English | Telugu
ఎట్టకేలకు ఓటీటీలోకి 'ప్రతినిధి 2'.. 'దేవర' ఎఫెక్ట్ ఉంటుందా..?
Updated : Sep 24, 2024
విభిన్న చిత్రాలతో తనకంటూ ప్రత్యేక గుర్తింపు తెచ్చుకున్న నారా రోహిత్.. ఈ ఏడాది 'ప్రతినిధి 2'తో ప్రేక్షకులను పలకరించాడు. మూర్తి దేవగుప్తపు దర్శకత్వంలో రూపొందిన ఈ పొలిటికల్ థ్రిల్లర్.. మే 10న థియేటర్లలో విడుదలై మంచి స్పందనను సొంతం చేసుకుంది. ఇప్పుడు ఈ సినిమా ఓటీటీలో అలరించడానికి సిద్ధమైంది. (Prathinidhi 2)
'ప్రతినిధి 2' మూవీ డిజిటల్ స్ట్రీమింగ్ రైట్స్ ని ఆహా సొంతం చేసుకుంది. ఈ చిత్రాన్ని సెప్టెంబర్ 27 నుంచి ఓటీటీలో స్ట్రీమింగ్ చేయనున్నట్లు తాజాగా ఆహా ప్రకటించింది. ఇటీవల మెజారిటీ సినిమాలు థియేటర్లలో విడుదలైన నాలుగు వారాలకే ఓటీటీలోకి వస్తుండగా.. 'ప్రతినిధి 2' మాత్రం ఏకంగా నాలుగు నెలలకు ఓటీటీలోకి వస్తుండటం విశేషం. ఇక్కడ మరో విశేషం కూడా ఉంది. నందమూరి హీరో జూనియర్ ఎన్టీఆర్ నటించిన 'దేవర' మూవీ సెప్టెంబర్ 27న థియేటర్లలో అడుగుపెడుతుండగా.. అదేరోజు నారా హీరో మూవీ ఓటీటీలోకి వస్తోంది. (Devara)
వానరా ఎంటర్టైన్మెంట్స్, రానా ఆర్ట్స్ బ్యానర్స్ పై కుమార్ రాజా, ఆంజనేయులు, సురేంద్రనాథ్ నిర్మించిన 'ప్రతినిధి 2'లో నారా రోహిత్, సిరి లెల్లా, సచిన్ ఖేడేకర్, ఉదయ భాను, దినేష్ తేజ్, అజయ్ ఘోష్ తదితరులు నటించారు. మహతి స్వరసాగర్ సంగీతం అందించాడు.