూయాలని, ప్రార్థనా మందిరాల దగ్గర ఏదో ఓ వికృత చేష్ట చేయాలని చూస్తున్నారు. అలా చేసి ప్రజల మధ్య మత విద్వేషాలు రెచ్చగొట్టాలని చూస్తున్నారు. పెద్ద ఎత్తున గొడవలు చేసి, ఘర్షణ వాతావరణాన్ని సృష్టించి అసలు జిహెచ్ఎంసి ఎన్నికలు నిర్వహించే పరిస్థితి లేకుండా చేయాలని, ఎన్నికలు వాయిదా వేయించాలని పక్కా ప్రణాళిక రచించారు. దీనికి సంబంధించిన సమాచారం ప్రభుత్వం వద్ద ఉంది అని సిఎం కేసీఆర్ చెప్పారు.    హైదరాబాద్ నగరంతో పాటు రాష్ట్రంలో శాంతి సామరస్యాలు యథావిధిగా కొనసాగాలన్నదే ప్రభుత్వ లక్ష్యం. ఎట్టి పరిస్థితుల్లో సంఘ విద్రోహ శక్తుల ఆటలు సాగనీయవద్దు. ఎంతో పోరాడి తెలంగాణ సాధించుకున్నాం. కడుపు కట్టుకుని, నోరు కట్టుకుని నిబద్ధతతో పనిచేసి రాష్ట్రాన్ని ఓ దరికి తెచ్చాం. శాంతిభద్రతల పరిరిక్షణలో రాజీలేకుండా వ్యవహరిస్తున్నాం. పేకాట కబ్బులు, గుడుంబా లాంటి మహమ్మారులను దూరం చేశాం. సంఘ విద్రోహ శక్తుల పట్ల, మాఫియాల పట్ల, విచ్చిన్నకర శక్తుల పట్ల టిఆర్ఎస్ ప్రభుత్వం ఎంత కఠినంగా వ్యవహరించిందో ప్రజలు చూశారు. ప్రభుత్వం తీసుకున్న చర్యలకు ప్రజల నుంచి పెద్ద ఎత్తున మద్దతు లభించింది. శాంతి భద్రతలను కాపాడే విషయంలో, సంఘ విద్రోహ శక్తులను అణచివేసే విషయంలో ప్రభుత్వం మొదటి నుంచి రాజీలేని ధోరణి అవలంభిస్తున్నది. కాబట్టే నేడు హైదరాబాద్ నగరం, రాష్ట్రం ప్రశాంతంగా ఉంది. ప్రజలు సుఖంగా ఉన్నారు. ఎవరి పని వారు ఎలాంటి ఇబ్బంది లేకుండా చేసుకుంటున్నారని చెప్పారు కేసీఆర్.   ప్రపంచ వ్యాప్తంగా హైదరాబాద్ నగరానికి సేఫ్ సిటీ అనే మంచి పేరు వచ్చింది. పెద్ద ఎత్తున పెట్టుబడులు నగరానికి వస్తున్నాయి. యువకులకు ఉపాధి దొరుకుతున్నది. హైదరాబాద్ మహా నగరంలో మూడు కమిషనరేట్ల పరిధిలో దాదాపు కోటి 60 లక్షల జనాభా ఉంది. ఈ నగరాన్ని కాపాడుకోవడం ప్రభుత్వానికున్న ప్రధాన బాధ్యత. ప్రభుత్వానికి ఈ రాష్ట్రం బాగుండడం ముఖ్యం. హైదరాబాద్ ప్రశాంతంగా ఉండడం ముఖ్యం. ఇక్కడి ప్రజలు సుఖ సంతోషాలతో జీవించడం ముఖ్యం. ప్రశాంత హైదరాబాద్ నగరంలో, తెలంగాణకు గుండె కాయ లాంటి హైదరాబాద్ లో మత విద్వేషాలు రెచ్చగొట్టి, మత ఘర్షణలు పెట్టి, రాజకీయ లబ్ది పొందాలని కొందరు ప్రయత్నాలు చేస్తున్నారు. హైదరాబాద్ నగర ప్రశాంతతను ఫణంగా పెట్టి ఎవరినో క్షమించాల్సిన అవసరం లేదు. ఘర్షణలు సృష్టించే వారి పట్ల అత్యంత కఠినంగా వ్యవహరించాలి. ఎంతటి వారినైనా సరే, వారు అధికార పార్టీ సభ్యులైనా సరే వదలొద్దు. ఎక్కడికక్కడ సమాచారం సేకరించి, ఎప్పటికప్పుడు అప్రమత్తంగా ఉండి కుట్రలను భగ్నం చేయాలని అని సిఎం కేసీఆర్ స్పష్టం చేశారు.    ప్రశాంత హైదరాబాద్ లో మత చిచ్చు పెట్టడానికి, శాంతి భద్రతలకు విఘాతం కలిగించడానికి ప్రయత్నాలు చేసే శక్తుల పట్ల అప్రమత్తంగా ఉండాలని సిఎం కేసీఆర్ ప్రజలకు పిలుపునిచ్చారు. ఉద్వేగాలు, ఉద్రేకాలు రెచ్చగొట్టే వారి విషయంలో జాగ్రత్తగా ఉండాలని, ఎవరో రెచ్చగొడితే రెచ్చిపోవద్దని యువకులను కోరారు. ఎన్నికల్లో ప్రజాస్వామ్య బద్ధంగా, పారదర్శకంగా పోరాడాలని రాజకీయ పార్టీలను కోరారు. పోలీసు యంత్రాంగం పూర్తి అప్రమత్తతతో ఉంటుందని, ఎట్టి పరిస్థితుల్లో అరాచక, సంఘ విద్రోహ శక్తుల కుట్రలు భగ్నం చేసి తీరుతామని పోలీసు అధికారులు ఈ సందర్భంగా ముఖ్యమంత్రికి హామీ ఇచ్చారు. హైదరాబాద్ లోనే కాకుండా, రాష్ట్ర వ్యాప్తంగా పోలీసు అధికారులు అప్రమత్తంగా ఉంటారని, ఎక్కడ ఏ చిన్న అవాంఛనీయ సంఘటన జరగకుండా చూస్తామని ముఖ్యమంత్రి స్పష్టం చేశారు.
టీఆర్ఎస్ లో అసమ్మతి బాంబ్ పేలబోతుందా? కేసీఆర్ కు షాకిచ్చేందుకు నేతలు ఒక్కొక్కరుగా సిద్ధమవుతున్నారా? కారు పార్టీకి ఇకపై వరుస కష్టాలేనా? తెలంగాణలో జరుగుతున్న రాజకీయ మార్పులతో జనాల్లో ఇదే చర్చ జరుగుతోంది. శాసనమండలి మాజీ చైర్మన్ స్వామి గౌడ్ బీజేపీలో చేరడంతో.. ఆయన బాటలోనే మరికొందరు గులాబీ నేతలు కమలం గూటికి చేరేందుకు సన్నాహాలు చేసుకుంటున్నారని తెలుస్తోంది. కేసీఆర్ తీరుపై గుర్రుగా ఉన్న నేతలంతా బయటికి రాబోతున్నారనే ప్రచారం జరుగుతోంది.    శాసనమండలి మాజీ చైర్మెన్ స్వామి గౌడ్ కొంత కాలంగా కేసీఆర్ తీరుపై అసంతృప్తిగా ఉన్నారు. శాసనమండలి చైర్మెన్ పదవి కాలం ముగిసాకా ఆయనను పట్టించుకోవడమే మానేశారట టీఆర్ఎస్ పెద్దలు. గత అసెంబ్లీ ఎన్నికల్లో రాజేంద్రనగర్ నుంచి పోటీకి సిద్ధమైన స్వామి గౌడ్ కు టికెట్ ఇవ్వలేదు. లోక్ సభ ఎన్నికల్లో చేవెళ్ల టికెట్ ఇస్తారని ప్రచారం జరిగినా అది కూడా జరగలేదు. దీంతో కేసీఆర్ వైఖరి, టీఆర్ఎస్ సర్కార్ పై చాలా సార్లు అసంతృప్తిని బాహాటంగానే వ్యక్తపరిచారు స్వామి గౌడ్. తెలంగాణ ఉద్యమంలో ఉద్యోగులందరిని ఏకం చేసిన తనకు ప్రభుత్వంలో తగిన ప్రాధాన్యత దక్కడం లేదని ఆయన ఆగ్రహంగా ఉన్నారనే ప్రచారం జరిగింది. రెండు నెలల క్రితం కూడా హాట్ కామెంట్స్ చేశారు. టీఆర్ఎస్ లో బీసీ నేతలను పట్టించుకోవడం లేదని ఆయన ఆరోపించారు. దీంతో స్వామి గౌడ్ పార్టీ మారతారని ప్రచారం జరిగినా ఆయన ఖండిస్తూ వచ్చారు.    దుబ్బాక ఉప ఎన్నిక విజయంతో స్పీడ్ పెంచిన బీజేపీ.. మూడేళ్ల తర్వాత జరగనున్న అసెంబ్లీ ఎన్నికల్లో గెలుపే లక్ష్యంగా పావులు కదుపుతోంది. అందులో భాగంగానే గులాబీ పార్టీలో అసంతృప్తిగా ఉన్న నేతలను పార్టీలోకి ఆహ్వానిస్తోంది. ఇటీవలే స్వామిగౌడ్‌తో రాష్ట్ర బీజేపీ అధ్యక్షుడు బండి సంజయ్‌, కేంద్రమంత్రి కిషన్‌రెడ్డి, బీజేపీ నేత లక్ష్మణ్‌ సమావేశమై బీజేపీలోకి రావాలని ఆహ్వానించారు. అయితే అప్పుడు చేరికను నిర్దారించని స్వామి గౌడ్.. ఢిల్లీకి వెళ్లి బీజేపీ జాతీయ అధ్యక్షుడు జేపీ నడ్డా సమక్షంలో కాషాయ కండువా కప్పుకున్నారు. స్వామి గౌడ్ చేరికతో గ్రేటర్ ఎన్నికల్లో బీజేపీకి భారీగా ప్రయోజనం కలగనుంది కమలం నేతలు చెబుతున్నారు. తెలంగాణ ఉద్యమంలో ఉద్యోగులను ఏకతాటిపై నడిపిన స్వామి గౌడ్ కు.. ఇప్పటికే ఉద్యోగ సంఘాలపై పట్టుంది. గ్రేటర్ ఓటర్లలో లక్షలాది మంది ఉద్యోగులు ఉన్నారు. వారంతా ఇప్పుడు బీజేపీకి సపోర్ట్ చేయవచ్చని భావిస్తున్నారు. నగరంలోని గౌడ సామాజిక వర్గం కూడా బీజేపీ వైపు మెగ్గుచూపుతుందని భావిస్తున్నారు.                   స్వామి గౌడ్ బీజేపీలో చేరడంతో తెలంగాణ రాజకీయాల్లో కీలక మార్పులు జరిగే అవకాశం ఉందని చెబుతున్నారు. స్వామి గౌడ్ బాటలోనే చాలా మంది టీఆర్ఎస్ నేతలు కారు దిగి కమలం గూటికి చేరబోతున్నారనే ప్రచారం జరుగుతోంది. తెలంగాణ ఉద్యమంలో క్రియాశీలకంగా పనిచేసిన చాలా మంది నేతలకు ఇప్పటి వరకు ఎలాంటి పదవులు రాలేదు. అలాంటి వారంతా బీజేపీలో చేరుతారని చెబుతున్నారు. ప్రస్తుతం టీఆర్ఎస్ బీటీ, యూటీ బ్యాచ్ లుగా విడిపోయిందన్న చర్చ జరుగుతోంది. బంగారు తెలంగాణ.. బీటీ బ్యాచ్ హవానే పార్టీలో సాగుతుందని.. ఉద్యమ తెలంగాణ నేతలకు అన్యాయం జరుగుతుందన్న విమర్శలు ఉన్నాయి. పలుసార్లు స్వామిగౌడ్ కూడా ఇదే విషయాన్ని చెప్పారు. దీంతో ఇప్పుడు యూటీ బ్యాచ్ నేతలంతా బీజేపీ వైపు వస్తారని భావిస్తున్నారు. ఇప్పటికే చాలా మంది నేతలు కమలం నేతలతో టచ్ లోకి వచ్చారని చెబుతున్నారు. గ్రేటర్ ఎన్నికల్ల బీజేపీ విజయం సాధిస్తే .. ఆ పార్టీలోకి వలసలు మరింత పెరుగుతాయంటున్నారు.    మరోవైపు స్వామి గౌడ్ చేరికతో తమకు మరింత బలం వచ్చిందని భావిస్తున్న తెలంగాణ బీజేపీ నేతలు.. గ్రేటర్ ఎన్నికల పోలింగ్ కు ముందే మరిన్ని చేరికలకు ప్లాన్ చేస్తున్నారని తెలుస్తోంది. గ్రేటర్ ప్రచారానికి జేపీ నడ్డా రానుండటంతో.. ఆయన సమక్షంలో మరికొందరు టీఆర్ఎస్ నేతలు కాషాయ కండువా కప్పుకునేలా కసరత్తులు చేస్తున్నారట. మొత్తంగా స్వామి గౌ]డ్ తో మొదలైన టీఆర్ఎస్ నుంచి జంపింగ్ లు కొనసాగుతూనే ఉంటాయని, టీఆర్ఎస్ నుంచి బీజేపీలోకి ఊహించని విధంగా చేరికలు ఉంటాయని తెలంగాణ బీజేపీ నేతలు చెబుతున్నారు. కొందరు పెద్ద నేతలు కూడా కమలం పెద్దలతో మాట్లాడుతున్నారని కూడా బాంబ్ పేల్చుతున్నారు.

మొన్న అసద్.. నిన్న అక్భర్‌కు సెగ! ఎంఐఎం చేతులెత్తెసినట్టేనా?

జీహెచ్ఎంసీ ఎన్నికల్లో జిమ్మిక్కు జరగనుందా? పతంగి పార్టీకి ఊహించని ఫలితాలు రాబోతున్నాయా?  ఓల్డ్ సిటీ బాద్ షాలకు షాక్ తగలనుందా?. అంటే అవుననే సమాధానమే వస్తోంది.  గ్రేటర్ ఎన్నికల ప్రచారంలో చోటు చేసుకుంటున్న వరుస పరిణామాలు ఇందుకు బలాన్నిస్తున్నాయి. పాతబస్తిలో తమకు తిరుగులేదని భావించే ఎంఐఎం పార్టీకి వ్యతిరేక పవనాలు వీస్తున్నాయని తెలుస్తోంది.  ఓల్ట్ సిటీలో ఇప్పటివరకు పతంగి పార్టీదే హవా. గత నాలుగు పర్యాయాలుగా వారికి 45 నుంచి 50 డివిజన్లు వస్తున్నాయి. పాతబస్తీలో పతంగి పార్టీకి పోటీ ఇచ్చే స్థాయిలోనూ ఏ పార్టీ నిలవడం లేదు. అయితే  ప్రస్తుతం పాతబస్తీలో సీన్ రివర్స్ అయినట్లు కనిపిస్తోంది. బాద్ షా అనుకుంటున్నవారికే దిమ్మతిరిగే షాకులు తగులుతున్నాయి.  గతంలో ఎంఐఎం పార్టీ గురించి మాట్లాడాలంటేనే పాతబస్తీలో భయపడేవారు. ఒవైసీల గురించి అయితే అసలు చెప్పనవరసం లేదు. ఒవైసీ బ్రదర్స్ ముందు నిలబడటానికి కూడా ఎవరూ సాహసించేవారు  కాదు. కాని ఇప్పుడు ఎంఐఎం పార్టీకి వ్యతిరేకంగా పాతబస్తిలో ఆందోళనలు జరుగుతున్నాయి. ఆ పార్టీ లీడర్లను ప్రజల నుంచి చీత్కారాలు ఎదురవుతున్నాయి. అంతేకాదు ఏకంగా ఒవైసీ బ్రదర్స్ నే  నిలదీస్తున్నారు ఓల్ట్ సిటీ ఓటర్లు. సమస్యలు పరిష్కరించాలని ధైర్యంగా అడుగుతున్నారు. వరదల సమయంలో ఎంఐఎంకు వ్యతిరేకంగా చాలా ప్రాంతాల్లో నిరసనలు జరిగాయి. ఇప్పుడు గ్రేటర్ ఎన్నికల ప్రచారంలోనూ ఎంఐఎం నేతలు జనాగ్రహాన్ని చవి చూస్తున్నారు.  ముషిరాబాద్ లో ఎంఐఎం అభ్యర్థి తరపున ప్రచారానికి వెళ్లిన ఆ పార్టీ శాసనసభాపక్ష నేత అక్భరుద్దీన్ కు నిరసన సెగ తగిలింది. ఎన్నికల సభలో మాట్లాడేందుకు అక్భర్ మైక్ దగ్గరకు రాగానే ముస్లిం మహిళలు పెద్ద ఎత్తున నినాదాలు చేశారు. తమకు వరద సాయం అందలేదంటూ ఆగ్రహం వ్యక్తం చేశారు. ఆయన ప్రసంగాన్ని అడ్డుకున్నారు. కామ్ గా ఉండాలని మూడు, నాలుగు సార్లు అక్బరుద్దీన్ కోరినా  ఎవరూ పట్టించుకోలేదు. దీంతో అసహనానికి గురైన అక్భరుద్దీన్  ప్రసంగించడం ఆపేశారు. తనకు చాలా పని ఉందని, వెళ్లిపోతున్నానని.. డిసెంబర్ 1న జరిగే పోలింగ్ లో ఎంఐఎం అభ్యర్థికి ఓటు వేసి గెలిపించాలని చెప్పి వేదిక దిగి నిమిషాల్లో  అక్కడి నుంచి వెళ్లిపోయారు. అక్భర్ సభ నుంచి మాట్లాడకుండానే వెళ్లిపోవడంతో స్థానిక ఎంఐఎం కార్యకర్తలు షాకయ్యారు.  జాంబాగ్ ఎంఐఎం అభ్యర్థి రవీందర్‌ తరుఫున ప్రచారానికి వెళ్లిన ఆ పార్టీ అధినేత అసదుద్దీన్‌కు ఊహించని చేదు అనుభవం ఎదురైంది. ఓవైసీని స్థానిక ముస్లిం మహిళలు అడ్డుకున్నారు. వరద సాయంపై వారు అసద్ కు ప్రశ్నల వర్షం కురిపించారు. తమకు వరద సాయం పదివేలు అందలేదని... ప్రజాప్రతినిధులుగా ఉన్న మీరు ఏం చేస్తున్నారని ఆ మహిళలు ప్రశ్నించారు. మహిళల నిరసనతో అసదుద్దీన్ షాక్ తిన్నారు. గతంలో కూడా ఎంఐఎంని గెలిపిస్తే జాంబాగ్‌లో ఎలాంటి అభివృద్ధి లేదని, ఐదేళ్లకోసారి వచ్చి ఓట్లు అడిగి.. గెలవగానే ముఖం చాటేస్తున్నారని వారు ఆగ్రహం వ్యక్తం చేశారు. మహిళల ఆందోళనతో వారికి ఎలాంటి సమాధానం చెప్పకుండానే, అక్కడ  ప్రచారం చేయకుండానే అసదుద్దీన్‌ ఓవైసీ వెనుదిరిగారు.  పాతబస్తిలోని చాలా డివిజన్లలో ఇదే పరిస్థితి ఉందని తెలుస్తోంది.ఎంఐఎం ఎమ్మెల్యేలు, కార్పొరేటర్లుగా పోటీ చేస్తున్న అభ్యర్థులను ఓటర్లు ఎక్కడికక్కడ నిలదీస్తున్నారు. రోడ్డు వేయడం లేదని, తాగునీరు సరిగా రావడం లేదని ఎన్నిసార్లు చెప్పినా.. పట్టించుకోవడం లేదని మహిళలు మండిపడుతున్నారు. పాతబస్తీలో వచ్చిన మార్పులతో ప్రస్తుతం ఎంఐఎం నేతలకు వణుకు పుడుతున్నట్లు చెబుతున్నారు. అందుకే ఇతర పార్టీల వారు ప్రచారానికి వస్తే అడ్డుకుంటున్నారని తెలుస్తోంది. అక్బర్ బాగ్ డివిజన్ సపోటాబాగ్ లో టీఆర్ఎస్ అభ్యర్థిని ఎంఐఎం కార్యకర్తలు అడ్డుకోవడం ఉద్రిక్తతకు దారి తీసింది. ఓల్డ్ సిటీలోని మరికొన్ని ప్రాంతాల్లోనూ ఇలాంటి ఘటనలే జరుగుతున్నాయని చెబుతున్నారు. మొత్తంగా ఓల్డ్ సిటీలో జరుగుతున్న పరిమాణాలతో పతంగి పార్టీకి కష్టాలు మొదలయ్యాయనే చర్చ జరుగుతోంది. పరిస్థితిని గమనించడం వల్లే అసద్, అక్భర్ లు పాదయాత్రలు చేస్తున్నారని చెబుతున్నారు.

‘కారు’కు ‘కమ్మ’ని కబురు!

