మోడ‌ల్‌, న‌టి పూన‌మ్ పాండేను శారీర‌కంగా వేధించిన‌ భ‌ర్త శామ్ బాంబేను న‌వంబ‌ర్ 7న ముంబై పోలీసులు అరెస్ట్ చేశారు. ఎఎన్ఐ వార్తా సంస్థ ప్ర‌కారం, భ‌ర్త‌పై కంప్ల‌యింట్ చేసిన అనంత‌రం పూన‌మ్ హాస్పిట‌ల్‌లో అడ్మిట్ అయ్యింది. "త‌న‌ను కొట్టాడంటూ పూన‌మ్ పాండే కంప్ల‌యింట్ చేయ‌డంతో ముంబైలో నిన్న ఆమె భ‌ర్త శామ్ బాంబేను పోలీసులు అరెస్ట్ చేశారు. పూన‌మ్ ఒక హాస్పిట‌ల్‌లో అడ్మిట్ అయ్యారు." అని ట్వీట్ చేసింది ఏఎన్ఐ.

పూన‌మ్ వైవాహిక జీవితం వార్త‌ల్లోకి ఎక్క‌డం ఇదే ఫ‌స్ట్ టైమ్ కాదు. త‌మ పెళ్ల‌యిన కొద్ది రోజుల‌కే గ‌త ఏడాది సెప్టెంబ‌ర్‌లో గోవాలో ఒక సినిమా షూటింగ్ కోసం ప్రిపేర్ అవుతున్న‌ప్పుడు, భ‌ర్త‌పై గృహ‌హింస చ‌ట్టం కింద పోలీసుల‌కు ఫిర్యాదు చేసిందామె. త‌న భ‌ర్త వేధింపుల‌కు గురిచేశాడ‌నీ, త‌న‌పై కంప్ల‌యింట్ చేస్తే తీవ్ర ప‌రిణామాలు ఎదుర్కోవాల్సి వ‌స్తుంద‌ని బెదిరించాడ‌నీ ఆమె ఆరోపించింది. ఆ ఫిర్యాదుతో గోవా పోలీసులు శామ్‌పై ఐపీసీ సెక్ష‌న్లు 353, 506, 354 కింద కేసు న‌మోదు చేసి, అరెస్ట్ చేశారు.

అయితే ఆ కేసులో శామ్‌కు బెయిల్ వ‌చ్చాక‌, తిరిగి భ‌ర్త‌తో క‌లిసిపోయింది పూన‌మ్‌. "మేం స‌మ‌స్య‌ల‌ను ప‌రిష్క‌రించుకున్నాం. నేను నా వివాహ బంధాన్ని కాపాడుకున్నాను. మీరు ఎవ‌రినైనా ల‌వ్ చేస్తే, అంత త్వ‌ర‌గా వ‌దిలేసుకుంటారా? ప్రాబ్లెమ్స్ వ‌స్తుంటాయ‌ని నేను ఒప్పుకుంటాను, కానీ ఒక చాన్స్ క‌చ్చితంగా ఇవ్వాలి." అని అప్పుడు చెప్పిందామె. ముంబైలోని త‌మ బాంద్రా నివాసంలో నిరాడంబ‌రంగా పెళ్లి చేసుకోవ‌డానికి ముందు.. పూన‌మ్‌, శామ్ రెండేళ్ల పాటు స‌హ‌జీవ‌నం చేశారు.