గోవా ముఖ్యమంత్రిగా పారికర్ రీఎంట్రీ.. అసలు ఏమైందీ..?

ప్రధాని మోడీ కేబినేట్లో రక్షణ శాక మంత్రిగా ఉన్న మనోహర్ పారికర్ త్వరలోనే మళ్లీ గోవా సీఎంగా బాధ్యతలు స్వీకరించనున్నట్టు వార్తలు వస్తున్నాయి. అసలు గతంలో గోవా ముఖ్యమంత్రిగా ఉన్న పారికర్ ను ప్రధాని నరేంద్ర మోడీనే తన పనితీరు నచ్చి.. గోవా సీఎం పదవికి రాజీనామా చేయించి మరీ తన కేబినెట్ లో చేర్చుకొని రక్షణ శాఖ బాధ్యతలను ఆయనకు అప్పజెప్పారు. అయితే పారికర్ కూడా తన బాధ్యతలు ఎలాంటి వివాదాలు లేకుండా సక్రమంగా నిర్వహిస్తూ వస్తున్నారు. అయితే ఏమైందో, ఏమో తెలియదు కాని... మోదీ కేబినెట్ నుంచి పారికర్ బయటకు వచ్చేస్తున్నారని.. తిరిగి గోవా సీఎంగా పారికర్ పదవీ బాధ్యతలు చేపడతారని ప్రచారం ఊపందుకుంది. అంతేకాదు గోవాలోని బిచోలిమ్ లో ఓ వెబ్ సైట్ తో మాట్లాడిన పారికర్ కూడా ఈవిషయంపై క్లారిటీ ఇచ్చినట్టే కనిపిస్తోంది. ‘అవును. మూడు నాలుగు నెలల్లో తిరిగి గోవాకు వచ్చేస్తున్నాను’ అని ఆయన వ్యాఖ్యానించారు. మరి అసలు ఏం జరిగిందో.. ఇంత సడెన్ గా మళ్లీ గోవాకి రీఎంట్రీ ఇవ్వడంపై కారణాలు ఏంటో అని పలువురు సందేహం వ్యక్తం చేస్తున్నారు.