గ్రేటర్‌లో కమ్మ ఓటర్లు టీఆర్‌ఎస్ వైపే?   ‘అమరావతి’పై ‘కమలం’ కప్పగంతులే కారణమట   గ్రేటర్ హైదరాబాద్ మున్సిపల్ కార్పొరేషన్ ఎన్నికల్లో కమ్మ సామాజిక వర్గం, మరోసారి టీఆర్‌ఎస్ ‘కారు’ వైపే  చూస్తోందా? నగరంలోని కమ్మ వర్గ పెద్దలు, వివిధ పార్టీల్లో ఉన్న ఆ సామాజిక వర్గ నేతలు చెబుతున్న విశ్లేషణ ప్రకారం.. పలు నియోజకవర్గాల్లో నిర్ణయాత్మక శక్తిగా ఉన్న కమ్మ సామాజికవర్గం, రానున్న గ్రేటర్ ఎన్నికల్లో టీఆర్‌ఎస్‌కే మళ్లీ పట్టం కట్టేందుకు సిద్ధమవుతున్నట్లు తెలుస్తోంది. బీజేపీ, కాంగ్రెస్, టీడీపీ కూడా కమ్మ వర్గానికి నాలుగు సీట్లు ఇచ్చినా.. ఆ కులం ఓటర్లు మాత్రం కారు ఎక్కేందుకే ఆసక్తి ప్రదర్శిస్తుండటం విశేషం.   కమ్మ వర్గం స్వాభావికంగా టీడీపీకి, సంప్రదాయ ఓటు బ్యాంకుగా దశాబ్దాల నుంచి కొనసాగుతోందన్నది బహిరంగమే. దాని పలితంగానే ఉమ్మడి రాష్ట్రంలో, నగరంలోని శేరిలింగంపల్లి, సనత్‌నగర్, కూకట్‌పల్లి, ఎల్బీనగర్, ఉప్పల్, మల్కాజిగిరి, రాజేంద్రనగర్, కుత్బుల్లాపూర్ వంటి నియోజకవర్గాల్లో టీడీపీ విజయం సాధించగలిగింది. అక్కడ సెటిలర్ల సంఖ్య ఎక్కువయినప్పటికీ, వారిలో కమ్మ వారి హవానే ఎక్కువ కావడం దానికి మరో ప్రధాన కారణం.   రాష్ట్ర  విభజన తర్వాత కూడా... నగరంలో టీడీపీ చెప్పుకోదగ్గ ఫలితాలే సాధించింది. అయితే, చంద్రబాబునాయుడు తెలంగాణపై దృష్టిసారించకపోవడంతో,  ఉన్న ఎమ్మెల్యేలంతా టీఆర్‌ఎస్‌లో చేరారు. పోనీ ఆ తర్వాత కూడా బాబు మేల్కొనకపోవడంతో, ద్వితీయ శ్రేణి నేతలు కూడా పార్టీని వీడారు. ఇప్పుడు మొత్తం 150 డివిజన్లలో 90 డివిజన్లకే పోటీ చేస్తుందంటే, ఆ పార్టీ పరిస్థితి ఎంత దయనీయంగా ఉందో అర్ధం చేసుకోవచ్చు. ఇప్పటికీ, ఎన్టీఆర్ హయాం నుంచి పనిచేస్తున్న నేతలు మాత్రమే టీడీపీలో కొనసాగుతుండగా, వారిలో కమ్మవారే ఎక్కువ. ఇతర పార్టీల్లో అవకాశం లేక, ఉన్నా అక్కడి వాతావరణంలో సర్దుకోలేక, విధిలేక టీడీపీలోనే కొనసాగుతున్న పరిస్థితి. నిజానికి ఈ ఎన్నికల్లో అంతమంది అభ్యర్ధులను వెతికి నామినేషన్లు వేయించడం.. టీడీపీ సీనియర్ నేత, ఆ పార్టీ నగర అధ్యక్షుడు పిన్నమనేని సాయిబాబా నాయకత్వ ప్రతిభ, పొలిట్‌బ్యూరో సభ్యుడయిన అరవిందకుమార్‌గౌడ్ పర్యవేక్షణ ఫలితమని చెప్పకతప్పదు.   అయితే, టీడీపీకి సంప్రదాయ మద్దతుదారుగా ఉన్న కమ్మవారికి.. ఈ ఎన్నికల్లో కేవలం 6 సీట్లు మాత్రమే ఇచ్చారంటే, టీడీపీని కమ్మ వారు ఎంత వేగంగా వీడిపోతున్నారో స్పష్టమవుతోంది. శేరిలింగంపల్లి, కూకట్‌పల్లి, కుత్బుల్లాపూర్, సనత్‌నగర్, ఉప్పల్, ఎల్బీనగర్ నియోజకవర్గాల్లో విజయాన్ని నిర్దేశించే స్థాయిలో ఉన్నప్పటికీ, కమ్మ వర్గ నేతలు.. టీడీపీ వైపు కాకుండా టీఆర్‌ఎస్-బీజేపీ వైపు చూడటం ఆశ్చర్యం. ఈ ఎన్నికల్లో టీఆర్‌ఎస్ 4, బీజేపీ 4, కాంగెస్ 2, టీడీపీ 6 సీట్లు కమ్మ వర్గానికి ఇవ్వడం విశేషం. అంటే కమ్మ వర్గం మాసికంగా టీడీపీని అభిమానిస్తున్నప్పటికీ, రాజకీయంగా ఇతర పార్టీల వైపు చూస్తుందని స్పష్టమవుతోంది. సనత్‌నగర్‌లో మంత్రి తలసాని శ్రీనివాసయాదవ్, కూకట్‌పల్లిలో టీఆర్‌ఎస్ ఎమ్మెల్యే మాధవరం కృష్ణారావు స్థానికంగా తమ నియోజకవర్గాల్లో కమ్మ వారితో తొలి నుంచీ కలసి ఉండటం ప్రస్తావనార్హం.   సహజంగా కమ్మవర్గం మిగిలిన కులాలకంటే ఒక తరం ముందు ఆలోచిస్తుంది. ఎవరితోనూ గొడవ పడకుండా, తమ వ్యాపారాలేవో తాము చేసుకునే తత్వం దాని సొంతం. ఏ ప్రభుత్వంలో ఉన్నా కావలసినవి ఇచ్చి, పనులు చేయించుకోవడం వారి ప్రత్యేకత. ఉమ్మడి రాష్ట్రంలో చంద్రబాబు చుట్టూ చేరిన కమ్మ వ్యాపారులు, వైఎస్ సీఎం అయిన వెంటనే ఆయన చుట్టూ చేరిపోయారు. ఆ తర్వాత వచ్చిన సీఎంల చుట్టూ కూడా వారే కనిపించేవారు. జగన్ కంపెనీల్లో ఎక్కువ పెట్టుబడులు పెట్టిన వారిలో కూడా కమ్మ వ్యాపారులే ఎక్కువ. అంటే వ్యాపారం వారి రక్తంలో ఒక భాగమన్నది తెలిసిందే.   ఎక్కడ.. ఏది లాభం అనుకుంటే,  అటే అడుగులేసే తెలివైన కులంగా పేరుంది. లాభనష్టాల బేరీజు.. ఇతరులను వాడుకోవడంలో,  కమ్మ వర్గ నైపుణ్యం ముందు ఎవరూ సరిరారన్నది బహిరంగ రహస్యం. ప్రతిదీ వ్యాపారకోణంలో ఆలోచించే కమ్మ వర్గానికి, ఇతర సామాజికవర్గం నుంచి సహకారం-మద్దతు లభించడం కష్టం. ఇతరులతో కలిసి నడిచే అలవాటు తొలి నుంచీ ఆ వర్గానికి లేదు. ఈ వ్యాపారతత్వం కృష్ణా జిల్లాలో.. బ్రాహ్మణ-వైశ్యులతో సహా, కుల-మతాలకు అతీతంగా అలవాటుకావటం మరో విశేషం. కృష్ణా జిల్లాకు చెందిన ప్రతి కులం-మతంలో, వ్యాపారధోరణి స్పష్టంగా కనిపిస్తుంటుంది. అది వేరే విషయం.   సహజంగా కష్టపడి పనిచేసే మనస్తత్వం, డబ్బు సంపాదన మెళకువల్లో నిష్ణాతులైన కమ్మ వర్గం.. ఆ ధ్యాసలో పడి, ఇతర సామాజికవర్గాల సహకారం తమకు అవసరం లేదని భావిస్తుంటుంది. కమ్మ సామాజికవర్గం దేనినయినా వదులుకునేందుకు సిద్ధంగా ఉంటుంది కానీ,  డబ్బును పోగొట్టుకునేందుకు మాత్రం  సిద్ధంగా ఉండదన్న సామెత వినిపిస్తుంటుంది. అందుకే.. రెడ్డి, వెలమ వర్గాలతో పోలిస్తే, కమ్మ వర్గానికి ఉండే ఇతర వర్గాల దన్ను బహు తక్కువ. ఇన్ని లక్షణాలున్న కమ్మవర్గం.. ఇతరుల సొమ్ముకు ఆశపడకుండా, కష్టపడి వ్యాపారాల్లోనే సంపాదించడంపైనే ఎక్కువ దృష్టి సారిస్తుందన్నది కూడా అంతే నిజం.   ఇప్పుడు హైదరాబాద్‌లో దశాబ్దాల నుంచి స్థిరపడిన కమ్మ వర్గం, ఇదే ధోరణిలో టీఆర్‌ఎస్‌కు మద్దతుదారుగా మారటం గమనార్హం. గత గ్రేటర్ ఎన్నికల్లోనూ ఈ వర్గం టీఆర్‌ఎస్‌కే జై కొట్టింది. చంద్రబాబు ఇక్కడి నుంచి వెళ్లినందున, తమ రక్షణ కోసమే వారు ఆ నిర్ణయం తీసుకున్నట్లు కనిపించింది. అసెంబ్లీ ఎన్నికల్లోనూ అదే తీరు కొనసాగించింది. చంద్రబాబు హైదరాబాద్‌లో పార్టీని వదిలేయడంతో, కమ్మ వర్గం తమకు టీఆర్‌ఎస్ ఒక్కటే  సురక్షితమైన పార్టీగా ఎంచుకున్నారు. దాని ఫలితమే సెటిలర్లు ఉండే నియోజకవర్గాల్లో ఆ పార్టీ గెలుపు. ఇప్పుడు ఆ వర్గం నేతలు బీజేపీలో చేరినా, కమ్మ ఓటర్లు మాత్రం కారు ఎక్కేందుకే ఇష్టపడుతున్నట్లు కనిపిస్తోంది.   ఇక ఇతర పార్టీల్లో స్థానిక అంశాల కారణంగా చోటు లభించక కొందరు.. ఆయా పార్టీల్లో ఇమడలేని మరికొందరు కమ్మ వర్గ నేతలు మాత్రమే, ప్రస్తుతం టీడీపీలో కొనసాగుతున్నారు. గత గ్రేటర్ ఎన్నికల్లో కమ్మ వర్గ ప్రాధాన్యతను గుర్తించిన టీఆర్‌ఎస్, ఆ వర్గ నేతలకు సీట్లిచ్చింది. కూకట్‌పల్లి అసెంబ్లీ ఎన్నికల సమయంలో.. చంద్రబాబుకు అత్యంత సన్నిహితుడైన కొమ్మినేని వికాస్ ఇంటికి స్వయంగా కేటీఆర్ వెళ్లి, కేసీఆర్ వద్దకు తీసుకువెళ్లి, వికాస్ సహకారం కోరారు. ఆ తర్వాత శేరిలింగంపల్లి, జూబ్లీహిల్స్‌తోపాటు, ఖమ్మం జిల్లాలో కూడా కమ్మ వర్గ నేతలకే టీఆర్‌ఎస్ ఎమ్మెల్యే సీట్లిచ్చింది. పువ్వాడకు క్యాబినెట్‌లో చోటు కూడా ఇచ్చింది.  తాజా గ్రేటర్ ఎన్నికల్లో కూడా కమ్మ వర్గం చూపు, టీఆర్‌ఎస్ వైపే కనిపిస్తోంది. మంత్రి పువ్వాడ అజయ్ నివాసంలో.. కమ్మ వర్గ ఎమ్మెల్యేలు భేటీ అయి, నగరంలోని కమ్మ ప్రముఖులతో భేటీ కావాలని నిర్ణయించుకున్నారట.   ఇదిలాఉండగా... నగరంలో కమ్మ వర్గంతోపాటు, సెటిలర్ల అభిప్రాయాలపై తాము వివిధ నియోజకవర్గాల్లోని, ఆయా వర్గాల వారితో ముచ్చటించడం జరిగింది.  ఆ ప్రకారంగా... నిజానికి సెటిలర్లలో ఎక్కువ శాతం ఈసారి బీజేపీకి ఓటు వేయాలన్న ధోరణిలో ఉన్నట్లు కనిపించింది. కానీ ఏపీలో,  అమరావతి అంశానికి బీజేపీ మద్దతు ఇవ్వని కారణంగా.. ఆ పార్టీకి బదులు, గతంలో మాదిరిగానే ఈసారి కూడా టీఆర్‌ఎస్ మద్దతునివ్వాలని నిర్ణయించుకున్నట్లు, వారి మాటల్లో స్పష్పమయింది. ఈ విషయంలో వారి వాదన-వైఖరి విచిత్రంగా అనిపించింది. అమరావతికి అడ్డంకులు సృష్టిస్తున్న ఏపీ సీఎం జగన్... తెలంగాణ సీఎం కేసీఆర్‌తో సఖ్యతగానే ఉన్నారు. అయితే, జగన్‌తో దోస్తానా చేస్తున్న కేసీఆర్‌పై కరుణ.. కేసీఆర్ మద్దతునిస్తున్న జగన్‌పై కోపం ప్రదర్శించడమే విచిత్రం. -మార్తి సుబ్రహ్మణ్యం

సంజయ్ నై.. కిషన్ సై! బీజేపీలో ఏం జరుగుతోంది? 

తెలంగాణ బీజేపీ రెండు వర్గాలుగా విడిపోయిందా? జనసేనతో పొత్తు కొందరికి ఇష్టం లేదా? పవన్ తో చర్చలకు ఆయన ఎందుకు వెళ్లలేదు? గ్రేటర్ ఎన్నికల వేడి రోజురోజుకు పెరుగుతుండగా బీజేపీలో పరిణామాలు ఆసక్తిగా మారుతున్నాయి. గ్రేటర్ ఎన్నికల కార్యాచరణ విషయంలో తెలంగాణ బీజేపీ నేతలు రెండు వర్గాలుగా విడిపోయారని ప్రచారం జరుగుతోంది. ముఖ్యంగా జనసేన పొత్తు విషయంలో పార్టీ చీఫ్ బండి సంజయ్, కేంద్ర మంత్రి కిషన్ రెడ్డి మధ్య విభేదాలు ఉన్నట్లు తెలుస్తోంది. గ్రేటర్ ఎన్నికల్లో జనసేనతో కలిసి పోటీ చేయడంపై బండి సంజయ్ ఓ అభిప్రాయంతో ఉండగా కిషన్ రెడ్డి అందుకు భిన్నంగా వ్యవహరించారనే చర్చ బీజేపీలో జరుగుతోంది. కిషన్ రెడ్డి, బండి సంజయ్ మధ్య సఖ్యత లేదని. నగర సీనియర్ నేతలు కూడా రెండు వర్గాలుగా విడిపోయారని చెబుతున్నారు. జనసేనతో పొత్తు విషయంలో బండి సంజయ్ కు ఇష్టం లేకున్నా కిషన్ రెడ్డి చొరవ తీసుకుని పవన్ కల్యాణ్ తో మాట్లాడరనే చర్చ జరుగుతోంది. ఎందుకంటే శుక్రవారం రోజంతా హైదరాబాద్ లోనే  ఉన్నారు బండి సంజయ్. కాంగ్రెస్ మాజీ నేత సర్వే సత్యనారాయణ ఇంటికి వెళ్లి ఆయన్ను బీజేపీలోకి ఆహ్వానించారు. మరికొందరు నేతలతోనూ సంజయ్ మంత్రాంగం జరిపారని చెబుతున్నారు. హైదరాబాద్ లోనే ఉన్నా పవన్ కల్యాణ్ తో చర్చలకు సంజయ్ వెళ్లకపోవడం చర్చనీయాంశంగా మారింది. జనసేనతో పొత్తు ఇష్టం లేదు కాబట్టే.. పవన్ దగ్గరకు బండి వెళ్లలేదని చెబుతున్నారు. అంధ్రా పార్టీగా ముద్రపడిన జనసేనతో పొత్తు పెట్టుకుంటే గ్రేటర్ లో పార్టీకి నష్టం జరిగే అవకాశం ఉందని కూడా కొందరు బీజేపీ నేతలు ఆందోళన పడుతున్నారని తెలుస్తోంది. అందుకే బండి సంజయ్ జనసేన విషయంలో పెద్దగా ఆసక్తి చూపలేదని చెబుతున్నారు.  జీహెచ్ఎంసీ ఎన్నికలకు సంబంధించి బీజేపీ, జనసేన పొత్తుపై మొదటి నుంచి తీవ్ర గందరగోళం నడిచింది. సొంతంగానే పోటీ చేస్తామని ప్రకటించిన పవన్ కల్యాణ్ ..అభ్యర్థుల ఎంపిక కోసం కసరత్తు  చేస్తున్నామని చెప్పారు. గ్రేటర్ లో పోటీ చేయడానికి భారీగా దరఖాస్తులు వస్తున్నాయని తెలిపిన జనసేన.. పార్టీ కార్యాలయంలో హెల్ప్ డెస్క్ కూడా ఏర్పాటు చేసింది. సొంతంగానే పోటీ చేస్తామని బయటికి చెబుతూనే... బీజేపీతో పొత్తుకు జనసేన నేతలు ప్రయత్నించారని తెలుస్తోంది. అయితే జనసేనతో పొత్తుకు బీజేపీ ఆసక్తి చూపలేదు. జనసేనతో పొత్తు పెట్టుకుంటే వారికి కొన్ని డివిజన్లు ఇవ్వాల్సి వస్తుందని. దాంతో పార్టీలో అసంతృప్తి వస్తుందని తెలంగాణ బీజేపీ చీఫ్ బండి సంజయ్ భావించారట. అందుకే గ్రేటర్ ఎన్నికల్లో తమకు ఎవరితోనూ పొత్తు లేదని ఆయన ప్రకటించారు. అంతేకాదు జనసేనతో పొత్తు ఏపీ వరకే పరిమితమని కూడా స్పష్టం చేశారు. సంజయ్ ప్రకటన తర్వాత కూడా గురువారం జనసేన నుంచి మరో ప్రకటన వచ్చింది. గ్రేటర్ ఎన్నికలపై  పవన్ తో మాట్లాడేందుకు బండి సంజయ్ వస్తున్నారని ప్రకటించింది. జనసేన లేఖపై మరోసారి స్పందించిన బండి సంజయ్.. జనసేనతో పొత్తు సమస్యే లేదని తేల్చి చెప్పారు.  బండి సంజయ్ పొత్తు లేదని రెండోసారి స్పష్టం చేయడంతో జనసేన ఒంటరిగానే పోటీ చేస్తుందని భావించారు. అయితే శుక్రవారం మళ్లీ పొలిటికల్ సీన్ మారిపోయింది. జనసేన పొత్తు మేటర్ లోకి కేంద్రమంత్రి కిషన్ రెడ్డి ఎంటరయ్యారు. పార్టీ మరో ముఖ్య నేత లక్ష్మణ్ తో కలిసి వెళ్లి ఆయన పవన్ కల్యాణ్ తో చర్చలు జరిపారు. జనసేన పోటీ చేయకుండా బీజేపీకి మద్దతిచ్చేలా పవన్ ను ఒప్పించారు. కిషన్ రెడ్డి తో సమావేశం తర్వాత గ్రేటర్ ఎన్నికల్లో జనసేన పోటీ చేయడం లేదని అధికారికంగా ప్రకటించారు జనసేన చీఫ్. జీహెచ్ఎంసీ ఎన్నికల్లో బీజేపీకి జనసేన పార్టీ సంపూర్ణ మద్దతు ఉంటుందని ప్రకటించారు. బండి సంజయ్, కిషన్ రెడ్డిల తీరుతో బీజేపీలో కన్ఫ్యూజన్ నెలకొన్నదని చెబుతున్నారు. టికెట్ల ఎంపికలోనూ సంజయ్, కిషన్ రెడ్డి వర్గాల మధ్య గొడవలు జరిగాయంటున్నారు. బంజారాహిల్స్, కూకట్ పల్లి ప్రాంత నేతలు కొందరు కిషన్ రెడ్డిపై బహరంగంగానే తీవ్ర ఆరోపణలు చేశారు.  గ్రేటర్ హైదరాబాద్ ఎన్నికల్లో బీజేపీ దూకుడు మీద ఉన్నట్లు కనిపిస్తోంది. దుబ్బాక ఉప ఎన్నిక విజయంతో జీహెచ్ఎంసీలోనూ పాగా వేస్తామనే ధీమా కమలనాధుల్లో పెరిగిందని చెబుతున్నారు. గ్రేటర్ పరిధిలో బీజేపీలోకి జోరుగా వలసలు కొనసాగుతున్నాయి. నగర కాంగ్రెస్ లోని కొందరు ముఖ్య నేతలు, టీఆర్ఎస్ సిట్టింగ్ కార్పొరేటర్లు కూడా కమలం గూటికి చేరారు. గ్రేటర్ ఎన్నికల్లో బీజేపీ నుంచి  పోటీ  చేసేందుకు నేతలు పోటీ పడ్డారు. ఒక్కో డివిజన్ నుంచి 10 నుంచి 10 మంది టికెట్ కోసం పోటీ పడ్డారని బీజేపీ నేతలు చెబుతున్నారు. గ్రేటర్ లో దాఖలైన నామినేషన్లలోనూ అధికార టీఆర్ఎస్ కంటే బీజేపీ పేరుతో వేసినవే ఎక్కువగా ఉన్నాయి. ఇంత వరకు  బాగానే రాష్ట్ర బీజేపీ ముఖ్య నేతల తీరే గందరగోళంగా మారిందని తెలుస్తోంది. ముఖ్య నేతల తీరుతో గ్రేటర్ ఎన్నికల్లో పార్టీకి నష్టం కలగవచ్చనే ఆందోళన కమలం కేడర్ లో కనిపిస్తోంది.

