పెరుగుతున్న భూతాపానికి పొంచివున్న

 ప్రమాదానికి అంతమెప్పుడని? చింతిస్తూ

నింగిలోకి తొంగిచూసే అన్నదాతలనడిగా
పంచభూతాల ఆగ్రహానికి కారణమెవరని?
కరగని కురవని ఆ నీలిమేఘాలేననె...

కరగని కురవని ఆ నీలిమేఘాలనడిగా...
మీరెప్పుడు చిరుజల్లులుగా మరేదని..?
తమను తాకని ఆ చల్లగాలినడగమనె...

మేఘాల తనువును తాకని చల్లగాలినడిగ
మబ్బులతో ఎందుకు మీకు విరోధమని..?
స్వార్థంతో వాతావరణాన్ని కలుషితం
చేసే మాయదారి మనుషులనడగమనె...

మాయదారి మనుషులనడిగా...
ఈ విషపూరిత శబ్ద జల వాయు భూ
వాతావరణ కాలుష్యానికి కారణమెవరని?
చేసిన శాసనాలను అమలుచేయని
ఆ అసమర్థ ప్రభుత్వాన్ని అడగమనె...

అసమర్ద ప్రభుత్వాన్ని ఘాటుగా ప్రశ్నించా
కాలుష్య నివారణ...పర్యావరణ పరిరక్షణ

బాధ్యతెవరిదని? ప్లాస్టిక్ ను విరివిగావాడే
పచ్చనిచెట్లను నరికే ఈ మట్టిమనిషిదేననె