అన్నా..! ఓ ఓటరన్నా..!
నీ చేతిలో ఉన్నది ఓటు...
కాదు...అది వజ్రవైడూర్యాలకన్నా
కోహినూర్ వజ్రం కన్నా విలువైనది

అన్నా..! ఓ ఓటరన్నా..!
నీ చేతిలో ఉన్నది ఓటు...
కాదు...అది ఒక వజ్రాయుధం...
అది అత్యంత శక్తివంతమైనది...

అన్నా..! ఓ ఓటరన్నా..!
నీ చేతిలో ఉన్నది ఓటు...
కాదు...అది అంబేద్కర్
నీకందించిన...ఒక గండ్రగొడ్డలి...
నేతల తలల్ని తలరాతల్ని మార్చవచ్చు

అన్నా..! ఓ ఓటరన్నా..!
నీ చేతిలో ఉన్నది ఓటు...
కాదు...అది ఒక మంత్రదండం...
బ్రహ్మ రహస్యంగా వ్రాసిన
రాజకీయ నాయకుల జాతకాలను
ఒక్కరాత్రిలో తారుమారు చేయవచ్చు

కానీ అన్నా..! ఓ ఓటరన్నా..!
పచ్చని నోటు...నీ నీతినిజాయితీని
"కాటు వేసే కాలసర్పం"...కారాదు.
ఏ మందుకో ఏ మటన్ బిర్యానీకో
ఆశపడి ఓటును...అమ్ముకోకు...
ప్రశ్నించే హక్కును...కోల్పోకు...
బానిసవై ఐదేళ్లు ....బ్రతకబోకు...

అన్నా..! ఓ ఓటరన్నా..!
నీకు నచ్చిన వారికే
"అధికార పీఠం"... దక్కాలి
రామరాజ్యం...రావాలి 
ప్రజాస్వామ్యం...వర్ధిల్లాలి
నీ సమస్యలు పరిష్కారం కావాలి

అందుకే అన్నా..! ఓ ఓటరన్నా..!
విజ్ఞత ప్రదర్శించు...ప్రజాసేవకే
ప్రాణాలర్పించే ప్రజానాయకుల్ని ఎన్నుకో
నీవు ఓడరాదు..! నీ ఓటు ఓడిపోరాదు..!