హైద‌రాబాద్‌లో 'కేజీఎఫ్ 2' ఫైన‌ల్ షెడ్యూల్ ప్రారంభించిన య‌ష్‌

  గురువారం, న‌వంబ‌ర్ 26న య‌ష్ 'కేజీఎఫ్‌: చాప్ట‌ర్ 2' తుది షెడ్యూల్ చిత్రీక‌ర‌ణ‌ను ప్రారంభించాడు. ప్ర‌శాంత్ నీల్ డైరెక్ట్ చేస్తున్న ఈ మూవీ షెడ్యూల్ హైద‌రాబాద్‌లో జ‌రుగుతోంది. డిసెంబ‌ర్ మ‌ధ్య దాకా య‌ష్ హైద‌రాబాద్‌లోనే ఉంటాడ‌ని భావిస్తున్నారు. గురువారం ఉద‌య‌మే ఆయ‌న సిటీకి వ‌చ్చాడు. ఎయిర్‌పోర్ట్ నుంచి బ‌య‌ట‌కు వ‌స్తున్న‌ప్పుడు ఆయ‌న కెమెరా కంటికి చిక్కాడు. ఆయ‌న స్వెట్‌ష‌ర్ట్‌, డెనిమ్ ధ‌రించి ఉన్నాడు. ముఖం క‌నిపించ‌కుండా మాస్క్ ధ‌రించాడు. కొవిడ్‌-19 మ‌హ‌మ్మారి కార‌ణంగా సుదీర్ఘ కాలం షూటింగ్ నిలిచిపోయి, కొద్ది రోజుల క్రితం పునరుద్ధ‌రింప‌బ‌డి, ఇప్పుడు తుది ద‌శ‌కు చేరుకోవ‌డంతో య‌ష్ స‌హా యూనిట్ మెంబ‌ర్స్ అంతా సూప‌ర్ ఎక్జ‌యిటింగ్‌తో ఉన్నారు. ఆగ‌స్ట్ చివ‌ర‌లో బెంగ‌ళూరులోని కంఠీర‌వ స్టూడియోస్‌లో 'కేజీఎఫ్‌: చాప్ట‌ర్ 2' షూటింగ్‌ను పున‌రుద్ధ‌రించారు. మూవీలో న్యూస్ చాన‌ల్ హెడ్ దీపా హెగ్డే రోల్‌ను పోషిస్తున్న న‌టి-పొలిటీషియ‌న్ మాళ‌వికా అవినాష్, షూటింగ్ స్టార్ట్ అయిన‌ప్పుడు య‌ష్‌తో దిగిన పిక్చ‌ర్‌ను షేర్ చేశారు. ర‌మికా సేన అనే కీల‌క పాత్ర‌ను ర‌వీనా టాండ‌న్ పోషిస్తున్నారు. అక్టోబ‌ర్ 26న త‌న బ‌ర్త్‌డే సంద‌ర్భంగా త‌న ఫ‌స్ట్ లుక్‌ను ఆమె షేర్ చేశారు. అక్టోబ‌ర్ చివ‌రి నాటికి ఈ సీక్వెల్ షూటింగ్ పూర్త‌యిపోతుంద‌ని నిర్మాత‌లు ఆశించారు. కానీ ఆల‌స్యం అయ్యింది. విడుద‌ల తేదీని ఇంకా ప్ర‌క‌టించ‌లేదు. 'కేజీఎఫ్‌: చాప్ట‌ర్ 2'లో విల‌న్ అధీర రోల్‌లో సంజ‌య్ ద‌త్‌ను మ‌నం చూడ‌బోతున్నాం. ప్ర‌కాశ్ రాజ్‌, శ్రీ‌నిధి శెట్టి, అచ్యుత్ కుమార్ ఈ మూవీలో క‌నిపించ‌నున్నారు. ఈ మూవీని హోంబ‌ళే ఫిలిమ్స్ బ్యాన‌ర్‌పై విజ‌య్ కిరంగ‌దూర్ నిర్మిస్తున్నారు. ఈ సినిమా ఐదు భాష‌ల్లో.. క‌న్న‌డ‌, తెలుగు, హిందీ, త‌మిళ‌, మ‌ల‌యాళం భాష‌ల్లో విడుద‌లవుతుంది. మొద‌టి చాప్ట‌ర్ భార‌త‌దేశ వ్యాప్తంగా బ్లాక్‌బ‌స్ట‌ర్ హిట్ట‌యింది. య‌ష్ హీరోగా న‌టించిన ఈ చిత్రం, ఒక సామాన్యుడు ఎలా డేంజ‌ర‌స్ గ్యాంగ్‌స్ట‌ర్‌గా మార‌తాడో చూపించింది.

'ఎఫ్‌3'కి వ‌రుణ్ ఎక్కువ డిమాండ్ చేస్తున్నాడా?

  కామెడీ ఎంట‌ర్‌టైన‌ర్‌ 'ఎఫ్2'కు సంతకం చేయడానికి ముందు వరుణ్ తేజ్‌కు కొన్ని హిట్స్ ఉన్న‌ప్ప‌టికీ, స్టార్ హీరో అనిపించుకోలేదు. కాబట్టి, 'ఎఫ్2'లో న‌టించ‌డానికి నిర్మాత‌ దిల్ రాజు అత‌నికి ఓ మోస్త‌రు రెమ్యూన‌రేష‌న్ చెల్లించాడు. అయితే 'గ‌ద్ద‌ల‌కొండ గ‌ణేష్' మూవీ వ‌చ్చాక మాస్ ఆడియెన్స్‌లోనూ బాగా వెళ్లిపోయాడు వ‌రుణ్‌. ఇప్పుడు అత‌నికంటూ మార్కెట్ ఏర్ప‌డింది. అత‌నితో సినిమాలు తీసేందుకు అటు నిర్మాత‌లు, ఇటు ద‌ర్శ‌కులు ఉత్సాహం చూపిస్తున్నారు. అందువ‌ల్ల స‌హ‌జంగానే అత‌ని రెమ్యూన‌రేష‌న్ పెరిగింది. కానీ వరుణ్‌కు 'ఫిదా', 'ఎఫ్‌2' లాంటి రెండు భారీ హిట్లు ఇచ్చింది త‌నే కాబ‌ట్టి, 'ఎఫ్‌3'లోనూ మిగ‌తా సినిమాల నిర్మాత‌ల‌తో పోలిస్తే, త‌క్కువకే అత‌న్ని తీసుకోవాల‌ని దిల్ రాజు అనుకున్నారు. కానీ రాజు ఆఫ‌ర్ చేసిన దానికంటే వ‌రుణ్ ఎక్కువ ఆశిస్తున్న‌ట్లు ఫిల్మ్‌న‌గ‌ర్‌లో గుస‌గుస‌లు వినిపిస్తున్నాయి. వెంక‌టేశ్‌, వ‌రుణ్ తేజ్ తోడ‌ల్లుళ్లుగా న‌టించిన 'ఎఫ్‌2' సినిమాకు పెట్టిన ఇన్వెస్ట్‌మెంట్‌తో పోలిస్తే దిల్ రాజుకు రెట్టింపు డ‌బ్బు వ‌చ్చింది. స‌హ‌జంగానే అంచ‌నాలు భారీగా ఉండే 'ఎఫ్‌3'కి మ‌రింత ఎక్కువ రాబ‌డి వ‌చ్చే అవ‌కాశం ఉంది కాబ‌ట్టి, త‌న‌ది స‌హేతుక‌మైన డిమాండ్‌గా వ‌రుణ్ తేజ్ భావిస్తున్నాడు. ఈ గొడ‌వ ఇలా ఉండ‌గానే 'ఎఫ్‌3' షూటింగ్ డిసెంబ‌ర్ 14న మొద‌ల‌వుతుంద‌ని డైరెక్ట‌ర్ అనిల్ రావిపూడి అనౌన్స్ చేశాడు. ఈ సీక్వెల్‌లోనూ హీరోలు, హీరోయిన్లు త‌మ పాత్ర‌ల‌ను నిలుపుకున్నారు. అంటే వెంకటేశ్‌, వ‌రుణ్ తేజ్‌, త‌మ‌న్నా, మెహ్రీన్ ఇందులోనూ అవే పాత్ర‌ల్లో క‌నిపించ‌నున్నారు. 2021 స‌మ్మ‌ర్‌లోనే 'ఎఫ్‌3'ని ప్రేక్ష‌కుల ముందుకు తీసుకు రావాల‌నేది దిల్ రాజు ప్లాన్‌.

'తీన్‌మార్' హీరోయిన్ పెళ్లెప్పుడంటే...

  బాలీవుడ్ యాక్ట‌ర్ పుల‌కిత్ సామ్రాట్‌తో 'తీన్‌మార్' హీరోయిన్ కృతి ఖ‌ర్బందా డేటింగ్ చేస్తోంద‌నే ప్ర‌చారం సోష‌ల్ మీడియాలో మొద‌లైన‌ప్పుడు.. ఆ ఇద్ద‌రిలో ఎవ‌రూ నోరువిప్ప‌లేదు. కాల‌మే జ‌వాబు చెబుతుంద‌న్న‌ట్లు ఇన్‌స్టాగ్రామ్ హ్యాండిల్స్ ద్వారా షేర్ చేసుకుంటున్న పిక్చ‌ర్స్‌, వీడియోస్‌తో త‌మ రిలేష‌న్‌షిప్‌ను చెప్ప‌క‌నే చెప్పారు ఆ ఇద్ద‌రూ. తాజాగా త‌న బాయ్‌ఫ్రెండ్ పుల‌కిత్ సామ్రాట్‌ను పెళ్లెప్పుడు చేసుకోబోతోంద‌నే ప్ర‌శ్న‌కు స‌మాధానం చెప్పింది కృతి. బెంగుళూర్ మిర్ర‌ర్‌కు ఇచ్చిన ఇంట‌ర్వ్యూలో మాట్లాడుతూ, ఇటీవ‌ల పుల‌కిత్‌తో క‌లిసి చేసిన రోడ్ ట్రిప్ తాము ఒక‌రినొక‌రం బాగా అర్థం చేసుకోడానికి ఉప‌యోగ‌ప‌డింద‌ని తెలిపింది. "పుల‌కిత్ లాంటి వ్య‌క్తి నాతో ఉండ‌టం అదృష్టంగా భావిస్తున్నా. నా ముఖంలో న‌వ్వును చెద‌ర‌నివ్వ‌కుండా చూస్తుంటాడు త‌ను. నేనూ అత‌ని విష‌యంలో అదే చేయ‌డానికి ట్రై చేస్తున్నా. అత‌ని వ్య‌క్తిత్వం అంటే నాకెంతో ఇష్టం. న‌న్న‌డిగితే, సెల్ఫ్‌-ల‌వ్‌కు అత‌ను బ్రాండ్ అంబాసిడ‌ర్ అంటాను" అని చెప్పింది కృతి. ఇటీవ‌ల వ‌చ్చిన 'తాయిష్' సినిమాలో ఆ ఇద్ద‌రూ క‌లిసి న‌టించారు. ఇద్ద‌రికీ ఆ సినిమా మంచిపేరు తెచ్చింది. ప్రొఫెష‌న‌ల్‌గా మంచి స్థితిలో ఉన్న ఆ ఇద్ద‌రూ వ్య‌క్తిగ‌త జీవితంలో ఎప్పుడు ఒక‌టి కాబోతున్నారు?  "మేం ఒక‌టిన్న‌ర సంవ‌త్స‌రం నుంచీ ప్రేమ‌లో ఉన్నాం. ఇప్ప‌టి దాకా మ్యారేజ్ గురించి మేం డిస్క‌స్ చేసుకోలేదు. ఇప్ప‌టికిప్పుడు చేసుకోవాల‌నే ఆలోచ‌న కూడా చేయ‌ట్లేదు. ప్ర‌స్తుతం మేం మా కెరీర్స్ మీద ఫోక‌స్ పెట్టాం. పెళ్ల‌నేది ఒక సుదూర క‌ల" అని తెలిపింది కృతి. అదీ విష‌యం!

దుబాయ్ వీధుల్లో నితిన్‌-కీర్తి విహారం!

  నితిన్‌, కీర్తి సురేశ్ జంట‌గా న‌టిస్తోన్న చిత్రం 'రంగ్ దే'. వెంకీ అట్లూరి డైరెక్ట్ చేస్తోన్న ఈ మూవీ షూటింగ్ ప్ర‌స్తుతం దుబాయ్‌లో జ‌రుగుతోంది. మూడు రోజుల క్రితం భార్య షాలినితో క‌లిసి దుబాయ్‌కు బ‌య‌లుదేరి వెళ్లాడు నితిన్‌. ప్ర‌స్తుతం అక్క‌డి రోడ్ల‌పై కొన్ని సీన్లు తీస్తున్నారు. గురువారం నితిన్ త‌న ట్విట్ట‌ర్ హ్యాండిల్ ద్వారా ఓ ఫొటో షేర్ చేశాడు. అందులో చైర్‌లో కూర్చొని క‌ళ్లు మూసుకొని, ముఖంపై క్లాత్ పెట్టుకొని కీర్తి రిలాక్స్ అవుతుంటే, చ‌డీచ‌ప్పుడు లేకుండా ఆమె వెనుక నిల్చొని ఫొటో దిగారు నితిన్‌, వెంకీ. ఆ ఫొటోకు, "Between the shot ⁦@KeerthyOfficial  relaxing . While we are sweating" అనే క్యాప్ష‌న్ జోడించాడు నితిన్‌. కాగా అక్క‌డి సెట్స్ నుంచి అన‌ధికారికంగా మ‌రికొన్ని పిక్చ‌ర్స్ కూడా సోష‌ల్ మీడియాలో ద‌ర్శ‌న‌మిస్తున్నాయి. వాటిలో రోడ్డు ప‌క్క‌న నితిన్‌, కీర్తి నిల్చొని ఉన్న ఫొటో ఒక‌టి ఉంది. కీర్తి టీ ష‌ర్ట్‌, జీన్స్ ధ‌రించి, ఆగివున్న మోపెడ్‌పై ఉండ‌గా, నితిన్ ఓ షోల్డ‌ర్ బ్యాగ్ ప‌ట్టుకొని, క్యాజువ‌ల్ డ్ర‌స్‌లో ఉన్నాడు. ఆ పిక్చ‌ర్‌లో ఇద్ద‌రూ చూడ‌చ‌క్క‌ని జోడీగా క‌నిపిస్తున్నారు. 'రంగ్ దే' టీజ‌ర్ వ‌చ్చిన‌ప్ప‌ట్నుంచీ ఈ సినిమాపై బ‌జ్ పెరుగుతూ వ‌స్తోంది. 'భీష్మ' మూవీతో హిట్ కొట్టిన నితిన్ మ‌రింత ఉత్సాహంతో ఈ సినిమాకు ప‌నిచేస్తున్నాడు. దేవి శ్రీ‌ప్ర‌సాద్ మ్యూజిక్ ఇస్తోన్న ఈ మూవీని సితార ఎంట‌ర్‌టైన్‌మెంట్స్ బ్యాన‌ర్‌పై సూర్య‌దేవ‌ర నాగ‌వంశీ నిర్మిస్తున్నారు. 2021 సంక్రాంతికి 'రంగ్ దే'ను ప్రేక్ష‌కుల ముందుకు తీసుకురావాల‌ని ప్లాన్ చేస్తున్నారు.

భ‌ర్త వివాహేత‌ర సంబంధం పెట్టుకున్నాడ‌ని పూన‌మ్ కూడా...

  ఫెమీనా మిస్ ఇండియా కిరీటాన్ని సాధించ‌డంతో 1977లో ఒక్క‌సారిగా ఫేమ్ వ‌చ్చేసింది పూన‌మ్ ధిల్లాన్‌కు. 'త్రిశూల్' (1978)తో దిగ్గ‌జ ద‌ర్శ‌కుడు య‌శ్ చోప్రా ఆమెను బాలీవుడ్‌కు ప‌రిచ‌యం చేశారు. ఆ సినిమా సూప‌ర్ హిట్ట‌వ‌డంతో ఓవ‌ర్‌నైట్ స్టార్‌గా మారారు పూన‌మ్‌. అనేక‌మంది ద‌ర్శ‌కులు ఆమెతో సినిమాలు చేయ‌డానికి ముందుకు వ‌చ్చారు. ఆమె మాత్రం రెండో సినిమా డైరెక్ట‌ర్‌గా ర‌మేశ్ త‌ల్వార్‌ను ఎంచుకున్నారు. ఆ సినిమా 'నూరీ'. అది చేసే టైమ్‌లో ఆ ఇద్ద‌రూ మంచి ఫ్రెండ్స్ అయ్యారు. ర‌మేశ్ అయితే ఆమెకు మ‌న‌సిచ్చేశారు. ముంబైలో ఆమెకు ఓ బంగ‌ళా కూడా కొనిచ్చారు. అయితే ఆమె ఆయ‌న‌ను ఫ్రెండ్‌గానే భావించింది కానీ, ఆయ‌న‌లో ల‌వ‌ర్‌ని చూడ‌లేక‌పోయారు. అందుకే ఆయ‌న‌కు దూరంగా ఉండ‌టం మంచిద‌నుకొని, అన్ని సంబంధాల‌ను తెంచుకున్నారు పూన‌మ్‌. 1980ల‌లో ఆమె స్టార్ హీరోయిన్‌గా రాణించారు. కెరీర్ పీక్ స్టేజ్‌లో ఉండ‌గా డైరెక్ట‌ర్ రాజ్ సిప్పీతో ప‌రిచ‌యం, బ‌ల‌మైన స్నేహంగా మారింది. అప్ప‌టికే వివాహితుడైన ఆయ‌న ప్రేమ‌లో ప‌డ్డారు పూన‌మ్‌. వారి రిలేష‌న్‌షిప్ టాక్ ఆఫ్ ద టౌన్‌గా మారింది. సిప్పీని మ్యారేజ్ చేసుకోవాల‌ని ఆమె అనుకున్నారు. కానీ ఆమె కోసం త‌న కుటుంబాన్ని వ‌ద‌ల‌డానికి రాజ్ సిప్పీ అంగీక‌రించ‌లేదు. ఆయ‌న జీవితంలో రెండో స్త్రీగా ఉండాల‌ని ఆమె కూడా అనుకోలేదు. అందుకే ఆయ‌న‌తో బంధాన్ని కూడా ఆమె తెంచేసుకున్నారు. 1988వ సంవ‌త్స‌రం పూన‌మ్ జీవితంలో చాలా మార్పులు జ‌రిగాయి. సిప్పీతో బంధం ముగియ‌డ‌మే కాకుండా, తండ్రిని కూడా ఆమె కోల్పోయారు. అంతే కాదు, అశోక్ ఠ‌కేరియా ప‌రిచ‌యమైంది అప్పుడే. ఒక ఫ్రెండ్ ఫామ్‌హౌస్‌లో జ‌రుగుతున్న హోలి సెల‌బ్రేష‌న్స్‌కు వెళ్లి ఓ మూల కూర్చున్న ఆమె అశోక్ దృష్టిలో ప‌డ్డారు. ఆమె అందం ఆయ‌న‌ను మెస్మ‌రైజ్ చేసింది. త‌న‌ను ప‌రిచ‌యం చేసుకున్నారు ఠ‌కేరియా. ఇద్ద‌రూ త‌ర‌చూ మాట్లాడుకుంటూ వ‌చ్చారు. అదే ఏడాది పెళ్లి చేసుకున్నారు. ఇండ‌స్ట్రీలోని పూన‌మ్ శ్రేయోభిలాషులు ఆమె నిర్ణ‌యాన్ని త‌ప్పుప‌ట్టారు. కెరీర్‌లో తిరిగి మంచి రోజులు వ‌స్తున్న త‌రుణంలో దాన్ని వారు తొంద‌ర‌పాటు చ‌ర్య‌గా భావించారు. అశోక్ ఠ‌కేరియాతో పెళ్లి త‌ర్వాత ఆమె న‌ట‌న‌కు బ్రేక్ ఇచ్చారు. రెండేళ్ల త‌ర్వాత త‌న బిజినెస్‌తో అశోక్ బిజీగా మార‌గా, పూన‌మ్‌కు ప‌ని లేకుండా ఉండ‌టం క‌ష్ట‌మైంది. తిరిగి సినిమాల్లోకి వ‌చ్చారు. ఈ లోపు ఆమె ఇద్ద‌రు పిల్ల‌ల‌కు త‌ల్ల‌య్యారు. 1994లో భ‌ర్త అశోక్ వివాహేత‌ర సంబంధం గురించి ఆమెకు తెలిసింది. భ‌ర్త‌కు గుణ‌పాఠం చెప్పాల‌నుకున్న ఆమె త‌ను కూడా అలాంటి సంబంధాన్నే ఏర్ప‌ర‌చుకోవ‌డం దిగ్భ్రాంతిక‌ర‌మైన విష‌యం. 1997లో విడాకుల‌కు ద‌ర‌ఖాస్తు చేసుకున్న ఆమె.. ఇద్ద‌రు పిల్ల‌లు త‌న ద‌గ్గ‌రే ఉండేలా కోర్టు అనుమ‌తి పొందారు. వ్య‌క్తిగ‌త జీవితంలో అలాంటి బాధాక‌ర‌మైన అనుభ‌వాలు చ‌విచూసిన ఆయ‌న‌, త‌న‌ను తాను సంభాళించుకొని, సొంత వ్యాపారం మొద‌లుపెట్టారు. పిల్ల‌ల‌ను చ‌క్క‌గా పెంచుతూ వ‌చ్చారు. 2001లో రామోజీ రావు నిర్మించిన 'ఇష్టం' సినిమా ఆమె న‌టించిన ఏకైక తెలుగు చిత్రం. 2009లో మాధ‌వ‌న్‌తో విక్ర‌మ్ కుమార్ డైరెక్ట్ చేసిన '13బి' సినిమాతో న‌టిగా ఆమె థ‌ర్డ్ ఇన్నింగ్స్ ప్రారంభించారు. అప్ప‌ట్నుంచీ ఆమె వెనుతిరిగి చూడ‌లేదు. సినిమాలు, టీవీ సీరియ‌ల్స్‌తో బిజీగా ఉంటున్నారు.

