'బింబిసార' డైరెక్టర్ అప్పట్లో హీరోగా చేసిన సినిమా తెలుసా?
on Aug 2, 2022
ఆగస్టు 5న ప్రేక్షకుల ముందుకు రానున్న 'బింబిసార' సినిమాపై మంచి అంచనాలు ఉన్నాయి. నందమూరి కళ్యాణ్ రామ్ టైటిల్ రోల్ పోషించిన ఈ ఫాంటసీ యాక్షన్ ఫిల్మ్ తో మల్లిడి వశిష్ట్ దర్శకుడిగా పరిచయమవుతున్నాడు. ఇప్పటికే విడుదలైన టీజర్, ట్రైలర్ ఆకట్టుకోవడంతో ఒక కొత్త దర్శకుడు ఇంత భారీ సినిమాని ఎలా డీల్ చేశాడన్న ఆసక్తి అందరిలో నెలకొంది. ప్రీ రిలీజ్ ఈవెంట్ లో జూనియర్ ఎన్టీఆర్ సైతం సినిమా అద్భుతంగా ఉందంటూ వశిష్ట్ ని ప్రశంసించాడు. దీంతో ఇంకా సినిమా కూడా విడుదల కాకముందే వశిష్ట్ పేరు బలంగా వినిపిస్తోంది. అయితే ఇది దర్శకుడిగా వశిష్ట్ కి మొదటి సినిమా కానీ, ఫిల్మ్ ఇండస్ట్రీకి అతను కొత్త కాదు. 15 ఏళ్ల క్రితం ఆయన ఒక సినిమాలో హీరోగా నటించాడు.
2007 లో వచ్చిన 'ప్రేమలేఖ రాశా' అనే సినిమాలో వశిష్ట్ హీరోగా నటించాడు. అప్పుడు ఆయన స్క్రీన్ నేమ్ వేణు మల్లిడి అని ఉండేది. కులశేఖర్ దర్శకత్వంలో మల్లిడి సత్యనారాయణ రెడ్డి నిర్మించిన ఈ సినిమాలో అంజలి హీరోయిన్ గా నటించింది. ఈ సినిమాలో సాంగ్స్ ఆకట్టుకున్నప్పటికీ సినిమా గురించి మాత్రం ప్రేక్షకులకు పెద్దగా తెలియలేదు. అలా 2007 లో హీరోగా నటించిన వశిష్ట్ 15 ఏళ్ళ తర్వాత ఇప్పుడు దర్శకుడిగా ఎంట్రీ ఇస్తున్నాడు. అయితే తాను యాక్టింగ్ ని ఎందుకు పక్కన పెట్టాడో తాజాగా 'బింబిసార' ప్రమోషన్స్ లో చెప్పాడు.
మొదటి నుంచి తనకు డైరెక్షన్ అంటేనే ఇష్టమని, కానీ కెరీర్ స్టార్టింగ్ లో హీరోగా 'ప్రేమలేఖ రాశా' సినిమా చేశానని తాజాగా మీడియా సమావేశంలో తెలిపాడు వశిష్ట్. అయితే యాక్టింగ్ తన దారి కాదనిపించి, వెనక్కొచ్చి కథలు రాసుకోవడంపైనే దృష్టి పెట్టానని చెప్పాడు. హీరోలు రవితేజ, శిరీష్ కు కథలు వినిపించగా వర్కౌట్ కాలేదని, 'బింబిసార'కి ముందు కూడా కళ్యాణ్ రామ్ కి రెండు కథలు వినిపించగా అవి కూడా వర్కౌట్ కాలేదని అన్నాడు. ఇప్పుడు ఇంత పెద్ద చిత్రంతో దర్శకుడితో పరిచయమవుతుండటం సంతోషంగా ఉందని వశిష్ట్ చెప్పుకొచ్చాడు.
Also Read