English | Telugu

అమెరికాలో 'పోకిరి', 'జ‌ల్సా' వ‌సూళ్ల‌ను దాటిన‌ 'చెన్న‌కేశ‌వ‌రెడ్డి'

 

నంద‌మూరి బాల‌కృష్ణ టైటిల్ రోల్‌లో న‌టించగా, వి.వి. వినాయ‌క్ ద‌ర్శ‌క‌త్వం వ‌హించిన‌ 'చెన్న‌కేశ‌వ‌రెడ్డి' చిత్రం విడుద‌లై సెప్టెంబ‌ర్ 25కు ఇర‌వై ఏళ్లు నిండుతున్నాయి. ఈ సంద‌ర్భంగా ఆ సినిమాను రిరిలీజ్ చేశారు నిర్మాత బెల్లంకొండ సురేశ్‌. ఈరోజు ప్రీమియ‌ర్స్‌తో ఆ సినిమా రిలీజైంది. కాగా అమెరికాలో స్పెష‌ల్ షోస్‌తో 'చెన్న‌కేశ‌వ‌రెడ్డి' సంచ‌ల‌నం సృష్టించింది. 38 సెంట‌ర్ల‌లో 82 షోస్‌కు 3119 టికెట్లు అమ్ముడ‌వ‌గా, 39,054 డాల‌ర్ల గ్రాస్ వ‌చ్చింది. స్పెష‌ల్ షోస్‌కు సంబంధించిన ఇది రికార్డ్‌.

ఇంత‌కు ముందు స్పెష‌ల్ షోస్ ట్రెండ్‌ను మ‌హేశ్ పుట్టిన‌రోజున‌ 'పోకిరి' మూవీ స్టార్ట్ చేసింది. ఆ సినిమా షోస్‌కు వ‌చ్చిన స్పంద‌న‌తో ప‌వ‌న్ క‌ల్యాణ్ పుట్టిన‌రోజున 'జ‌ల్సా' స్పెష‌ల్ షోలు వేశారు. అది 'పోకిరి'ని మించిన వ‌సూళ్ల‌ను సాధించింది. దాంతో ప‌వ‌న్ ఫ్యాన్స్ త‌మ హీరో సినిమా స్పెష‌ల్ షోస్‌లో రికార్డు సృష్టించిందంటూ సంబ‌రాలు చేసుకున్నారు. సోష‌ల్ మీడియాలో హంగామా చేశారు.

కానీ మూడు వారాలు తిరిగేస‌రిక‌ల్లా అమెరికాలో ఆ రికార్డును 'చెన్న‌కేశ‌వ‌రెడ్డి' చెరిపేశాడు. నిజానికి 20 ఏళ్ల క్రితం విడుద‌లైన‌ప్పుడు 'చెన్న‌కేశ‌వ‌రెడ్డి' బాక్సాఫీస్ ద‌గ్గ‌ర యావ‌రేజ్ క‌లెక్ష‌న్ల‌ను మాత్ర‌మే రాబ‌ట్టింది. 'పోకిరి'లాగా అది ఇండ‌స్ట్రీ హిట్ కాదు, 'జ‌ల్సా' లాగా హిట్టూ కాదు. అయినా కూడా, యు.ఎస్‌.లో స్పెష‌ల్ షోస్ ప‌రంగా అత్య‌ధిక టికెట్లు అమ్ముడైన సినిమాగా, అత్య‌ధిక గ్రాస్ వ‌సూలు చేసిన సినిమాగా సరికొత్త రికార్డులు సృష్టించింది.

బాల‌కృష్ణ డ‌బుల్ రోల్ చేసిన 'చెన్న‌కేశ‌వ‌రెడ్డి' మూవీలో ట‌బు, శ్రియ హీరోయిన్లుగా న‌టించ‌గా, దేవ‌యాని, జయప్రకాశ్ రెడ్డి, చలపతి రావు, ఆహుతి ప్రసాద్, రఘుబాబు, బ్రహ్మానందం, అలీ, ఎల్బీ శ్రీరాం, ఎమ్మెస్ నారాయణ, వేణుమాధవ్ ఇత‌ర కీల‌క పాత్ర‌లు చేశారు. ప‌రుచూరి బ్ర‌ద‌ర్స్ రాసిన‌ సంభాష‌ణ‌లు, మ‌ణిశ‌ర్మ సంగీతం స‌మ‌కూర్చిన పాట‌లు పాపుల‌ర్ అయ్యాయి.