రాజకీయాలకు బలౌతున్న ఐఏఎస్ అధికారులు

ఇద్దరు అధికారులు దివంగత వై ఎస్ రాజశేఖరరెడ్డి ముఖ్యమంత్రిగా ఉన్నప్పుడు కీలకమైన శాఖలు నిర్వహించిన వారు. ప్రస్తుత ముఖ్యమంత్రి జగన్ చేతిలో వీరిద్దరూ తీరని అవమానాలకు గురౌతున్నారు. తండ్రి చేతిలో ఎత్తులు చుసిన వారు తనయుడి చేతిలో లోతులు చూస్తున్నారు. వారిద్దరూ సీనియర్ ఐఏఎస్ అధికారులు. ఒకరినైతే మెడపట్టుకుని బయటకు గెంటేశారు. మరొకరిని కులం పేరుతో కుళ్లపొడుస్తున్నారు. విచిత్రం ఏమిటంటే ఈ ఇద్దరు అధికారులూ కూడా చంద్రబాబు అంటే గిట్టనివారే. ఇద్దరు అధికారులు కూడా చంద్రబాబు ముఖ్యమంత్రిగా ఉన్నప్పుడు చిన్న చూపుకు గురి అయిన వారే. ఒకరు బలయ్యారు.. మరొకరు అవుతున్నారు. ఆ ఇద్దరూ ఎవరంటే ఒకరు ఎల్‌వి సుబ్రహ్మణ్యం. రెండో వారు నిమ్మగడ్డ రమేష్ కుమార్. చంద్రబాబు ముఖ్యమంత్రిగా ఉన్న సమయంలో సీనియర్ అయినా ఎల్‌వి సుబ్రహ్మణ్యంకు జగన్ కేసుల్లో సహా ముద్దాయిగా ఉన్నారని ప్రాధాన్య పోస్టులు ఇవ్వలేదు. ఒక సందర్భంలో కీలకమైన వైద్య ఆరోగ్య శాఖ కార్యదర్శి పోస్టు ఇచ్చినా మళ్ళీ ఆయనను అక్కడ నుంచి తీసి అత్యంత చిన్నదైన యువజన శాఖకు మార్చారు. ఇక రమేష్ కుమార్ పరిష్తితి కూడా దాదాపుగా అంతే. చంద్రబాబు హయాంలో ఆయనకు ఏ కీలక శాఖ లభించలేదు. ఈ ఇద్దరూ వై ఎస్ రాజశేఖరరెడ్డి ముఖ్యమంత్రిగా ఉన్నప్పుడే ప్రతిభకు తగిన గుర్తింపు పొందారు. ఎల్‌వి సుబ్రహ్మణ్యం, రమేష్ కుమార్ ఇద్దరూ ఆర్ధిక శాఖను నిర్వహించిన వారే. ఆర్ధిక శాఖలో ఈ ఇద్దరిదీ ప్రత్యేకమైన శైలి అని వారితో సాన్నిహిత్యం ఉన్న అధికారులు అంటారు. రాష్ట్రంలో ఆర్ధిక క్రమశిక్షణ తీసుకురావడంలో బిల్లుల చెల్లింపు తదితర విషయాలలో ఎలాంటి వివాదాలు రాకుండా చూసిన వారన్న విషయాన్ని మర్చిపోలేం అని చెప్తున్నారు. ఆర్ధిక క్రమశిక్షణ తీసుకురావడం, జవాబుదారీతనం, దుబారా తగ్గించడం వంటి విషయాల్లో ఈ ఇద్దరూ అనేక చర్యలు తీసుకున్నారు.వీరికి ఇంకో పోలిక కూడా ఉంది. నిమ్మగడ్డ రమేష్ కుమార్, ఎల్‌వి సుబ్రహ్మణ్యం ఇద్దరూ కూడా తిరుమల తిరుపతి దేవస్థానం ట్రస్టు బోర్డు ముఖ్య కార్యనిర్వహణాధికారులుగా పని చేశారు. ఈ ఇద్దరి హయాంలో తిరుమల పవిత్రత రెండింతలు పెరగడమే కాకుండా క్రమ శిక్షణ ఉండేదన్న విషయం మర్చిపోరాదు. భక్తుల సౌకర్యార్ధం ఈ ఇద్దరి హయాంలో పలు కీలక నిర్ణయాలు తీసుకున్నారు. ఎంతో సీనియర్ రాజకీయ నాయకులు ట్రస్టు బోర్డు చైర్మన్లుగా ఉన్నా కూడా ఎల్‌వి సుబ్రహ్మణ్యం, రమేష్ కుమార్ ఈవోలుగా ఉన్నప్పుడు వీరు చెప్పినట్లే నడచుకునేవారన్న పేరుండేది. వృత్తి పట్ల అంతటి నిబద్ధతతో ఈ ఇద్దరు అధికారులు పని చేశారు. అత్యంత సీనియర్ అయిన ఎల్‌వి సుబ్రహ్మణ్యం ను పక్కన పెట్టి ఆయన కన్నా జూనియర్లకు చంద్రబాబునాయుడు చీఫ్ సెక్రటరీ పదవిని అప్పగించారు. అయినా ఎల్‌వి సుబ్రహ్మణ్యం ఎలాంటి వివాదాస్పద వ్యాఖ్యలు చెయ్యని విషయం మనం చూసాం. సార్వత్రిక ఎన్నికల సమయంలో అప్పటి రాష్ట్ర ప్రభుత్వ ప్రధాన కార్యదర్శి పునేటాను పక్కన పెట్టి కేంద్ర ఎన్నికల సంఘం ఎల్‌వి సుబ్రహ్మణ్యంను రాష్ట్ర ప్రభుత్వ ప్రధాన కార్యదర్శిగా నియమించింది. ఎన్నికల కమీషన్ ప్రధాన కార్యదర్శిగా నియమించాక సహ ముద్దాయిని సిఎస్ గా ఎలా నియమిస్తారని విమర్శించారు కూడా.   ఆ తర్వాత ముఖ్యమంత్రి అయిన జగన్ ఎల్‌వీ ని కొనసాగించగా జగన్ ను అందరూ మెచ్చుకున్నారు కూడా. అయితే ఏమైందో ఏమూ కానీ కొద్ది కాలంలోనే ఎల్‌వి ని అత్యంత అవమానకరంగా పదవి నుంచి జగన్ తొలగించిన విధానం కూడా తెలిసిందే. ఇప్పుడు నిమ్మగడ్డ రమేష్ కుమార్ కు కూడా దాదాపుగా అలానే జరిగింది. ఆయనను రాష్ట్ర ఎన్నికల అధికారిగా నియమించడం చంద్రబాబుకు అస్సలు ఇష్టం లేదు. చంద్రబాబు దగ్గర పని చేయడం రమేష్ కుమార్ కూ ఇష్టం లేదని అంటారు. అయితే తన కార్యదర్శిగా పని చేసిన రమేష్ కుమార్ కు రాష్ట్ర ఎన్నికల సంఘానికి నియమించాలని అప్పటి గవర్నర్ ఇ ఎస్ ఎల్ నర్సింహన్ చంద్రబాబుపై వత్తిడి తెచ్చారనీ. గత్యంతరం లేని పరిస్థితుల్లో చంద్రబాబు రమేష్ కుమార్ కు రాష్ట్ర ఎన్నికల సంఘాన్ని అప్పగించారనీ అంటున్నారు. రమేష్ కుమార్ పేరు బదులు వేరే అధికారి పేరు రాష్ట్ర ఎన్నికల సంఘానికి సిఫారసు చేశామని చంద్రబాబు కూడా చెప్పారు. అటువంటి రమేష్ కుమార్ ఇప్పుడు చంద్రబాబు ఏజెంటుగా జగన్ చేతిలో ముద్ర వేయించుకోవడం దురదృష్టం. ఈ ఇద్దరూ ముక్కుసూటిగా మాట్లాడే అధికారులు. ఎలాంటి మొహమాటం లేకుండా విధులు నిర్వర్తించే వారన్న పేరుంది. అలాంటి ఈ ఇద్దరూ కూడా అత్యంత ఘోరమైన అవమానాన్ని పొందారు. ఈ అవమానాలకు వీరు అర్హులు కాదని మాత్రం కచ్చితంగా చెప్పవచ్చని అధికార వర్గాలు అనుకుంటున్నారు. నాయకులు తమ స్వంత ప్రయోజనాల కోసం అఖిల భారత సర్వీసు అధికారులకు కులాలు, ప్రాంతాలు అంటగట్టడం ఏంటని కొందరు ఆవేదన చెందుతున్నారు.

ఆంధ్ర లో బీజేపీ 'పంచ్' తంత్రం...

  * దిగుమతి నాయకులు, బిజినెస్ లీడర్లు, లాబీయిస్టులు కలిసి బీ జె పి ని ఎటు నడిపిస్తారో....  * ఇంతకీ స్థానిక సమరం లో సత్తా చూపించే ట్యాలెంట్ ఆ పార్టీకి ఉన్నట్టా, లేనట్టా....  * జి వి ఎల్ ఋతుపవనాల్లాంటి వారు... ఇలావచ్చి అలా పలకరించి, అటు నుంచి ఆటే మాయమైపోతారు  * సి ఎం రమేష్ లాబీ మాస్టర్ గా ఢిల్లీ లో ప్రసిద్ధులు.. నోకియా మాదిరి ఈయన కూడా కనెక్టింగ్ పీపుల్ నినాదాన్ని బలంగా నమ్మిన వారు  * సుజనా చౌదరి... గత్యంతరం లేని పరిస్థితుల్లో అమరావతి నినాదాన్ని భుజాన వేసుకుని చందమామ కథలో విక్రమార్కుడి మాదిరి ... వై ఎస్ ఆర్ సి పి లోని బేతాళుడి తో జగడమాడుతుంటారు  * టీ జీ వెంకటేష్.. అవసరార్ధ రాజకీయాల కు కేరాఫ్ అడ్రెస్ .... రాయలసీమ అనేది ఈయనకు ట్యాగ్ లైన్ ...దురదపుట్టినప్పుడు గోక్కోవటానికి ఉపయోగపడే ఆరో వేలుగా ఆయన ఆ నినాదాన్ని బాగా వాడేస్తారు..  * అంగ వంగ కళింగ రాజ్యాలను అవలీలగా గెలిచిన చక్రవర్తి, చివరకు ఆముదాలవలస లో ఓడిపోయినట్టు, రాష్ట్ర బీ జె పి అధ్యక్షుడు కన్నా లక్ష్మీ నారాయణ , చివరకు పవన్ కళ్యాణ్ తో కలిసి స్థానిక సమరం లో బీజేపీకి కాస్తో కూస్తో ఉన్న ఇమేజ్ ని పణం గాపెట్టే సాహసానికి ఒడిగట్టారు  ఆ ఐదుగురూ ఇంతకీ ఏమి చేస్తున్నట్టు..భారతీయ జనతా పార్టీ దిగుమతుల విభాగం నుంచి డంప్ అయిన జి వి ఎల్ నరసింహారావు , అలాగే తెలుగు దేశం నుంచి బీ జె పి లోకి దిగుమతి అయిన సుజనా చౌదరి, సి ఎం రమేష్, టీ జీ వెంకటేష్ , కాంగ్రెస్ లో నుంచి బీ జె పి లోకి షిఫ్ట్ అయిన  బీ జె పి అధ్యక్షుడు కన్నా లక్ష్మీ  నారాయణ కలిసి ఈ స్థానిక సమరం లో రాష్ట్రం మొత్తం మీద కనీసం ఒక్కొక్కరికి 50 చొప్పున 250 మంది ఎం పి టి సి లు, జెడ్ పీ టి సి లను  గెలిపించుకురాగలరా అనేది చాలా పెద్ద సందేహం గా కనిపిస్తోంది. ఎందుకంటే, నిన్ననే విజన్ డాక్యుమెంట్ ని కలిసి ఆవిష్కరించిన బీ జె పి , జన సేన కంబైన్ నేతలు , చాలా పెద్ద  దృశ్యాన్నే జనం ముందు ఆవిష్కరించే ప్రయత్నం చేశారు. వై ఎస్ ఆర్ సి పి, తెలుగుదేశం పార్టీ లకు తామే ప్రత్యామ్నాయమన్నట్టు గా ప్రకటించుకున్న ఈ ఐదుగురిదీ  వాస్తవానికి తలో దారీ.. ఎవరు , ఎప్పుడు, ఎందుకు, ఎలా మాట్లాడతారో తెలీని గందర గోళం ....  జి వి ఎల్ నరసింహ రావు ది అయితే సొంత రాజ్యాంగం, పూర్తిగా పార్టీ రాష్ట్ర శాఖ తో  గానీ, లేదా బీ జె పి లో ఉన్నతెలుగుదేశం మాజీ లతో  కానీ ఈయనకు ఎలాంటి సంబంధాలు ఉండవు.  రాష్ట్రాన్ని ఎప్పుడైనా పలకరించడానికి రుతు పవనాల మాదిరి అలా చుట్టపు చూపు గా వచ్చేసి ,  ఇలా మాయమైపోయే  జి వి ఎల్ వ్యవస్థ ల గురించి రాష్ట్ర బీ జె పి లో ఎవరికీ ఎలాంటి క్లూలు ఉండవు. ఈయన దారి రహదారి. ఈయన వ్యవస్థ ఇలాఉంటే, బీ జె పి లో ఉంటూ కూడా ఇంకాతెలుగు దేశం ఎజెండా , జెండా రెండూ మోస్తున్నట్టు కనిపించే సుజనా చౌదరి ఒక్క అమరావతి అంశం మీద తప్పించి, ఇతరత్రా ఏదీ మాట్లాడటానికి ఎక్కువగాఇష్టపడరు. జీ వీ ఎల్ కు, సుజనా కూ క్షణం పడదు. ఆయన ఎడ్డెం అంటే ఈయన తెడ్డెం అనే రకం.. ఏ మాత్రం పొసగని,పొంతన లేని పరస్పర భిన్నమైన అభిప్రాయాలు గల వీరిద్దరూ ఉత్తర ధృవం, దక్షిణ ధృవం మాదిరి ఒకే పార్టీ లో ఉంటూ కూడా కామన్  ఎజెండా తో పని చేసిన దాఖలాలు ఇప్పటివరకూ అయితే లేవు.   ఇహ, సి ఎం రమేష్ గురించి వేరే చెప్పనక్కర్లేదు. ఆయన తన బిజినెస్ వ్యవహారాలను బీ జె పి తో ముడి కట్టేసి, ఏ పార్టీ లో ప్రయాణిస్తున్నాడో కూడా మర్చే పోయి, మొన్నటికి మొన్న పరిమళ్ నత్వాని ని జగన్ మోహన్ రెడ్డి దగ్గర ప్రవేశ పెట్టడం లో కీలక పాత్ర పోషించిన  ఘనుడు. గుర్తు చేస్తే కానీ తానూ బీ జె పి లో ఉన్నాననే విషయం గుర్తుండని ఈయన కు  బీ జె పి, జన సేన కలిసి పోటీ  చేస్తున్న విషయం తెలుసో లేదో అని కూడాపార్టీ శ్రేణులు గుసగుస లాడుకుంటున్నాయి.  ఇహ వీరందరినీ సమన్వయము చేసుకుని  ముందుకెళ్తున్నట్టు భావిస్తూ , బాహ్య ప్రపంచం ముందు ఆవిష్కృతమయ్యే  వ్యక్తి మరెవరో కాదు... సాక్షాత్తూ  రాష్ట్ర బీ జె పి అధ్యక్షుడు కన్నా లక్ష్మీ నారాయణ. ఈయన, పవన్ కళ్యాణ్ తో కలిసి ప్రయాణించటానికి అంతగాసుముఖం గా లేదు...కారణమేమిటంటే, చంద్రబాబు నాయుడు లాంటి యోధులతో పోరాడిన తన రాజకీయం , చివరకు ఇలా ఏ పూట ఎక్కడ ఉంటారో కూడా తెలీని పవన్ కళ్యాణ్ పార్టీతో కలిసి పని చేయాల్సిన దుస్థితికి దిగజారటమేమిటని  తరచూ తనలో తానె కుమిలి పోతున్నట్టు సమాచారం.  ఇహ, టీ జీ వెంకటేష్ అయితే మరీను..... రాయలసీమ నినాదాన్ని తన ట్యాగ్ లైన్ గాచేసుకుని కాలక్షేపం చేసేస్తూ... ప్రస్తుతానికి బీ జె పి లో నివసిస్తూ ....ఈ స్థానిక ఎన్నికల సమరం లో తన పాత్ర ఏమిటో కూడాతెలీకుండా జీవనం వెళ్లదీస్తున్నారు. మొత్తానికి ఈ పంచ పాండవులు స్థానిక సమరం లో తమ 'పంచ్ ' పవర్ ఏమిటో ఈ నెలాఖరు లోగా చుపిస్తారేమోననే బోలెడు , ఇంకా గంపెడాశతో బీ జె పి అభిమానులు ఆత్రంగా ఎదురు చూస్తున్నారు.

