అసెంబ్లీలో మంత్రిగారి రాసలీలలు

ప్రజల తలరాతలు మార్చే అతి పవిత్రమైన అసెంబ్లీలోనే ఒక బాధ్యతగల మంత్రి రాసలీలలు జరిపాడు. ఈ పనికి ఒడిగట్టింది కర్ణాటక అబ్కారీ శాఖ మంత్రి హెచ్.వై.మేటీ. బాగల్‌కోటేకు చెందిన ఓ ఉద్యోగిని తన బదిలీ విషయమై కొన్ని రోజుల క్రితం కర్ణాటక విధానసౌధలోని మేటీ కార్యాలయానికి వచ్చింది. ఈ సందర్భంగా ఆమెను లొంగదీసుకున్న మంత్రి పలుమార్లు రాసలీలలు జరిపాడు. అయితే ఈ అశ్లీల దృశ్యాలను ఆయన మాజీ గన్‌మెన్ రహస్యంగా చిత్రీకరించాడు. దీంతో మేటీ బండారం బట్టబయలైంది. ఈ ఘటనతో కాంగ్రెస్ పార్టీ మరోసారి చిక్కుల్లో పడింది.

ఇటీవలే టిప్పుసుల్తాన్ జయంతి రోజున ప్రాథమిక విద్యాశాఖ మంత్రి తన్వీర్ సేఠ్..వేదికపైనే ఫోన్‌లో నీలిచిత్రాలు చూస్తూ మీడియా కంటపడటంతో పెద్ద వివాదం రేగింది. ఆ వివాదం ఇంకా ముగియకముందే ఏకంగా అసెంబ్లీలోనే మంత్రిగారు రాసలీలలకు దిగడంతో సిద్ధూ పరువు గంగలో కలిసిపోయింది. మరో వైపు , మేటీని సదరు మహిళతో కలిసి మాజీ గన్‌మెన్ బ్లాక్‌మెయిల్ చేసినట్లు తెలుస్తోంది. రూ.15 కోట్లు ఇవ్వకపోతే వీడియోలను బయటపెడతానని గన్‌మెన్ హెచ్చరించాడు. అయితే బళ్లారికి చెందిన సామాజిక కార్యకర్త ఒకరు మంత్రిగారి రాసలీలలకు సంబంధించిన ఆడియో సీడీ బయటపెట్టడంతో కర్ణాటక ఉలిక్కిపడింది.