ఈ పుడమి పై పుట్టి గిట్టిన అతి భయంకరమైన

అతి ప్రమాదకరమైన, అతి బాధాకరమైన, 

అతి కౄరమైన అన్ని క్రిములలో కన్నా

కంటికి కనిపించని ఈ కరోనా విషక్రిమియే వేరయా

మంచాన పడిన ప్రపంచాన, విషం చిమ్ముతూ

వాయువేగంగా విస్తరిస్తూ, వేలకొలది ప్రాణాలను

కబలించి వేస్తూ, కడచూపైనా దక్కనివ్వక

పుట్టెడు దుఃఖాన్ని గుండెళ్ళో కుమ్మరించే

అన్ని క్రిములన్న ఈ కరోనా విషక్రిమియే వేరయా

పున్నమి వెన్నెలను కాళరాత్రిగా,మార్చివేసి

చిరునవ్వులను చీకటి కాన్వాసుల మీద

చితిమంటలుగా చిత్రించే, బ్రతుకులు చిధ్రంచేసే

అన్ని క్రిములకన్నా ఈ కరోనా విషక్రిమియే వేరయా

రక్తసంబంధాల నెన్నింటినో రాత్రికిరాత్రే

రద్దుచేస్తూ ప్రపంచపటం మీద పాములా ప్రాకి

ప్రజల ప్రాణాలను పాయసంలా త్రాగేసే

అన్ని విషక్రిములకన్నాఈ కరోనా విషక్రిమియే వేరయా

సెల్ఫ్ ఐషోలేషన్, రక్షణ కవచాన్ని ధరించి

స్వీయనియంత్రణ, వ్యక్తిగత శుభ్రత,మాస్కులు, 

సమదూరంలాంటి రామబాణాలను సంధించడానికి,

ఈ కరోనా విషక్రిమిని బంధించడానికి

దాని భరతం పట్టడానికి,బొంద పెట్టడానికి

గరుడపురాణంలోని వింత శిక్షలన్నీ విధించడానికి

అన్నిదేశాల కన్నా ముందున్నది భరతఖండమేనయా

ఈ కరోనా విషక్రిమి విరుగుడుకై,ఏడుకొండలెక్కడానికి

కోటి కొబ్బరికాయలు కొట్టడానికి,ఆ కోనేటి రాయుడికి

మొక్కులు తీర్చుకోవడానికి, అన్ని ప్రపంచదేశాల 

ప్రజలకన్నా ముందున్నది మన భారతీయులేనయా