ఏపీలో వంద కోట్ల దందా.. రియల్ క్రైమ్ స్టోరీ

సినిమాలలో ఎన్నో క్రైమ్ స్టోరీలు, ఎన్నో కిడ్నాప్ సీన్లు చూసుంటారు. అయితే.. కాకినాడలో జరిగిన ఈ రియల్ స్టోరీ ముందు ఆ రీల్ స్టోరీలన్నీ చిన్నబోతాయి. పేరున్న రాజకీయ నాయకులు, పలుకుబడి ఉన్న అధికారులు.. ఇలా భారీ తారాగణం నటించిన.. ఆ రియల్ స్టోరీ టైటిల్ వచ్చేసి.. "ఓ కిడ్నాప్, వంద కోట్ల స్కాం". 'నేనే రాజు నేనే మంత్రి' మూవీలో ఒక డైలాగ్ ఉంటుంది. మీరు ఏ పార్టీకి ఓటేసినా మేమే అధికారంలో ఉంటామని. అవును.. కొందరు రాజకీయ నాయకులు.. ఎన్నికల్లో ప్రజలు ఏ పార్టీని గెలిపిస్తే.. ఆ పార్టీలోకి జంప్ చేస్తారు. అలాగే అధికారులు కూడా.. ఏ పార్టీ అధికారంలోకి వస్తే ఆ పార్టీ నేతలని కాకాపడుతూ వారి ఆటలు సాగిస్తుంటారు. ఈ రియల్ స్టోరీ వింటే అది నిజమని మీకే అర్ధమవుతుంది. కాకినాడలోని సర్పవరంకి చెందిన ఆకుల గోవిందరాజు అనే వ్యక్తికి భోగాపురంలో వంద కోట్ల విలువైన 18 ఎకరాల ల్యాండ్ ఉంది. ఈ ఒక్క విషయం చాలదా.. మాఫియా కన్ను ఆయన మీద పడటానికి. ఎక్కడో ఆకాశంలో ఎగురుతున్న గద్దకి కింద ఉన్న కోడిపిల్ల కనిపించినట్టు.. మాఫియా వాళ్ళకి ఎక్కడున్నా విలువైన ల్యాండ్స్ కనిపిస్తాయి కదా. అలాగే, బలగ ప్రకాష్ అనే మాఫియా లీడర్ కి.. ఆకుల గోవిందరాజుకి చెందిన ల్యాండ్ పై కన్నుపడింది. ఇంకేముంది ఏకంగా పోలీసులనే రంగంలోకి దింపాడు. ఇక పోలీసులైతే ఓ అడుగు ముందుకేసి ఏకంగా కిడ్నాప్ కే తెరలేపారు. 2017.. సెప్టెంబర్ 19 .... శూన్యమాసం.. అమావాస్య.. మంగళవారం.. మధ్యాహ్నానికి- సాయంత్రానికి నడుమ సూర్యుడు మండిపోతున్న సమయం... అబ్బా ఏమన్నా ముహూర్తమా... శూన్యమాసం.. అమావాస్య.. మంగళవారం.. ఇదే కిడ్నాప్ కి సరైన ముహూర్తం అనుకున్నారేమో పోలీసులు... AP 30 AB 6655 నెంబర్ గల ఇన్నోవా కార్ లో.. పోలీసులు ఆకుల గోవిందరాజు ఇంటికి వచ్చారు. కారు నెంబర్ ఫ్యాన్సీగా ఉన్నా, ఆ ఖాకీలు చేసే పని మాత్రం ఏ మాత్రం పద్దతిగా లేదు. వాళ్ళు చేసే పనేంటో ఆ చుట్టుపక్కల ఉన్నవారికి తెలియదు. కొత్త మొహాలు కావడంతో.. చుట్టుపక్కల వారు కొందరు ఆశ్చర్యంతో, కొందరు అనుమానంతో చూస్తున్నారు. వాళ్ళు అలా చూస్తుండగానే.. దొంగల రూపంలో వచ్చిన పోలీసులు.. గోవిందరాజుని ఇన్నోవాలో పడేసి.. జెట్ స్పీడ్ లో హైవే ఎక్కారు. పోలీసుల భాషలో చెప్పాలంటే దీనినే కిడ్నాప్ అంటారు. కారు హైవే మీద దూసుకెళ్తుంది. ఆ స్పీడ్ చూస్తే.. అంబులెన్స్ డ్రైవర్ కావాల్సిన వ్యక్తి ఇన్నోవా డ్రైవ్ చేస్తున్నాడేమో అనిపిస్తుంది. డ్రైవర్ స్టీరింగ్ పట్టుకుంటే.. మనం ఖాళీగా ఉండి ఏం చేస్తాం అనుకున్నారేమో.. మిగతా పోలీసులు గోవిందరాజు పనిపెట్టారు. కారు.. కాకినాడ నుంచి భోగాపురం చేరేవరకు.. అంటే దాదాపు నాలుగు గంటల పాటు... గోవిందరాజుని భయపెట్టారు.. బెదిరించారు.. చిత్రహింసలు పెట్టారు. ఒక్కమాటలో చెప్పాలంటే నరకం చూపించారు. కారు సాయంత్రం 6 గంటలకు భోగాపురం సబ్ రిజిస్టార్ ఆఫీస్ కి చేరుకుంది. ఖాకీలకు భయపడ్డాడో, కాసులకు కక్కుర్తి పడ్డాడో తెలియదు కానీ.. సబ్ రిజిస్టార్ పందిళ్లపల్లి రామకృష్ణ.. సాయంత్రం 4:30 కే రిజిస్ట్రేషన్ కాగితాలు సిద్ధం చేసి.. పదేళ్ల తర్వాత ఫారెన్ నుంచి రిటర్న్ వస్తున్న ఫ్రెండ్ కోసం ఎదురుచూస్తున్నట్టు.. గుమ్మం వైపు చూస్తూ పోలీసుల కోసం ఎదురుచూస్తున్నాడు. ఇంతలో పోలీసులు గోవిందరాజుని తీసుకొని గుమ్మంలోకి అడుగు పెట్టనే పెట్టారు. గుమ్మంలో వాళ్ళ అడుగు పడిందో లేదో.. సబ్ రిజిస్టార్ మోహంలో వెలుగు వచ్చింది. గోవిందరాజు మోహంలో భయం పెరిగింది. భయంతో చూస్తుండగా ఎదురుగా కుర్చీలో కూర్చొని ఉన్న మాఫియా లీడర్ బలగ ప్రకాష్ కనిపించాడు. జర్నీలో పోలీసుల చిత్రహింసలతో భయపడిపోయిన గోవిందరాజు.. బలగ ప్రకాష్ ని చూసి మరింత భయపడ్డాడు. బలగ ప్రకాష్.. పోలీసుల మాదిరి సాగదియ్యలేదు.. కమర్షియల్ సినిమాల్లో విలన్ లాగా ఒక్కటే డైలాగ్ కొట్టాడు.. "సంతకం పెడతావా? సమాధిలో పడుకుంటావా?".... ఆ ఒక్క డైలాగ్ తో గోవిందరాజు భయం చావుభయంగా మారిపోయింది. ఎదురుగా మాఫియా లీడర్.. చుట్టూ భోగాపురం సీఐ నర్సింహారావు, ఎస్సైలు తారక్, మహేష్.. హెడ్ కానిస్టేబుల్ గోవిందరావు.. ఉన్నారు. ఎస్సైల పేర్లు తారక్, మహేష్ అని హీరోల పేర్లు ఉన్నాయి కానీ.. వాళ్ళ బిహేవియర్ మాత్రం పెద్ద విలన్ల పక్కన ఉండే చెంచా విలన్లు లాగా ఉంది. అన్యాయాన్ని అడ్డుకోవాల్సిన పోలీసులే.. మాఫియా లీడర్ తో కలిసిపోయి.. చిత్రహింసలు చేసి బెదిరిస్తుంటే.. తప్పనిసరి పరిస్థితుల్లో, వంద కోట్లు కంటే విలువైన ప్రాణం కోసం, అన్యాయం ముందు తలవంచి గోవిందరాజు సంతకం పెట్టాడు. ఆ ఒక్క సంతకంతో.. గోవిందరాజు మొహంలో తప్ప.. అక్కడున్న అందరి మొహాల్లో లక్ష్మీకళ ఉట్టిపడింది. అన్నట్టు ఇంత జరుగుతున్నా అక్కడ ఇతరులు ఎవరూ లేరా? అని మీకు అనుమానం రావొచ్చు. అక్కడ నిజంగానే ఎవరూ లేరు.. ఎందుకంటే వాళ్ళు పెట్టిన ముహూర్తం అలాంటిది మరి. శూన్యమాసం-అమావాస్య.. బుద్ధి ఉన్నోడు ఎవడైనా రిజిస్ట్రేషన్ పెట్టుకుంటాడా? వీళ్లంటే.. వంద కోట్ల కబ్జా ల్యాండ్ కాబట్టి.. బుద్ధిని పక్కనపెట్టి.. బెదిరించి.. రిజిస్ట్రేషన్ చేపించుకున్నారు. ఇప్పుడు అర్థమైందా వాళ్ళ శూన్యమాసం-అమావాస్య కాన్సెప్ట్ ఏంటో?!!.. ఈ కిడ్నాప్- కబ్జా వ్యవహారంపై.. సర్పవరం పోలీస్ స్టేషన్ లో 330/217 నెంబర్ తో కేస్ రిజిస్టర్ అయింది. అదేంటో.. FIR కూడా అయిన తరువాత.. చార్జిషీట్ దాఖలు చేయడానికి.. రాజమౌళి RRR చేయడానికి తీసుకునే టైం కన్నా ఎక్కువ తీసుకుంటున్నారు సర్పవరం పోలీసులు. రెండున్నరేళ్లుగా నాన్చుతూనే ఉన్నారు. ఈ విషయం గురించి.. ఏపీ హ్యూమన్ రైట్స్ కమిషన్ కి కాకినాడ పోలీసులు రిపోర్ట్ కూడా పంపారు. కానీ చార్జిషీట్ దాఖలు చేసే విషయంలో సర్పవరం సీఐ డిలే చేస్తూనే ఉన్నాడు. ఏంటి ఆ సీఐ ధైర్యం?.. భయపడితే భయపడటానికి ఆయన పోస్ట్ మ్యాన్ కాదు.. పోలీసోడు.. దానికితోడు పొలిటిషీయన్స్ సపోర్ట్ ఉన్నోడు. అవును.. ఈ వ్యవహారంలో.. బడా పొలిటిషీయన్స్ సపోర్ట్ కూడా ఉంది. అదే పోలీసుల ధైర్యం... శ్రీకాకుళం జిల్లాకి చెందిన మాజీ మంత్రి, ప్రస్తుత టీడీపీ నేత.. అలాగే గత ప్రభుత్వ హయాంలో విప్ గా పనిచేసిన నేత.. వీరిద్దరి సాయంతో సర్పవరం పోలీస్ స్టేషన్ ని ఫుల్ గా influence చేసే ప్రయత్నం బలంగా నడుస్తుంది. అందుకే చార్జిషీట్ కి మోక్షం కలగట్లేదు. ఇంత పెద్ద కిడ్నాప్- కబ్జా జరిగితే అస్సలు చర్యలే తీసుకోకుండా ఎలా ఉన్నారని అనుకుంటున్నారేమో... అబ్బో చాలా పెద్ద చర్య తీసుకున్నారు. భోగాపురం ఇన్స్పెక్టర్ ని బదిలీ చేసారు. అదేంటి!!.. అంత జరిగితే కేవలం బదిలీనా అనుకోవద్దు.. రాజకీయ ఒత్తిళ్లు అలాంటివి మరి.. అర్థంచేసుకోవాలి... ఇంకో విషయం ఏంటంటే.. ఈ వ్యవహారం డీజీపీ ఆఫీస్ కి కూడా చేరింది. మరి ఇంకేంటి.. వెంటనే అందరి మీద చర్యలు తీసుకొని ఉంటారుగా అంటారా? అబ్బో.. మీరు పవర్ ఫుల్ పోలీస్ ఆఫీసర్ సినిమాలు చూసి బాగా మోసపోయారు... అలాంటి పప్పులు ఇక్కడ ఉడకవు. వాస్తవానికైతే... CRPC 41A కింద డీజీపీ నియమించే ఓ సీనియర్ అధికారి.. విచారణ జరిపి.. తదుపరి చర్యల వరకు.. ఆ సీఐని సస్పెండ్ చేసే అవకాశముంది. కానీ ఇక్కడ అలాంటిదేం జరగలేదు. ఏదో ఫార్మాలిటీకి బదిలీతో సరిపెట్టారు. గోవిందరాజు ని బెదిరించి వంద కోట్ల విలువైన ల్యాండ్ అన్యాయంగా లాక్కున్నారు. అయినా తప్పు చేసిన వాళ్ళు బాగానే ఉన్నారు. పైగా గోవిందరాజునే ఇంకా టార్చర్ చేస్తున్నారు. రాజకీయ ఒత్తిళ్లలో భాగంగా.. ప్రస్తుత సర్పవరం సీఐ మరియు అర్బన్ డీఎస్పీ.. గోవిందరాజుని పదేపదే తిప్పించుకుంటున్నారు. ఇక కాకినాడలో ఉద్యోగం వెలగపెడుతున్న.. ఇప్పటి ఓ మంత్రిగారి బావమరిది.. రంగంలోకి దిగడంతో ఈ కేసు మరింత డైల్యూట్ అయింది. అసలే భోగాపురంలో ఎయిర్ పోర్ట్ అంటున్నారు. రెక్కలున్న విమానాలు వస్తున్నాయి అంటే.. ఆటోమేటిక్ గా భూముల ధరలకు రెక్కలొస్తాయి కదా.. అందుకే పోలీసులు- పొలిటీషియన్స్ అండతో మాఫియా ఇంతలా రెచ్చిపోతుంది. అంతేకాదు.. ఈ వ్యవహారం వెనుక.. 2017 ప్రాంతంలో ఉత్తరాంధ్ర జిల్లాల్లో పనిచేసిన ఓ కలెక్టర్ మరియు ఎస్పీ పాత్ర ఉన్నట్టు.. సెక్రటేరియట్ వర్గాల వద్ద స్పష్టమైన సమాచారం ఉంది. టీడీపీ పెద్దతలకాయలకు సన్నిహితులైన ఈ ఐఏఎస్, ఐపీఎస్ లు.. వైసీపీ ప్రభుత్వ హయాంలో కూడా తమ హవా కొనసాగించడం... అందరినీ ముక్కు, మూతి ఇలా అన్నింటి మీదా వేలేసుకునేలా చేస్తుంది. ఇంతకీ ఆ ఐఏఎస్ & ఐపీఎస్ ఎవరు? * ఒకరు.. పరుల అవినీతి మీద కాంతివంతంగా దండెత్తే ఐఏఎస్... * ఇంకొకరు.. పొద్దునలేస్తే సుభాషితాలు చెప్పే పాలమీగడ లాంటి ఐపీఎస్.. ఈయనకి టెక్నాలజీ మీద గ్రిప్ బాగా ఎక్కువ. ఈ వ్యవహారంలో వీరిద్దరి పాత్ర కూడా ప్రముఖంగా ఉంది. 'వంద గొడ్లను తిన్న రాబందు కూడా ఒక్క గాలివానకు కూలిపోతుంది' అన్నట్టు.. ఈ అవినీతి రాబందులను భయపెట్టే గాలివాన ఇప్పుడిప్పుడే మొదలవుతుంది. మాఫియా లీడర్ బలగ ప్రకాష్ కనుసన్నల్లో.. ఐఏఎస్, ఐపీఎస్లు, పోలీసులు, పొలిటీషియన్స్ అండతో జరిగిన ఈ అన్యాయంపై.. గోవిందరాజు కొద్ది నెలలుగా పోరాడుతూనే ఉన్నాడు. న్యాయం కోసం ఆయన ఎక్కని గుమ్మం దిగని గుమ్మం లేదు. సన్నిహితుల సాయంతో న్యాయం కోసం పోరాడుతున్నాడు. ఆ పోరాడంతో కొన్ని విషయాలు కూడా వెలుగులోకి వచ్చాయి. వాస్తవానికి అప్పుడు జరిగింది తప్పుడు రిజిస్ట్రేషన్ అని పేర్కొంటూ... భోగాపురం రిజిస్టార్ డాక్యుమెంట్ రైటర్.. 2019 అక్టోబర్ 19 తేదీన.. 164 CRPC స్టేట్మెంట్ ని.. కాకినాడ ఫస్ట్ అడిషనల్ జ్యూడిషల్ సివిల్ జడ్జ్.. ముందట ఇచ్చాడు. అంతేకాదు.. సీసీ కెమెరాలతో దొంగలని పట్టుకునే పోలీసులు.. ఆ సీసీ కెమెరాల పుణ్యమా అని అడ్డంగా బుక్ అయ్యారు. సర్పవరం లో కిడ్నాప్ చేసి.. భోగాపురం తీసుకెళ్లిన.. నాలుగు గంటల తతంగమంతా.. పలు చోట్ల సీసీ కెమెరాలలో రికార్డు అయింది. క్షవరం అయితే కానీ ఇవరం రాదని.. సీసీ కెమెరాలు చూసి దోషులని పట్టుకునే పోలీసులు.. ఆ సీసీ కెమెరాల సంగతి మర్చిపోయి ఇలా దొరికిపోవడం కామెడీగా ఉంది. మొత్తానికి కొద్దికొద్దిగా కదులుతున్న తీగతో.. దందా చేసి ఇన్నాళ్లు డొంకలో దాక్కున్నవారు.. ఇప్పుడిప్పుడే భయంతో వణుకుతున్నారు. ముఖ్యంగా డీజీపీకి కంప్లైంట్ వెళ్లడంతో ఐఏఎస్, ఐపీఎస్ ఒణికిపోతున్నారట. మరి ముఖ్యంగా ఆ ఐపీఎస్ అయితే.. డైపర్ వేసుకొని తిరుగుతున్నాడని టాక్... ఇప్పటికే ఆ ఐపీఎస్ గడిచిన రెండు నెలల్లో.. బలగ ప్రకాష్ టీం తో.. ఒకే హోటల్ లో 17 సార్లు సిట్టింగ్ వేశాడు. దీన్నిబట్టే అర్థంచేసుకోవచ్చు ఆ ఐపీఎస్ ఎంతలా వణికిపోతున్నాడో!! తప్పుని సరిదిద్దాల్సిన పోలీసులే.. ఇంత పెద్ద తప్పు చేశారు. ఈ విషయం డీజీపీ దృష్టికి కూడా వెళ్ళింది. మరి ఆయన ఈ కిడ్నాప్-కబ్జా వ్యవహారంలో ఇన్వాల్వ్ అయినవారిపై ఎలాంటి చర్యలు తీసుకుంటారు?.. బాధితుడికి ఎప్పుడు న్యాయం చేస్తారు? ఆయన ఇలాగే మౌనంగా ఉంటే ప్రజలకు పోలీసు వ్యవస్థ మీదే నమ్మకం పోతుంది. ఇక ఈ విషయంలో సర్కార్ కూడా అడుగు ముందుకేసి బాధితుడికి న్యాయం చేయాల్సిన అవసరముంది. అవినీతి రహిత పాలనే అందించడమే తమ లక్ష్యమని చెప్పుకునే అధికారపార్టీ.. అవినీతి-అన్యాయం చేసిన వారికి.. పరోక్షంగా అండగా ఉండటం ఎంత వరకు కరెక్ట్? గత ప్రభుత్వం మీద, అప్పుడు వారికి సన్నిహితంగా ఉన్న కొందరు అధికారులపైనా.. ఇప్పటి అధికారపార్టీ నేతలు పదేపదే అవినీతి ఆరోపణలు చేస్తుంటారు. మరి ఈ వ్యవహారం మీద ఎందుకు నోరు మెదపడం లేదు? ఇందులో తమ పార్టీ నేతలు కూడా ఉన్నారా? లేక పార్టీ సీనియర్ నేతైన మంత్రి గారి బావమరిది ఇన్వాల్వ్ అయ్యాడని వెనకడుగు వేస్తున్నారా? ప్రభుత్వం దీనిపై స్పందించాలి. ఈ భోగాపురం భాగోతం వెనుకున్న వారిపై ప్రభుత్వం కఠినంగా వ్యవహరించి.. బాధితుడికి న్యాయం చేయాలి. లేదంటే ప్రభుత్వం మీద కూడా నమ్మకం పోతుంది.  

క‌విత‌, ష‌ర్మిలా రాజ్య‌స‌భ‌కు వెళ్తారా?

