ఏలనోయ్ ఏలనోయ్ అన్నీ

శాశ్వతమని తలచేవు

నాది నాది అనుకున్నది

ఏదీ నీదికాదన్న

నిజం తెలిసినా

అంతులేని ధనాన్ని

ఎలరా ఆర్జించేవు?

నీవు అనుభవించక

ఆకలికి అలమటిస్తూ

అస్థిపంజరాలై నీచుట్టే

నీ కళ్ళముందరే తిరిగే

ఆ అభాగ్యులకింత పంచక

కన్నుమూసిన మరుక్షణమే

నీ ప్రయాణం పరలోకానికేగదరా

నీ కష్టార్జితం పరులపాలే గదరా

ఈ భూమిపైన

ఈ భోగభాగ్యాలు

ఈ సిరి సంపదలు

ఈ కళ్ళు తిరిగే ఖరీదైన విల్లాలు

ఈ బ్రాండెడ్ బట్టలు

ఈ బంగారు ఆభరణాలు

ఈ విలాసవంతమైన జీవితాలు

ఈ కోట్ల వ్యాపారాలు

వాటితాలూకు,

ఆ ఆనందం ఆ అహంకారం

నీ బొందిలో ప్రాణమున్నంత వరకేరా

అన్నీ అశాశ్వితమేరా

కలలో కనిపించిన‌ కోట్లు

కళ్ళు తెరవగానే

కరిగిపోయినట్టురా

మేలు కొన్నమరుక్షణమే

మాయమైపోయినట్టురా

నీటిమీద బుడగలు

నిముషమే నిలుచినట్టురా