అమ్మాయిల రోజువారీ జీవితంలో హ్యాండ్ బ్యాగ్ అనేది కేవలం బయటకు వెళ్లేటప్పుడు కొన్ని  వస్తువులను భద్రపరుచుకునే ఐటమ్ మాత్రమే కాదు. అది ఒక అమ్మాయిల వ్యక్తిత్వాన్ని, ఆత్మవిశ్వాసాన్ని అలాగే అభిరుచిని ప్రతిబింబించే అత్యంత ముఖ్యమైన యాక్ససరీ. బయటకు వెళ్లేటప్పుడు ఫోన్, డబ్బులు, కాస్మోటిక్స్ వంటి అవసరమైన వస్తువులను తీసుకెళ్లడానికి బ్యాగ్ ఉపయోగపడినప్పటికీ, స్టైల్ పరంగా చూస్తే  ఇది లుక్ మొత్తాన్ని మార్చేసే శక్తిని కలిగి ఉంటుంది. సరైన హ్యాండ్ బ్యాగ్ ఎంచుకోవడం వల్ల సాధారణ దుస్తులు కూడా ఎంతో ఆకర్షణీయంగా కనిపిస్తాయి. స్టైలిష్‌గా కనిపించడంలో హ్యాండ్ బ్యాగ్  పాత్ర చాలా పెద్దది.

అయితే చాలామంది మహిళలు సరైన హ్యాండ్ బ్యాగ్ ఎంచుకునే విషయంలో కొన్ని చిన్నపాటి పొరపాట్లు చేస్తుంటారు. దుస్తుల రంగు, శైలి , వెళ్లే సందర్భాన్ని పట్టించుకోకుండా ఎప్పుడూ ఒకే రకమైన హ్యాండ్ బ్యాగ్‌ను వాడటం అందులో మొదటిది. అలాగే చాలా పెద్దగా ఉండే బ్యాగులను చిన్నపాటి ఈవెంట్లకు తీసుకెళ్లడం లేదా గ్రాండ్ డ్రెస్సులపైకి అతి సాధారణమైన ఆఫీస్ బ్యాగులను క్యారీ చేయడం వల్ల లుక్ పాడవుతుంది. దుస్తులకు, ప్యాటర్న్లకు మ్యాచ్ కాని డిజైన్లు వాడటం వల్ల మొత్తం అప్పియరెన్స్ అసంపూర్తిగా అనిపిస్తుంది. అందుకే ఏ సందర్భానికి ఎలాంటి దుస్తులు వేసుకుంటున్నామో, వాటికి తగినట్లుగా హ్యాండ్ బ్యాగ్‌ను ఎంచుకోవడం ఎంతో ముఖ్యం. వీటి గురించి వివరంగా తెలుసుకుంటే..

సాంప్రదాయ దుస్తులు..

సాంప్రదాయ దుస్తులైన చీరలు, లెహంగాలు , పట్టు వస్త్రాలు వేసుకున్నప్పుడు వాటికి తగినట్లుగా రాయల్ లుక్ ఇచ్చే బ్యాగులను ఎంచుకోవాలి. పెళ్లిళ్లు, పూజలు లేదా పండుగల సమయంలో క్లచ్‌లు, పోట్లీ బ్యాగులు లేదా ఎంబ్రాయిడరీ, జరీ వర్క్ ఉన్న హ్యాండ్ బ్యాగులు చాలా చక్కగా సరిపోతాయి. ఇవి సాంప్రదాయ దుస్తుల వైభవాన్ని మరింత పెంచుతాయి. చిన్నపాటి క్లచ్ బ్యాగులు లేదా ముత్యాలు, రాళ్లతో అలంకరించిన పోట్లీలు పట్టు చీరలపైకి ప్రత్యేకమైన అందాన్ని ఇస్తాయి.

ఆఫీస్ లేదా కాలేజ్..

