ఒక సినిమా ప్రేక్షకాదరణ పొందాలంటే అందులో ప్రధానంగా ఉండాల్సిన అంశాలేమిటి, ఎలాంటి కథాంశాలు ప్రేక్షకులకు కనెక్ట్‌ అవుతాయి అనే విషయాలను హీరోలైనా, దర్శకులైనా, నిర్మాతలైనా పరిగణనలోకి తీసుకోవాలి. ప్రేక్షకుల అభిరుచి ఎప్పటికప్పుడు మారిపోతూ ఉంటుంది. వారి టేస్ట్‌కి అనుగుణంగా మారుతూ, వారు మెచ్చే కంటెంట్‌ ఇవ్వగలిగినవారే ఇండస్ట్రీలో నిలబడతారు. ఎప్పటి నుంచో హీరోలుగా చలామణి అవుతున్న వారికి ఈ విషయంపై అవగాహన ఉంటుంది. అందుకే ఒక సినిమా చెయ్యాలంటే వంద రకాలుగా ఆలోచించి నిర్ణయం తీసుకుంటారు. తమ సినిమాను చూసేందుకు ప్రేక్షకుల్ని థియేటర్స్‌కి రప్పించాలంటే కథలో ఎలాంటి మ్యాజిక్‌ చెయ్యాలి, ఆ కథను ఆసక్తికరంగా తెరకెక్కించగల దర్శకుడు ఎవరు అనే విషయంలో హీరోలకు ఖచ్చితమైన అభిప్రాయం ఉంటుంది. అప్పుడే సక్సెస్‌ సాధించగలుగుతారు. ప్రస్తుతం ఇండస్ట్రీకి వస్తున్న కొందరు హీరోలు అలాంటి కసరత్తు ఏమీ చేయకుండానే ప్రేక్షకుల ముందుకు వచ్చేస్తున్నారు. అన్నివిధాలుగా వారు దెబ్బతినడమే కాకుండా, నిర్మాతలు కూడా నష్టపోవడానికి కారణం అవుతున్నారు.

టీవీ రంగంలో ఎన్నో కార్యక్రమాల ద్వారా ఎంతో పాపులర్‌ అయిన నటులు చాలా మంది ఉన్నారు. ఇంటికే పరిమితమైన టీవీల్లోనే అంత పేరు తెచ్చుకున్న తాము సినిమా రంగంలోకి ప్రవేశిస్తే తమకు తిరుగుండదు అని ఆలోచించి చిత్ర పరిశ్రమకు ఎంతో మంది వస్తున్నారు. అయితే టీవీ వేరు, సినిమా వేరు అనే విషయం ఇండస్ట్రీకి వచ్చిన తర్వాతే వారికి అర్థమవుతోంది. అయినప్పటికీ వారి ప్రయత్నాలు మాత్రం మానడం లేదు. ఎప్పటికప్పుడు కొత్త కొత్త ప్రయత్నాలు చేస్తూనే ఉన్నారు. కానీ, ప్రేక్షకులు మాత్రం వారిని దూరం పెడుతూ వస్తున్నారు. అయితే టీవీల్లో వచ్చే ప్రోగ్రామ్స్‌ ద్వారా ప్రేక్షకుల్లో మంచి ఫాలోయింగ్‌ తెచ్చుకోవడం అనేది మామూలు విషయం కాదు. టీవీ రంగం నుంచి సినిమా రంగానికి వచ్చి స్టార్స్‌ అయినవారు కూడా ఉన్నారు. అలాంటి వారిలో మొదట చెప్పుకోవాల్సినవారు షారూక్‌ ఖాన్‌. 1980వ దశకంలో దూరదర్శన్‌లో ప్రసారమైన ‘సర్కస్‌’ అనే సీరియల్‌ ద్వారా తన కెరీర్‌ను ప్రారంభించారు షారూక్‌. అనుకోకుండా సినిమా అవకాశం రావడం, దాన్ని సక్రమంగా సద్వినియోగం చేసుకోవడం వల్ల సినిమా రంగంలో స్థిరపడ్డారు. ఆ తర్వాత స్టార్‌గా ఎదిగారు. అలాగే దివంగత సుశాంత్‌ సింగ్‌ రాజ్‌పుత్‌ కూడా టీవీ రంగం ద్వారా సినిమాల్లోకి వచ్చిన వచ్చివారే. ప్రస్తుతం కన్నడలోనే కాదు, ఇండియాలోనే స్టార్‌గా వెలుగొందుతున్న యశ్‌ కూడా టీవీ ద్వారా వచ్చిన నటుడే.

