మూవీ: ది రోడ్
నటీనటులు: త్రిష, షబ్బీర్ కలరక్కల్, సంతోష్ ప్రతాప్ తదితరులు
సినిమాటోగ్రఫీ: కె. జి. వెంకటేశ్
ఎడిటింగ్: ఏఆర్ శివరాజ్
మ్యూజిక్: శామ్ సిఎస్
రచన, దర్శకత్వం: అరుణ్ వశీకరన్
ఓటిటి: ఆహా

క్రైమ్ సస్పెన్స్ థ్రిల్లర్ సినిమాలకి ఉండే క్రేజే వేరు.‌ అలాంటి కథలో త్రిష ఉంటే ఆమె నటనకి ప్రేక్షకులకి పిధా. మరి తాజాగా ఆహాలో రిలీజైన ' ది రోడ్' మూవీ కథేంటో ఒకసారి చూసేద్దాం...

కథ:

మీరా(త్రిష) తన కొడుకు కమిన్, భర్త ఆనంద్ తో హ్యాపీగా జీవితం సాగిస్తుంటుంది‌. అయితే తన కొడుకు పుట్టినరోజుని కన్యాకుమారిలో సెలబ్రేట్ చేయాలనుకుంటుంది మీరా. కన్యాకుమారికి 'రోడ్ ' ద్వారా ప్రయాణించాలని మీరా కొడుకు ఆశపడతాడు. కానీ మీరా ప్రెగ్నెంట్ అని ఆ రోడ్ ప్రయాణం చేయకుండా మీరా భర్త, కొడుకు కలిసి 'రోడ్' లో వెళ్తుంటారు. దారిలో యాక్సిడెంట్ అయి ఇద్దరు చనిపోతారు. అయితే వారిది నిజంగానే యాక్సిడెంటా? లేక ఎవరైన కావాలని చేశారా? మీరా అసలు మిస్టరీ ఛేధించిందా లేదా తెలియాలంటే ఈ సినిమా చూడాల్సిందే.

విశ్లేషణ:

రాత్రిపూట నేషనల్ హైవేలో ఒక జంట కారులో వెళ్తుంటారు. వారిద్దరి మధ్య గొడవజరుగుతుంటుంది. ఇంతలో వారి కారు టైర్ పంచర్ అవ్వడంతో రిపేర్ చేసుకొని కొద్దిదూరం వెళ్ళగానే కారు ఆగిపోతుంది. కాసేపటికి వాళ్ళిద్దరు కారులో చనిపోయి ఉంటారు. అసలేమైందనే ఆసక్తితో కథని ప్రారంభించాడు డైరెక్టర్ అరుణ్ వసీగరన్‌.

మీరా తన ఫ్యామిలీతో హ్యాపీగా లైఫ్ సాగిస్తుండగా యాక్సిడెంట్ అయిందంటూ వచ్చిన కాల్ తో తన జీవితం ఎలా మలుపు తిరిగిందో చక్కగా చూపించారు మేకర్స్. మీరా ఫ్రెండ్ ఉమాదేవీ ఒక బ్యాంక్ లో పనిచేస్తుంటుంది. ఉమాదేవీ భర్త ప్రసాద్ చివరగా ఆ యాక్సిడెంట్ చూసి వారిని హాస్పిటల్ కి తీసుకొచ్చి మీరాకి ఇన్ఫర్మేషన్ ఇస్తాడు. ఇక్కడివరకు కథ కాస్త నెమ్మదిగా సాగుతున్నట్టు అనిపిస్తుంది. అయితే రెగ్యులర్ గా ఆ రోడ్ లో ప్రమాదం జరిగిన ప్లేస్ కి వెళ్ళే మీరా ముందే ఒక కారు యాక్సిడెంట్ అవుతుంది. అక్కడికి వెళ్ళి చూసిన మీరా.. ఆ కారులోని వ్యక్తిని కాపాడలేకపోతుంది‌. అయితే వెనక్కి వచ్చి మళ్ళీ ఆ ప్రమాదం జరిగిన ప్లేస్ కి వస్తే అక్కడ కారు ఉండదు, మనుషులు ఉండరు. దాంతో ఆ హైవేలో ఏదో తప్పు జరుగుతుందని భావిస్తుంది మీరా. అసలేం జరిగిందంటూ ఇన్వెస్టిగేషన్ స్టార్ట్ చేస్తే కొన్ని నమ్మలేని నిజాలు మీరాకి తెలుస్తాయి.

ద్వితీయార్థంలో మీరా ఒక్కో క్లూని సాల్వ్ చేస్తూ చివరి వరకు సస్పెన్స్ ని క్రియేట్ చేస్తుంది. ఎప్పుడైతే మీరా ఇన్వెస్టిగేషన్ స్టార్ట్ చేస్తుందో కథలో వేగం పెరుగుతుంది. అసలు ఎవరూ ఊహించని మలుపు ఉంటుంది. ప్రతీ రోడ్డుకి ఒక మలుపు ఉన్నట్టే ఈ నేషనల్ హైవే(ది రోడ్) కి ఒక కథ ఉందంటూ ముగించిన తీరు బాగుంటుంది‌. అసలు కథలో వచ్చే ట్విస్ట్ లకి చూసే ప్రేక్షకులు ఒక గొప్ప థ్రిల్ ని ఫీల్ అవుతారు. ఒక మనిషి బ్రతకడానికి డబ్బు కావాలి. కానీ అదే డబ్బు మనిషిని చంపి తీసుకుంటే అది క్రైమ్ అవుతుంది. డబ్బు లేదని చావాలనుకున్న వాడిని ఆ రోడ్ (ది రోడ్) బ్రతికిస్తే.. అతను ఎలా మారాడో చూపిస్తూ తీసిన ఈ సినిమా ప్రేక్షకులని ఆకట్టుకుంది‌.

అడల్ట్ సీన్స్ ఏమీ లేవు. అందరు ఫ్యామిలీతో కలిసి చూడాల్సిన సినిమా. ఏఆర్ శివరాజ్ ఎడిటింగ్ బాగుంది. సామ్ సిఎస్ అందించిన బిజిఎమ్ ఆకట్టుకుంది. కె.జి వెంకటేశ్ సినిమాటోగ్రఫీ బాగుంది. నిర్మాణ విలువలు బాగున్నాయి.

నటీనటుల పనితీరు:

మీరా పాత్రలో త్రిష నటన ఈ మూవీకి ప్రధాన బలంగా నిలిచింది. షబ్బీర్ కలరక్కల్, ఆనంద్ పాత్రలో సంతోష్ ప్రతాప్ ఆకట్టుకున్నారు. మిగిలిన వారు వారి పాత్రల మేర నటించి మెప్పించారు.

తెలుగువన్ పర్ స్పెక్టివ్:

సస్పెన్స్ క్రైమ్ థ్రిల్లర్ సినిమాలని ఇష్టపడే వారికి ఈ సినిమా ఒక ఫీస్ట్.

రేటింగ్ : 2.75/ 5

✍🏻. దాసరి మల్లేశ్