తెలంగాణ నుంచి రెండు రాజ్యసభ సీట్ల కోసం అధికార టీఆర్ఎస్‌లో పోటాపోటీ నెలకొంది. షెడ్యూల్‌ ప్రకారం రాజ్యసభ ద్వైవార్షిక ఎన్నికల నోటిఫికేషన్‌ మార్చి 6న జారీ కానుంది. 13వ తేదీ వరకు నామినేషన్ల దాఖలుకు అవకాశం ఉంది.  సామాజిక కోణంలో తమకు అవకాశం దక్కుతుందని పలువురు సీనియర్లు భావిస్తుండగా, ఇప్పటివరకు పార్టీ తరఫున రాజ్యసభ పదవులు దక్కని వర్గాల వారూ ఆశగా ఎదురుచూస్తున్నారు. పార్టీ అధినేత కేసీఆర్‌ నిర్ణయం కోసం ఉత్కంఠగా ఎదురుచూస్తున్నారు.  నిజామాబాద్‌ మాజీ ఎంపీ కవితను ఈసారి పార్టీ తరఫున రాజ్యసభకు పంపిస్తార‌నే ప్ర‌చారం విస్తృతంగా జరుగుతోంది. అయితే సి.ఎం. కేసీఆర్ ఆలోచ‌నే ఎలా వుందో ఎవ‌రూ అంచ‌నా వేయ‌లేక‌పోతున్నారు. కెటిఆర్ సి.ఎం. అవుతారా? క‌వితా రాజ్య‌స‌భ‌కు వెళ్తారా?  అయితే హ‌రిష్‌రావు ఈ ప‌రిణామాల‌పై ఎలా స్పందిస్తారు? అనే అంశంపై టిఆర్ ఎస్ కార్య‌క‌ర్త‌ల్లో విస్తృతంగా చ‌ర్చ జ‌రుగుతోంది. జాతీయ రాజకీయాల్లోకి వెళ్లాలనుకుంటున్న సీఎం కేసీఆర్‌ తన తరఫున ఢిల్లీ, ఇతర రాష్ట్రాల్లో ఫెడరల్‌ ఫ్రంట్‌ ఏర్పాటు ప్రయత్నాలకు నమ్మకమైన వారి కోసం అన్వేషిస్తున్నారు.  రాజ్యసభ సీటు భర్తీ సామాజిక కోణంలోనే ఉంటుందని టీఆర్‌ఎస్‌ ముఖ్యులు భావిస్తున్నారు. ఏపీ కోటాలో పదవీ విరమణ చేస్తున్న టీఆర్‌ఎస్‌ రాజ్యసభ సభ్యుడు కె.కేశవరావుకు వయసు రీత్యా ఈసారి అవకాశం ఉండకపోవచ్చన్న అంచనాలున్నాయి. రెడ్లకు అవకాశం లభిస్తే, మాజీ ఎంపీ పొంగులేటి శ్రీనివా్‌సరెడ్డి, మాజీీ స్పీకర్‌ కె.ఆర్‌.సురే్‌షరెడ్డి, ఎమ్మెల్సీ నాయిని నర్సింహారెడ్డి మధ్య పోటీ ఉంటుందని చెబుతున్నారు. కమ్మ సామాజిక వర్గానికి ఇవ్వాలనుకుంటే మండవ వెంకటేశ్వరావు, తుమ్మల నాగేశ్వరరావు పేర్లు పరిశీలించవచ్చని అంటున్నారు. బీసీలకు అవకాశం ఇస్తే సిరికొండ మధుసూదనాచారి, బస్వరాజు సారయ్య పేర్లు పరిశీలిస్తారని చెబుతున్నారు. ఎస్సీ కోటాలో భర్తీ చేయాలని భావిస్తే కడియం శ్రీహరి, మాజీ ఎంపీ మంద జగన్నాథం పేర్లు పరిశీలిస్తారని అంటున్నారు. ఎస్సీల్లోనే మాలలకు అవకాశం ఇవ్వాలని అనుకుంటే, టీఎ్‌సఐఐసీ చైర్మన్‌ గాదరి బాలమల్లు, ఎస్టీ అయితే సీతారాంనాయక్‌ పేరు ఉండొచ్చని అంటున్నారు. అనూహ్యంగా ఒక పారిశ్రామికవేత్తను టీఆర్‌ఎస్‌ తరఫున రాజ్యసభకు పంపాలని అనుకుంటే హెటిరో అధినేత పార్థసారథిరెడ్డి పేరు పరిశీలించవచ్చని చెబుతున్నారు.  ఆంధ్రప్రదేశ్ కు చెందిన రాజ్యసభ స్థానాలు ఎవరికీ కేటాయించాలని ఇన్నాళ్లు చర్చించిన అధికార పార్టీ ఓ నిర్ణయానికి వచ్చిందని తెలుస్తోంది. ఈ మేరకు ఏపీ నుంచి రాజ్యసభకు ప్రాతినిధ్యం వహించే వారి జాబితా సిద్ధమైనట్టు సమాచారం.  కీలకమైన పదవులు కావడంతో పార్టీ నమ్ముకున్నోళ్లు.. తమకు అండగా నిలబడిన వ్యక్తులను ఎంపిక చేసినట్లు పార్టీ వర్గాల్లో వార్త వినిపిస్తోంది.  మాజీ ఎంపీ వైవీ సుబ్బారెడ్డి - సజ్జల రామకృష్ణారెడ్డితో పాటు మాజీమంత్రి - ఏపీసీసీ మాజీ అధ్యక్షుడు రఘువీరారెడ్డి ఉన్నట్లు తెలుస్తోంది. అయితే రఘువీరారెడ్డి కాకుంటే సుప్రీంకోర్టు రిటైర్డ్ జస్టిస్ జాస్తి చలమేశ్వర్ కూడా ఉన్నట్లు వార్తలు వస్తున్నాయి. ఈ జాబితా ఫైనలైనట్టు తెలుస్తోంది.  షర్మిల ఆపద సమయంలో జ‌గ‌న్‌కు తోడుగా నిలిచారు. జగనన్న వదిలిన బాణాన్ని అంటూ పాదయాత్ర చేశారు. కష్టకాలంలో పార్టీకి షర్మిల పెద్ద దిక్కుగా నిలిచారు. తన సొంత మీడియా సాక్షి ప్రారంభించినప్పటి నుంచి సజ్జల రామకృష్ణారెడ్డి జగన్ తో ఉన్నారు. సాక్షి పత్రిక ఎడిటోరియల్ డైరెక్టర్ గా కొనసాగుతూనే జగన్ కు రాజకీయాలపై సలహాలు సూచనలు ఇచ్చారు. ఆ తర్వాత సజ్జలను పార్టీలోకి ఆహ్వానించి పెద్ద పదవే ఇచ్చారు. విజయ సాయిరెడ్డి తర్వాత జగన్ కు అత్యంత నమ్మకస్తుడు సజ్జలనే. ఆయన పార్టీలో జగన్ రాజకీయ సలహాదారుడిగా పార్టీ రాజకీయ వ్యవహారాల కమిటీలో పని చేశారు. ప్రస్తుతం ఆంధ్రప్రదేశ్ ప్రభుత్వ సలహాదారుడిగా కొనసాగుతున్నారు. కడప జిల్లాకు చెందిన వ్యక్తి. ఎప్పుడూ తన తోడు ఉండడంతో ఆయనను రాజ్యసభకు జగన్ పంపించనున్నట్టు తెలుస్తోంది. ప్రకాశం జిల్లాకు చెందిన వైవీ సుబ్బారెడ్డి జగన్ పార్టీ పెట్టినప్పటి నుంచి ఉన్నారు. గతంలో ప్రకాశం ఎంపీగా సుబ్బారెడ్డి పని చేశారు. ఈసారి జరిగిన ఎన్నికల్లో సుబ్బారెడ్డి పోటీ చేయలేదు. అప్పుడు ఆయన పదవులు ఆశించకపోవడంతో ఇప్పుడు రాజ్యసభకు పంపించాలని నిర్ణయానికి వచ్చారు. పార్టీలో కీలక నాయకుడిగా గుర్తింపు పొందిన సుబ్బారెడ్డిని రాజ్యసభకు పంపితే న్యాయం జరుగుతుందనే భావనలో జగన్ ఉన్నారంట. అనూహ్యంగా రాజ్యసభకు పంపే జాబితాలో ప్రస్తుతం కాంగ్రెస్ పార్టీ సీనియర్ నాయకుడు రఘువీరారెడ్డి ఉండడం గమనార్హం. అనంతపురము జిల్లాకు చెందిన రఘువీరారెడ్డికి పిలిచి మరి రాజ్యసభ సీటు ఇస్తామంటున్నారు. యాదవ సామాజికి వర్గానికి చెందిన రఘువీరారెడ్డి జగన్ తండ్రి వైఎస్సార్ తో మంచి అనుబంధం ఉంది. అయితే రఘువీరారెడ్డి కాకుంటే మరొకరిని కూడా దృష్టిలో పెట్టుకున్నారు. భారత అత్యున్నత న్యాయస్థానం సుప్రీంకోర్టు జడ్జిగా పని చేసిన జస్టిస్ జాస్తి చలమేశ్వర్ ను రాజ్యసభకు పంపించాలని భావిస్తున్నారంట.  కృష్ణాజిల్లా యాదవ సామాజిక వర్గానికి చెందిన చలమేశ్వర్ సేవలను వినియోగించుకునేలా పార్టీ ఒక నిర్ణయానికి వచ్చిందంట. ఎందుకంటే తరచూ జగన్ న్యాయస్థానాల్లో చిక్కులు ఎదుర్కొంటున్నారు. చలమేశ్వర్ సేవలు వినియోగించుకుంటే జగన్ సేఫ్ గా ఉండడంతో పాటు న్యాయ కోవిదుడికి గౌరవంగా రాజ్యసభను ఇద్దామనే ఆలోచనలో ఉన్నారంట.

అధికారంలో ఉంటే ఒకలా... ప్రతిపక్షంలో ఉంటే మరోలా... వైజాగ్ ఎపిసోడ్ నీతి ఏంటి?

రాజకీయాల్లో ఓడలు బళ్లు అవుతాయి. బళ్లు ఓడలవుతాయి. ప్రజాస్వామ్యంలో ఇది సాధారణమే. ప్రస్తుతం దేశంలోనూ, అనేక రాష్ట్రాల్లోనూ ఇదే జరుగుతోంది. నిన్నమొన్నటివరకు దేశంలోనూ, ఆయా రాష్ట్రాల్లో చక్రం తిప్పినవారంతా, అనామకులుగా మారిపోయారు. దశాబ్దాల తరబడి రాజ్యాన్ని ఏలినవారు, ఇప్పుడు సైడైపోవాల్సిన పరిస్థితులు ఏర్పడ్డాయి. తెలుగు రాష్ట్రాల్లో పలువురు ఉద్దండుల పరిస్థితి ఇప్పుడలాగే కనిపిస్తోంది. ఎంతోమంది ముఖ్యనేతలు తీవ్ర గడ్డుపరిస్థితులను ఎదుర్కొంటున్నారు. మళ్లీ వాళ్లకు మంచి రోజులు వస్తాయని మాత్రం కచ్చితంగా చెప్పలేని పరిస్థితులు కనిపిస్తున్నాయి. ఆంధ్రప్రదేశ్, తెలంగాణ రెండింటిలోనూ ఊహించని రాజకీయ మార్పులు జరగడంతో ఓడలు బళ్లు... బళ్లు ఓడలయ్యాయి.  అయితే, అధికారంలో ఉండగా ఒకలా, ప్రతిపక్షంలా ఉంటే మరోలా వ్యవహరించడం సర్వసాధారణంగా కనిపిస్తుంది. విపక్ష నేతగా ఉన్న సందర్భాల్లో నేతలు వ్యవహరించే తీరు ఒక్కోసారి సాధారణ ప్రజాస్వామిక సూత్రాలకు విరుద్ధంగా ఉంటుంది. నేటి ముఖ్యమంత్రి వైఎస్ జగన్మోహన్ రెడ్డి మూడేళ్ళ క్రితం విపక్ష నేతగా ఉన్నారు. అప్పట్లో ఆయన ప్రత్యేక హోదా కోసం పట్టుదలతో ఉన్నారు. క్యాండిల్ ర్యాలీ నిర్వహించేందుకు వైజాగ్ పర్యటనకు వెళ్లారు. అప్పటికే అక్కడ సీఐఐ పార్ట్ నర్ షిప్ సమ్మిట్ జరుగుతోంది. ఆ నేపథ్యంలో క్యాండిల్ ర్యాలీకి అనుమతిని ప్రభుత్వం నిరాకరించింది. అయినా కూడా జగన్ వైజాగ్ చేరుకున్నారు. అక్కడి నుంచి నగరంలోకి వెళ్లేందుకు ప్రయత్నించారు. అప్పట్లో పోలీసులు ఆయనను అడ్డుకున్నారు. తనను అడ్డుకోవడంపై అప్పట్లో విపక్ష నేతగా ఉన్న జగన్ తీవ్ర ఆగ్రహం వ్యక్తం చేశారు.  ఇక, ఇప్పడు ఏపీలో రాజధాని రగడ కొనసాగుతోంది. అందులో భాగంగా చంద్రబాబు చేపట్టిన వైజాగ్ యాత్రలో ఉద్రిక్తత చోటు చేసుకుంది. ఇందులో పోలీసులను తప్పు పట్టాల్సింది ఏమీ లేదు. అయితే, ఇలాంటి సమయంలో విపక్ష నాయకులు ప్రతిష్టాత్మకంగా తీసుకుంటారు. ఎలాగైనా పోలీసు వలయాన్ని ఛేదించుకోవాలని తాము అనుకున్నది చేయాలని చూస్తుంటారు. పొలిటికల్ మైలేజ్ పొందాలని ప్రయత్నిస్తుంటారు. చంద్రబాబు వైజాగ్ టూర్లోనూ అదే జరిగిందనే మాట వినిపిస్తోంది. నాయకులు విపక్షంలో ఉన్నప్పుడు పొలిటికల్ మైలేజ్ కోసం ప్రయత్నించడంలో తప్పు లేదు. కాకపోతే...ఆ ప్రయత్నాలు సమాజంలో ఉద్రిక్తతలు పెంచేవిగా మాత్రం ఉండకూడదంటున్నారు. అదే సమయంలో అధికారంలో ఉన్న నాయకులు ప్రజాస్వామ్యంలో విపక్షాలకు ఉండే ప్రాధాన్యాన్ని గుర్తించాలని సూచిస్తున్నారు. అధికారపక్షం, విపక్షం....రెండూ ప్రజాస్వామ్యానికి రెండు చక్రాల్లాంటివని, ఏ ఒక్కటి సరిగా లేకున్నా ప్రజాస్వామ్యం కుంటుపడుతుందని గుర్తుచేస్తున్నారు.

రాజీవ్ గాంధీ మరణించాక ఆ సీక్రెట్ బయటపెట్టిన వాజపేయి!!

అమావాస్య రోజు చందమామని చూడాలనుకోవడం, రాజకీయాలలో విలువలు గురించి మాట్లాడాలనుకోవడం ఒకటే అంటుంటారు. అవును ఈ తరం రాజకీయాలను చూస్తే నిజమే అనిపిస్తుంది. ఒకరిపై ఒకరు హద్దు మీరి విమర్శలు చేసుకోవడమే తప్ప.. విలువైన రాజకీయాలు చేసేవారు ఎంతమంది ఉన్నారు ఈరోజుల్లో. ఎవరు అధికారంలోకి వచ్చినా ప్రతిపక్ష నేతల మీద కక్ష తీచుకోవాలన్న ధోరణే తప్ప.. ప్రజల కోసం ఒకరి సూచనలను ఒకరు గౌరవించుకుంటూ విలువైన రాజకీయాలు చేసేవారు ఎక్కడున్నారు?. ఈతరం రాజకీయ నాయకులు ముందుతరం వారిని చూసి ఎంతో నేర్చుకోవాలి. మాజీ ప్రధానులు రాజీవ్ గాంధీ- వాజపేయి మధ్య జరిగిన ఓ సంఘటన తెలిస్తే.. ఈ తరం రాజకీయ నాయకులు సిగ్గుతో తలదించుకుంటారు. అది రాజీవ్ గాంధీ ప్రధానిగా ఉన్న సమయం. అప్పుడు వాజపేయి ప్రతిపక్ష నేతగా ఉన్నారు. వారి మధ్య జరిగిన ఓ అపురూప సంఘటన గురించి ఇప్పుడు తెలుసుకుందాం.  " సార్..ప్రధానమంత్రి రాజీవ్ గాంధీ గారు లైన్ లో వున్నారు..మీతో మాట్లాడుతారుట ".. ఫోన్ పట్టుకుని వాజపేయి దగ్గరికి వచ్చి చెప్పాడు ఆయన వ్యక్తిగత కార్యదర్శి.." ఫోన్ అందుకున్న వాజపేయి ప్రధానమంత్రి తో రెండు నిమిషాలు మాట్లాడారు. ఫోన్ పెట్టేసి వాజపేయి కార్యదర్శి వంక చూసి "మనం ప్రధానమంత్రి తో పాటు ఐక్యరాజ్యసమితి సమావేశంలో పాల్గొనటానికి అమెరికా వెళ్తున్నాం.. ఏర్పాట్లు చూడండి" అనడంతో తను విన్నది నిజమేనా అని ఆశర్యంతో మరోమారు అటల్జీ ని అడిగి కన్ఫర్మ్ చేసుకున్నాడు కార్యదర్శి. " సార్..పత్రికలకు ప్రెస్ నోట్ పంపమంటారా?" నసిగాడు కార్యదర్శి వాజపేయి ఒక్క క్షణం అతనివంక చూసి నవ్వుతూ "నిక్షేపంగా" అన్నారు. ఈ వార్త అప్పట్లో ఇటు కాంగ్రెస్ పార్టీలోనూ, అటు బీజేపీ లోనూ పెద్ద దుమారం సృష్టించింది. రాజీవ్ గాంధీ నిర్ణయానికి కాంగ్రెస్ పార్టీలో సీనియర్లు సైతం ముక్కున వేలేసుకున్నారు. "సాక్షాత్తు ప్రధానమంత్రి హోదాలో ఐక్యరాజ్యసమితి ప్రతినిధుల సమావేశానికి అటెండ్ అవుతూ ప్రతిపక్షపార్టీ నేతను వెంటపెట్టుకెళ్లటం ఏంటి?" అంటూ పార్టీలో సన్నాయి నొక్కులు నొక్కారు. కానీ రాజీవ్ గాంధీ మాత్రం వాజపేయి ని తీసుకెళ్లడం వెనుక అసలు కారణాన్ని ఎవరికీ చెప్పలేదు. కానీ ఆయన మరణానంతరం వాజపేయే అసలు విషయాన్ని ప్రపంచానికి చెప్పారు.. ఆన్ టోల్డ్ వాజపేయి అనే పుస్తకం ద్వారా.. అదీ ఆయన మాటల్లోనే.. "1985 లోనే నాకు ఒక కిడ్నీ దెబ్బ తిని వైద్యం తీసుకుంటున్నా.1988 నాటికి రెండో కిడ్నీ కూడా దెబ్బతింది. డాక్టర్లు తక్షణం వైద్య చికిత్స అవసరం అన్నారు. ఇక్కడ కన్నా అమెరికాలో మెరుగైన వైద్యం అందుబాటులో ఉన్నందున అక్కడికి వెళ్లి ట్రీట్మెంట్ తీసుకోవాలని డాక్టర్లు సూచించారు. ఈ విషయం తెలుసుకున్న రాజీవ్ గాంధీ ఐక్యరాజ్యసమితి ప్రతినిధుల సమావేశానికి నన్ను కూడా రమ్మని ఫోన్ లో కోరారు. కానీ చివరగా ఆయన ఒక మాట చెపుతూ.. 'అటల్ జీ.. ఈ పర్యటనను పూర్తిగా మీ వైద్యానికి ఉపయోగించుకుని సంపూర్ణ ఆరోగ్యంతో ఇండియా కి రండి' అని చెప్పారు. ఈ రోజు నేను ప్రాణాలతో ఉన్నానంటే అది రాజీవ్ గాంధీ నాకు చేసిన ఉపకారం వల్లనే. నా కన్నా ఇరవై ఏళ్ళ చిన్నవాడు అయిన రాజీవ్ నాకు తమ్ముడిలాంటి వాడే" అని వాజపేయి అన్నారు. అది విలువలతో కూడిన రాజకీయమంటే. రాజీవ్ గాంధీ, వాజపేయి రాజకీయంగా ప్రత్యర్థులు కావచ్చు కానీ ఒకరినొకరు గౌరవించుకుంటూ విలువైన రాజకీయాలు చేశారు. వారిని చూసి ఈ తరం రాజకీయ నాయకులు ఎంతో నేర్చుకోవాలి. పొద్దున్న లేస్తే ఒకరిపై ఒకరు దుమ్మెత్తి పోసుకునే అధికార-ప్రతిపక్ష పార్టీల నాయకులు.. రాజకీయాలు పక్కన పెట్టి అప్పుడప్పుడన్నా నైతిక విలువలు పాటించాలన్న సూత్రం.. ఇలాంటి విషయాలు తెలుసుకుని అయినా పాటిస్తే బాగుండు..!

