శంకర్ దర్శకత్వం వహించిన ‘ఐ’ సినిమా సంక్రాంతి పండుగకు విడుదల అవుతోందని తెలిసి కూడా పవన్ కళ్యాణ్, వెంకటేష్ నటించిన ‘గోపాల గోపాల’ సినిమా విడుదల చేయడం తెలివి తక్కువ పనే అని దర్శకుడు రామ గోపాల్ వర్మ ట్వీట్ చేసాడు. అంతే కాక ‘ఐ’ సినిమా విడుదలయితే పాపం పీకే (అంటే పవన్ కళ్యాణ్) పనేమవుతుందోనని పవన్ కళ్యాణ్ మీద అతను బోలేడంత జాలి కూడా కురుపించేసాడు. కానీ ఇప్పుడు ఆ రెండు సినిమాల కలెక్షన్లు చూసినట్లయితే తన అభిప్రాయం మార్చుకోక తప్పదు.

రెండు సినిమాలు రెండుర్ రాష్ట్రాలలో కూడా ఇంచుమించు సరిసమానమయిన కలెక్షన్లు వసూలు చేస్తూ దూసుకుపోతున్నాయి. గోపాల గోపాల సినిమా ఆంద్ర, తెలంగాణా రాష్ట్రాలలో కలిపి మొదటి నాలుగు రోజులలో రూ.17.81 కోట్లు వసూలు చేయగా, ఐ సినిమా నెగెటివ్ టాక్ మూటగట్టుకొన్నప్పటికీ మొదటి రోజు ఏడు కోట్ల వరకు వసూలు చేసిందిట. కానీ పండుగ హడావుడితో బాటే ఐ కలెక్షన్లు కూడా తగ్గుముఖం పట్టవచ్చని సినీ పండితులు అంచనా వేస్తున్నారు. ఎందువలన అంటే అద్బుత ప్రతిభ కలిగిన శంకర్ ఐ సినిమాను ఏవిధంగా నిర్మించారో చూద్దామని వెళ్ళినవారే ఎక్కువ తప్ప ఆ సినిమా బాగుంటుందనే ఉద్దేశ్యంతో వెళ్ళేవారు తక్కువే. కానీ పవన్ కళ్యాణ్, వెంకటేష్ కలిసి నటించిన గోపాల గోపాల సినిమాకు మొదటి రోజునుండే మంచి టాక్ రావడమే కాకుండా అచ్చతెలుగు సినిమా కావడం అన్ని వర్గాలను ఆకట్టుకొనే విధంగా మంచి వినోదం అందిస్తుండటం కారణంగా ఆ సినిమాకే తెలుగు ప్రేక్షకులు ఎక్కువ మొగ్గు చూపుతున్నారు. అయితే శంకర్ ఐ సినిమాను ఏ మాత్రం తక్కువ అంచనా వేయడానికీ లేదు. శంకర్ దర్శకత్వ ప్రతిభను చూసేందుకు అయినా అందరూ ఒక్కసారి ఆ సినిమాను చూడటం ఖాయం కనుక ఆ సినిమా గోపాలా గోపాలా సినిమా అంత కాకపోయినా బాగానే కలెక్షన్లు రాబట్టుకోవచ్చును. కాకపోతే తెలుగు ప్రేక్షకులు గోపాలా గోపాలా సినిమాకు మళ్ళీ మళ్ళీ వెళ్ళే అవకాశాలు ఎక్కువ ఉంటాయి గనుక దానితో కలెక్షన్ల విషయంలో ఐ సినిమా పోటీ పడలేదని చెప్పవచ్చును.