ఆఫీస్ లేదా కాలేజ్ , లేదా మీటింగ్స్ కు వెళ్లేటప్పుడు ప్రాక్టికల్ గా ఉంటూనే ప్రొఫెషనల్ లుక్ ఇచ్చే టోట్ బ్యాగులు లేదా స్ట్రక్చర్డ్ హ్యాండ్ బ్యాగులు ఎంతో అనువుగా ఉంటాయి. కుర్తీలు, ఫార్మల్ షర్టులు, బ్లేజర్లు లేదా సల్వార్ సూట్లతో ఇవి చాలా బాగుంటాయి. వీటిలో ల్యాప్‌టాప్, ఫైళ్లు, డైరీ వంటి రోజువారీ అవసరమైన వస్తువులన్నీ పెట్టుకోవడానికి తగినంత స్థలం ఉంటుంది. నలుపు, గోధుమ, నేవీ బ్లూ లేదా బీజ్ వంటి  రంగుల టోట్ బ్యాగులు ప్రతి రకం ఫార్మల్ వేర్‌కు సులభంగా సరిపోతాయి.

బయటకు వెళ్లేటప్పుడు..

సాధారణంగా ఫ్రెండ్స్‌తో బయటకు వెళ్లినప్పుడు లేదా షాపింగ్, క్యాజువల్ ఔటింగ్‌లకు వెళ్లే సమయంలో వెస్టర్న్ దుస్తులైన జీన్స్, టాప్స్, టీషర్టులు లేదా క్యాజువల్ డ్రెస్సులు ధరిస్తుంటాం. ఇలాంటి దుస్తులపైకి స్లింగ్ బ్యాగులు, క్రాస్ బాడీ బ్యాగులు లేదా చిన్న బ్యాక్‌ప్యాక్‌లు చాలా స్టైలిష్‌గా కనిపిస్తాయి. ఇవి చేతులకు స్వేచ్ఛను ఇవ్వడమే కాకుండా, యువతకు ఎంతో ట్రెండీగా కూల్ లుక్‌ను అందిస్తాయి.

ఫారిన్ దుస్తులు..

పాశ్చాత్య శైలికి చెందిన గాౌన్లు, ఈవెనింగ్ డ్రెస్సులు లేదా పార్టీ వేర్ దుస్తులు వేసుకున్నప్పుడు పెద్ద బ్యాగులను పూర్తిగా పక్కన పెట్టాలి. పార్టీలు, డిన్నర్ డేట్లు లేదా ఈవెంట్లకు వెళ్లేటప్పుడు మెటాలిక్ షేడ్స్ ఉండే బాక్స్ క్లచ్‌లు, డిజైనర్ పౌచ్‌లు లేదా సన్నని చైన్ ఉన్న చిన్న స్లింగ్ బ్యాగులు ఎంచుకోవాలి. బంగారు లేదా వెండి రంగు డిజైన్లతో ఉన్న క్లచ్‌లు ఈవెనింగ్ వేర్‌కు మెరుపును అందిస్తాయి.

ఇండో-వెస్టర్న్ దుస్తులు లేదా కాటన్ కుర్తాలు, లాంగ్ స్కర్టులు వేసుకునేటప్పుడు జ్యూట్ బ్యాగులు, ఫ్యాబ్రిక్ బ్యాగులు లేదా థ్రెడ్ వర్క్ ఉన్న హ్యాండ్ బ్యాగులు చాలా బాగుంటాయి. ఇవి ఇండో-వెస్టర్న్ ఫ్యాషన్‌కు తగినట్లుగా సహజమైన, ఎత్నిక్ లుక్‌ను ఇస్తాయి.

చివరగా..

దుస్తుల రంగుకు పూర్తి భిన్నంగా ఉండే కాంట్రాస్ట్ రంగుల హ్యాండ్ బ్యాగులను ఎంచుకోవడం ఈమధ్య బాగా ట్రెండ్ అవుతోంది. ఉదాహరణకు తెల్లటి లేదా నల్లటి దుస్తులు వేసుకున్నప్పుడు ఎరుపు లేదా పసుపు రంగు బ్యాగ్‌ను క్యారీ చేస్తే అది ప్రత్యేకంగా హైలైట్ అవుతుంది. సందర్భం, ధరించే దుస్తులు  శరీర ఆకృతికి సరిపోయే హ్యాండ్ బ్యాగ్‌ను ఎంచుకున్నప్పుడు లుక్ మరింత కంప్లీట్ గా, అట్రాక్షన్ గా మారుతుంది.

 

                         *రూపశ్రీ.