ప్రపంచంలోని అత్యంత విలువైన నాణెలలో ఆరు

ప్రపంచం డిజిటల్ మనీ, ఈ మనీ వైపు పరుగులు తీస్తుంది. కానీ, వేలాది సంవత్సరాలుగా డబ్బుగా చెలామణి అయినవి నాణెలు మాత్రమే.  లోహంతో తయారు చేయబడి  చెలామణిలో ఉన్న నాణెలకు ప్రత్యేక గుర్తింపు ఉంది. అయితే  కాగితం కరెన్సీ అందుబాటులోకి వచ్చిన తర్వాత ఈ నాణెల ప్రాధాన్యత బాగా తగ్గిపోయింది.  ప్రపంచంలో అరుదైన నాణెలుగా రికార్డు సృష్టించిన నాణెలు ఎన్నో ఉన్నాయి. వాటి విలువ కోట్లాది రూపాయల్లో ఉంటుంది. మరి వాటి వివరాలు ఎంటో చూద్దామా.. 6. లిబర్టీ హెడ్ నికెల్ మోర్టన్ స్మిత్ ఎలియాష్ బర్గ్ (1913 ) ఖరీదు 4.5మిలియన్ డాలర్లు (33,33,96,675  రూపాయలు) ఈ నాణెం ఖరీదు 2018లో వేలం ద్వారా 4,560000 డాలర్లకు చేరుకుంది. అత్యంత ప్రసిద్ధ చెందిన ఈ నాణెం ఈ భూగ్రహం మీద ఉనికిలో ఉన్న నాణెం ఐదు నమూనాలలో ఇది ఒకటి. వేలంపాటతో ధర పెరుగుతూ వచ్చి 2018లో 4.5మిలియన్ డాలర్లకు మించి ధర పలికింది. ఈ నాణెం పై భాగం నునుపుగా అద్దం వలే కనిపిస్తుంది. ఇలాంటి ఫినిషింగ్ ఉన్న నాణెం అరుదుగా ఉంటుంది. దీని  విలువ  ఎక్కువగా ఉండటానికి ఇది కూడా ఒక కారణం. అంతేకాదు ఈ నాణెం ముద్రణ గురించి  అధికారిక రికార్డులు లేనందున ఇది ఏ కాలం నాటిది అన్న విషయంపై చాలా వివాదాలు ఉన్నాయి.  కేవలం ఐదు లిబర్టీ నికెల్ నాణాలు మాత్రమే లభించాయి.  ఇవన్నీ అనధికారంగా తయారుచేశారంటారు. అయితే 1913 లో లిబర్టీ నికెల్ నాణెలను తయారు చేయడానికి  చట్టం అనుమతించింది. కాని కొంతమంది  మింట్ ఉద్యోగులు కొన్ని అక్రమ నమూనాలను ముద్రించారన్న ఆరోపణ ఉంది. ఈ ప్రసిద్ధ నాణెం 1972 నుండి రికార్డులను బద్దలు కొడుతున్నాయి. 100,000 కు అమ్ముడైన మొదటి నాణెం ఇదే. ఆ తర్వాత 1996 లో దీని ధర  ఒక మిలియన్ డాలర్లు పలికింది.  ప్రస్తుత రికార్డ్ హోల్డర్ ఎలియాస్‌బర్గ్ స్పెసిమెన్, గ్రేడెడ్ పిసిజిఎస్ పిఎఫ్ 66.  ఇది 2018 లో  4.5 మిలియన్ డాలర్లకు అమ్ముడైంది. 5.ఎడ్వర్డ్ 111 ఫ్లోరిన్ (1343) ఖరీదు 6.8 మిలియన్ డాలర్లు(50,37,99,420 రూపాయలు) ప్రపంచంలో అత్యంత ఖరీదైన నాణాల్లో ఇది ఒకటి. అంతేకాదు చాలా పురాతనమైన నాణెం.  దాదాపు 670ఏండ్ల చరిత్ర ఉంది. ఈ నాణెం విలువ ఎక్కువగా ఉండడానికి మరో ముఖ్యమైన కారణం ఇది అతి పురాతన నాణెం కావడం. ఒకే విధమైన నాణాల్లో మూడు మాత్రమే అనేక శతాబ్దాల నుంచి చెక్కుచెదరకుండా ఉన్నాయి. అంటే ఇది చాలా విలువైనది మాత్రమే కాదు, అరుదైనది కూడా. ప్రపంచంలో ఎక్కడా ఇలాంటి నాణెలు ఇప్పటి వరకు కనుగొనబడలేదు.  ఈ నాణెం 2006 సంవత్సరంలో వెలుగులోకి వచ్చింది. అదే సంవత్సరంలో వేలంపాట ద్వారా దీన్ని విక్రయించారు. ఆ తర్వాత 1857 లో టైన్ నదిలో కనుగొనబడిన మిగిలిన రెండు నాణేలు ప్రస్తుతం బ్రిటిష్ మ్యూజియంలో ప్రదర్శనకు ఉంచారు. 4.బ్రషర్ డబులూన్ (1787) ఖరీదు 7.4 మిలియన్లు(54,82,50,830 రూపాయలు) న్యూయార్క్ రాష్ట్రంలో నాణాల తయారిలో బంగారం బదులు రాగిని ఉపయోగించాలన్న బ్రషర్ లక్ష్యం  మేరకు రూపుదిద్దుకున్న నాణెలు. అయితే బంగారానికి బదులుగా రాగి నాణెలు తయారుచేయాలన్న ఎఫ్రియం బ్రషర్ల ప్రతిపాదనను ఆ రాష్ట్రం ఒప్పుకోలేదు. బంగారు నాణెలనే చెలామణిలోకి తీసుకువచ్చే ప్రయత్నం చేశారు. అయితే  బ్రషర్ ప్రతిభావంతుడైన స్వర్ణకారుడు. అతను స్టేట్ చేసిన సూచనను విస్మరిస్తూ కొత్త నాణెలను ముద్రించాడు. వాటిలో ఎక్కువ భాగం కాంస్యంతో తయారు చేయబడ్డాయి. వాటిలో కొన్ని 22 క్యారెట్ల బంగారంతో కూడా తయారుచేశాడు. ఈ నాణెలు చాలా అరుదుగా లభిస్తాయి. అంతేకాదు ఆసక్తి గల  కథ వీటిపై ఉంటుంది. కాబట్టి, అవి చాలా విలువైనవి.  ఒక వాల్ స్ట్రీట్ ఇన్వెస్ట్‌మెంట్ సంస్థ 2011 లో  వేలంలో 7.4 మిలియన్ డాలర్లకు ఒక నాణెం కొనుగోలు చేసింది. 3.సెయింట్ గౌడెన్స్ బబుల్ ఈగిల్ (1907) ఖరీదు 7.6 మిలియన్ డాలర్లు(56,30,62,340 రూపాయలు) ఈ నాణాలను ఎక్కువ పరిమాణంలో ఉత్పత్తి చేయడం అనుకున్న దానికన్నా చాలా కష్టమని తేలింది. సంక్లిష్టమైన రూపకల్పన కారణంగా  వీటి ఉత్పత్తిని నిలిపివేశారు.  ఆ తర్వాత కొన్ని మార్పు చేశారు. యు.ఎస్. మింట్స్ చీఫ్ గా బాధ్యతలు నిర్వహించే చార్లెస్ బార్బర్ ఈ నాణెం పై దేవుడిని మేం విశ్వసిస్తున్నాం అన్న పదాలను తొలగించాడు. నాణెం మార్పులో,  తయారీ బాధ్యత పూర్తిగా అతనే తీసుకున్నాడు.  కానీ దీన్ని సమావేశంలో అంగీకరించలేదు. అయినప్పటికీ నాాణెం తయారీ మాత్రం ఆగలేదు.  ఇప్పుడు అది అత్యంత విలువైన నాణెంగా రికార్డు నెలకొల్పింది. 2. డబుల్ ఈగల్ (1933) ఖరీదు 7.6మిలియన్ డాలర్లు(56,30,62,340 రూపాయలు) డబుల్ ఈగిల్ 1933 అనేది యునైటెడ్ స్టేట్స్ 20 డాలర్ల బంగారు నాణెం. ఈ నాణెం రెండో ముద్రణ 1933లో జరిగింది. అయితే ఇవి చెలామణిలోకి రాలేదు. అప్పటివరకు సాధారణ ప్రజల మధ్య వాడకంలో ఉన్న ఈ నాణెలు కరిగించబడ్డాయి. అంతేకాదు అమెరికా అధ్యక్షుడైన థియోడర్ రూజ్‌వెల్ట్ ప్రజలు బంగారం కలిగి ఉండకుండా ఈ నాణాలను నిషేధించాడు. ఆ సమయంలో నెలకొనిఉన్న బ్యాంకింగ్ సంక్షోభానికి ఇది సహాయపడుతుందని అతను భావించాడు.  అయితే  కొద్ది మొత్తంలో ఈ నాణాలు ముద్రణాలయం నుంచి బయటకు వచ్చాయి.  ఏలా వచ్చాయి అన్నది మాత్రం స్పష్టం తెలియదు. కానీ, ఈ నాణాలను కలిగి ఉండటం అనేది చట్టవిరుద్ధం. ఎవరితోనైనా ఈ నాణెం ఉందని తెలస్తే దాన్ని వెంటనే స్వాధీనం చేసుకునేవారు. కానీ, ఎక్కడ నాణెలు ఉన్నాయి అన్నది తెలుసుకునే లోగానే ఇది ఒక కాయిన్స్ కలెక్టర్ వద్దకు చెేరింది. అవుతుంది. ఏదేమైనా, ఒక ప్రైవేట్ యజమాని ఒక నాణెం పొందగలిగాడు. ఇది మొదట ఈజిప్ట్ రాజు ఫరూక్ దగ్గర ఉండేది. ఆ తర్వాత ప్రైవేట్ వ్యక్తి దీన్ని పొందాడు. నాణెం  విక్రయించి లాభాలను యుఎస్ మింట్ కు తో విభజించాడు. ఏదీ ఏమైనా 4,455.,000 నాణెలు ముద్రించబడినప్పటికీ ఏదీ అధికారిక నాణెంగా వాడుకల్లోకి రాలేదు. 1. ఫ్లోయింగ్ హెయిర్ సిల్వర్, కాపర్ డాలర్ (1794) ఖరీదు 10 మిలియన్ డాలర్లు (74,21,43,500 రూపాయలు) ప్రపంచంలోనే అత్యంత విలువైన నాణెం ఇది. పరిశోధకుల అంచనా ప్రకారం వెండితో తయారుచేయబడిన మొదటి నాణెం ఇది.  యూఎస్ ఫెడరల్ ప్రభుత్వం చేత ముద్రించబడి ప్రజలకు అందుబాటులోకి వచ్చిన మొదటి వెండి నాణెంగా గుర్తింపు పొందింది. అంతేకాదు  2013 లో ఈ నాణెం మరో రికార్డు సాధించింది. ఇది ఇప్పటివరకు అమ్మకానికి వచ్చిన అతి ఖరీదైన సింగిల్ కాయిన్ గా ప్రపంచ కొత్త రికార్డును సృష్టించింది. వెండి నాణేల ముద్రణకు వెళ్ళేముందు మింట్ 1792లో ముద్రణకు సంసిద్ధం అయ్యింది.  రాగి, వెండి నమూనా నాణేలను మాత్రమే తయారు చేసింది. అయితే ఈ నాణాలను సేకరించేవారు ఈ చారిత్రాత్మక,  అత్యంత విలువైన నాణెంను 200 సంవత్సరాలకు పైగా సంరక్షించారు. నాణేల ముద్రణ వెనుక ఉన్న కథ దాని విలువను పెంచుతుంది. చాలా సార్లు అంతకన్నా ఎక్కువే ఉంటుంది.

ప్రపంచంలో అత్యంత భయానక రహస్య సరస్సులు

ప్రపంచం అనేక అద్భుతాల సమాహారం. అందమైన జలపాతాలు, అలరించే అడవులు, చిత్రకారుణి కుంచెను మించిన అపూర్వమైన దృశ్యాలు ఎన్నో ఎన్నెన్నో.. అయితే కొన్ని అద్భుతాల వెనుక భయంకరమైన వాస్తవాలు దాగి ఉన్నాయి. వాటి గురించి తెలుసుకున్నప్పుడు ఆశ్చర్యానికి గురిచేస్తాయి. ప్రపంచంలోని అందమైన సరస్సులే కాదు అత్యంత భయానక సరస్సులు కూడా ఉన్నాయి. వాటిలో కొన్ని ప్రాణాలను హరిస్తాయి. ముందుగా వీటి గురించి తెలుసుకోవడం వల్ల ఆయా ప్రాంతాలకు వెళ్ళినప్పుడు జాగ్రత్తలు తీసుకోవడం సాధ్యమవుతుంది. మరి ఆ భయానక రహాస్య సరస్సుల విశేషాలు ఏంటో చూద్దామా... 1. బ్లూ లేక్, రష్యా రష్యాలోని వింతైన సరస్సు ఇది. ఈ సరస్సులోకి నీరు వర్షం ద్వారా ఈ సరస్సులోని నీరు  ప్రవాహాల నుంచి,  నదుల నుంచి ఇందులోకి చేరదు. భూగర్భ నీటి బుగ్గల ద్వారా సరస్సులోకి నీళ్లు చేరుతాయి. అయితే నీటిలో హైడ్రోజన్ సల్ఫైడ్ కంటెంట్ ఎక్కువగా ఉంటుంది. ఈ కారణంగా నీటి రంగు నీలం రంగులో కనిపిస్తుంది.  సరస్సు 258 మీటర్ల లోతులో ఉంది. ఇది 75 మీటర్ల ఎత్తున ఉన్న సీటెల్ స్పెస్ కూడా ఈజీగా ఇందులో మునిగిపోతుంది. ఈ సరస్సు నీరు రాళ్ళను సైతం కోస్తూ వెళ్లడంతో సరస్సు రోజురోజుకు లోతుగా మారుతోంది. ఈ నీలం సరస్సు ప్రపంచంలోని అతిపెద్ద గుహలను తనలో నిక్షిప్తం చేసుకుందని కొంతమంది శాస్త్రవేత్తలు భావిస్తున్నారు. 2. లేక్ నాట్రాన్, టాంజానియా తూర్పు ఆఫ్రికాలో లోతైన సరస్సు ఇది.  టాంజానియా కథలలో ఈ సరస్సు ప్రస్తావన ఉంటుంది.  ప్రజల జీవితాలను ఇది ప్రభావితం చేస్తుంది. అయితే ఈ సరస్సు ఒడ్డున ఫ్లెమింగోలు, చిన్న పక్షులు, గబ్బిలాలు ప్రాణములేని స్థితిలో కనిపిస్తాయి. అత్యంత భయంకరమైన విషయం ఏమిటంటే, ప్రాణాలు కోల్పోయిన అన్ని జీవుల శరీరాలు భద్రపరచబడి కనిపిస్తాయి. నీటిలోని సోడియం కంటెంట్ కారణంగా సరస్సు పసుపు రంగును కనిపిస్తుంది. అయితే ఇందులో ఉండే అనంతమైన సూక్ష్మజీవుల కారణంగా ఈ జలాలు నారింజ రంగులో ఉంటాయి. కానీ నెమ్మదిగా నారింజ రంగు మరింత ముదురుగా మారి, నీటి రంగు ప్రకాశవంతమైన ఎరుపు రంగులోకి మారుతోంది. ఈ సరస్సులో నాట్రాన్ పుష్కలంగా ఉంది, సహజంగా సంభవించే సోడియం సమ్మేళనం సోడియం కార్బోనేట్, బైకార్బోనేట్, క్లోరైడ్ మరియు సల్ఫేట్ల మిశ్రమాన్ని కలిగి ఉంటుంది. ఈ సరస్సు చుట్టూ వాతావరణం రంగురంగుల ల్యాండ్ స్కేప్ మాదిరిగా కనిపిస్తోంది. 3. మిచిగాన్ లేక్, యుఎస్ఎ అమెరికాలో ఉన్న ఐదు గొప్ప సరస్సుల్లో మిచిగాన్ లేక్ ఒకటి. ఈ సరస్సు వందలాది మంది ప్రాణాలను తీసిన విషయం చాలా తక్కువ మందికి తెలుసు. సరస్సులో ఎలాంటి రాక్షసులు లేరు. అంతేకాదు మరణించినవారు నీటికి దూరంగా ఉన్నప్పుడే మరణించారు. అయితే ఇక్కడి అలలను ప్రమాదకరంగా పరిగణిస్తారు. ఒడ్డుకు వచ్చే అలలు, నీటి ప్రవాహాలు ఊహించని విధంగా ప్రాణాలను హరిస్తాయి. అంతేకాదు గజ ఈతగాళ్లు కూడా  మిచిగాన్ ఒడ్డున ప్రవాహాలను ఎదుర్కోలేరని, ఇవి చాలా ప్రమాదకరమైనవి అంటారు. సమ్మర్ సీజన్ లో ఇక్కడికి ఈతకు వచ్చి అనేక మంది ప్రాణాలు కోల్పోతారు.  ఆ నిర్దిష్ట సమయంలో నీటి ప్రవాహం, అలల తాకిడి ఎక్కువ కావడంతో ఎక్కువ మరణాలు సంభవిస్తాయి. శరదృతువు ఈ సరస్సు వాతావరణం పడవలు, మత్స్యకారులకు ప్రమాదకరం.  నీటి ఉపరితలంపై హఠాత్తుగా పెరుగుతున్న ప్రవాహాలు ప్రాణాంతక తరంగాలకు కారణమవుతాయి. 4. న్యోస్ కామెరూన్ సరస్సు ఈ సరస్సు అనేక పొరుగు గ్రామాలకు అనేక శతాబ్దాలుగా నిశ్శబ్దంగా నీటిని అందించింది. కానీ దాని ఉపరితలం కింద, ఒక రహస్యం ఉంది. ప్రకృతి ప్రాణాంతక శక్తిని అకస్మాత్తుగా విడుదల చేసిన తరువాత సరస్సు ప్రపంచవ్యాప్తంగా ఖ్యాతిని పొందింది. ఈ సంఘటన ఆగస్టు 21, 1986 న జరిగింది. సరస్సు నుండి అధిక శక్తితో కూడిన వాయువు మేఘం పెరిగింది. సమీపంలో నివసించే ప్రతిదీ ప్రజలు, పశువులు, పక్షులు మొదలైనవి ఏమీ ఈ విపత్తు నుంచి బయటపడలేదు! సరస్సు చుట్టూ నివసించే చిన్న కీటకాలు కూడా కుళ్ళిపోయాయి. ఈ సంఘటన సుమారు 1746 మంది మానవుల ప్రాణాలను తీసింది.  ప్రపంచం నలుమూలల శాస్త్రవేత్తలు ఈ ప్రదేశాన్ని సందర్శించారు, సరస్సులో అగ్నిపర్వత బిలం ఉన్నట్లు వారు కనుగొన్నారు. 5.కరాచాయ్ సరస్సు, రష్యా రష్యా లోని యురల్స్ లో ఉన్న ఈ సరస్సు ప్రపంచంలో అత్యంత కలుషితమైన వాటిలో ఒకటిగా పరిగణించబడుతుంది. ఈ సరస్సు ఒడ్డున కేవలం రెండు గంటలు గడపడం వల్ల మీరు రెండు గంటలు ఎక్స్‌రే మెషీన్‌లో కూర్చున్నట్లుగా అనిపిస్తుంది. అంతేకాదు అది కూడా సీసంతో కప్పబడిన కవరింగ్ లేకుండా ఉంటుంది. రేడియేషన్ పాయిజనింగ్ ద్వారా చాలా నెమ్మదిగా ప్రాణాలు కోల్పోయే ప్రమాదం ఉంటుందని ప్రత్యేకంగా చెప్పనవసరం లేదు. ఈ సరస్సు 1950 లలో జరిగిన యుద్ధం కారణంగా నాశనమైంది. ఆ తర్వాత ఈ సరస్సును ద్రవ రేడియోధార్మిక వ్యర్థాల నిల్వ కోసం ఉపయోగించారు.  

తెల్ల కాగితం- నల్ల చుక్క

‘‘ఇవాళ మీకో పరీక్ష పెట్టబోతున్నాను’’ క్లాసులోకి అడుగుపెడుతూనే చెప్పారు ప్రొఫెసర్‌. అకస్మాత్తుగా ఈ పరీక్ష ఏమిటా అని విద్యార్థులంతా తలపట్టుకుని కూర్చున్నారు. కానీ ప్రొఫెసర్‌ మాటని ఎవరు కాదనగలరు. ఎలాగొలా పరీక్షని పూర్తిచేసేందుకు అంతా సిద్ధపడ్డారు. అందరికీ తలా ఒక ప్రశ్నాపత్రాన్నీ ఇచ్చారు ప్రొఫెసర్‌. ‘‘ఈ ప్రశ్నాపత్రం వెనుకనే మీ జవాబులు రాసి ఇవ్వండి. మీకు ఒక్క అరగంటే సమయం ఉంది,’’ అంటూ పరీక్షని మొదలుపెట్టేశారు.   విద్యార్థులంతా ప్రశ్నాపత్రాలని తెరిచి చూస్తే ఏముంది. కాగితం మధ్యలో ఒక చిన్న చుక్క కనిపించింది అంతే! ప్రొఫెసర్‌గారు తమ తెలివితేటల్ని పరీక్షించేందుకే హఠాత్తుగా ఈ పరీక్షని పెట్టారన్న విషయం విద్యార్థులకి అర్థమైపోయింది. కాబట్టి అంతా ఆ చుక్కని చూసి తమకి తోచిన జవాబుని ఏదో ప్రశ్నాపత్రం వెనకాల రాయడం మొదలుపెట్టారు.   అరగంట గడిచిపోయింది, ఒకో విద్యార్థీ వచ్చి తను పూర్తిచేసి ప్రశ్నాపత్రాన్ని ప్రొఫెసర్‌గారి బల్లమీద ఉంచి వెళ్లారు. ప్రొఫెసరుగారు ఆ ప్రశ్నాపత్రాలన్నింటినీ తీసుకుని వాటిలోంచి ఒక్కో విద్యార్థీ రాసిన జవాబుని చదవడం మొదలుపెట్టారు. ప్రశ్నాపత్రంలో ఉన్న చుక్కని చూసి విద్యార్థులు రకరకాల జవాబులు రాశారు. కొంతమంది ఆ చుక్క ఆకారాన్నీ, రంగునీ వర్ణించారు. మరికొందరు కాగితంలో దాని స్థానం గురించి కొలతలు వేశారు. ఇంకొందరు మరో అడుగు ముందుకు వేసి ‘జీవితం ఓ చుక్కలాంటిది...’ అంటూ కవితలల్లారు. కొందరైతే అసలు ఏ జవాబూ లేకుండా కాగితాన్ని అలాగే వదిలివేశారు.   ప్రశ్నాపత్రాలన్నింటినీ చదివిన తరువాత ప్రొఫెసరుగారు తన అభిప్రాయాన్ని చెప్పడం మొదలుపెట్టారు- ‘‘మీకు ఓ నల్ల చుక్క ఉన్న పత్రాన్ని ఇచ్చి మీకు తోచింది రాయమని అడగ్గానే, అంతా కాగితం మధ్యలో ఉన్న నల్లని చుక్క గురించే రాశారు. ఎవ్వరూ కూడా మనం చెప్పుకునే సబ్జెక్టు గురించి కానీ, మీ లక్ష్యాల గురించి కానీ, జీవితం మీద మీకు ఉన్న అభిప్రాయాల గురించి కానీ... ఆఖరికి మీ గురించి కానీ ఒక్క ముక్క కూడా రాయలేదు. మన జీవితం కూడా మీకిచ్చిన తెల్లకాగితం లాంటిదే! దాని మీద అనారోగ్యం, పేదరికం, అసంతృప్తి, కుటుంబ కలహాలు లాంటి చిన్న చిన్న మరకలు కనిపిస్తూ ఉంటాయి. మనమంతా విలువైన జీవితాన్ని మర్చిపోయి ఎంతసేపూ ఆ మరకల మీదే మన దృష్టిని కేంద్రీకరిస్తూ ఉంటాము. వాటి గురించే మన మనసునీ కాలాన్నీ వెచ్చిస్తూ ఉంటాము. అంతేకానీ, చేతిలో ఉన్న తెల్లటి కాగితం మీద ఎంత అందమైన జవాబుని రాయవచ్చో, ఎంత అద్భుతమైన చిత్రాలని గీయవచ్చో మర్చిపోతూ ఉంటాము. నేను మీకు ఈ పరీక్ష పెట్టింది మీకు మార్కులు ఇవ్వడానికి కాదు, మీకు జీవితం విలువ నేర్పడానికి,’’ అంటూ ముగించారు ప్రొఫెసరుగారు. ఆయన మాటలు విన్న తరువాత విద్యార్థులకి తమ జీవితాల్లో అత్యంత ఉపయోగపడే పాఠం అదే అనిపించింది. (ప్రచారంలో ఉన్న కథ ఆధారంగా)   ..Nirjara

స్వామీజీ ఆర్డర్ వేశారు.. మంత్రి గారు గప్ చుప్

జగన్ ప్రతిపక్షం లో ఉన్న సమయంలో ఆయనతో యాగాలు చేయించి మరీ తన ఆశీస్సులతో ఆయనను సీఎం పదవిలో కూర్చోబెట్టారు శారదా పీఠాధిపతి స్వరూపానంద స్వామి. అప్పటి నుండి స్వామి వారి హవా ఏపీలో అప్రతిహతంగా సాగుతోంది. దీంతో ఇటు ఏపీలోని ఉన్నతాధికారులతో పాటు బడా బడా నేతలు కూడా శారదా పీఠానికి క్యూ కడుతున్నారు. అయితే కొద్దీ రోజుల క్రితం తన పుట్టినరోజుకు అన్ని దేవాలయాల్లో పూజలు చేయించాలనే ఆర్డర్లు ఇప్పించి ఆ తరువాత ఆ విషయం వివాదం కావడంతో ఆ తరువాత వెనక్కు తగ్గారు. ఇప్పుడు ఎక్కడ ఏ దేవాలయంలో ఎవరు ట్రస్టీగా ఉండాలనేది కూడా ఆయనే డిసైడ్ చేసేస్తున్నారు.   తాజాగా భీమిలి దగ్గర గుడిలోవలో ఉన్న రంగనాథ స్వామి ఆలయం విషయంలో కూడా అదే జరిగింది. ట్రస్టు బోర్డులో ఎవరెవరిని అపాయింట్ చేయాలో స్వరూపానందస్వామి పేర్లు ఇస్తే.. అక్కడి అధికారులు దానిని ఆమోదించేసారు. ఈ నియామకాలకు దేవాదాయశాఖ కమిషనర్ దగ్గర నుంచి కూడా అప్రూవల్ వచ్చేసిందట. అయితే ఎటొచ్చి స్థానిక ఎమ్మెల్యే ప్లస్ మంత్రి కూడా అయిన అవంతి శ్రీనివాసరావుకు మాత్రం అసలు సమాచారం లేదట. అయితే తీరా తెలిశాక ఆయన మండిపడ్డారట. ఫైనల్ గా ఆ రికమెండేషన్ ఎవరు చేశారో తెలిశాక పాపం గప్ చుప్ గా నోరు మూసుకున్నారని సమాచారం.