అయితే ఇది అందరికీ సాధ్యం కాదనే విషయాన్ని కొందరు టీవీ నటులు అర్థం చేసుకోవాల్సిన అవసరం ఉంది. టీవీలో ‘మొగలిరేకులు’ సీరియల్‌కి ఆరోజుల్లో ఎంతటి పాపులారిటీ ఉండేదో అందరికీ తెలిసిందే. ఆ సీరియల్‌లో నటించిన వారందరూ వారి వారి క్యారెక్టర్స్‌ని బట్టి ఎంతో పాపులర్‌ అయ్యారు. అందులో ఆర్‌.కె.నాయుడుగా నటించిన సాగర్‌కి ఒకరకంగా హీరో ఇమేజ్‌ వచ్చిందని చెప్పాలి. దాన్ని దృష్టిలో పెట్టుకొని తాను కూడా హీరో అవ్వాలని సినీరంగానికి వచ్చారు. అయితే కొన్ని సినిమాల్లో నటించినప్పటికీ అతను ఆశించిన స్థాయి విజయాలు అందుకోలేకపోయారు. ఎన్నో సంవత్సరాలుగా అ ప్రయత్నాలు చేస్తున్నప్పటికీ విజయం అనేది అతని దరిదాపులకు రావడం లేదు. తాజాగా ‘ది 100’ అనే సినిమాతో మరోసారి ప్రేక్షకుల ముందుకు వచ్చారు. ఈ సినిమాను కూడా ప్రేక్షకులు ఆదరించలేదు. ఈ సినిమా ప్రమోషన్‌ కోసం వెంకయ్యనాయుడు, పవన్‌కళ్యాణ్‌ వంటి వారిని కూడా రంగంలోకి దించారు. కానీ, ప్రేక్షకుల తీర్పు ముందు అవేవీ నిలబడలేదు.

సాగర్‌ ఒక్కరే కాదు, టీవీలో పాపులర్‌ అయిన యాంకర్‌ ప్రదీప్‌, సుడిగాలి సుధీర్‌, రాకేష్‌, ధన్‌రాజ్‌, గెటప్‌ శ్రీను, షకలక శంకర్‌, హైపర్‌ ఆది, చమ్మక్‌ చంద్ర వంటి టీవీ ఆర్టిస్టులు టీవీల్లో స్టార్స్‌ అనిపించుకున్నారు. సినిమా విషయానికి వచ్చేసరికి వారి ప్రభావం ప్రేక్షకులపై ఏమాత్రం ఉండడం లేదు. వీరిలో కొందరు హీరోలుగా, కొందరు కమెడియన్స్‌గా సినిమాల్లో కనిపిస్తున్నప్పటికీ ఆశించిన స్థాయి ఆదరణ లభించడం లేదు. ఇప్పటికే సుధీర్‌, ప్రదీప్‌, ధన్‌రాజ్‌, శంకర్‌ వంటి వారు హీరోలుగా కొన్ని సినిమాల్లో నటించారు. కానీ, ఏ ఒక్క సినిమా వారిని ఇండస్ట్రీలో నిలబెట్టలేకపోయింది. వారు సక్సెస్‌ అవ్వకపోవడానికి ప్రధాన కారణం వారు ఎంపిక చేసుకుంటున్న సబ్జెక్ట్స్‌, జోనర్‌. ఎప్పటికప్పుడు మారుతున్న ప్రేక్షకుల అభిరుచికి అనుగుణంగా వారు కోరుకున్న దానికి రెట్టింపు ఎంటర్‌టైన్‌మెంట్‌ ఇవ్వగలిగినప్పుడే ఇండస్ట్రీలో నిలబడే అవకాశం ఉంటుంది. టీవీల్లో చేసినంత ఈజీగా సినిమాల్లో కూడా చేస్తానంటే కుదిరే పని కాదనే విషయం టీవీల్లో స్టార్స్‌గా వెలుగొందిన కొందరికి ఇప్పటికే అర్థమైంది.

టీవీ నుంచి వచ్చి సినిమాల్లో కూడా స్టార్స్‌ అవ్వడం అనేది అసాధ్యం అని చెప్పడానికి లేదు. ఎందుకంటే... అలా వచ్చి సక్సెస్‌ అయినవారు కూడా ఉన్నారు. సక్సెస్‌ అవ్వని టీవీ స్టార్స్‌ గురించి చెప్పాలంటే.. టీవీల్లో మనకి విపరీతమైన ఫాలోయింగ్‌ ఉంది... సినిమాల్లో మనల్ని ఎందుకు చూడరు అనే ఓవర్‌ కాన్ఫిడెన్స్‌ వారిని దెబ్బతీస్తోంది. టీవీకి, సినిమాకీ ఎంతో తేడా ఉంటుంది. టీవీలో ఒక ప్రోగ్రామ్‌ చూస్తున్నప్పుడు అది ఇంట్రెస్టింగ్‌గా లేకపోతే మరో ఛానల్‌కి వెళ్లే అవకాశం ఉంది. కానీ, సినిమా విషయంలో అలాంటి ఆప్షన్‌ లేదు. సినిమా చూసేందుకు ప్రేక్షకులు థియేటర్‌కి రావాలంటే ఎన్నో కాలిక్యులేషన్స్‌ ఉంటాయి. రెండున్నర గంటల సేపు ప్రేక్షకుల్ని సీట్లలో కూర్చోబెట్టగలిగే కంటెంట్‌ ఉండాలి, దాన్ని పర్‌ఫెక్ట్‌గా నడిపించగల డైరెక్టర్‌ కావాలి. అన్నింటినీ మించి వీటన్నింటినీ సమన్వయం చేసి సినిమాను ప్రేక్షకుల వరకు తీసుకెళ్ళగలిగే సత్తా ఉన్న నిర్మాత కావాలి. టీవీలో స్టార్స్‌గా వెలుగొందినవారు సినిమా రంగంలో కూడా రాణించాలనుకోవడం తప్పేమీ కాదు. అది అసాధ్యం కూడా కాదు. అయితే ప్రేక్షకుల్ని దృష్టిలో పెట్టుకొని కథలను ఎంపిక చేసుకుంటే టీవీ స్టార్స్‌ కూడా సిల్వర్‌ స్క్రీన్‌పై అద్భుతాలు చేయవచ్చు.