English | Telugu
'PVT04' కోసం రంగంలోకి దిగిన జి.వి. ప్రకాష్
Updated : May 11, 2023
పంజా వైష్ణవ్ తేజ్, శ్రీలీల జంటగా నటిస్తున్న చిత్రం 'PVT04'(వర్కింగ్ టైటిల్). వైష్ణవ్ తేజ్ కెరీర్ లో నాలుగో సినిమాగా రూపొందుతోన్న ఈ సినిమాతో శ్రీకాంత్ ఎన్ రెడ్డి దర్శకుడిగా పరిచయం అవుతున్నాడు. సితార ఎంటర్టైన్మెంట్స్, ఫార్చ్యూన్ ఫోర్ సినిమాస్ సంయుక్తంగా నిర్మిస్తున్న ఈ సినిమాలో జోజు జార్జ్, అపర్ణా దాస్ ముఖ్య పాత్రలు పోషిస్తున్నారు.
ఈ యాక్షన్ ఎంటర్టైనర్ పై రోజురోజుకి అంచనాలు పెరిగిపోతున్నాయి. తన తొలి చిత్రం 'ఉప్పెన'తో సంచలన విజయాన్ని అందుకుని, అందరినీ ఆకట్టుకున్న వైష్ణవ్ తేజ్ విభిన్నమైన జోనర్లను ఎంచుకుంటున్నాడు. అన్ని రకాల చిత్రాలలో నటిస్తూ, తనలోని నటుడిని విభిన్న కోణాలలో ప్రదర్శించాలని చూస్తున్నారు. ఇప్పుడు ఆయన ఓ మాస్ యాక్షన్ ఎంటర్టైనర్తో రాబోతున్నాడు. మునుపెన్నడూ చూడని పాత్రలో ఆయన్ను చూడబోతున్నామని సినిమా అనౌన్స్మెంట్ వీడియో స్పష్టం చేసింది. ఇక టీజర్ ఈ సినిమాపై అంచనాలకు రెట్టింపు చేసింది.
ఇప్పుడు ఈ సినిమాని మరోస్థాయికి తీసుకెళ్లడానికి ప్రముఖ సంగీత దర్శకుడు జి.వి. ప్రకాష్ కుమార్ రంగంలోకి దిగుతున్నాడు. ఈ చిత్రానికి జి.వి. ప్రకాష్ సంగీతం అందించబోతున్నట్లు మేకర్స్ తాజాగా అధికారికంగా ప్రకటించారు. ధనుష్ హీరోగా సితార ఎంటర్టైన్మెంట్స్, ఫార్చ్యూన్ ఫోర్ సినిమాస్ సంయుక్తంగా నిర్మించిన 'సార్'తో మ్యూజికల్ బ్లాక్బస్టర్ను అందించారు జి.వి. ప్రకాష్. PVT04 ఆల్బమ్ ఖచ్చితంగా మరో పెద్ద చార్ట్బస్టర్గా అవుతుందని చిత్రం బృందం నమ్మకంగా ఉంది.