ప్రచారంలో కరోనా రూల్స్ పాటించాల్సిందే! ఎస్ఈసీ తాజా ఆదేశాలు

గ్రేటర్ హైదరాబాద్ ఎన్నికల ప్రచారంలో ఎవరూ కరోనా మార్గదర్శకాలు పాటించడం లేదు. మాస్కులు కూడా లేకుండానే గుంపులు గుంపులుగా తిరుగుతూ ప్రచారం చేస్తున్నారు. ప్రచారంలో ఎక్కడా శానిటైజర్లు వాడటం లేదు. రాజకీయ నేతలు కూడా మాస్కులు లేకుండానే ప్రచారంలో పాల్గొంటున్నారు. దీంతో హైదరాబాద్ లో మళ్లీ కరోనా మహమ్మారి విజృంభిస్తుందేమోనన్న ఆందోళన వ్యక్తమవుతోంది. దీనిపై స్పందించిన రాష్ట్ర ఎన్నికల సంఘం.. రాజకీయ పార్టీలకు మరోక సారి కరోనా మర్గదర్శకాలు జారీ చేసింది.    ఎన్నికల సందర్భంగా నిర్వహించే ఇంటింటి ప్రచారం, రోడ్‌షోలు, ర్యాలీల్లో అన్ని రాజకీయ పార్టీలు, అభ్యర్ధులు, కార్యకర్తలు కచ్చితంగా కరోనా కోడ్‌ నిబంధనలు పాటించాల్సిందేనని ఆదేశించింది. పలు పార్టీలు ఎన్నికల సంఘం జారీ చేసిన కోవిడ్‌ నిబంధనలు పాటించడం లేదని గుర్తు చేసిన ఎన్నిక సంఘం.. ఎట్టి పరిస్థితుల్లోనూ కోవిడ్‌ నిబంధనలు ఉల్లంఘించరాదని సూచించింది. నిబంధనలు పాటించని వారిపై చర్యలు తీసుకుంటామని స్పష్టంచేసింది. అన్నిపార్టీల అభ్యర్ధులు, వారి కార్యకర్తలు ఎన్నికల ప్రచారం సందర్భంగా తప్పని సరిగా ముఖానికి మాస్క్‌ ధరించాలి. అలాగే శానిటైజర్లను వినియోగిస్తూ భౌతిక దూరం పాటించాలని సూచించింది.    ఇంటింటి ప్రచారానికి వెళ్లినప్పుడు అభ్యర్ధితో పాటు ఐదుగురు మాత్రమే వెళ్లాలని ఎన్నికల సంఘం స్పష్టమైన ఆదేశాలు జారీ చేసింది. ఇతరులు ప్రచారంలో పాల్గొంటే తప్పని సరిగా ఫేస్‌మాస్క్‌ ధరించాలని ఎన్నికల కమిషన్ సూచించింది. తప్పని సరిగా శానిటైజర్‌ వినియోగిస్తూ భౌతిక దూరం పాటించాలని సూచించింది. రోడ్‌షోలు, ర్యాలీలు నిర్వహించే సమయంలోనూ తప్పని సరిగా ఫేస్‌మాస్క్‌లను ప్రతి ఒక్కరూ ధరించేలా చూడాలని... చేతులను శానిటైజర్‌తో శుభ్రం చేసుకోవాలని..సమావేశాలు, బహిరంగ సభల్లోనూ భౌతిక దూరం తప్పని సరి అని రాష్ట్ర ఎన్నికల సంఘం స్పష్టంచేసింది.

రెచ్చగొట్టే మాటలు.. విద్వేష ప్రసంగాలు! గాడి తప్పిన గ్రేటర్ ప్రచారం

రోహింగ్యాలు.. పాకిస్తాన్.. సర్జికల్ స్ట్రైక్.. కూల్చేస్తాం.. తరమికొడతాం. ఇవి గ్రేటర్ హైదరాబాద్ మున్సిపల్ కార్పొరేషన్ ఎన్నికల ప్రచారంలో వినిపిస్తున్న మాటలు. స్థానిక ఎన్నికల్లో సాధారణంగా స్థానిక సమస్యలే కీలకంగా ఉంటాయి. స్థానిక సమస్యలు, ప్రజల అవసరాల అంశాలపైనే గతంలో ప్రచారాలు జరిగేవి. కాని ఈసారి జీహెచ్ఎంసీ ఎన్నికల్లో స్థానిక అంశాల ప్రస్తావనే రావడం లేదు. జాతీయ , అంతర్జాతీయ అంశాలు గ్రేటర్ ఎన్నికల్లో ప్రచారాస్త్రాలుగా మారిపోయాయి. జీహెచ్ఎంసీ ఎన్నికల ప్రచారంలో నేతల మధ్య మాటల తూటాలు పేలుతున్నాయి. విద్వేషపూరిత ప్రసంగాలు, రెచ్చగొట్టే వ్యాఖ్యలు చేస్తూ కలకలం రేపుతున్నారు లీడర్లు.    నిన్నటి వరకు ప్రశాంతంగా ఉన్న హైదరాబాద్ నగరంలో నేతల విద్వేశపూరిత ప్రసంగాలు దుమారం రేపుతున్నాయి. అన్ని పార్టీల నేతలు పోటీపడీ మరీ నోటికి పనిచెబుతున్నారు. ఒకరిని మించి మరొకరు రెచ్చగొట్టే ప్రసంగాలతో విరుచుకుపడుతున్నారు. ఇష్టమెచ్చినట్లుగా మాట్లాడుతూ అలజడి రేపుతున్నారు. జనం సమస్యలు పట్టించుకోకుండా.. కాంట్రవర్సీ కామెంట్లతో కాక రేపుతున్నారు. ప్రచారాల తీరు, నేతల దూకుడుతో గ్రేటర్ హైదరాబాద్ ఎన్నికల ప్రచారం దారి తప్పిందనే అభిప్రాయం వ్యక్తమవుతోంది. గ్రేటర్ ఎన్నికల్లో జరుగుతున్న ఉద్రిక్త పరిస్థితులతో నగర ప్రజల్లో ఆందోళన కూడా పెరుగుతోంది.    బీజేవైఎం చీఫ్, బెంగళూరు బీజేపీ ఎంపీ తేజస్వీ సూర్య రాకతో మొదలైన గ్రేటర్‌ రాజకీయ వేడి తారాస్థాయికి చేరింది. మంగళవారం హైదరాబాద్‌ లో పర్యటించిన సూర్య.. ఎంఐఎం నేతలపై ఘాటు వ్యాఖ్యలు చేశారు. ఎంపీ అసదుద్దీన్‌ ఒవైసీ పాకిస్తాన్‌ ఏజెంట్‌గా పనిచేస్తున్నారని విమర్శించారు.అసద్ ను పాకిస్తాన్‌ జాతిపిత మహ్మద్‌ అలీ జిన్నాతో పోల్చారు సూర్య. దేశ విభజన సమయంలో హైదరాబాద్‌ సంస్థానాన్ని పాకిస్తాన్‌లో విలీనం చేయాలని జిన్నా డిమాండ్‌ చేశారని, ఒవైసీ కూడా అదే ఆలోచన విధానం ఉన్న వ్యక్తి అని వివాదాస్పద వ్యాఖ్యలు చేశారు. హైదరాబాద్‌లో పెద్ద ఎత్తున రొహింగ్యాలు, పాకిస్తాన్‌ ఓట్లు ఉన్నాయని.. పాకిస్తాన్‌ మద్దతు దారులే ఎంఐఎం పార్టీలో ఉన్నారని వ్యాఖ్యానించారు. తేజస్వి సూర్య విమర్శలపై ఒవైసీ ఘాటుగా స్పందించారు. హైదరాబాద్‌లో పాకిస్తాన్‌, రొహింగ్యా ఓటర్లు ఉంటే కేంద్రహోం మంత్రి అమిత్‌ షా ఏం చేస్తున్నారు..? నిద్రపోతున్నారా? అంటూ ప్రశ్నించారు. కేంద్ర ప్రభుత్వ అనుమతితోనే భాగ్యనగరంలో రొహింగ్యాలకు షెల్టర్‌ ఇచ్చారని ఒవైసీ గుర్తుచేశారు.    ఇక తెలంగాణ బీజేపీ అధ్యక్షుడు బండి సంజయ్‌ వివాదాస్పద వ్యాఖ్యలతో అలజడి సృష్టిస్తున్నారు. గ్రేటర్‌ ఎన్నికల్లో బీజేపీ విజయం సాధిస్తే పాతబస్తీలో సర్జికల్‌ స్ట్రైక్‌ చేస్తామన్న ఆయన వ్యాఖ్యలు తీవ్ర కలకలం రేపాయి. సంజయ్‌ కామెంట్స్‌ తెలంగాణలోనే కాకుండా దేశ వ్యాప్తంగానూ హాట్‌ టాపిక్‌గా మారాయి. సంజయ్ వ్యాఖ్యలపై దుమారం రేగుతుండగానే.. ఎంఐఎం శాసనసభా పక్ష నేత అక్బరుద్దీన్ రెచ్చిపోయారు. అక్రమ కట్టడాల తొలగింపుపై మాట్లాడుతూ.. మాజీ ప్రధానమంత్రి పీవీ నరసింహారావు, మాజీ సీఎం ఎన్టీఆర్‌ ఘాట్స్‌ను కూల్చివేయాలంటూ అనుచిత వ్యాఖ్యలు చేశారు. అక్భర్ కామెంట్లకు కౌంటరిచ్చిన బండి సంజయ్.. పీవీ, ఎన్టీఆర్ సమాధులు కూల్చివేస్తే రెండు గంటల్లో ఎంఐఎం కార్యాలయం దారుస్సలాంను నేలమట్టం చేస్తామని హెచ్చరించాారు. బండి సంజయ్. అక్బరుద్దీన్ వ్యాఖ్యలపై రాష్ట్ర వ్యాప్తంగా తీవ్ర విమర్శలు వ్యక్తమవుతున్నాయి.    గ్రేటర్‌ ఎన్నికల సందర్భంగా వివిధ పార్టీలకు చెందిన నాయకులు చేస్తున్న ప్రసంగాలపై నగర ప్రజల్లో ఆందోళన వ్యక్తమవుతోంది. గతంలో ఎప్పుడూ ఇలాంటి పరిస్థితి రాలేదని, ప్రస్తుత పరిణామాలతో ఎప్పుడు ఏం జరుగుతుందోనన్న భయం వస్తుందని చెబుతున్నారు. గ్రేటర్ ప్రచారంలో జరుగుతున్న పరిణామాలపై సోషల్‌ మీడియా వేదికగా నెటిజన్లు తీవ్ర ఆందోళన వ్యక్తం చేస్తున్నారు. ప్రజల మధ్య చిచ్చుపెట్టే విధంగా రెచ్చగొట్టే ప్రసంగాలు చేస్తున్నారని అసంతృప్తి వ్యక్తం చేస్తున్నారు. ప్రజలను ఆకట్టుకునే విధంగా పథకాలు, మేనిఫేస్టోలు తయారుచేసి, ఓటర్లను ఆకర్శించాలే గానీ ఇలా రెచ్చగొట్టే విధంగా వ్యాఖ్యలు చేయవద్దని హితవు పలుకుతున్నారు.

Cycling – Adding a silver lining to our Health!

    Cycling may be favorite pastime for many of us but it is certainly very useful in maintaining our health! As it is one of the easiest ways to exercise without producing fat bills, moreover it can be almost everywhere and any time during the year. The health benefits though are numerous, few to pen down are: The act of cycling involves the lower body. So, it strengthens and tones up the calf and thigh muscles. It also improvises the mobility of the hip and knee joints. Cycling effectively increases the stamina, thus you are able enough to fight against the physical strains more ably and for a longer time. Cycling does only good to your heart. It improves cardio-vascular fitness due to which our heart pounds steadily. Studies suggest that people who cycle at least 20 miles a week are least likely to suffer from heart diseases when compared to non-cycling people. Cycling is great of losing the extra pound you stare at! Steady cycling burns a great deal of calories. Cycling boosts our metabolic rates even after we have finished our ride thus, aiding more in calorie-loss! Any regular exercise is capable of reducing stress and depression. It improves the well-being and self esteem. Cycling outdoors is a awesome way of connecting with nature, which aids in rejuvenating the soul. As cycling involves every part of our body, the co-ordination among the body parts is improved! So, take some time out to indulge in a cycle ride. Take Care!! ...... SIRI

Meditate to cure Back Ache

Who hasn't come across someone suffering from backaches...one in every three adults complains of back ache, at some time of the day. There have been several pain relief techniques such as over-the-counter drugs, physiotherapy treatments, exercises, acupressure and accupuncture, yoga and such, all promising to offer pain relief and problem eradication. A recent study conducted by a health research institute in Seattle, Washington state, USA revealed that training the brain through meditation can help cure back ache isssues. They invited more than 300 people between the ages 20 and 70, suffering from some form of back pain issues and offered them three different treatments, randomly to each for more than 3 months. One was a form of phychotherapy, second a mindfullness based therapy such as yoga and meditation, third being the usually followed treatment such as medication through drugs with the Doctors help. The first therapy was concentrating on changing the thought process of the patients, teaching them relaxation therapies...the Second practice taught the group to train the brain to accept the difficult emotions and thoughts of discomfort and relaxing thebrain using yoga and meditation.     After offering these two therapies for 8 weeks, the study conducted a result oriented casestudy and observed that at 6 months milestone, the second form of treatment that involved meditation fetched more good results than the phychotherapy based treatment, and the medication technique was the last...and the number of people who reported a recurrence of back pain was lesser in the meditation group, next the phychotherapy group, last the drug-treated group, after one year after starting the respective treatments. The study revealed that training the brain helped people to get more immune to back aches and recurrence was reduced than through the traditional physiotherapy and medication techniques, which is a healthier option compared to risks that may come along with medication for some people...and a cost effective, affordable option for those who cannot afford expensive medicines and physiotherapy sitting fees every week or so. There needs to be a further study extended to find out if these positive results of the meditation technique are valid even after an year and beyond or not, until then it is considered a better, healtheir and affordable alternative to any other techinques to fight chronic lower back aches. --Pratyusha

వ్యాయామం మీద అతి పెద్ద పరిశోధన

ఆరోగ్యానికి నడక ఎంత అవసరమో కొత్తగా చెప్పేదేమీ లేదు. జాగింగ్‌ చేయడం, సైకిల్‌ తొక్కడం, ఈత కొట్టడం... ఇవన్నీ కూడా మంచి ఫలితాలని ఇచ్చే వ్యాయామాలే అయినప్పటికీ... సులువుగా సహజంగా చేసే నడకే మన ఆరోగ్యాలను కాపాడుతూ వస్తోంది. కానీ ఈ నడక ఎంతసేపు ఉండాలి, ఎలా ఉండాలి అన్నదాని మీద ఇప్పటివరకూ ఎవరూ సరైన జవాబు చెప్పలేకపోతున్నారు. రోజుకి 10,000 అడుగులు నడిస్తే మంచిదన్న మాట ఉన్నప్పటికీ... అదేమీ అంత శాస్త్రీయం కాదని కొట్టి పారేస్తున్నారు నిపుణులు. ఈ 10,000 అడుగులు అన్నమాట జపాన్‌లోకి ఒక వాణిజ్య సంస్థ మొదలుపెట్టిన ప్రచారం అని గుర్తుచేస్తున్నారు. మరికొందరేమో వారానికి ఓ రెండు రోజుల పాటు వ్యాయామం చేస్తే సరిపోతుందిలే... మిగతా రోజుల్లో ఆఫీసుకి పోవాలి కదా! అంటున్నారు. మరి నడకకు సంబంధించి లోగుట్టును రట్టు చేసేదెలా!     అమెరికాలోని స్టాన్‌ఫోర్డ్‌కు చెందిన ‘అలెన్‌ యూంగ్‌’ అనే కార్డియాలజిస్టుకి ఇదే అనుమానం వచ్చింది. వేలమంది జనాల రోజువారీ కదలికలను క్షుణ్నంగా పరిశీలిస్తే కనుక.... వారి జీవిత విధానం, అందులో భాగంగా వారు ఎంతసేపు నడుస్తున్నారు, ఎలాంటి వ్యాయామం చేస్తున్నారు తెలిసిపోతుంది. వ్యాయామం చేయడం వల్ల వాళ్ల ఆరోగ్యం ఏమన్నా మెరుగుపడిందా! అన్న విషయమూ బయటపడుతుంది. కానీ ఇందుకోసం వేలమంది జీవితాలను దగ్గరగా పరిశీలించడం ఎలా సాధ్యం?     తన పరిశోధనను ఎలా ముందుకు తీసుకుపోవాలా అని బుర్ర బద్దలుకొట్టుకుంటున్న అలెన్‌కు హఠాత్తుగా ఓ ఉపాయం తోచింది. అప్పటికే యాపిల్‌ సంస్థ విడుదల చేసిన ఒక యాప్‌ గుర్తుకువచ్చింది. మన శరీర కదలికలు ఎలా ఉన్నాయి? మనం ఎంత దూరం నడుస్తున్నాం? అని పసిగట్టగలిగే ఈ యాప్‌ను డౌన్‌లోడ్‌ చేసుకోమంటూ ఒక పిలుపుని ఇచ్చారు. అలెన్‌. అలెన్ పిలుపునిచ్చిన తొలివారంలోనే దాదాపు 53,000 మంది ఈ యాప్‌ను డౌన్‌లోడ్‌ చేసుకున్నారు. ప్రస్తుతానికి లక్షమంది ఈ యాప్‌ ద్వారా అలెన్‌కు తమ కదలికలకు సంబంధించిన సమాచారాన్ని అలెన్‌కు అందిస్తున్నారు. అందుకే వ్యాయామానికి సంబంధించి అతి పెద్ద పరిశోధనగా ఇది పేరుగాంచింది.     అలెన్‌ మొదలుపెట్టిన ఈ పరిశోధన ద్వారా పూర్తిస్థాయి ఫలితాలు అందేందుకు కొంత కాలం పట్టక తప్పదు. లక్షమందికి సంబంధించిన గణాంకాలను విశ్లేషించాలంటే అంత తేలికైన విషయం కాదు కదా! కానీ ఈపాటికే ఈ గణాంకాలు కాస్త భయపెట్టేవిగా ఉంటున్నాయట. మనలో చాలామంది అసలు కదలనే కదలడం లేదంటూ ఈ యాప్ ద్వారా తేలుతోందట. ‘అందులో ఆశ్చర్యం ఏముంది? మన సమయాన్ని పూర్తిగా కూర్చునే గడిపేస్తున్నాం. అటూఇటూ వెళ్లడం మాట అటుంచి, కనీసం లేచి నిలబడేందుకు కూడా ప్రయత్నించడం లేదు’ అంటున్నారు అలెన్. మరి ఈ పరిశోధన ముగిసేసరికి ఇలాంటి భయంకరమైన వాస్తవాలు ఎన్ని బయటపడతాయో! మరైతే ఎంతసేపు నడవాలి? ఎలా నడవాలి? అన్న విషయమై అలెన్‌ తన పరిశోధనని పూర్తి చేసేదాకా మనం ఆగాలా! అమెరికాలోనే సుదీర్ఘ కాలం నడక గురించి అధ్యయనం చేస్తున్న ‘ట్యూడర్‌ లాక్‌’ అనే నిపుణుడి ప్రకారం మనషి రోజుకి కనీసం 8,000 అడుగులన్నా నడిస్తే మంచిది. సాధారణంగా మనిషి ఓ 5,000 అడుగుల వరకు తనకు తెలియకుండానే నడుస్తుంటాడనీ, దానికి మరో 3,000 అడుగులు జోడించేందుకు, ఓ అరగంటపాటు ప్రత్యేకంగా నడకసాగించమని చెబుతున్నారు ట్యూడర్‌. మరి అలెన్‌ పరిశోధన, ట్యూడర్‌ మాటను ఎంతవరకు రుజువు చేస్తుందో చూడాలి. - నిర్జర.
Disclaimer:
All content included on this TeluguOne.com Portal including text, graphics, images, videos and audio clips, is the property of ObjectOne Information Systems Ltd. or our associates, and protected by copyright laws. The collection, arrangement and assembly of all content on this portal/ related channels is the exclusive property of ObjectOne Information Systems Ltd. or our associates and protected copyright laws.
You may not copy, reproduce, distribute, publish, display, perform, modify, create derivative works, transmit, or in any other way exploit any part of copyrighted material without permission from ObjectOne Information Systems Ltd or our associates.