చాలా కాలంగా ప్రేమలో ఉన్న విజయ్‌ దేవరకొండ, రష్మిక మందన్న ఎట్టకేలకు నిశ్చితార్థం చేసుకున్నారు. వీరి మధ్య ప్రేమ వ్యవహారం నడుస్తోందంటూ సోషల్‌ మీడియాలో ఎన్నో ప్రూఫ్‌లు చూపిస్తూ ఆ న్యూస్‌ను వైరల్‌ చేసేవారు. వాటన్నింటికీ తెరదించుతూ అక్టోబర్‌ 4న పెద్దల సమక్షంలో విజయ్‌, రష్మికల నిశ్చితార్థం జరిగిందని తెలుస్తోంది. దీనికి సంబంధించిన న్యూస్‌ ఇప్పుడు సోషల్‌ మీడియాలో వైరల్‌ అవుతోంది.

ఇదిలా ఉంటే.. సినిమా ఇండస్ట్రీలో ఎవరు పెళ్లి చేసుకున్నా.. నేనున్నానంటూ వార్తల్లోకి వస్తాడు వేణుస్వామి. పెళ్లి చేసుకునే జంట ఎన్నాళ్ళు కాపురం చేస్తుంది, వాళ్ళు ఎప్పుడు విడిపోతారు అనే వివరాలు ఎవరూ అడక్కపోయినా స్వచ్ఛందంగా తానే ప్రకటించి పలు మార్లు అభాసుపాలైన విషయం తెలిసిందే. అయితే ఈ జంట విషయంలో తాజాగా ఆయన ఎలాంటి కామెంట్స్‌ చేయనప్పటికీ వీరిద్దరి భవిష్యత్తు గురించి గతంలోనే ఒక ఇంటర్వ్యూలో చెప్పాడు. ఇప్పుడా వీడియో సోషల్‌ మీడియాలో వైరల్‌గా మారింది. ఎక్కడ చూసినా విజయ్‌, రష్మికల గురించి వేణు స్వామి మాట్లాడిన వీడియో కనిపిస్తోంది.

అసలు ఆ వీడియోలో వేణుస్వామి ఏం చెప్పాడో ఒకసారి చూద్దాం.. ‘విజయ్‌, రష్మిక గురించి ఆల్రెడీ మనకు తెలుసు కదా. గీతగోవిందం సినిమా నుంచి నాకు వాళ్లు తెలుసు. వాళ్లిద్దరూ పెళ్లి చేసుకుంటారు. ఆ తర్వాత విడిపోతారు. నేను ఇది ఇప్పుడు చెప్పడం లేదు. ఎప్పుడో చెప్పాను. వేరే వాళ్ళకు చెప్పడం ఎందుకు అని రష్మికతోనే నేరుగా ఈ విషయం చెప్పాను. అతన్ని పెళ్లి చేసుకోకు.. విడిపోతావు అన్నాను. అప్పటి నుంచి ఆమెతో నాకు విభేదాలు వచ్చాయి’ అని ఆ వీడియో చెప్పాడు.