నిన్న స్వాతంత్ర సమరాన
సాహిత్య సాగరాన శ్రీశ్రీ కలాన
ఉప్పొంగిన అల ! కాదేదీ కవితకనర్హం...

నేడు రాబోయేకాలానికి
కాబోయే రాజకీయ నాయకులు కన్న
రంగుల కల ! కాదేదీ కమీషన్లకనర్హం...

నిన్న పట్టపగలే
ప్రజల్ని దోచుకున్న...గజదొంగలు !
నేడు చట్టసభలకెన్నికైన కొల్లేటి కొంగలు !

నిన్న కూటికిలేక కుమిలిన కుచేలులు !
నేడు కుంభకోణాల్లో ఆరితేరిన కుబేరులు !

నిన్న ఓట్లకోసం బిక్షమెత్తిన శనీశ్వరులు !
నేడు కోట్లకు పడగలెత్తిన కోటీశ్వరులు !

నిన్న ప్రగతి కాముకులు ప్రజాబంధువులు
నేడుప్రజలరక్తంత్రాగే రాజకీయరాబందులు

జానెడు పొట్టకోసం
జాతికి ద్రోహంచేసే ఓ జలగలారా !
నీడనిచ్చే కొమ్మలను నరికే ఓ నీచులారా !
కన్నతల్లి కన్నీటిని త్రాగే కసాయివాళ్లారా !

ఒక్కనిజం తెలుసుకోండి !
ఓటరంటే..."త్రినేత్రుడని"...
కళ్ళు తెరిచి కరుణిస్తే మీరు
రివ్వున ఎగిరే తారాజువ్వలౌతారని...
కానీ...ఓర్పు నశించిన ఆ ఓటరే
నిగ్రహం కోల్పోతే...ఉగ్రరూపం దాలిస్తే...
రెప్పపాటున మీరు కుప్పకూలిపోతారని...