గతంలో
లక్ష సార్లు సుత్తి దెబ్బల్ని
కోటి టన్నుల ఒత్తిడిని
ఒక్కడే ఒంటరిగా భరించి
వేలమంది బెదిరించే శతృవుల్ని
ఎదిరించి పోరాడి గెలిచి
కొత్త కాఫీ సామ్రాజ్యాన్ని స్థాపించి
కోట్లకు పడగలెత్తిన
ఆ కార్పోరేట్ కేఫ్ కాఫీ కింగ్
నేత్రావతీ నదిలో దూకి
ఆత్మహత్య చేసుకునే ముందు
ఒక్కసారి ఒక్కక్షణం ఆలోచిస్తే ఎంత బావుండేది ?
జరిగిన తప్పులకు అప్పులకు
తననొక్కడినే బాధ్యున్ని చేసుకుని
గుండెల్లోఅగ్ని పర్వతాలను దాచుకొన్న
ఆ అమృతామూర్తి ఆ మానవతావాది
ఆ కార్పోరేట్ కేఫ్ కాఫీ కింగ్
నేత్రావతీ నదిలో దూకి
ఆత్మహత్య చేసుకునే ముందు
ఒక్కసారి ఒక్కక్షణం ఆలోచిస్తే ఎంత బావుండేది?
ఊరించే విధంగా
మతిపోయేలా మత్తెక్కించేలా
వేలకొద్దీ కొత్త కేఫ్ కాఫీ డేలను స్థాపించి
ఎందరో అభాగ్యులకు జీవనోపాధి కల్పించి
ఊహలకందని రీతిలో
ఎవరెస్ట్ శిఖరమంత ఎత్తుకు ఎదిగిన
ప్రపంచ ప్రసిద్ధి చెందిన
ఆ కార్పోరేట్ కేఫ్ కాఫీ కింగ్
నేత్రావతీ నదిలో దూకి
ఆత్మహత్య చేసుకునే ముందు
ఒక్కసారి ఒక్కక్షణం ఆలోచిస్తే ఎంత బావుండేది?
వేల కేఫ్ కాఫీ డేలను
చూడగానే ఆకట్టుకునేలా
తిలకించగానే పులకించిపోయేలా,
అడుగు పెట్టగానె ఆశ్చర్యచకితులయ్యేలా
కాఫీ త్రాగగానే తన్మయత్వం చెందేలా
అందమైన ఆహ్లాదకరమైన వాతావరణంలో
ఒత్తిడికి గురయ్యే ప్రతిఒక్కరిలో
కొండంత ఉల్లాసాన్ని ఉత్సాహాన్ని నింపి పంపే
ఆ కార్పోరేట్ కేఫ్ కాఫీ కింగ్
నేత్రావతీ నదిలో దూకేముందు
ఒక్కసారి ఒక్కక్షణం ఆలోచిస్తే ఎంత బావుండేది?
చచ్చి తాను సాధించేదేమిటి?
ఆవేశంతో ఆత్మహత్య చేసుకునే
యువతకు తానిచ్చే సందేశమేమిటీ? అని
సమస్యల ఇనుపసంకెళ్ళలో బందింపబడినా
ఎన్ని అవాంతరాలు వచ్చినా అడ్డంకులు ఎదురైనా
భయపడక జీవితంలో పోరాడి గెలిచినవారే వీరులు
పారిపోయిన వారంతా పిరికిపందలే చరిత్రహీనులే
 |